1 ታን ኔና ጾሳ ስንꬃንነ፥ ደኡዋን ደእያ አሳነ ሀይቄዳ አሳ ፕርዳናዉ ደእያ ክርስቶስ የሱሳ ስንꬃን፥ ቃይ አ ዩሳንነ አ ካዉተꬃን ኔና ዞራይ። 2 ቃላ ኦዳ። ዎዲ እንጀትና እንጀታና ꬋይና፥ ምናደ ኦዳ። ዳሮ ዳንዳያን አሳ ታማርሳደ ሱርሳ፥ ሴራነ ዞራ። 3 አያዉ ጎፐ፥ አሳይ ቱሙ ትምርትያ ስሰናን እጽያ ዎዲ ያናዋ። ሽን አሳይ ባረንቱ አሙዋ ካሊደ፥ ስሳናዉ ናሸችያዋ ኦድያ ታማርስያዋንታ ጉጅ ጉጅ ሺሻና። 4 ኡንቱንቱ ቱሙ የዉዋ ስስያዋ አጊደ፥ ቶሳ ስሳናዉ ባረንቱ ሀይꬃ ዎራ ዛራና። 5 ሽን ኔን ኡባባን ነ ሁጲያ ናጋናዉ በሴ። ዋይያ ዳንዳያ። ዎንጋላ ምሽራቹዋ ኦድያዌ ኦꬅያ ኦሱዋ ኦꬃ። ጾሳ ቆማዳን፥ ነ ኦꬅያ ኦሱዋ ኡባ ፖላ።

6 ታና ግዶፐ፥ ታ ሱꬃይ ጉኪደ ያርሸትያ ዎዲነ ቃይ ሀ ደኡዋ አጋደ ብያ ዎዲ ጋኬዳ። 7 ታን ሎኦ ባጽያ ባጸታድ፤ ዎꬃ ዎጻደ ዉርሳድ፤ አማኑዋካ ናጋድ። 8 ስንꬃፐ ታዉ ጽሎተꬃ ካላቻይ ጊግ ኡቴዳ። ሄዋ ጽሎ ፕርዳ ፕርድያ ጎዳይ ሄ ጋላስ ታዉ እማና። ቃይ ክርስቶስ ቆንጫናዋ ዶስያ ኡባ ሳፐ አትን፥ ታ ጻላላሳ ግደና።

9 ታኮ ኤለካ ያናዉ ምና። 10 አያዉ ጎፐ፥ ዴማስ ሀ አላምያ ዶሲደ፥ ታና አጊደ፥ ተሰሎንቀ ግያ ካታማ ቤዳ። ቀርቂስ ጋላትያ ግያ ጋድያ ቢና፥ ቃይ ቲቶ ድልማጽያ ግያ ጋድያ ቤዳ። 11 ሉቃሳ ጻላላይ ታናና ደኤ። ማርቆስ ታና ኪታን ሎይꬅ ማዳናዉ ዳንዳይያ ድራዉ፥ አ ደማደ ኔናና አካደ ያ። 12 ሽን ታን ትክቆሳ ኤፈሶና ግያ ካታማ ኪታድ። 13 ኔን ያደ፥ ጽሮኣዳ ግያ ካታማን ካርፖሳዋን ታን የጋደ ዬዳ ታ ጋብያነ ቃይ ማጻፋቱዋ ታዉ አካደ ያ። ሽን ዱማያደ ጋልባን ጻፈቴዳ ማጻፋቱዋ አያ ግዶፐነ፥ አከናን ዮፓ።

14 ብራታ ቆጽያ እስክንድር ታና ዳሮ ቆሄዳ፤ ጎዳይ አዉ አ ኦሱዋዳን ዛራና። 15 እ ኑን ኦድያዋ ሎይꬅ ጳልቂያ ድራዉ፥ ኔን አፐ ኔና ናጋ።

16 ኮይሮ ታና ሞትያ ዎደ፥ ኡባይካ አጌዳዋፐ አትን፥ ታና ኦንነ ማድቤና። ጾሳይ ሄዋ ኡንቱንቶ ፓይዶፖ። 17 ሽን ታን ኩመንꬃ ኪታ አይሁዳ ግደና አሳይ ኡባይ ስሳናዉ ኦዳና ማላ፥ ጎዳይ ታ ማታን ኤቂደ፥ ታዉ ዎልቃ እሜዳ። ቃይ ጋሙዋ ዶናፐካ ታና አሼዳ። 18 ጎዳይ ታና ኢታባ ኡባፐ አሺደ፥ ባረ ሳሉዋ ካዉተꬃ ሳሮተꬃን አፋና፤ አዉ መꬍ መꬍናዉ ቦንቹ ግዶ። አመንእ።

19 ጵርስቂልዉ፥ አቂላስነ ሄነስፎሩ ሶይ አሳዉ ታ ሳሮታ ኦዳ። 20 ኤራስጾስ ቆሮንቶሳ ግያ ካታማን አቴዳ። ሽን ጽሮፊሞስ ሳከቴዳ ድራዉ፥ ምሊጸ ግያ ካታማን አ ዎꬃድ። 21 ባልጉ ዎꬋናፐ ካሰ ያናዉ ምና።

ኤዉቡሉስ፥ ጱዴስ፥ ሊኖስነ ቅላዉደ ቃይ ሀራ እሻቱ ኡባይካ ኔና ሳሮ ሳሮ ጊኖ።

22 ጎዳይ ነ አያናና ግዶ። አꬎ ኬካተꬃይ ህንተናና ኡባና ግዶ። አመንእ።