1 ጰጽሮስነ ዮሃንስ አሳዉ ኦድሽን፥ ቄሳቱዋ ካፓቱ፥ ጌሻ ጎልያ ዎታዳራቱዋ አዛዝያዌነ ሳዱቃዋናቱ፥ 2 ኡንቱንቱ አሳ ታማርስያ ድራዉነ ሀራ አሳቱ ሀይቁዋፐ ደንዳናዎ ማርካ ግዳና ማላ፥ የሱስ ሀይቁዋፐ ደንዴዳዋ ኦዴዳ ድራዉ፥ ዳሪ ይሎቲደ፥ ኡንቱንቱኮ ዬድኖ። 3 ኡንቱንታ ኦይቂደ፥ ሳአይ ኦማርስድጎ ድራዉ ዎንታናዉ ቃሾ ጎለ ገልሴድኖ። 4 ሽን ቃላ ስሴዳዋንቱፐ ጮራቱ አማኔድኖ፤ አቱማ አሳ ፓይዱ እቼሹ ሻአ ኬና ግዴዳ።

5-6 ዎንተꬃ ጋላስ፥ ኡንቱንታ ሞድያዋንቱ፥ አይሁዳ አሳ ጭማቱ፥ ሙሴ ህግያ ታማርስያዋንቱ፥ ቄሳቱዋ ኡባቱዋ ካፓቱ ሃን፥ ቃያፍ፥ ዮሃንስ እስክንድርነ ቄሳቱዋ ኡባቱዋ ካፓቱዋ ዳባቱ ኡባይ የሩሳላመን ሺቄድኖ። 7 የሱስ ኪቴዳዋንታ ባረንቱ ግዱዋን ኤሲደ፥ “አያ ዎልቃን ዎይ ኦ ሱንꬃን ሀዋ ህንተንቱ ኦꬄድቴ?” ያጊደ ኦቼድኖ።

8 ሄ ዎደ ጰጽሮስ ባረናን ጌሻ አያናይ ኩምና፥ ኡንቱንታ ሀዋዳን ያጌዳ፤ “አሳ ካለꬅያዋንቶ፥ አይሁዳ አሳ ጭማቶ፥ 9 ሀቼ ሀ ሀርጋንቻ ብታንያዉ ኦሰቴዳ ሎኦ ኦሱዋባነ እ ዋን ፓጼደንቶ፥ ህንተንቱ ኑና ኦቾፐ፥ 10 ማስቃልያ ቦላ ምስማርያን ህንተንቱ ꬍሺደ ካቂና፥ ጾሳይ ሀይቁዋፐ ደንꬄዳ ናዝሬትያ የሱስ ክርስቶሳ ሱንꬃን ሀ ብታኒ ፓጺደ፥ ህንተንቱ ስንꬃን ኤቄዳዌ ህንተንቱ ኡባዉነ እስራኤልያ አሳ ኡባዉ ኤረቶ። 11 ጎልያ ኬጽያዋንቱ ህንተንቱ ካꬊደ እጼዳ ቱሳይ ጎልያ ኡባ ቶክያ ኮሽያ ቱሳ ግዴዳ። ማዝ. 118:22 12 አሳይ አቶተꬃ የሱሳ ባጋና ደማናፐ አትን፥ ሀራ ኦ ባጋናነ ደመና፤ ኑን አ ሱንꬃን ኦꬃናዉ በሴ፤ አያዉ ጎፐ፥ ጾሳይ ሳሉዋፐ ጋርሳን አሳዉ እሜዳ ሀራ ሱንꬃይ ባዋ” ያጌዳ።

13 ሺቁዋ አሳይ ጰጽሮስነ ዮሃንስ ጻሌዳ ጻላ በኤዳ ዎደ፥ ኡንቱንቱ ታማርቤና ጮ አሳ ግዴዳዋ አኬኪደ ማላለቴድኖ፤ ኡንቱንቱ የሱሳና ደእያዋካ ኤሬድኖ። 14 ቃይ ፓጼዳ ብታኒ ጰጽሮሳናነ ዮሃንሳና ኤቄዳዋ አሳይ በኢደ፥ ግያዋ ꬋዬድኖ። 15 ሽን ጰጽሮስነ ዮሃንስ ሺቁዋፐ ካረ ከሳና ማላ አሳይ አዛዚደ፥ ባረ ግዶን ዞረቲደ፥ 16 “ሀ አሳቱዋ አያ ኡዳኔ? አያዉ ጎፐ፥ ኡንቱንቱ ኩሽያን ኦሰቴዳ ዎልቃማ ማላታቱ የሩሳላመን ደእያ ኡባዉ ቤቴዳ። ኑን ሄዋ ኤሮኮ ጋናዉ ዳንዳዮኮ። 17 ሽን የዉ አሳዉ ላለተና ማላ፥ ሀዋፐ ስንꬃዉ ሀ አሳቱ የሱሳ ሱንꬃ ኦስነ ኦደናዳን፥ ምንሲደ ኡንቱንታ፥ ‘ህንተና ኤርተ’ ጎይተ” ያጌድኖ።

18 ኡንቱንቱ ጼሲደ፥ የሱሳ ሱንꬃ ሙለካ ደንናዳንነ አባ ታማርሰናዳን አዛዜድኖ። 19 ሽን ጰጽሮስነ ዮሃንስ ዛሪደ፥ “ጾሳዉ ኤኖ ግያዋ አጊደ፥ ህንተንቶ ኤኖ ግያዌ ጾሳ ስንꬃን ሎኤንቶነ አነ ህንተ ፕርድተ። 20 አያዉ ጎፐ፥ ኑን በኤዳባነ ስሴዳባ ኦደናን አጋናዉ ዳንዳዮኮ” ያጊደ ሺቄዳ አሳዉ ኦዴድኖ።

21 ሺቄዳ አሳይ ኡንቱንታ ሙራናዉ ጋሶትያባይ ꬋይና፥ ላኤንꬁዋ ዳርስ ፓሉመቲደ፥ ሀኔዳባዉ አሳይ ኡባይ ጾሳ ጋላትያ ድራዉ፥ ኡንቱንታ ብሊደ የዴድኖ። 22 ሄ ሀርግያፐ ፓꬅያ ማላታቱ አዉ ኦሰቴዳ ብታኒ የለቶደፐ ላይꬃይ አዉ ኦይታሙዋፐ አꬌዳ።

23 ጰጽሮስነ ዮሃንስ ብለቲደ፥ ባረንቱ ዳባቱዋኮ ቢደ፥ ቄሳቱዋ ካፓቱነ አይሁዳ ጭማቱ ባረንታ ጌዳባ ኡባ ኡንቱንቶ ኦዴድኖ። 24 ኡንቱንቱ ሄዋ ስሴዳ ዎደ፥ እት ዎዛና ግዲደ፥ ጾሳ ሀዋዳን ያጊደ ዎሴድኖ፤ “ኡባ ሞድያ ጎዳዉ፥ ሳሉዋ፥ ሳኣ፥ አባነ ኡንቱንቱ ግዶን ደእያ ኡባባ መꬌዳዎ፥ከሳ 20:21፤ ናህ. 9:6፤ ማዝ. 146:6 25 ኔን ነዉ ኦꬅያ ኑ አዉዋ ዳዊተ ዶናን ጌሻ አያናን ሃሳያደ፥

27 “አያዉ ጎፐ፥ ሄሮድስነ ጰንጸናውያ ጵላጾስ አይሁዳ ግደና አሳናነ እስራኤልያ አሳና፥ ኔን ኦኬዳ ክርስቶሳ ነ ጌሻ ናኣ የሱሳ ቦላ ደንዳናዉ፥ ሀ ካታማን ሺቄዳዌ ቱማ። 28 ቃይ ኔን ነ ዎልቃንነ ነ ሸንያን ሀናና ጋደ ቆፓ ኡቴዳባ ኡባ ኦꬃናዉ ሺቄድኖ። 29 ሀእካ ጎዳዉ፥ ኡንቱንቱ ናስያ ጼላ፤ ኑን ኔና ካልያዋንቱ፥ ነ ቃላ ኩመንꬃ ቆንጨተꬃን ኦዳናዳን፥ ኑና ዳንዳይሳ። 30 ፓꬃናዉ ነ ዎልቃ በሳ፤ ቃይ ነ ጌሻ ናኣ የሱሳ ሱንꬃን ኦራꬃባነ ማላታ ኦስሳ” ጊደ ዎሴድኖ።

31 ኡንቱንቱ ጾሳ ዎሴዳዋፐ ጉይያን፥ ሄ ኡንቱንቱ ሺቄዳሳይ ቃጼዳ። ኡንቱንቱ ኡባን ጌሻ አያናይ ኩምና፥ ጾሳ ቃላ ቆንጨተꬃን ኦዴድኖ።

32 አማንያዋንቱ ኡባቱ ቆፋንነ ዎዛናን እቱዋ ግዴድኖ። ኡንቱንቱ መሂ ኡባይ እትፐ ደእያዋፐ አትን፥ ባረዉ ደኤዳባ ኦንነ ባረንቱባ ግቤና። 33 የሱስ ኪቴዳዋንቱ ጎዳ የሱስ ሀይቁዋፐ ደንዴዳዋ ዎልቃማ ዎልቃን ማርካቲኖ፤ ቃይ ጾሳይ ኡንቱንቶ ኡባዉ አꬎ ኬካተꬃ ዳርሲደ እሜዳ። 34 አማንያዋንቱ ግዶን መቶታንቻይ እቱነ ባዋ፤ አያዉ ጎፐ፥ ቢታይ ዎይ ጎሊ ደእያዋንቱ ኡባቱ ዛልኢደ፥ አኬዳ ሚሻ አሂደ፥ 35 የሱስ ኪቴዳዋንቶ እሚኖ፤ ሄ ሚሻይ አሳዉ ኮሽያዋዳን ሻከት፥ ሁጲያን ሁጲያን እመቴ።

36 ቆጲሮሳ ጌተትያ ሳን የለቴዳ ዮሴፎ ግያ ሌዊያ ዛሪ እቱ ደኤ፤ አ ሱንꬃ የሱስ ኪቴዳዋንቱ ባርናባሳ ጌድኖ። ሄዋ ብለꬃይ “መንꬅያ ናኣ” ግያዋ። 37 ባርናባስ ባረዉ ደእያ ጋድያ ዛልኤዳ ሚሻ አሂደ፥ የሱስ ኪቴዳዋንቶ እሜዳ።