1 ጳዉሎስነ ስላሰ፥ አምፕጶሊሳናነ አጶሎንያና አꬊደ፥ ተሰሎንቀ ዬድኖ፤ ተሰሎንቀን አይሁዳ ዎሳ ጎሊ ደኤ። 2 ጳዉሎስ ባረ ዶያዳንካ ያ ገሌዳ፤ ሄዋን ሄዙ ሳምባታ ጋላሳቱዋን ጾሳ ማጻፋቱዋፐ አሳና ሃሳዬዳ፤ 3 ክርስቶስ ዋይያ አካናዉነ ሀይቁዋፐ ደንዳናዉ በስያዋ ኡንቱንቶ ብሊደ ኦዲድነ ቱማ ግዴዳዋካ ኡንቱንታ ኤርሲደ፥ “የሱስ ሀ ታን ህንተንቶ ኦድያዌ ክርስቶሳ” ያጌ። 4 ኡንቱንቱፐ እቱ እቱ የዉ ቱማ ግዴዳዋ አኬኪደ፥ ጳዉሎሳናነ ስላሰና ጋከቴድኖ፤ ሀዋዳንካ፥ ጾሳዉ ጎይንያ ጮራ ግሪከ አሳይነ ጮራ ቦንቼቴዳ ማጫዋንቱ፥ ጳዉሎሳናነ ስላሰና ጋከቴድኖ።

5 ሽን አይሁዳቱ ቃናቲደ፥ እት እት ኦሱ ባይና ኢታ አሳቱዋ ቆጫፐ ሺሺደ ካታማ አሳ ዋላሴድኖ፤ ጳዉሎሳነ ስላሳ አሳኮ ከሳና ማላ ኮዪደ፥ ያሶና ጎልያ ዶዴድኖ። 6 ጳዉሎስነ ስላሰ ኡንቱንቶ ቤተናን እጽና፥ ያሶናነ እት እት እሻቱዋ ካታማ ካፓቱዋኮ አፊደ፥ “ሀዋንቱ ጋድያ ኡባ መቶꬄዳዋንቱ፥ ሀዋካ ዬድኖ። 7 ያትና ያሶን ኡንቱንታ ባረ ሶይን ዎꬄዳ፤ ሀዋንቱ ኡባይ፥ ‘የሱሳ ግያ ሀራ ካቲ ደኤ’ ጊደ ቄሳረ አዛዙዋ ምንሲኖ” ያጊደ፥ ኮሻ ꬎቂሲደ ሃሳዬድኖ።

8 ሺቄዳ አሳይነ ካታማ ካፓቱ ሄዋ ስሲደ መቶቴድኖ። 9 ካፓቱ ያሶናነ ሀራቱዋ ዋስያን ብሌድኖ።

10 አማንያዋንቱ ጳዉሎሳነ ስላሳ ሳአይ ቃምያዋን ኤለካ ቤርያ የዴድኖ። ያ ጋኪደ፥ አይሁዳ ዎሳ ጎለ ገሌድኖ። 11 ቤርያ አሳቱ ተሰሎንቀን ደእያ አሳቱዋፐካ አꬍ ዶየቶ ዎዛናይ ደእያ ድራዉ፥ “ጳዉሎስ ጌዳዌ ቱመንቶነ” ያጊደ፥ ኡባ ጋላስ ጾሳ ማጻፋቱዋ ታማሪደ፥ ቃላ ኩመንꬃ ላሞታን አኬድኖ። 12 ሄዋ ድራዉ፥ ኡንቱንቱፐ ጮራቱ፥ ግሪካቱዋፐ ቦንቼቴዳ ጮራ ማጫዋንቱነ ጮራ አቱማ አሳቱ አማኔድኖ።

13 ሽን ተሰሎንቀን ደእያ አይሁዳቱ ጳዉሎስ ጾሳ ቃላ ቤርያንካ ኦዴዳዋ ስሴዳ ዎደ፥ ቤርያ ዪደ፥ አሳ አናና ዋላሴድኖ። 14 ሄዋፐ ጉይያን፥ እሻቱ ኤለካ ጳዉሎሳ አባ ማታን የድ አጌድኖ፤ ሽን ስላሰነ ጽሞቶሰ ቤርያን አቴድኖ። 15 ጳዉሎሳ ሞይዜዳ አሳቱ አቴና ጋꬄድኖ፤ ሄ አሳቱ ስላሰነ ጽሞቶሰ ባረንቶ ዳንዳየቴዳዋዳን፥ ኤለካ ባረኮ ያና ማላ፥ ጳዉሎስ ኪቴዳ ኪታ አኪደ፥ ቤርያ ስሜድኖ።

16 ጳዉሎስ አቴናን ስላሳነ ጽሞቶሳ ናጊደ፥ ካታማን ኤቃይ ኩሜዳዋ በኢደ ይሎቴዳ። 17 ሄዋ ድራዉ፥ አይሁዳ ዎሳ ጎልያን አይሁዳቱዋናነ ጾሳዉ ጎይንያ አይሁዳ ግደና አሳቱዋና ፓሉመቴ፤ ቃይ ኡባ ጋላስ ገያን ባረናና ጋከትያ አሳናካ ፓሉመቴ። 18 ቃይ ኤፕቆሮሳፐነ *ኤፕቆሮሳ፦ ሀዌ ጋድያ ግዲደ፥ ሀ ጋድያን ደእያ አሳቱ ናሸችያ አሳ ደኦ ኮይሮ ሳኣ ኦይቄዳ ያግ ታማርስያ ኤፕቆሮሳ ግያ ብታንያ ትምርትያ ካልያዋንታ። እስጾእክያፐ †እስጾእክያ፦ ሀዌካ ጋድያ ግዲደ፥ ሀ ጋደን ደእያ አሳቱ፥ ባረና ሞዱሳነ ባረ ቆፋን ካለሰትያዋ አሳይ ታማራና በሴ፥ ያግያ ትምርትያ ታማርስያ ዜኖ ያገትያ ብታንያ ትምርትያ ካልያዋንታ። ዬዳ እት እት ኤራንቻቱ ጳዉሎሳና ፓሉመቴድኖ፤ ኡንቱንቱፐ እቱ እቱ፥ “ሀ ቶፊናይ አያ ሃሳያናዉ ኮዪ?” ያጌድኖ።

ሀራቱ ጳዉሎሳ የሱሳባነ ሀይቁዋፐ እ ደንዴዳዋ ባረንቶ ኦድያ ድራዉ፥ “ኦራꬃ ጾሳቱባ ኦድያዋ ማላቴ” ያጌድኖ።

19-20 ጳዉሎሳ ኦይቂደ፥ “ሀ ኔን ታማርስያ ኦራꬃ የዉ አየንቶ ኑና ኤርሳርኪ? አያዉ ጎፐ፥ ኔን ኑዉ ኦራꬃባ ኦዳሳ፤ ስም ሀዌ አየንቶ ኑን ኤራናዉ ኮዬቶ” ያጊደ ጳዉሎሳ አርዮስፓጎሳ ጌተትያሳ አፌድኖ። 21 አቴና አሳይ ኡባይነ ሄዋን ደእያ እማꬃቱ ኦራꬃባ ሃሳዪድነ ስሲደ ፔሽያዋፐ አትን፥ ሀራባን ፔሽክኖ።

22 ጳዉሎስ አርዮስፓጎሳን ደእያ ሺቁዋ ስንꬃን ኤቂደ፥ ሀዋዳን ያጌዳ፤ “አቴና አሳቶ፥ ጾሳቶ ኡባባን ህንተንቱ ዳሪ ያይያዋ ታን በአይ። 23 አያዉ ጎፐ፥ ታን ህንተንቱ ጎይንያዋ ጼላደ አꬍሽን፥ ‘ኤረተና ጾሳዉ’ ጌተቲደ ጻፈቴዳ ያርሹዋ ሳኣ ቃይ ደማድ፤ ሄዋ ድራዉ፥ ሀ ህንተ ኤረናን ጎይንያዋ ታን ህንተንቶ ኦዳይ።

24 “አላምያነ አላምያን ደእያ ኡባባ መꬌዳ ጾሳይ ሳሉዋነ ሳኣ ጎዳይ፥ አሳይ ኬጼዳ ጌሻ ጎልያን ደኤና። 1 ካታ. 8:27፤ ኢሳ. 42:5፤ ኪታ 7:48 25 አየንቶ ፓጬዳ አሳዳን፥ አሳ ኩሽያ እ ጼለና፤ አያዉ ጎፐ፥ እ ባረ ሁጰዉ ደኡዋ ሸምፑዋነ ኡባባ አሳ ኡባዉ እሜዳ። 26 ጾሳይ አሳ ዛርያ ኡባ እት ኡራፐ መꬊደ፥ ጋድያ ኡባን ዎꬄዳ፤ እ ባረ ሁጰዉ ኡንቱንቱ ደአና ዎድያነ ሳኣ ካሰ ዛዋዬዳ።

27 “እ ሄዋ ኦꬄዳዌ ኡንቱንቱ ኦይቂ ኦይቂ ጼሊደ፥ ባረና ኮዪደ፥ ኦን ኤር ደማናዋንቴሻ ግያዋና፤ ግዶፐነ፥ ጾሳይ ኑፐ ኦስነ ሃኮ ግደና። 28 አያዉ ጎፐ፥ ህንተንቱፐ እት እት ኤራንቻቱ፥ ‘ኑን አ ናና’ ጌዳዋዳን፥ ኑን አን ፓጻ ደኤቶነ ቃጸቴቶ። 29 ስም ኑን ጾሳ ናና ግዴዳ ድራዉ፥ ጾሳይ አሳ ጭንጫተꬃንነ ቆፋን ዎርቃፐ ዎይ ብራፐ ዎይ ሹቻፐ ኦሰቴዳዋ ማላቴ ያጊደ፥ ቆፓናዉ በሰና። 30 ሄዋ ድራዉ፥ ጾሳይ አሳይ ኤርቤና ዎድያ አꬄዳ፤ ሽን ሀእ ኡባ ሳን አሳይ ኡባይ ናጋራፐ ስማና ማላ አዛዜዳ። 31 አያዉ ጎፐ፥ ጾሳይ ዎድያ ኬር ዎꬄዳ፤ ሄ ዎድያን ባረ ዶሬዳ ኡራን ሳኣን ደእያ አሳ ኡባ ቦላ ጽሎ ፕርዳ እ ፕርዳና፤ አሳ ኡባዉ ሀይቁዋፐ የሱሳ ደንꬄዳዋን ሄዋ ቱማዬዳ” ያጌዳ።

32 ኡንቱንቱፐ እት እት አሳቱ ሀይቁዋፐ ደንዱዋባ ጳዉሎሳፐ ስሲደ፥ አ ቦላ ቅሊጬድኖ፤ ሽን ሀራ አሳቱ አ፥ “ኑን ሀዋ ኔፐ ጉጂደ ስሳና ኮዬቶ” ጌድኖ። 33 ሄዋ ድራዉ፥ ጳዉሎስ ኡንቱንቱ ግዶፐ ከሴዳ። 34 ሽን እት እት አቱማ አሳቱ ጳዉሎሳና ጋከቲደ አማኔድኖ፤ ኡንቱንቱ ግዱዋን አርዮስፓጎሳን ደእያ ፕርዳ ጎለ ዳናይ ድዮናስዮስ፥ ዳማሪሶ ጌተትያ እት ምሽራትና ሀራ አሳቱ ደኢኖ።