1 እት ሀናንያ ጌተትያ ብታኒ ባረ ማቻት ሳጲርና ጋድያ ዛልኤዳ። 2 ሄ ዛልኤዳ ሚሻፐ ባረ ማቻታ ኤርሽን አሺደ፥ አቶዋ የሱስ ኪቴዳዋንቶ እሜዳ።

3 ሽን ጰጽሮስ ሀናንያ፥ “ኔን ጌሻ አያና ጭማደ ነ ጋድያ ዛልኤዳ ሚሻፐ ሻካ አሻና ማላ፥ ጻላሂ ነ ዎዛናን አያዉ ገሌዴ? 4 ኔን ዛልአናፐ ካሰ ጋዲ ነዋ ግደኔ? ቃይ ኔን ዛልአ ስምናካ ሚሻይ ኔሳ ግደኔ? ያትና፥ ሀዋ ማላባ ኦꬃናዉ አያዉ ነ ዎዛናን ቆፓዲ? ኔን ጾሳዉ ዎርዶቶዋፐ አትን፥ አሳዉ ዎርዶታበይካ” ያጌዳ።

5 ሀናኒ ሄ ቃላ ስሴዳ ኤለካ ኩንዲደ ሀይቂ አጌዳ፤ ሄዋ ስሴዳ ኡባይ ዳሮ ያዬዳ። 6 ዎዳላ አሳቱ ሶይ ገሊደ፥ አ አሃ ጻጺደ፥ ካረዉ ከስ አ ሞጌድኖ።

7 ሄዙ ሳተ ግዶዋፐ ጉይያን፥ ሀናንያ ማቻታ ሄዋ ኤረናን ደኣደ ገላዱ። 8 ጰጽሮስ እዞ፥ “ህንተንቱ ጋድያ ሀን ኬና ሚሻን ዛልኤድቴ? አነ ታዉ ኦዳ” ያጌዳ።

እዛ፥ “ኤ ሀን ኬና ሚሻን ዛልኤዶ” ያጋዱ።

9 ጰጽሮስ ምሽራቶ፥ “ኔንነ ነ አስናይ ጎዳ አያና ፓጫናዉ አያዉ ዞረቴድቴ? በአ፤ ነ አስና ሞጌዳ አሳቱ ካረን ደኢኖ፤ ነ አሃካ ኡንቱንቱ ካረ ከሳና” ያጌዳ።

10 ምሽራታ ሄ ማንእያን ጰጽሮሳ ገድያ ማታን ኩንዳደ ሀይቃ አጋዱ፤ ዎዳላ አሳቱ ገልያ ዎደ ሀይቄዳዉኖ ደሚደ፥ ካረ ከሴዳዋፐ ጉየ፥ እዝ አስና ዱፉዋ ማታን ሞጌድኖ። 11 አማንያ አሳ ኡባይነ ሄዋ ስሴዳ ሀራ አሳይ ኡባይ ዳሪ ያዬዳ።

12 የሱስ ኪቴዳዋንቱ ዳሮ ማላታነ ኦራꬃባ አሳ ግዶን ኦꬂኖ፤ አማንያ ኡባቱ ሶሎሞነ ባራንዳን እትፐ ሺቂኖ። 13 ሀራ አሳፐ ኡንቱንቱና ጋከታናዉ ሀራይ አቶ እቱነ ጻልቤና፤ ሽን አሳይ ኡንቱንታ ቦንቼ። 14 አማንያ አቱማ አሳይነ ማጫ አሳይ ካሰዋፐ ጮራይ ጎዳዉ ጉጀቴ። 15 ሄዋ ድራዉ፥ አሳይ ሀርጋንቻቱዋ ሻንቻማንነ ሳሌናን ቀር ቶኪደ፥ ጰጽሮስ ሄዋና አꬍያ ዎደ ሀራይ አቶ፥ አዉ ኩዌንቶነ ኡንቱንቱፐ እቱዋ እቱዋ ቦላና አꬋና ማላ፥ ካታማ ኦግያ ዶና ከሲደ ዎꬄ። 16 ቃይ ጮራ አሳይ የሩሳላመ ማታን ደእያ ካታማቱዋፐ ሀርጋንቻቱዋነ ኢታ አያናን ኦይቀቴዳ አሳቱዋ አክ ዬድኖ፤ ኡባቱካ ፓጼድኖ።

17 ሄዋፐ ስምና ቄሳቱዋ ካፑነ አናና ደእያ ሳዱቃዋናቱ ኡባቱ የሱስ ኪቴዳዋንታ ዳሮ ቃናቲደ፥ ኡንቱንቱ ቦላ ደንዴድኖ። 18 ቃይ የሱስ ኪቴዳዋንታ ኦይቂደ፥ ኡባ አሳ ቃችያ ጎልያን የጌድኖ። 19 ሽን ጎዳ ኪታንቻይ ቃማ ቃሾ ጎለ ፐንግያ ዶዪደ፥ የሱስ ኪቴዳዋንታ ካረ ከሲደ፥ 20 “ህንተንቱ ቢደ፥ ጌሻ ጎልያን ኤቂደ፥ ሀ ኦራꬃ ደኡዋ ቃላ ኡባ አሳዉ ኦድተ” ያጌዳ። 21 የሱስ ኪቴዳዋንቱ ሄዋ ስሴዳ ዎደ፥ ዎንቱማꬃን ጌሻ ጎልያ ገሊደ፥ ታማርሳናዉ ዶሜድኖ።

ቃይ ቄሳቱዋ ካፑነ አናና ደእያዋንቱ ዪደ፥ ሺቄዳ አሳና እስራኤልያ ጭማቱዋ ኡባቱዋ እትፐ ጼሲደ፥ የሱስ ኪቴዳዋንታ ባረንቱ ስንꬃ አሀና ማላ፥ ዎታዳራቱዋ ቃሾ ጎለ ኪቴድኖ። 22-23 ሽን ዎታዳራቱ ቃሾ ጎለ ቢደ፥ የሱስ ኪቴዳዋንታ ደምበይክኖ፤ ጉየ ስሚደ ሺቄዳ አሳዉ፥ “ኑን ብያ ዎደ ቃሾ ጎለ ካርያ ዳሮ ምንስ ቃችና፥ ናግያዋንቱካ ፐንግያን ኤቄዳዋንታ ደሜዶ፤ ሽን ኑን ቃሾ ጎልያ ዶይያ ዎደ፥ ጎለ ጋርሳን ሀራይ አቶ እት አሳይነ ባዋ” ያጌድኖ። 24 ጌሻ ጎልያ ዎታዳራቱዋ ኪትያዌነ ቄሳቱዋ ካፓቱ ሄዋ ስሴዳ ዎደ፥ “ሀዌ ዋኑዋሻ? ቃይ ግድን አዬ ሀናንዴሻ?” ያጊደ ህርጌድኖ።

25 ሄዋፐ ጉይያን፥ እት ብታኒ ኡንቱንቱኮ ዪደ፥ “በእተ፤ ቃሾ ጎልያን ህንተ ቃቼዳ አሳቱ ጌሻ ጎልያን ኤቂደ፥ አሳ ታማርሲኖ” ያጊደ ኡንቱንቶ ኦዴዳ። 26 ጌሻ ጎልያ ዎታዳራቱዋ አዛዝያዌ ዎታዳራቱዋና ቢደ፥ የሱስ ኪቴዳዋንታ አሄዳ፤ ሽን ኡንቱንቱ ባረንታ አሳይ ሹቻን ጫዳናዋንታ ጊደ ያዬዳ ድራዉ፥ ኡንቱንታ ሎዳን አሄድኖ።

27 ኡንቱንቱ የሱስ ኪቴዳዋንታ አሂደ፥ ሄዋ ሺቄዳ ሻንጉዋ ስንꬃን ኤስና፥ ቄሳቱዋ ካፑ ኡንቱንታ፥ 28 “ህንተንታ ኑን ሄ ብታንያ ሱንꬃን ታማርሰና ማላ ምንሲደ አዛዝበይኮ? በእተ፤ ህንተ ትምርትያ የሩሳላመ ካታማ ኡባ ጋꬄድታ፤ ቃይ ሄ ብታንያ ሸምፑዋን ኑና ኦይꬃናዉ ቆፒታ!” ያጊደ ኦቼዳ።

29 ጰጽሮስነ የሱስ ኪቴዳ ሀራንቱ ዛሪደ ያጌድኖ፤ “ኑን አሳዉ አዛዘታናፐ ጾሳዉ አዛዘታናዉ በሴ። 30 ማስቃልያ ቦላ ምስማርያን ꬍሽ ካቂደ፥ ህንተ ዎꬌዳ የሱሳ ኑ አዎቱዋ ጾሳይ ሀይቁዋፐ ደንꬄዳ፤ 31 እስራኤላቶ ናጋራፐ ስማነ ናጋራ አቶ ጉሳ የሱስ እማና ማላ፥ ጾሳይ ሞድያዋነ አሽያዋ አ ኦꬂደ፥ ባረፐ ኡሸቻ ባጋን ꬎቁ ꬎቁ ኦꬄዳ። 32 ሄዎ ኑን ማርካ፤ ቃይ ጾሳይ ባረዉ አዛዘትያዋንቶ እሜዳ ጌሻ አያናይካ ማርካ” ያጌድኖ።

33 ሺቄዳ አሳይ ሄዋ ስሴዳ ዎደ፥ ዳሮ ይሎቲደ፥ የሱስ ኪቴዳዋንታ ዎꬋናዉ ቆፔድኖ። 34 ሽን አሳ ኡባን ዳሮ ቦንቼቴዳ ጋማልያላ ጌተትያ፥ ህግያ ታማርስያ እት ፓርሳዊ፥ ሺቁዋን ደንድ ኤቂደ፥ የሱስ ኪቴዳዋንቱ ጉꬃ ዎድያ ካረ ከሳና ማላ 35 አዛዚደ ሄዋን ሺቄዳ አሳ ሀዋዳን ያጌዳ፤ “እስራኤልያ አሳቶ፥ ህንተ ሀ አሳቱዋ ኦꬃና ቆፕያዋን ህንተንታ ናግተ። 36 አያዉ ጎፐ፥ ሀዋፐ ካሰ ዎድያን ተዎዳሳ ጌተትያዌ ባረና ዎልቃማ ጊደ ደንዴዳ፤ ደንድና ኦይዱ ጼቱ ግድያ አሳቱ አናና ጋከቴድኖ፤ ሽን አ ዎꬍና፥ አ ካሌዳ ኡባቱካ ላለቲደ፥ ማደና አሳ ግዲደ አቴድኖ። 37 ሄዋፐ ጉይያን፥ አሳይ ፓይደትያ ዎደ፥ ጋሊላ ይሁዳይ ደንዲደ፥ ዳሮ አሳ ፓኑዋ ኦꬂደ ካለꬄዳ፤ ሽን አካ ዎꬍና፥ አ ካሌዳ አሳይ ኡባይ ላለቴዳ።

38 “ሀእካ ታን ህንተንቶ ኦዳይ፤ ሀ አሳቱዋፐ ሻከትተ፤ ኡንቱንታ ቦቾፕተ። አያዉ ጎፐ፥ ሀ ቆፋይነ ሀ ኦሱ አሳይ ኦꬄዳዋ ግዶፐ ꬋያና። 39 ሽን ሀ ቆፋይነ ሀ ኦሱ ጾሳፐ ዬዳዋ ግዶፐ፥ ህንተ ኡንቱንታ ꬋይሳናዉ ዳንዳይክታ፤ ኦን ኤር ሀዋ ሀኒደ ጾሳና ህንተ ኢተተናዳን” ያጌዳ።

40 ሄዋፐ ጉየ ሺቄዳ አሳይ ጋማልያላ ዞርያ አኪደ፥ የሱስ ኪቴዳዋንታ ጼሲደ፥ ልሱዋን ሾጭሴድኖ፤ ሄዋፐ ጉይያን ኡንቱንታ፥ “የሱሳ ሱንꬃ ላኤንꬁዋ ኡባካ ደንꬆፕተ” ግ ብሊደ የዴድኖ። 41 የሱሳ ሱንꬃ ድራዉ፥ ኡንቱንቱ ኡጋቲደ ዬላታናዉ በስያባ ቆፔዳ ድራዉ፥ ሻንጉዋ ስንꬃፐ ናሸቲደ ከሴድኖ። 42 ኡንቱንቱ ኡባ ጋላስ ጌሻ ጎልያንነ አሳ ሶይን የሱስ፥ ክርስቶሳ ግዴዳዋ ታማርስያዋነ ኦድያዋ ያ ጉጄድኖ።