1 የሱስ ክርስቶስ ኪቴዳ ታን ጳዉሎስ፥ ጾሳ አይል፥ ሀ ዳብዳቢያ ጻፋይ። ጾሳይ ዶሬዳ አሳዉ አማኑ ደአናዳንነ ጾሳ ቱማተꬃ ኤራኮ ኡንቱንታ ካለꬃናዳን ታን ዶረታደ ኪተታድ። 2 ዎርዶተና ጾሳይ ኑዉ ሀ መꬍና ደኡዋ ዳሮ ዎድያፐ ካሰ እማና ጌዳ። 3 ጾሳይ ኑና አሽያዌ ልከ ዎድያን ባረ ቃላን ሀዋ ቆንጭሴዳ፤ እ ሀዳሪደ ታና አዛዜዳዋዳን፥ ታን አ ቃላ ኦዳይ።

4 አማኑዋ እትፐተꬃን ታ ቱሙ ናኣ ነዉ ቲቶ፥ ጾሳ አዉዋፐነ ኑና አሽያ የሱስ ክርስቶሳፐ፥ አꬎ ኬካተꬃይ፥ ማሮተꬃይነ ሳሮተꬃይ ግዶ።

5 ታን ኔና ቃርጼሳን አጋደ ዬዳዌ፥ ኔን አቶዋ ጊግሳናሳነ፥ ታን አዛዜዳዋዳን፥ ካታማ ኡባን ዎሳ ጎልያ ጭማቱዋ ዶራናሳ። 6 ጭማይ ቦረተናዋነ እት ማቻት ጻላላይ ደእያዋነ አማንያ ናናይ ደእያዋ ግዳናዉ በሴ፤ አ ናናይ ሻሉዋ ባይዝያባንነ ዎይ አዛዘተናን እጽያባን አሳይ አማሳለናዋንታ ግዳናዉ በሴ። 1 ጽሞ. 3:2-7 7 አያዉ ጎፐ፥ ሄ ጭማይ ጾሳ ኦሱዋ አዛዝያ ካፑዋ ግዲደ፥ ፖክሰናዋ፥ ኦቶረተናዋነ ኤለ ሀንቀተናዋ ግዳናዉ በሴ፤ ቃይ ማꬆተናዋ፥ ሱገናዋነ ዮራተናዋ ግዳናዉ በሴ። 8 ሽን እማꬃ ሞክያዋነ ሎኦባ ዶስያዋ ግዳናዉ በሴ፤ ቃይ አኬካንቻ፥ ጽሉዋ፥ ጌሻነ ባረና ናግያዋ ግዳናዉ በሴ። 9 አማነትያ ደኡ ቤትያ ትምርትያና ጊግያ ቃላ እ ሎይꬅ ኦይቆ። ያቶፐ ሀራቱዋ ቱሙ አማኑዋ ታማርስያዋን መንꬃናዉነ ቃይ ሄዋ እጽያዋንታካ ዞራናዉ ዳንዳያናዋ።

10 አያዉ ጎፐ፥ አዛዘተናዋንቱ፥ ማደናዋ ሃሳይያዋንቱ፥ ሀራቱዋ ጭምያዋንቱነ ቃጻረቴዳ አይሁዳ አማንያዋንቱ ባጋ ግዴዳ ዳሮ አሳቱ ደኢኖ። 11 ኡንቱንቱ ታማርሳናዉ በሰና ፖክያ ኦግያን ሚሻ ደማናዉ ታማርስያዋን ጎልያ ኡባ ባይዝያ ድራዉ፥ ኡንቱንቱ ሃሳያ ተአና በሴ። 12 ኡንቱንቱ ግዶፐ እቱ፥ ትምቢትያ ኦድያዌ ኡንቱንቶ፥ “ቃርጼሰ አሳይ ኡባ ዎደ፥ ዎርዳቱዋ፥ ኢታ ዱአቱዋነ ዮራንቻ፤ ቃይ አዛላ አሳ” ያጌዳ። 13-14 እ ማርካቶዌ ቱማ፤ ሄዋ ድራዉ፥ ኔን ኡንቱንቶ ምኖ አማኑ ደአናዳንነ ቃይ አይሁዳቱዋ ቶሳነ ቱሙዋ እጼዳ አሳቱዋ አዛዙዋ ኡንቱንቱ ስሰናዳን፥ ኡንቱንታ ምንሳደ ሴራናዉ በሴ። 15 ባረንቱ ሁጰዉ ጌሻ ግዴዳዋንቶ ኡባባይካ ጌሻ፤ ሽን ቱናቶነ አማነናዋንቶ ኡንቱንቱ ዎዛና ቆፋይነ ኡንቱንታ ሱረ ዎዛናይ ቱኔዳ ድራዉ፥ ኡንቱንቶ አያይነ ጌሻ ግደና። 16 ኡንቱንቱ ባረንቱ ጾሳ ኤርያዋ ቆንጭያን ኦዲኖ፤ ሽን ኡንቱንቱ ሸነይያዋንታ፥ አዛዘተናዋንታነ ኦሱዋ ኡባዉካ ጊገናዋንታ ግድያ ድራዉ፥ ባረንቱ ኪታን አ ኤሮኮ ጊኖ።