1 እት ጋላስ፥ ጰጽሮስነ ዮሃንስ ጾሳ ዎሳናዉ ኡዱፑ ሳትያን ጌሻ ጎልያ ቤድኖ። 2 የለቶደፐ ዶሚደ፥ ጉንዳ ግዲደ ደእያ እት ብታኒ ጌሻ ጎልያ ገልያ አሳፐ ሚሻ ዎሳናዉ፥ ኡባ ጋላስ ዳሪ ሎአ ግያ ጌሻ ጎልያ ፐንግያን አሳይ አፊደ ዎꬅያዌ ደኤ። 3 ሄ ዎባ ብታኒ፥ ጰጽሮስነ ዮሃንስ ጌሻ ጎልያ ገላና ሀንሽን በኢደ፥ ሚሻ ኡንቱንታ ዎሴዳ።

4 ጰጽሮስ ዮሃንሳና አ ጫድ ጼሊደ፥ “ኑኮ ሃ ጼላ” ያጌዳ። 5 ዎባ ብታኒ ኡንቱንቱፐ እትባ አካናዉ ኮዪደ፥ ኡንቱንቱኮ ጼሌዳ። 6 ሽን ጰጽሮስ አ፥ “ታዉ ሚሻይ ባዋ፤ ሽን ታዉ ደእያባ ታን ነዉ እማና፤ ናዝሬትያ የሱስ ክርስቶሳ ሱንꬃን ደንዳደ ሀመታ” ያጌዳ።

7 ያቲደ፥ ዎባ ብታንያ ባረ ኡሸቻ ኩሽያን ኦይቂደ፥ ፑደ ደንꬄዳ፤ ኤለካ አ ገዲነ ሜሽ መቀꬃይ ምን አጌዳ። 8 ብታኒ ፑደ ጉፒደ፥ ደንድ ኤቄዳ፤ ያነ ሃነ ሀመታ ዶሜዳ። ሄዋፐ ጉይያን ሀመቲደ፥ ጉፒድነ ጾሳ ጋላቲደ፥ ኡንቱንቱና እትፐ ጌሻ ጎልያ ገሌዳ።

9 እ ሀመትሺናነ ጾሳ ጋላትሽን፥ አሳይ ኡባይ አ በኤዳ። 10 ያቲደ፥ ሚሻ ዎሳናዉ ዳሪ ሎአ ግያ ጌሻ ጎልያ ፐንግያን ኡቴዳዌ አ ግዴዳዋ አኬኬድኖ፤ እ ሀኔዳዋ በኢደ ማላለቴድኖ።

11 ብታኒ ጰጽሮሳነ ዮሃንሳ ኦይቂ ኡቴዳ ዎደ፥ አሳይ ኡባይ ማላለቲደ፥ ሶሎሞነ ባራንዳ *ሶሎሞነ ባራንዳ፦ ጌሻ ጎልያ አዋይ ዶልያ ስንꬃ ባጋና ጮራ አሳይ ሺቅያ አዱሳነ አኮ ሳኣ። ግያ ሳን እትፐ ኡንቱንቱኮ ዎጼድኖ። 12 ጰጽሮስ አሳ በኤዳ ዎደ ኡንቱንቶ ያጌዳ፤ “እስራኤልያ አሳቶ፥ አያዉ ሀዎ ማላለቲቴ? ዎይ አያዉ ኑና ጫድ ጼሊቴ? ኑን ኑ ዎልቃን ዎይ ጾሳ ማላትያዋን ሀ ብታንያ ሀመꬄዳዋ ህንተንቶ ማላቲ? 13 አብራሃሞ ጾሳይ፥ ይሳቃ ጾሳይ፥ ያቆባ ጾሳይ፥ ኑ አዎቱዋ ጾሳይ፥ ህንተንቱ አꬅ እሜዳዋ ጵላጾስ ብላናዉ ቆፕ ኡቴዳ ዎደ፥ ህንተንቱ አ ስንꬃን፥ ‘ኑን አ ኤሮኮ’ ጌዳ ባረ ናኣ የሱሳ ቦንቼዳ። 14 ሽን ህንተንቱ ጌሻነ ጽሉዋ፥ ‘ኑን አ ኤሮኮ’ ጊደ፥ ሸምፑዋ ዎꬌዳዋ አ ድራ ህንተንቶ ብላናዉ ጵላጾሳ ዎሴድታ። 15 ደኡዋ እምያዋ ህንተንቱ ዎꬌድታ፤ ሽን ጾሳይ ሀይቁዋፐ አ ደንꬄዳዎ ኑን ማርካ። 16 ሀ ዎባ ብታንያ የሱሳ ሱንꬃ ዎልቃይ ምንሴዳ፤ ህንተንቱ በእያዌነ ኤርያዌካ እ አ ሱንꬃን አማንያዋን ኦሰቴዳ፤ ሀ ህንተንቱ ኡባ ስንꬃን አ ሀዋዳን ሎይꬄዳዌ፥ የሱሳ እ አማንያዋ።

17 “ሀእካ ታናዳን አማንያዋንቶ፥ ህንተንቱካ ህንተንታ ካልያዋንቱዳን፥ ኤረናን ኦꬄዳዋ ታን ኤራይ። 18 ሽን ጾሳይ በን፥ ናባቱዋ ኡባቱዋ ዶናን፥ ‘ክርስቶስ ዋየታና በሴ’ ያጊደ ኦዴዳ፤ ባረ ኦዴዳዋካ ሄዋዳን ፖሌዳ። 19-20 ስም ጾሳይ ህንተንቱ ናጋራ ማራናዳን፥ ጎዳ ማታፐ አያና ምኖተꬃ ዎዲ ህንተንቶ ያናዳንነ ጾሳይ የሱስ ክርስቶሳ ካሰ ህንተንቶ ኦደቶዋዳን የዳናዳን፥ ህንተንቱ ናጋራ ፓጺደ ጾሳኮ ስምተ። 21 ጾሳይ ጌሻ ግዴዳ ባረ ናባቱዋ ዶናን በንፐ ዶሚደ ሃሳዬዳዋዳን፥ ኡባባይ ኦራጽያ ዎዲ ጋካናዉ፥ የሱስ ሳሉዋን ጋምአናዉ በሴ። 22 ሙሴ፥ ‘ጎዳይ ጾሳይ፥ ህንተንቱ ዛርያ ግዶፐ ህንተንቶ ታናዳን ናብያ ደንꬃና፤ ህንተንቱ እ ግያዋ ኡባ ስስተ። ዛረ. 18:15፣ 18 23 ሄ ናቢ ኦድያዋ ስሰና አሳይ ኦንነ አሳ ግዶፐ ሻከት ꬋዮ’ ያጌዳ። ዛረ. 18:19

24 “ቃይ ሳሜላፐ ዶሚደ፥ አፐ ካላ ደንዴዳ ናባቱ ኡባቱ፥ ሀ ዎድያባ ኦዴድኖ። 25 ህንተንቱ ናባቱዋ ናና፤ ቃይ ጾሳይ አብራሃሞ፥ ‘ሳኣን ደእያ አሳ ኡባ ታን ነ ዘረꬃ ባጋና አንጃና’ ያጊደ ኑ አዎቱዋና ጫቄዳ ጫቁዋ ላትያ ናና። ዶመꬃ 22:18 26 ጾሳይ ህንተንታ ኡባቱዋ ህንተንቱ ኢታ ኦሱዋፐ ዛሪደ አንጃና ማላ፥ ባረ ቆማ †ቆማ፦ ጾሳ አዉዋን ዶረቴዳ ናኣ። ደንꬂደ፥ ህንተንቶ ኮይሮ የዴዳ” ያጌዳ።