1 የሱስ ኪቴዳዋንቱነ ይሁዳ ኡባን ደእያ እሻቱ፥ አይሁዳ ግደናዋንቱካ ጾሳ ቃላ አኬዳዋ ስሴድኖ። 2 ጰጽሮስ የሩሳላመ ቤዳ ዎደ፥ ቃጻረቴዳ አሳቱ አናና ፓሉመቲደ፥ 3 አ፥ “ኔን ቃጻረትቤናዋንቱኮ ገላደ፥ ኡንቱንቱና ቁማ ማዳ” ያጌድኖ።

4 ሽን ጰጽሮስ ሀኔዳዋ ኮይሩዋፐ ዶሚደ፥ ማራን ማራን ሀዋዳን ያጊደ ኦዴዳ፤ 5 “ታን ዮጰ ካታማን ጾሳ ዎስሽን፥ ታን አያናን ግዳደ ሳፃ በኣድ፤ ዎልቃማ ማዩዋ ማላትያዌ ኦይዱ ባጋና ኦይቀቲደ፥ ሳሉዋፐ ዎꬊደ፥ ታኮ ዬዳ። 6 ሄዋ ግዱዋ ታን ጫዳ ጼልያ ዎደ፥ ኦይዱ ገዲ ደእያ መህያ፥ ዱኣ፥ ሾሻ፥ ዛርያነ ካፉዋ በኣድ። 7 ቃይ፥ ‘ጰጽሮሳ፥ ደንዳ፤ ሹካ ማ’ ግያ ቃላ ታን ስሳድ።

8 “ሽን ታን፥ ‘ታ ጎዳዉ፥ ሀነና! ቱናባይ ዎይ ሸነይያባይ ኡባካ ታ ዶናኮ ሺቅ ኤረና’ ጋድ።

9 “ቃላይ ሳሉዋፐ ላኤንꬁዋካ፥ ‘ጾሳይ ጌሼዳዋ ኔን ቱና ጎፓ’ ያጊደ ታዉ ዛሬዳ።

10 “ሄዌ ሄዙ ገደ ሀንና፥ ዉርሰꬃን ኡባባይ ሳሉዋ ፑደ ጎሸቴዳ። 11 ሄ ማንእያን ሄዙ አሳቱ ቂሳርያፐ ታኮ ኪተቲደ፥ ታን ደእያ ጎልያ ጋክ አጌድኖ። 12 ታንካ ስናን ኡንቱንቱና ባና ማላ፥ ጌሻ አያናይ ታዉ ኦዴዳ። ቃይ ሀ ኡሱፑን እሻቱ ዮጰፐ ታናና ቂሳርያ ቢና፥ ኑን ቆርነልዮሳ ሶይ ገሌዶ። 13-14 ኪታንቻይ ባረ ሶይን ኤቂደ ባረና፥ ‘ጰጽሮሳ ጌተትያ ስሞና ጼሳናዉ አሳ ዮጰ ኪታ፤ ኔንነ ነ ጎለ አሳይ ኡባይ አትያ ቃላ እ ነዉ ኦዳናዋ’ ጌዳዋ ቆርነልዮስ ዎት ስሴደንቶ፥ ኑዉ ኦዴዳ።

15 “ታን ሃሳያናዉ ዶምያዋን ጌሻ አያናይ ኮይሮ ኑ ቦላ ዎꬌዳዋዳን፥ ኡንቱንቱ ቦላካ ዎꬍ አጌዳ። 16 ጎዳይ፥ ‘ዮሃንስ ሃꬃን ጻማቄዳ፤ ሽን ህንተንቱ ጌሻ አያናን ጻማቀታንታ’ ያጌዳ ቃላ ታን ሀሳያድ። 17 ጾሳይ ኑዉ ጎዳ የሱስ ክርስቶሳ አማኔዳዋንቶ እሜዳ እሞታ ማላ አይሁዳ ግደናዋንቶካ ቃይ እሞፐ፥ ስም ጾሳ ድጋናዉ ታን ኦኔ?” ያጌዳ።

18 ኡንቱንቱ ሀዋ ስሴዳ ዎደ ባረንቱ ፓሉማ አጊደ፥ “ያትና፥ ጾሳይ አይሁዳ ግደናዋንቱካ ቃይ ናጋራፐ ስሚደ ደአናዳን፥ ኡንቱንታ ካጬዳ” ያጊደ ጾሳ ጋላቴድኖ።

19 እስጽፋኖሳ ቦላ ጋኬዳ ዋይያ ጌዱዋን ላለቴዳ አማንያዋንቱ ቃላ አይሁዳቱዋ ጻላላፐ አትን፥ ሀራዉ እቶነ ኦደናን፥ ፕንቀ፥ ቆጲሮሳነ አንጾክያ ጋካናዉ ዩዬድኖ። 20 ሽን ቆጲሮሳፐነ ቀሬናፐ ዬዳ እት እት አማንያ አሳቱ አንጾክያ ቢደ፥ ጎዳ የሱሳ ዎንጋላ ምሽራቹዋ ኦዲደ፥ ግሪከ አሳዉካ *ግሪከ አሳ፦ ሀዋ ጉሳይ ግሪከ ቃላ ሃሳይያ አይሁደ ዎይ ሀራ አሳ። ኦዴድኖ። 21 ጎዳ ዎልቃይ ኡንቱንቱና ደኤ፤ ቃይ ጮራ አሳይ አማኒደ፥ ጎዳኮ ስሜድኖ።

22 ሀ የዉ የሩሳላመን ደእያ አማንያ አሳዉ ስሰትና፥ አማንያ አሳይ ባርናባሳ አንጾክያ ኪቴዳ። 23 ባርናባስ አንጾክያ ቤዳ ዎደ፥ ጾሳ አꬎ ኬካተꬃ ኦሱዋ በኢደ ናሸቴዳ፤ ኡንቱንቱ ኡባይ ጎዳን ባረንቱ ኩመንꬃ ዎዛናፐ ምን ደአናዳን፥ ኡንቱንታ ዞሬዳ። 24 አያዉ ጎፐ፥ ባርናባስ ጌሻ አያናይነ አማኑ ኩሜዳ ሎኦ አሳ፤ ሄ ጋሱዋን ጮራ አሳይ ጎዳኮ ዬድኖ።

25 ሄዋፐ ጉይያን፥ ባርናባስ ሳኦላ ኮያናዉ ጸርሴሰ ቤዳ። 26 ያቲደ ሳኦላ ደሜዳ ዎደ፥ አንጾክያ አሄዳ። ባርናባስነ ሳኦል አማንያ አሳና እት ላይꬃ ኩመንꬃ ኡቲደ፥ ጮራ አሳ ታማርሴድኖ፤ ካልያዋንቱ አንጾክያን አማንያ አሳ ጌተቲደ፥ ኮይሮ ጼሰቴድኖ።

27 ናባቱ የሩሳላመፐ አንጾክያ ሄ ዎደ ዎꬌድኖ። 28 ኡንቱንቱ ግዶፐ አጋቦሳ ግያዌ ደንዲደ፥ ሳኣ ኡባን ዎልቃማ ኮሻይ ደንዳናዋ አያና ዎልቃን ትምቢትያ ኦዴዳ፤ ሄዌ ሀኔዳዌ ቃላዉደዮሳ ካዉተꬃ ዎድያና። 29 ካልያዋንቱ ሁጲያን ሁጲያን ባረንቱ ዎልቃ ኬና ሚሻ ከሲደ፥ ይሁዳን ደእያ ባረንቱ እሻቶ ማዱዋ የዳናዉ ቆፋ ቃቼድኖ። 30 ኡንቱንቱ ሄዋዳን ኦꬂደ፥ ሚሻ ባርናባሳ ቦላንነ ሳኦላ ቦላ ዎሳ ጎለ ጭማቶ የዴድኖ።