1 እት እት አሳቱ ይሁዳፐ አንጾክያ ዎꬊደ፥ “ሙሴ ዎጋዳን፥ ህንተ ቃጻረተናዋ ግዶፐ፥ አታናዉ ዳንዳይክታ” ያጊደ እሻቱዋ ታማርሱዋ ዶሜድኖ። ዎጋ 12:3 2 ጳዉሎስነ ባርናባስ ኡንቱንቱና ዳርስ ዋላቀቲደ ፓሉመትና፥ አንጾክያን ደእያ እት እት ሀራ አሳቱ ሄ ፓሉማ ድራዉ፥ ጳዉሎሳናነ ባርናባሳና የሩሳላመ ቢደ፥ የሱስ ኪቴዳዋንቱናነ ጭማቱዋና ጋከታናዉ ቆፋይ ቃሸቴዳ።

3 አማንያ አሳቱ ኡንቱንታ ኪቲደ ኦግያን ማድሽን፥ አይሁዳ ግደናዋንቱ ጾሳኮ ስሜዳዋ ኦዲደ፥ ፕንቂያናነ ሳማርያና አꬌድኖ፤ ሄዌ እሻቱዋ ኡባ ሎይꬅ ናሸቼዳ። 4 ኡንቱንቱ የሩሳላመ ጋኬዳ ዎደ፥ አማንያዋንቱ፥ የሱስ ኪቴዳዋንቱነ ጭማቱ ኡንቱንታ ሞኬድኖ፤ ጾሳይ ባረንቱን ኦꬄዳዋ ኡባ ኦዴድኖ። 5 ሽን ፓርሳዋቱዋ ባጋፐ አማኔዳ እት እት አሳቱ ደንድ ኤቂደ፥ “ህንተንቱ ኡንቱንታ ቃጻራናዉነ ሙሴ ህግያ ናጋና ማላ አዛዛናዉ በሴ” ያጌድኖ።

6 የሱስ ኪቴዳዋንቱነ ጭማቱ ሄዋ ዞረታናዉ ሺቄድኖ። 7 ሎይꬅ ሃሳዬዳዋፐ ጉይያን፥ ጰጽሮስ ደንድ ኤቂደ፥ ኡንቱንታ ሀዋዳን ያጌዳ፤ “ታናዳን አማንያዋንቶ፥ አይሁዳ ግደናዋንቱ ዎንጋላ ምሽራቹዋ ቃላ ታ ዶናፐ ስሲደ አማናና ማላ፥ ታና ጾሳይ ህንተ ግዶፐ በን ዶሬዳዋ ህንተንቱ ኤሪታ። 8 አሳ ዎዛና ኤርያ ጾሳይ ጌሻ አያና ኑዉ እሜዳዋዳን፥ ኡንቱንቶካ እሚደ ቱማዬዳ። 9 ኡንቱንቱ አማኔዳ ድራዉ፥ እ ኡንቱንቱ ዎዛና ጌሺደ፥ ኑ ግዱዋንነ ኡንቱንቱ ግዱዋን ዱማተꬃ ዎꬅቤና። 10 ሄዋ ድራዉ፥ ኑ አዎቱነ ኑን ቶካናዉ ዳንዳይቤና ዎልቃማ ቶኩዋ ካልያዋንቱ ሞርግያን ዎꬂደ፥ ሀእ ህንተ አያዉ ጾሳ ፓጪቴ? 11 ሽን ጎዳ የሱስ ክርስቶሳ አꬎ ኬካተꬃን ኡንቱንቱ አቴዳዋዳን፥ ኑንካ አቴዳዋ አማኔቶ” ያጌዳ።

12 አሳይ ኡባይ ጮኡ ጊደ፥ ባርናባስነ ጳዉሎስ አይሁዳ ግደና አሳ ግዶን ባረንቱ ባጋና ጾሳይ ኦꬄዳ ማላታነ ኦራꬃባ ኡባ ኦድሽን ስሴ።

13 ኡንቱንቱ ሃሳያ ዉርሴዳዋፐ ጉይያን፥ ያቆብ ሀዋዳን ያጊደ ዛሬዳ፤ “እሻቶ፥ ታን ግያዋ ስስተ። 14 ጾሳይ አይሁዳ ግደናዋንቱ ግዶፐ ባረዉ ሀንያ አሳ አካናዉ አይሁዳ ግደናዋንቶ ኮይሮ ዎት ቆፔደንቶ ስሞን ኦዴዳ። 15-18 ናብያ ቃላይ ሀዋና ጊጌ፤ ጎዳይ ዳሮ ዎድያፐ ዶሚደ፥ አሳ ሀዋ ኤርሲደ፥ ጾሳ ማጻፋን ሀዋዳን ያጌዳ፤ አሞጻ 9:11-12

19 “ሄዋ ድራዉ፥ ታ ቆፋ ግዶፐ፥ አይሁዳ ግደናዋንቱፐ ጾሳኮ ስምያዋንታ ኑን መቶꬃናዉ ኮሸና። 20 ሽን ኡንቱንቱ ኤቃን ቱኔዳዋ ሜና ማላ፥ ዎሹመና ማላ፥ ባኩቴዳ መህያ አሹዋ ሜና ማላነ ሱꬃ ኡሸና ማላ፥ ኡንቱንቶ ኑን ዳብዳቢያ ጻፋናዉ ኮሼ። ከሳ 34:15-17፤ ዎጋ 17:10-16፤ 18:6-23 21 አያዉ ጎፐ፥ ሙሴ ህግያ ካሰ የለታፐ ዶሚደ ሳምባታን ሳምባታን አይሁዳ ዎሳ ጎለቱዋን ናባቢደ፥ አ ቃላ ካታማ ኡባን ኦድያዋንቱ ደኢኖ” ያጌዳ።

22 ሄዋፐ ጉይያን፥ የሱስ ኪቴዳዋንቱነ ጭማቱ ዎሳ ጎለ አሳ ኡባና እትፐ ባረንቱ ግዶፐ አማሬዳ አሳቱዋ ዶሪደ፥ ጳዉሎሳናነ ባርናባሳና አንጾክያ የዳናዉ ቆፋ ቃቼድኖ፤ ኡንቱንቱ ዳሮ ቦንቼቴዳ ላኡ አሳቱዋ ባርሳባ ጌተትያ ይሁዳነ ስላሳ ዶሬድኖ። 23 ያቲደ ሀዋዳን ግያ ዳብዳቢያ ጻፊደ፥ ኡንቱንቱ ቦላ ኪቴድኖ፤ “ኑን የሱስ ኪቴዳዋንቱነ ጭማቱ ህንተ እሻቱ፥ አንጾክያን፥ ሶርያንነ ክልቂያን ደእያ አይሁዳ ባጋ ግደና እሻቶ ኑ ሳሮታ ኪቴቶ።

24 “ኑን አዛዝቤና አሳቱ ኑ ግዶፐ ቢደ፥ ‘ህንተንቱ ቃጻረታናዉነ ሙሴ ህግያ ናጋናዉ በሴ’ ጊደ፥ ህንተንታ መቶꬄዳዋነ ይሎዬዳዋ ስሲደ፥ 25-26 ኑ ጎዳ የሱስ ክርስቶሳ ሱንꬃ ድራዉ፥ ባረንቱ ሸምፑዋ ኦሌዳ ኑን ሲቅያ ባርናባሳናነ ጳዉሎሳና ዶረቴዳ አሳቱዋ ህንተንቱኮ ኪታናዉ እት ዎዛናን ኑ ቆፋ ቃቼዶ። 27 ሄዋ ድራዉ፥ ኑን ጻፌዳዋ ኡንቱንቱ ባረንቱ ሁጰዉ ባረንቱ ዶናን ህንተንቶ ኦዳና ማላ፥ ይሁዳነ ስላሳ ኪቴዶ።

28-29 “አያዉ ጎፐ፥ ኤቃዉ ያርሼዳዋ ሞፕተ፤ ሱꬃ ኡሾፕተ፤ ባኩቴዳ መህያ አሹዋ ሞፕተ፤ ዎሹሞፕተ። ሀ ኮሽያዋንቱፐ አትን፥ ሀራ ዴጽያ የዉዋ ህንተንታ ቶሰና ማላ፥ ኑንነ ጌሻ አያናይ የዉዋ ኤኖ ጊደ አኬዶ፤ ሀ ኡባባፐ ህንተ ሁጲያ ናጎፐ፥ ህንተንቱ ሎኦባ ኦꬂታ። ስም ሳሮ ደእተ” ያጌድኖ።

30 ሄዋ ድራዉ፥ ኪተቴዳዋንቱ ሞይዘት፥ አንጾክያ ዎꬊደ፥ አማንያ አሳ ሺሺደ፥ ዳብዳቢያ አሳዉ እሜድኖ። 31 ኡንቱንቱ ሄ ምንስያ ዳብዳቢያ ናባቤዳ ዎደ፥ ናሸቴድኖ። 32 ቃይ ይሁዳይነ ስላሰ ባረንቱ ሁጰዉ ናባቱዋ ግድያ ድራዉ፥ እሻቱዋ ሎይꬅ ማቂደ ምንሴድኖ። 33 ኡንቱንቱ አንጾክያን አማሬዳ ጋላሳ ኡቴዳዋፐ ጉይያን፥ እሻቱ ሳሮተꬃን ሞይዝና፥ ባረንታ ኪቴዳዋንቱኮ ስሜድኖ። 34 ሽን ስላሰ ያን አታናዉ ባረ ቆፋ ቃቼዳ። *ስላሰ አንጾክያን አታናዉ ባረ ቆፋ ቃቼዳ፥ ግያዌ ጮራ ሀራ ቃላ ብለꬃን ባዋ።

35 ቃይ ጳዉሎስነ ባርናባስ ሀራ ጮራ አሳቱዋና እትፐ ጎዳ ቃላ ታማርሲደነ ዎንጋላ ምሽራቹዋ ኦዲደ፥ አንጾክያን ኡቴድኖ።

36 አማሬዳ ጋላሳፐ ጉይያን፥ ጳዉሎስ ባርናባሳ፥ “ኑን ጎዳ ቃላ ኦዴዳ ካታማ ኡባን ኑ እሻቱ ዎት ደኢኖንቶ፥ ጉየ ስሚደ፥ ጾሞስ በኦይተ” ያጌዳ። 37 ሄዋፐ ጉየ ባርናባስ ማርቆሳ ጌተትያ ዮሃንሳ ባረንቱና አፋናዉ ኮዬዳ። 38 ሽን ጳዉሎስ ማርቆሳ ባረንቱና አፋናዉ ኮይቤና፤ አያዉ ጎፐ፥ እ ኡንቱንቱፐ ጵንፍልያን ሻከቴዳ፤ ቃይ ኡንቱንቱና ኦሶ ብቤና። 39 ኡንቱንቱ ግዱዋን ሎኤና ዋላሳይ ከስና፥ እቱ እቱዋፐ ሻከቴዳ፤ ባርናባስ ማርቆሳ አኪደ፥ ማርካብያን ቆጲሮሳ ቤዳ። 40 ሽን ጳዉሎስ ስላሳ አክና፥ እሻቱ አ ሀዳራ ጾሳ አꬎ ኬካተꬃዉ እሜዳዋፐ ጉይያን ቤዳ። 41 ያቲደ አማንያ አሳቱዋ ምንሲደ፥ ሶርያናነ ክልቂያና አꬌዳ።