1 ቂሳርያን “ጻላቱዋ ኦላ አሳቱዋ” ጌተትያ ኦላንቻቶ እት ጼታቱዋ ካፑ ቆርነልዮሳ ግያዌ ደኤ። 2 ቆርነልዮስ ጾሳ ሎይꬂደ አማንያ አሳነ፥ ባረ ሶይ አሳ ኡባና እትፐ ጾሳዉ ጎይንያ አሳ፤ አይሁዳ ህዬሳካ እ ዳሮ ማዴ፤ ቃይ ጾሳ ኡባ ዎደ ዎሴ። 3 እት ጋላስ ኡዱፑ ሳትያ ሄራን፥ “ቆርነልዮሳ” ጊደ ጼስያ ጾሳ ኪታንቻይ ባረኮ ገልሽን፥ ቆርነልዮስ ሳጻን ጌሺደ በኤዳ።

4 ቆርነልዮስ ያዪደ፥ ኪታንቻ ጫድ ጼሊደ፥ “ታ ጎዳዉ፥ እ አዬ?” ያጌዳ።

ኪታንቻይ ዛሪደ፥ ሀዋዳን ያጌዳ፤ “ነ ዎሳይነ ኔን ህዬሳ ማድያዌ ጾሳ ስንꬃን ሀሳየታናዉ ሳሉዋ ቤዳ። 5 ሀእ ዮጰ አሳ ኪታደ፥ ጰጽሮሳ ጌተትያ ስሞና አህሳ። 6 ጰጽሮስ አባ ዶናን ደእያ ጋልባ ቃጭያ ስሞና ጎለን እማꬃተꬃን ኡቴዳ፤ ኔን ኦꬃናዉ በስያዋ እ ነዉ ኦዳናዋ” ያጌዳ።

7 ቆርነልዮስ ባረዉ ኦዴዳ ኪታንቻይ ቢና፥ ባረ ቆማቱዋፐ ላአቱዋነ ጾሳዉ ጎይንያ ባረፐ ሻከተና ዎታዳራቱዋፐ እቱዋ ጼሲደ፥ 8 ኡንቱንቶ ኡባባ ኦዲደ፥ ኡንቱንታ ዮጰ ኪቴዳ።

9 ዎንተꬃ ጋላስ ኡንቱንቱ ቢደ፥ ዮጰ ካታማኮ ማትሽን፥ ጰጽሮስ ኡሱፑን ሳትያ ሄራን ጎልያ ቦላን ደምባዪደ ኦꬄዳሳ ጾሳ ዎሳናዉ ከሴዳ። 10 ቃይ ኮሻቲደ፥ ቁማ ማናዉ ኮዬዳ፤ ሽን ቁማይ ካእሽን፥ ሳፃ በኤዳ። 11 ሳሉ ዶየትና፥ ዎልቃማ ማዩዋ ማላትያባይ ኦይዱ ባጋና ኦይቀቲደ፥ ሳኣን ዎꬍሽን፥ ጰጽሮስ በኤዳ። 12 ሄዋን ኦይዱ ገድያና ደእያ መሂ፥ ዶአይ፥ ሾሻይ፥ ዛሪነ ካፉ ኡባይ ደኤ። 13 “ጰጽሮሳ፥ ደንዳ ኤቃደ ሹካ ማ” ግያ ቃላይ አኮ ዬዳ።

14 ሽን ጰጽሮስ፥ “ታ ጎዳዉ፥ ሀነና! ታን ቱናባነ ሸነይያባ ኡባካ ማ ኤርከ” ያጌዳ።

15 ቃይ ላኤንꬁዋ፥ “ጾሳይ ጌሼዳዋ ኔን ቱንሶፓ” ግያ ቃላይ አኮ ዬዳ። 16 ሄዙ ገደ ሄዋዳን ጌዳ፤ ሄዋፐ ጉይያን፥ ኤለካ ሄ ዎልቃማ ማዩዋ ማላትያዌ ፑደ ሳሉዋ አከት አጌዳ።

17 ጰጽሮስ ባረ በኤዳ ሳፃ ብለꬃይ አያ ግዳንዴሻ? ያጊደ፥ ባረ ዎዛና ግዶን፥ “ላ ሀዌ አዬ?” ጊሽን፥ ቆርነልዮስ ኪቴዳ አሳቱ ስሞና ጎሊ ደኢያሳ ኮዪደ፥ አ ፐንግያን ኤቄድኖ። 18 ባረንቱ ኮሻ ꬎቁ ኦꬂደ፥ “ጰጽሮሳ ጌተትያ ስሞና ግያ እማꬃይ ሄዋን ደኢ?” ያጊደ ኦቼድኖ።

19 ጰጽሮስ ሳጻን በኤዳባ አኬካናዉ ቆፋን ሼክደእሽን፥ ጌሻ አያናይ አ፥ “በአ፥ ሄዙ *ሄዙ፦ እት እት ማጻፋቱ ጮራ ጊኖ፤ እት ማጻፋይ ላኡ ያጌ። አሳቱ ኔና ኮዪኖ፤ 20 ደንዳደ ዎꬋ፤ ታን ኡንቱንታ ኪቴዳ ድራዉ፥ ስናን ኡንቱንቱና ባ” ያጌዳ።

21 ጰጽሮስ አሳቱዋኮ ዎꬊደ፥ “ህንተንቱ ኮይያዌ ታና። አያ አካና ዬድቴ?” ያጌዳ።

22 ኡንቱንቱ፥ “ጾሳዉ ያይያ ጽሉ አይሁዳ አሳ ኡባን ዳሮ ቦንቼቴዳ ጼታቱዋ ካፑዋ ቆርነልዮስ፥ ኔና ባረ ሶይ አፍሲደ፥ ቃላ ኔፐ ስሳና ማላ፥ ጾሳ ጌሻ ኪታንቻይ አዉ ኦዴዳ” ያጌድኖ። 23 ጰጽሮስ አሳቱዋ እማꬃ ኦꬅ ሾባናዉ ሶይ ሞኬዳ።

ዎንተꬃ ጋላስ፥ ደንዲደ ኡንቱንቱና ቤዳ፤ ዮጰ ካታማን ደእያ እሻቱዋፐ እቱ እቱ አናና እትፐ ቤድኖ። 24 ዎንተꬃ ጋላስ፥ ቂሳርያ ጋኬድኖ፤ ቆርነልዮስ ባረ ዳባቱዋነ ባረ ላገꬃቱዋ እትፐ ጼስ ሺሺደ፥ ጰጽሮሳ ናጌ። 25 ጰጽሮስ ገላና ሀንሽን፥ ቆርነልዮስ አናና ጋከቲደ፥ አ ስንꬃን ኩንዲደ፥ አዉ ጎይኔዳ። 26 ሽን ጰጽሮስ፥ “ደንዳ! ታንካ ታ ሁጰዉ አሳ” ያጊደ አ ደንꬄዳ።

27 ጰጽሮስ ቆርነልዮሳና ሃሳዪደ፥ ሶይ ገሌዳ፤ እ ገልያ ዎደ ጮራ አሳይ ሺቄዳዋ ደሚደ፥ 28 አሳ፥ “አይሁዳ አሳይ ሀራ ዛርያና እትፐተꬃን ደአናዉ፥ ዎይ ጋከታናዉ ዎጋ ግደናዋ ህንተ ሁጰዉ ኤሪታ፤ ሽን ታን ኦናነ ቱና ዎይ ሸነይያባ ጌና ማላ፥ ጾሳይ ታና በሴዳ። 29 ሄዋ ድራዉ፥ ህንተ ታዉ ኪትና፥ ፓሉማይ ባይናን ያድ። ሀእ፥ ‘ታና አያዉ አህሴድቴ?’ ያጋደ ህንተንታ ኦቻይ” ያጌዳ።

30 ቆርነልዮስ ሀዋዳን ያጌዳ፤ “ታን ሀቼ ኦይዱ ጋላሳፐ ካሰ ሀ ሳትያን ኡዱፑ ሳትያ ዎሳ ታ ሶይን ጾሳ ዎስሽን፥ ጶልቂያ ማዩዋ ማዬዳ አሳይ ታ ስንꬃን ኤቂደ፥ 31 ታና፥ ‘ቆርነልዮሳ፥ ጾሳይ ነ ዎሳ ስሴዳ፤ ኔን ህዬሳ ማድያዋካ ሀሳዬዳ። 32 ስም አሳ ዮጰ ኪታደ፥ ስሞን ጰጽሮሳ ግያዋ ጼስሳ፤ ስሞን ጰጽሮስ ስሞና ግያ ጋልባ ቃጭያዋ ጎለን አባ ዶናን እማꬃተꬃ ኡቴዳ’ ያጌዳ። 33 ሄዋ ድራዉ፥ ታን ኔኮ ኤለካ ኪታድ፤ ኔንነ ያደ ሎይꬃዳ፤ ስም ኔን ኑዉ ኦዳናዉ ጾሳይ ኔና አዛዜዳዋ ኡባ ስሳናዉ ሀእ ኑን ኡባይ ሀዋን ጾሳ ስንꬃን ደኤቶ” ያጌዳ።

34-35 ጰጽሮስ ሃሳያ ሀዋዳን ያግ ዶሜዳ፤ “ጾሳይ አሳ ሶምእያ ጼለና፤ ሽን ጋደ ኡባን ባረዉ ያይያዋነ ጽሎ ኦሱዋ ኦꬅያዋ ጋላትያዋ ታን ቱሙ አኬካድ። ዛረ. 10:17 36 ጾሳይ አሳ ኡባ ጎዳ፥ የሱስ ክርስቶሳ ባጋና፥ ሳሮተꬃ ኦዲደ፥ ሀ ዎንጋላ ምሽራቹዋ እስራኤልያ አሳዉ ኪቴዳዋ ህንተንቱ ኤሪታ። 37 ዮሃንስ ቃላ ኦዴዳ ጽንቃታፐ ጉይያን፥ ጋሊላፐ ዶሚደ፥ ይሁዳ ጋድያ ኡባን ሀኔዳዋ ህንተ ኤሪታ። 38 ጾሳይ ናዝሬትያ የሱሳ ጌሻ አያናንነ ዎልቃን ኩንꬄዳ፤ ጾሳይ አናና ደእያ ድራዉ፥ ሎኦባ እ ኦꬂድነ ጻላህያ ካፖ ሞደቴዳ ኡባ ፓꬂደ ዩዬዳ።

39 “አይሁዳ ጋድያንነ የሩሳላመን እ ኦꬄዳ ኡባባዉ ኑን ማርካ። ኡንቱንቱ ማስቃልያ ቦላ ምስማርያን ꬍሽ ካቂደ፥ አ ዎꬌድኖ። 40 ሽን ጾሳይ ሄዘንꬅያ ጋላሳን ሀይቁዋፐ አ ደንꬂደ በሴዳ። 41 ጾሳይ ኮይሮ ዶሬዳ ማርካቱዋ ኑና፥ አ በሴዳፐ አትን፥ አሳ ኡባ ግደና፤ ሀይቁዋፐ እ ደንዴዳዋፐ ጉይያን፥ ኑን አናና ሜዶነ ኡሼዶ። 42 ጾሳይ ዎንጋላ ምሽራቹዋ አሳዉ ኑን ኦዳናዉነ፥ ፓጻ ደእያዋንቱ ቦላንነ ሀይቄዳዋንቱ ቦላን ፕርዳናዉ እ ሱንꬄዳዌ የሱሳ ግዴዳዋ ኑን ማርካታናዉ ኑና አዛዜዳ። 43 ጾሳይ አን አማንያ ኡባ ናጋራ አ ሱንꬃን አቶ ጋናዋ ናባቱ ኡባቱ ማርካቲኖ” ያጌዳ።

44 ጰጽሮስ ብሮ ሄ የዉዋ ኦድሽን፥ ቃላ ስስያ ኡባ ቦላ ጌሻ አያናይ ዎꬍ አጌዳ። 45 ጰጽሮሳና ዮጰፐ ዬዳ፥ አማንያ ቃጻረቴዳ አይሁዳ ኡባቱ አይሁዳ ግደናዋንቱ ቦላንካ ጌሻ አያና እሞታይ ጉኬዳ ድራዉ ማላለቴድኖ። 46 አያዉ ጎፐ፥ ኡንቱንቱ ዱማ ዱማ ቃላን ሃሳይሺንነ ጾሳ ዳሮተꬃ ሳቢሽን ስሴድኖ።

ሄ ዎደ ጰጽሮስ ዛሪደ፥ 47 “ሀዋንቱ ቃይ ኑናዳን ጌሻ አያና አኬዳዋንቱ ጻማቀተናዳን፥ ሃꬃ ኡንቱንታ ድጋናዉ ዳንዳይያዌ ኦኔ?” ያጌዳ። 48 ኡንቱንቱ የሱስ ክርስቶሳ ሱንꬃን ጻማቀታና ማላ፥ ኡንቱንታ አዛዜዳ፤ ሄዋፐ ጉይያን፥ ኡንቱንቱ ባረንቱና አማሬዳ ጋላሳ ኡታና ማላ፥ አ ዎሴድኖ።