1 ካሰዋዳንካ ጳዉሎስነ ባርናባስ እቆንዮነን አይሁዳቱዋ ዎሳ ጎለ ገሊደ፥ ቃላ ኦዴድኖ፤ ሄዋፐ ጉይያን ጮራ አይሁዳቱነ አይሁዳ ግደናዋንቱ አማኔድኖ። 2 ሽን አማንቤና አይሁዳቱ አይሁዳ ግደናዋንቱ ዎዛና ላሚደ፥ እሻቱዋ ቦላ ሀንቀꬄድኖ። 3 የሱስ ኪቴዳዋንቱ ሄዋን ዳሮ ዎድያ ጋምኤድኖ፤ ኡንቱንቱ ጎዳባ ያየናን ኦዴድኖ፤ ጎዳይ ማላታነ ኦራꬃባ ኡንቱንቱ ኦꬃና ማላ፥ ኡንቱንቶ ዎልቃ እሜዳዋን ባረ አꬎ ኬካተꬃ ቃላባይ ቱማ ግዴዳዋ ማርካቴዳ። 4 ሽን ካታማ አሳይ ሻከት፥ ባጋይ አይሁዳቱዋኮ፥ ባጋይ የሱስ ኪቴዳዋንቱኮ ስሜድኖ።

5 አይሁዳ ግደናዋንቱነ አይሁዳቱ ባረንቱ ካፓቱዋና እትፐ የሱስ ኪቴዳዋንታ ቆሀናዉነ ሹቻን ጫዳናዉ ቆፔዳ ዎደ፥ 6 የሱስ ኪቴዳዋንቱ ሄዋ ኤሪደ፥ ልስጽራነ ደርበ ጌተትያ ልቃኦንያ ካታማቱዋነ ኡንቱንቱ ሄራን ደእያ ጋድያ ብ አጌድኖ፤ 7 ሄዋን ዎንጋላ ምሽራቹዋ ኦዲኖ።

8 ባረ ዳይ ኡሉዋፐ የለቶደፐ ዶሚደ፥ ላኡ ገዲ ስልና፥ ኡባካ ሀመተና እት ብታኒ ልስጽራን ደኤ። 9 ሄ ብታኒ ጳዉሎስ ኦድሽን ስሴ፤ ጳዉሎስ አ ጫድ ጼልያ ዎደ፥ ፓጻናዉ አዉ አማኑ ደእያዋ በኢደ፥ 10 ኮሻ ꬎቂሲደ አ፥ “ስት ጋደ ነ ገድያን ኤቃ” ያጌዳ፤ ጉፕ ደንዲደ፥ ሀመታ ዶሜዳ።

11 ጳዉሎስ ኦꬄዳዋ አሳይ በኢደ፥ ባረ ኮሻ ልቃኦንያ ቃላን ꬎቁ ኦꬂደ፥ “ጾሳቱ አሳ ማላቲደ ኑኮ ዎꬌድኖ” ያጌዳ። 12 አሳይ ባርናባሳ፥ “ድያ”*ድያ፦ ጉሳይ ግሪካቱዋ ጾሳቱዋ ኡባቱዋፐ ቦላ ጌተት ፓይደትያ ኡንቱንቱ ኤቃ። ጊደ፥ ጳዉሎስ ሃሳያዉ ዋናትያ ድራዉ፥ አ፥ “ሄርሜሳ” ጊደ ሱንꬄዳ። 13 ጌሻ ጎሊ ካታማ ማታን ደእያ ድያ ቄሳይነ አሳይ ኮሩማቱዋነ ዳሪ ሎእያ ጪሻቱዋ የሱስ ኪቴዳዋንቶ ያርሹዋ ያርሻናዉ ኮዪደ፥ ፐንግያ አሄድኖ።

14 ሽን የሱስ ኪቴዳ ባርናባስነ ጳዉሎስ ሄዋ ስሴዳ ዎደ ባረንቱ ማዩዋ ፔꬊደ፥ አሳ ግዶ ዎጺደ፥ 15 ባረንቱ ኮሻ ꬎቁ ኦꬂደ፥ ሀዋዳን ያጌድኖ፤ “አሳዉ፥ ሀዋ አያዉ ኦꬂቴ? ኑንካ ህንተንቱዋዳን መቴዳ አሳ፤ ሀ ፓና የዉዋፐ ሳሉዋነ ሳኣ፥ አባነ ኡንቱንቱ ግዶን ደእያ ኡባባ መꬌዳ ደኡዋ ጾሳኮ ህንተ ስማና ማላ፥ ህንተንቶ ኑን ዎንጋላ ምሽራቹዋ ኦዴቶ። ከሳ 20:11፤ ማዝ. 146:6 16 እ በን አሳ ዘረꬃይ ኡባይ ባረንቱ ኦግያ ባና ማላ የድ አጌዳ። 17 ህንተንቶ እራ ሳሉዋፐ ቡክሴዳ፤ ካꬃካ እ ዎድያን እሜዳ፤ ቃይ ቁማ እሚደ፥ ህንተንታ ሎይꬅ ናሸቼ፤ ያቲደ ህንተንቶ ሎኦባ ኦꬂደ፥ ኡባ ዎደካ ባረዉ ማርካ ꬋይቤና” ያጌድኖ። 18 የሱስ ኪቴዳዋንቱ ሄዋ ጊደ፥ ባረንቶ አሳይ ያርሸና ማላ፥ መቶቲደ ድጌድኖ።

19 አንጾክያፐነ እቆንዮነፐ ዬዳ አይሁዳቱ አሳ ባረንቱ ባጋ ዛሪደ፥ ሹቻን ጳዉሎሳ ጫዴድኖ፤ ኡንቱንቶ ሀይቄዳዋ ማላትና፥ ካታማፐ ካረዉ አ ጎች ከሴድኖ። 20 ሽን ካልያዋንቱ አ ማታን ዩይ አꬊደ ኤቂሽን፥ እ ደንዲደ፥ ካታማ ገሌዳ። ዎንተꬃ ጋላስ ባርናባሳና እትፐ ደርበ ቤዳ።

21-22 ኡንቱንቱ ደርበ ካታማን ዎንጋላ ምሽራቹዋ ኦዲደ፥ ጮራ አሳይ የሱሳ አማናና ማላ ኦꬄዳዋፐ ጉይያን፥ ልስጽራ፥ እቆንዮነነ ጲሲድያን ደእያ አንጾክያ ስሜድኖ፤ ያቲደ ሄዋን ካልያዋንታ ምንሲደነ ኡንቱንቱ አማኑዋን ምን ደአና ማላ ዞሪደ፥ “ኑን ጾሳ ካዉተꬃ ገላናዉ ሎይꬅ ዋየታና በሴ” ያጌድኖ። 23 ቃይ አማንያዋንቶ ደእያ ሳን ደእያ ሳን ጭማቱዋ ዶሪደ፥ ጾሜዳዋፐነ ዎሴዳዋፐ ጉይያን፥ ኡንቱንቱ አማኔዳ ጎዳዉ ኡንቱንታ ሀዳራ እሜድኖ።

24 ጲሲድያ ጋድያፐ አꬊደ፥ ጵንፍልያ ዬድኖ፤ 25 ጰርገን ቃላ ኦዴዳዋፐ ጉይያን፥ አጻልያ ቤድኖ። 26 ሄዋፐ ኡንቱንቱ ባረንቱ ፖሌዳ ኦሱዋ ድራዉ፥ አሳይ ኡንቱንቱ ሀዳራ ጾሳ አꬎ ኬካተꬃዉ እሜዳ አንጾክያ ማርካብያን ስሜድኖ።

27 አንጾክያ ጋኬዳ ዎደ አማንያ አሳ ሺሺደ፥ ጾሳይ ባረንቱና እትፐ ኦꬄዳ ኡባባነ፥ አይሁዳ ግደና አሳይ አማናና ማላ፥ ኡንቱንቶ ፐንግያ ዶዬዳዋ፥ አሳዉ ኦዴድኖ። 28 ያቲደ ሄዋን ካልያዋንቱና ዳሮ ዎድያ ጋምኤድኖ።