1 ሽን ሳኦል ጎዳ ካልያዋንታ ዎꬋናዉ ማንዲደ፥ ቄሳቱዋ ኡባቱዋ ካፑዋኮ ቤዳ። 2 ያቲደ ጎዳ ኦግያ ካልያ አሳቱዋ ማጫዋንታነ አቱማዋንታ ደሞፐ፥ ቃቺደ የሩሳላመ አሀናዉ፥ ዳማስቆን ደእያ አይሁዳ ዎሳ ጎለቶ ዳብዳቢያ ጻፋናዉ አ ዎሴዳ።

3 እ ቢደ፥ ዳማስቆ ካታማ ጋካና ማቶደ፥ ቆፐናን ሳሉዋፐ ዎልቃማ ፖኡ አ ዩሹዋ ኡባን ፖኤዳ። 4 ሳኦል ሳኣን ኩንድ ኡትና፥ “ሳኦላ ሳኦላ፥ አያዉ ታና ዋይሳይ?” ግያ ቃላ ስሴዳ።

5 ሳኦል፥ “ታ ጎዳዉ፥ ኔን ኦኔ?” ያጊደ ኦቼዳ።

የሱስካ፥ “ታን ኔን የደርሳደ ደእያ የሱሳ” ያጌዳ።

6 ሽን ሳኦል ኮኮሪድነ ማላለቲደ፥ “ታ ጎዳዉ፥ ታን አያ ኦꬃናዳን ኮያይ?” ያጌዳ።

ጎዳይ አ፥ “ደንዳደ ካታማ ገላ፤ ኔን ኦꬃናዉ በስያባይ ነዉ ያን ኦደታናዋ” ያጌዳ።

7 ሳኦላና ኦግያን ብያ አሳቱ አይነ ሃሳየናን ኤቂ አጊደ፥ ኮሻ ስሲኖ፤ ሽን ኦናነ በእበይክኖ። 8 ሳኦል ሳኣፐ ደንድና፥ አ አይፊ ዶየቴዳ ዎደ፥ አይነ ጼላናዉ ዳንዳይቤና፤ ሄዋ ድራዉ፥ ኡንቱንቱ አ ኩሽያ ኦይቂ ጎቺደ፥ ዳማስቆ ገልሴድኖ። 9 ሄዙ ጋላሳ ጋካናዉካ እ ጼልቤና፤ አይነ ምቤና፤ አያኔካ ኡሽቤና።

10 ዳማስቆን እት ሀናንያ ግያ ካልያዌ ደኤ፤ ጎዳይ ሳጻን አ፥ “ሀናነዉ” ያጌዳ።

ሀናኒ፥ “ታ ጎዳዉ፥ ሀዋን ደአይ” ያጌዳ።

11 ጎዳይ አ፥ “ደንዳደ ሱረ ጌተትያ ኦግያ ባደ፥ ይሁዳ ሶይን እት ሳኦላ ግያ ጸርሴሰፐ ዬዳ ብታንያ ኮያ፤ አያዉ ጎፐ፥ እ ዎሴ። 12 ቃይ ሀናንያ ግያ ብታኒ ገሊደ፥ ሳኦል ላኤንꬁዋ ጼላናዳን፥ ባረ ኩሽያ አ ቦላ ዎꬅያዋ ሳጻን በኤዳ” ያጌዳ።

13 ሀናኒ ዛሪደ፥ “ታ ጎዳዉ፥ የሩሳላመን ነ ጌሻ አሳ ቦላ ሄ ብታኒ አይ ኬና ኢታባ ኦꬄደንቶ፥ ታን ዳሮ አሳፐ ስሳድ። 14 ቃይ ዳማስቆን ነ ሱንꬃ ጼስያዋንታ ኡባ ቃቻናዉ፥ ቄሳቱዋ ካፓቱ አዉ ማታ እሜድኖ” ያጌዳ።

15 ሽን ጎዳይ አ፥ “ሳኦል አይሁዳ ግደና አሳ ስንꬃን፥ ካታቱዋ ስንꬃንነ እስራኤልያ አሳ ስንꬃን፥ ታ ሱንꬃ ኤርሳናዉነ ታዉ ኦꬃናዳን ዶረቴዳ ሚሻ ግድያ ድራዉ፥ ኔን ባ። 16 አያዉ ጎፐ፥ ታ ሱንꬃ ድራዉ፥ እ አይ ኬና ዋየታናዉ በስንቶ፥ ታን አ በሳና” ያጌዳ።

17 ሀናኒ ቢደ፥ ሶይ ገሊደ፥ ባረ ኩሽያ ሳኦላ ቦላ ዎꬂደ፥ “ታ እሻዉ ሳኦላ፥ ኔን ይያ ኦግያን ነዉ ቤቴዳ የሱስ፥ ኔን ጼላና ማላነ ጌሻ አያናይ ኔናን ኩማና ማላ፥ ታና ኪቴዳ” ያጌዳ። 18 ኤለካ፥ አየንቶ ፖቁዋ ማላይ ሳኦላ አይፍያፐ ዎꬍና፥ ሳኦል ላኤንꬁዋ ጼሌዳ፤ ቃይ ደንዲደ ጻማቀቴዳ። 19 ቁማ ሚደ ምነት፥ ዳማስቆን ደእያ ካልያዋንቱና አማሬዳ ጋላሳ ጋምኤዳ።

20 ኤለካ፥ “የሱስ ክርስቶስ ጾሳ ናኣ” ያጊደ፥ አይሁዳ ዎሳ ጎለቱዋን ቃላ ኦዴዳ።

21 ሄዋ ስሴዳ ኡባይ ማላለቲደ፥ “ሀዌ የሩሳላመን የሱሳ ሱንꬃ ጼስያዋንታ ꬋይስያዋ ግደኔ? ቃይ ኡንቱንታ ቃቺደ፥ ቄሳቱዋ ካፓቱዋ ስንꬃ አፋናዉ ይቤኔየ?” ያጌድኖ።

22 ሽን ሳኦል ቃላ ኦድያ ኦዱ ምን ምን ቤዳ፤ የሱስ ቃይ ክርስቶሳ ግድያዋካ እ አኬክሲደ ኦዴዳ ድራዉ፥ ዳማስቆን ደእያ አይሁዳቱ አዉ ዛርያዋ ꬋዬድኖ።

23 ጮራ ጋላሳፐ ጉይያን፥ አይሁዳቱ ሺቂደ፥ ሳኦላ ዎꬋናዉ ዞረቴድኖ። 24 ሽን አይሁዳቱ ባረና ዎꬋናዉ ቆፖዋ ሳኦል ስሴዳ፤ ኡንቱንቱ አ ዎꬋናዉ ቃማነ ጋላስ ካታማ ፐንግያ ናጊኖ። 25 ሽን ካልያዋንታ አ ቃማ አፊደ፥ ድርሳ ሁጲያና ቁንኣን ዱገ ዎꬄድኖ።

26 ሳኦል የሩሳላመ ጋኬዳ ዎደ፥ ካልያዋንቱና እትፐ ጋከታናዉ ሺቅ በኤዳ፤ ሽን ካልያዋ እ ግዴዳዋ ኡባይ አማነናን እጺደ፥ አዉ ያዬድኖ። 27 ሽን ባርናባስ ሳኦላ የሱስ ኪቴዳዋንቱኮ አፌዳ፤ ኦግያን ጎዳ እ ዋኒደ በኤደንቶ፥ አዉ ጎዳይ ዎት ሃሳዬደንቶነ ቃይ ሳኦል ዳማስቆን የሱሳ ሱንꬃን ያየናን ዎት ቃላ ኦዴደንቶ፥ ኡንቱንቶ ጌሺደ ኦዴዳ። 28 ሳኦል የሩሳላመን ዩዪደነ ጎዳ የሱሳ ሱንꬃን ያየናን ቃላ ኦዲደ፥ የሱስ ኪቴዳዋንቱና እትፐ ደኤዳ። 29 ቃይ ሳኦል ግሪከ ቃላ ሃሳይያ አይሁዳቱዋና ሃሳዬነ ፓሉመቴ፤ ሽን ኡንቱንቱ አ ዎꬋናዉ ኮዬድኖ። 30 እሻቱ ሄዋ ስሲደ፥ ሳኦላ ዱገ ቂሳርያ አፊደ፥ ጸርሴሰ የዴድኖ።

31 ይሁዳን፥ ጋሊላንነ ሳማርያን ኡባን ደእያ አማንያ አሳቱ ሳሮተꬃን ደኤድኖ፤ ቃይ ምኔድኖ፤ ጎዳዉ ያይያዋንነ ጌሻ አያና ማዱዋን ጌመቲደ፥ ፓይዱዋንካ ዳር ዳር ቤድኖ።

32 ጰጽሮስ ኡባ ሳን ዩዪደ፥ ሊዳን ደእያ ጌሻ አሳቱዋኮ ቃይ ዎꬌዳ። 33 ያቲደ ሄዋን ሆስፑን ላይꬃ ስሊደ፥ አርሳን ግሲደ ደእያ እት ኤንያ ግያ ብታንያ ደሜዳ። 34 ጰጽሮስ ኤንያ፥ “ኤናዉ፥ የሱስ ክርስቶስ ኔና ፓꬄ፤ ደንዳደ ነ ሂጻ የጋ”*ሂጻ የጋ፦ ሀዋ ጉሳይ ሜተትያባ ጊግሳ ጉሳ። ያጌዳ። ሄዋፐ ጉየ ኤለካ ደንድ ኤቄዳ። 35 ሊዳንነ ሳሮናን ደእያ አሳይ ኡባይ ኤንያ በኢደ፥ ጎዳኮ ስሜድኖ።

36 ዮጰ ካታማን እት ጻቢቶ ጌተትያ አማነዉና ደአዉ፤ ጻቢቶ ጉሳይ ግሪከ ቃላን ዶርቆ ግያዋ። እዛ ባረ ደኤዳ ዎድያ ኡባን ሎኦባ ኦꬃደነ ህዬሳ ማዳደ ደአዉ። 37 ሄ ዎደ እዛ ሀርጋደ ሀይቂና፥ አሳይ እዝ አሃ ሜጪደ፥ ፖእያ ፑደ ከሲደ ግስሴዳ። 38 ሊዳይ ዮጰዉ ማታ፤ ካልያዋንቱ ጰጽሮስ ሊድያን ደእያዋ ዮጰን ስሲደ፥ “ሀያና ኑኮ ኤለካ ያርኪ” ያግያ ኪታ ላኡ አሳቱዋ ቦላ አኮ ኪቴድኖ።

39 ሄዋፐ ጉየ ጰጽሮስ ደንዲደ፥ ኡንቱንቱና ብ ጋክና፥ ፖቅያ ፑደ አ ከሲደ፥ ክፍልያ ገልሴድኖ። አስን ባይና አምኤ ማጫዋንቱ ኡባይ ዬኪደነ ዶርቃ ኡንቱንቱና ደእያ ዎደ ኦꬄዳ ቃምሻቱዋነ ማያቱዋ ኡባ ጰጽሮሳ በሲደ፥ አ ዩሹዋን ዩይ አꬊደ ኤቄድኖ። 40 ጰጽሮስ ኡንቱንታ ኡባ ካረ ከሲደ፥ ጉልባት ጾሳ ዎሴዳ፤ ቃይ አሃኮ ስሚደ፥ “ጻቢቴ፥ ደንዳ” ያጌዳ፤ ጻቢታካ ባረ አይፍያ ዶያ ጰጽሮሳ በኣደ፥ ꬎቃ ኡታዱ። 41 ጰጽሮስ እዞ ባረ ኩሽያን ማዲደ፥ ደንꬅ ኤሴዳ፤ ሄዋፐ ጉይያን፥ አማንያዋንታነ አስን ባይና አምኤ ማጫዋንታ ጼሲደ፥ ፓጼዳዉኖ ኡንቱንቶ እሜዳ።

42 ሀ የዉ ዮጰ ካታማ ኡባን ላለትና ጮራ አሳይ ጎዳ አማኔድኖ። 43 ጰጽሮስ ዮጰን እት ስሞና ግያ ጋልባ ቃጭያዋና ዳሮ ዎድያ ጋምኤዳ።