1 ጳዉሎስ ቃይ ደርበነ ልስጽራ ቤዳ፤ ሄዋን ጽሞቶሳ ጌተትያ ካልያዌ፥ እት አማንያ አይሁዳ ምሽራት ናአይ ደኤ፤ አ አቡ ግሪከ አሳ። 2 ልስጽራንነ እቆንዮነን ደእያ እሻቱ ጽሞቶሳባ ሎይꬅ ማርካቴድኖ። 3 ጳዉሎስ አ ጽሞቶሳ ባረናና አፋናዉ ኮዪደ፥ አ አቡ ግሪከ *አ አቡ ግሪከ አ ኦይቂደ ቃጻሬዳ፦ ግሪከ አሳይ ባረንቱ ናና ቃጻርክኖ። ሽን ጽሞቶሰ ቃጻረታና ꬋዮፐ፥ አይሁደ አሳይ አ አከና ድራዉ፥ ጳዉሎስ አ ኦይቂደ ቃጻሬዳ። አሳ ግዴዳዋ ሄዋን ደእያ አይሁዳ ኡባይ ኤርያ ድራዉ፥ አ ኦይቂደ ቃጻሬዳ። 4 ኡንቱንቱ ካታማቱዋና ቢደ፥ የሱስ ኪቴዳ የሩሳላመን ደእያዋንቱነ ጭማቱ ዎꬄዳ ህግያ አማንያዋንቱ ናጋና ማላ፥ ኡንቱንቶ ኦዲደ አꬌድኖ። 5 ሄዋ ድራዉ፥ አማንያዋንቱ አማኑዋን ምን፥ ፓይዱዋንካ ጋላሳፐ ጋላሳን ዳር ዳር ቤድኖ።

6 ኢስያን ቃላ ኦደና ማላ፥ ጌሻ አያናይ ኡንቱንታ ድጌዳ ድራዉ፥ ፕርግያ ጋድያናነ ጋላትያ ጋድያና አꬌድኖ። 7 ኡንቱንቱ ሚስያ ዛዋ ጋኬዳ ዎደ፥ ቢታንያ ባናዉ ኮዬድኖ፤ ሽን የሱሳ አያናይ ኡንቱንታ ድጌዳ። 8 ሄዋ ድራዉ፥ ኡንቱንቱ ሚስያ ማታና አꬊደ፥ ጽሮኣዳ ዎꬌድኖ። 9 ጳዉሎስ ቃማ ሳጻን እት ማቅዶንያ ብታኒ ባረና፥ “ማቅዶንያ ፕናደ ኑና ማዳርኪ” ያጊደ ኤቂ ዎስሽን በኤዳ። 10 ሳፃ እ በኤዳዋፐ ጉይያን፥ ኑን ኤለካ ማቅዶንያ ባናዉ ኮዬዶ፤ አያዉ ጎፐ፥ ዎንጋላ ምሽራቹዋ ያን ደእያ አሳዉ ኦዳናዉ፥ ጾሳይ ኑና ጼሴዳዋ ኑዉ ማላቴዳ።

11 ሄዋ ድራዉ፥ ጽሮኣዳፐ ደንዲደ፥ ስት ጊደ ማርካብያን ሳሞትራቀ ቤዶ፤ ዎንተꬃ ጋላስ ናጱለ ቤዶ። 12 ሄዋፐ ፕልጵስዮሳ ቤዶ፤ ፕልጵስዮስ ማቅዶንያ ቢታዉ ሁጰ ካታማ፤ ቃይ ሮመ አሳይ ደእያ ካታማ፤ ኑን ሄ ካታማን አማሬዳ ጋላሳ ኡቴዶ።

13 ሳምባታ ጋላስ፥ ካታማፐ ጋጻን ሻፋ ዶናን አይሁዳቱ ጾሳ ዎስያ ሳአይ ደእያዋ አኬኪደ ቤዶ፤ ሄዋን ኡቲደ ሺቄዳ ማጫ አሳዉ ቃላ ኦዴዶ።

14 እት ሊድያ ጌተተዉና፥ ትያጽሮና ካታማፐ ያደ ጾሳ አማነዉና፥ ዞኦ ማዩዋ ዛልእያ ምሽራታ፥ ኑን ኦድያዋ ስሳዱ፤ ጳዉሎስ ኦድያዋካ እዛ ስሳና ማላ ጾሳይ እ ዎዛና ዶዬዳ። 15 ሊድያ ባረ ሶይ አሳና እትፐ ጻማቀቴዳዋፐ ጉይያን ኑና፥ “ህንተንቱ ታና ጎዳ ቱማተꬃን አማናዉ ጊደ ቆፖፐ፥ ታ ሶይን ደእሽተ” ጋደ ዎሳዱ፤ ምንሳደ ሾባዱ።

16 ኑን ጾሳ ዎስያሳ ቢሽን፥ ኢታ አያናይ እዝ ቦላ አቅና ካይያ እት ቆማ ናታ ኑናና ጋከታዱ፤ ሄ ናታ ካያደ ዳሮ ሚሻ ባረ ጎዳቶ ደማዱ። 17 ጋከታደ ጳዉሎሳነ ኑና ካላደ፥ “ሀዋንቱ ህንተንቶ አታና ኦግያ ኦድያዋንቱ፥ ኡባፐ ቦላ ጾሳ አይለቱዋ” ጋደ ኮሻ ꬎቁ ኦꬃደ ሃሳያዉ።

18 ኡባ ጋላስ ሄዋዳን ጋዉ፤ ሽን ጳዉሎስ ይሎቲደ ጉየ ስም፥ ሄ ኢታ አያና፥ “ኔን ኢፐ ከሳና ማላ የሱስ ክርስቶሳ ሱንꬃን ኔና አዛዛይ” ያጌዳ፤ ሄ ማንእያን ኢታ አያናይ ኢፐ ከስ አጌዳ።

19 ሽን እዝ ጎዳቱ ባረንቱ ሚሻ ደማና ኦጊ ꬋዬዳዋ በኢደ፥ ጳዉሎሳነ ስላሳ ኦይቂደ፥ ገያ ሳኣን ደእያ ዳናቱዋ ስንꬃ ጎች ከሴድኖ። 20 ዳናቱዋ ስንꬃ ኡንቱንታ አፊደ፥ “ሀዋንቱ አይሁዳ አሳ ግዲደ፥ ኑ ካታማ አሳ ሎይꬅ መቶꬂኖ። 21 ኑን ሮመ ጋድያ አሳ ግዲደ፥ አካናዉነ ኦꬃናዉ ዎጋ ግደናባ ታማርሲኖ” ያጌድኖ።

22 አሳይ እት ባጋ ግዲደ፥ ጳዉሎሳ ቦላንነ ስላሳ ቦላ ደንዴዳ፤ ዳናቱካ ኡንቱንቱ ማዩዋ ቃር አኪደ፥ ጻምኣን ኡንቱንታ ሾጫና ማላ አዛዜድኖ። 23 ኡንቱንቱ ዳርስ ዋꬌዳዋፐ ጉይያን፥ ቃሾ ጎልያን የጌድኖ። ቃሾ ጎልያ ናግያዌካ ኡንቱንታ ምንስ ናጋናዳን አዛዜድኖ። 24 ቃሾ ጎልያ ናግያዌ ሄ አዛዙዋ አኪደ፥ ጳዉሎሳነ ስላሳ ቃሾ ጎልያ ቆልኦ ገልሴዳ፤ ኡንቱንቱ ገድያካ ምꬃና ጋꬅ ዳራጺደ ቃቼዳ።

25 ሽን ቃማ ብላሄ ግድያ ሄራን ጳዉሎስነ ስላሰ ጾሳ ዎሲደ፥ ማዝሙርያ የጺደ ጾሳ ጋላቲኖ፤ ቃሸቶ አሳይ ኡንቱንቱ ግያዋ ስሴ። 26 ቃሾ ጎልያ ጻጱ ቃጻና ጋካናዉ ዎዛና አናን ቢታይ ዳርስ ቃጼዳ፤ ሄ ማንእያን ፐንጊካ ኡባይ ዶየት አግና፥ ቃሸቴዳ አሳ ኡባ ሳንꬃላታይ ብለት ዎꬌዳ። 27 ቃሾ ጎልያ ናግያዌ ገምእሹዋፐ ቤጎትያ ዎደ፥ ቃሾ ጎልያ ፐንጊካ ኡባይ ዶየቴዳዋ በኢደ፥ ቃሸቶ አሳይ ከስ አኪደ ብድጌዳዋ አዉ ማላትና፥ ባረና ዎꬋናዉ ቆፒደ፥ ጩብያ አኬዳ። 28 ሽን ጳዉሎስ ኮሻ ꬎቁ ኦꬂደ፥ “ኔን ኔና አያነ ኦꬆፓ፤ አያዉ ጎፐ፥ ኑን ኡባይ ሀዋን ደኤቶ” ያጌዳ።

29 ቃሾ ጎልያ ናግያዌ ጾምፕያ ዎስ አኪደ፥ ኤለካ ቆልኦ ዎጼዳ፤ ኮኮሪደ ጳዉሎሳ ስንꬃንነ ስላሰ ስንꬃን ጉፋኔዳ፤ 30 ኡንቱንታ ካረ ከሲደ፥ “ታ ጎዳቶ፥ ታን አታናዉ አያ ኦꬃና በሲ?” ያጌዳ።

31 ጳዉሎስነ ስላሰ አ፥ “ጎዳ የሱስ ክርስቶሳ አማና፤ ኔን አታና፤ ነ ሶይ አሳይካ” ያጌድኖ። 32 ኡንቱንቱ አዉነ አ ሶይን ደእያ ኡባዉ ጎዳ ቃላ ኦዴድኖ። 33 ቃማ ሄ ሳትያንካ ቃሾ ጎልያ ናግያዌ ኡንቱንታ አፊደ ኡንቱንቱ ማይꬃ ሜጬዳ፤ ሄ ማንእያን ባረ ሶይ አሳ ኡባና ጻማቀት አጌዳ። 34 ጳዉሎሳነ ስላሳ ፑደ ባረ ሶይ አፊደ፥ ኡንቱንቶ ቁማ አꬄዳ፤ እ ባረ ሶይ አሳ ኡባና ጾሳ አማኔዳ ድራዉ፥ ናሸቴዳ።

35 ዎንትና ዳናቱ፥ “ሄ አሳቱዋ ብላ” ያጊደ፥ ፖልስያ ካፓቱዋ አኮ ኪቴድኖ። 36 ሄዋፐ ጉየ ቃሾ ጎልያ ናግያዌ፥ “ህንተንቱ ብለታና ማላ፥ ዳናቱ ታዉ ኪቴድኖ፤ ስም ሀእ ከሲደ ሳሮተꬃን ቢተ” ያጊደ ሄ ኪታ ጳዉሎሳዉ ኦዴዳ።

37 ሽን ጳዉሎስ ሄ ፖልስያ ካፓቱዋ፥ “ኑን ሮመ ጋደ አሳ †ሮመ ጋደ አሳ፦ ሮመ ካዉተꬃን ኤረቲደ ደእያ ጉꬃ አሳይ ሄ ጋደ አሳቱዋ ጌተቲኖ። ሄዋንቶካ ቃይ ሀራቱዋፐ ዱማትያ ማታይነ ካጫይ ደኤ። ግድሽን፥ ኡንቱንቱ ኑና ፕርዳይ ባይናን አሳ ስንꬃን ዋꬊደ፥ ቃሾ ጎልያን የጌድኖ። ሀእ ኑና ጌማን ከስ የዲኖ? ሀነና፤ ኡንቱንቱ ባረንቱ ሁጰዉ ዪደ፥ ኑና ከስኖ” ያጌዳ።

38 ፖልስያ ካፓቱ ዳናቶ ሄዋ ኦድና፥ ጳዉሎስነ ስላሰ ሮመ ጋደ አሳ ግዴዳዋ ስሴዳ ዎደ፥ ያዬድኖ። 39 ሄዋ ድራዉ፥ ዳናቱ ዪደ ኡንቱንታ፥ “ኑን ህንተንታ ናቄዶ” ጌድኖ። ቃሾ ጎልያፐ ካረ ኡንቱንታ ከሲደ፥ ካታማፐ ከሲደ ባና ማላ ዎሴድኖ። 40 ጳዉሎስነ ስላሰ ቃሾ ጎልያፐ ከሲደ፥ ሊድያ ሶይ ቤድኖ፤ ያን እሻቱዋና ጋከቲደ፥ ኡንቱንታ ምንሲደ ሄዋፐ ቤድኖ።