1 አጲሎስ ቆሮንቶሳን ደእሽን፥ ጳዉሎስ ቆሞ ባጋና አꬊደ፥ ኤፈሶነ ቤዳ፤ እት እት ካልያዋንታ ደሜዳ። 2 ጳዉሎስ ኡንቱንታ፥ “ህንተንቱ አማኔዳ ዎደ ጌሻ አያና አኬድቴ?” ያጊደ ኦቼዳ።

ኡንቱንቱ፥ “ቱይት፥ አክበይኮ፤ ሀራይ አቶ፥ ጌሻ አያናይ ደእያዋካ ስስበይኮ” ያጌድኖ።

3 ጳዉሎስ ኡንቱንታ፥ “ያትና፥ አያን ጻማቀቴድቴ?”*አያን ጻማቀቴድቴ? ሀዋ ጉሳይ ኦ ሱንꬃን ጻማቀቴድቴ፥ ጉሳ። ያጌዳ።

ኡንቱንቱ፥ “ኑን ዮሃንሳ ጽንቃታን ጻማቀቴዶ” ያጊደ ዛሬድኖ።

4 ጳዉሎስ፥ “ዮሃንስ ባረፐ ጉይያን ይያ የሱስ ክርስቶሳን አሳይ አማናና ማላ፥ አሳዉ ኦዲደ፥ ናጋራፐ ስምያ ጽንቃታን ጻማቄዳ” ያጌዳ።

5 ኡንቱንቱ ሄዋ ስሴዳ ዎደ፥ ጎዳ የሱስ ክርስቶሳዉ ግዳናዉ ጻማቀቴድኖ። 6 ጳዉሎስ ባረ ኩሽያ ኡንቱንቱ ቦላ ዎꬄዳ ዎደ ጌሻ አያናይ ኡንቱንቱ ቦላን ዎꬍና፥ ዱማ ዱማ ቃላን ሃሳዬድኖ፤ ቃይ ትምቢትያካ ኦዴድኖ። 7 ሄዋን ታማነ ላኡ አሳቱዋ ግድያዋንቱ ደኢኖ።

8 ጳዉሎስ አይሁዳ ዎሳ ጎለ ገሊደ፥ ጾሳ ካዉተꬃባ ፓሉመቲድነ አኬክሲደ፥ አሳና ሄዙ አገና ግድያዋ ኬና ያየናን ሃሳዬ። 9 ሽን ኡንቱንቱፐ እቱ እቱ ማካሊደ፥ ጮራ አሳ ስንꬃን ጎዳ ኦግያ ቦሪደ አማነናን እጽና፥ ጳዉሎስ ኡንቱንቱፐ ሻከት፥ ባረና ካልያዋንታ ባረናና አፌዳ፤ ጽራኖሳ ግያ ትምርተ ጎልያን ኡባ ጋላስ ፓሉመቴ። 10 ጳዉሎስ ላኡ ላይꬃ ጋካናዉ ቃላ ኦዴዳ፤ ሄዋ ድራዉ፥ ኢስያን ደእያ አሳይ ኡባይ፥ አይሁዳቱካ አይሁዳ ግደናዋንቱካ ጎዳ ቃላ ስሴድኖ።

11 ጾሳይ ጳዉሎሳ ባጋና ዱማ ማላታ ኦꬄዳ። 12 ሄዋ ድራዉ፥ አሳይ አ ቦላይ ቦቼዳ ማራብያ ዎይ ማዩዋ ሀርጋንቻቶ አፌ፤ ሀርጋንቻቱካ ፓጺኖ፤ ኢታ አያናቱካ ኡንቱንቱፐ ከሲኖ።

13 ኢታ አያናቱዋ ከሲደ ዩይያ አይሁዳቱዋፐ እቱ እቱ፥ “ጳዉሎስ ቃላ ኦድያ የሱሳ ሱንꬃን ኑን ህንተንታ ከስተ ጊደ አዛዜቶ” ያጊደ፥ ኢታ አያናቱ ደእያ አሳቱዋ ቦላን ጎዳ የሱሳ ሱንꬃ ጼስ በኤድኖ። 14 ቄሳቱዋ ካፑዋ አስቄዋ ግያ እት አይሁዳ ብታንያዉ ሄዋ ኦꬄዳ ላፑ ናናይ ደኢኖ።

15 ኢታ አያናይ ኡንቱንቶ ዛሪደ፥ “ታን የሱሳ ኤራይ፤ ጳዉሎሳካ ኤራይ። ሽን ህንተንቱ ኦኔ?” ያጌዳ።

16 ኢታ አያናይ ደእያ ብታኒ ኡንቱንቱ ቦላ ጉፕ ዎꬍና፥ ኡንቱንቱ ማሱንጺደ፥ ሄ ጎልያፐ ካሎ ዎጻና ጋካናዉ፥ ዎልቃሚደ ጾኔዳ። 17 ኤፈሶነን ደእያ አይሁዳቱነ አይሁዳ ግደናዋንቱ ኡባይ ሄዋ ስሲደ ኡባይ ዳሮ ያዬድኖ፤ ጎዳ የሱሳ ሱንꬃይካ ዳሮ ቦንቼቴዳ። 18 አማንያዋንቱፐ ጮራ አሳቱ ባረንቱ ኦꬄዳዋ ፓጺድነ ቆንጭያን ኦዲደ ዪኖ። 19 ብትያዋንቱፐ ጮራቱ ባረንቱ ማጻፋቱዋ ሺሺደ፥ አሳ ኡባ ስንꬃን ጉዴድኖ፤ ሄ ማጻፋቱዋ ጋትያ ሄትያ ዎደ፥ እሻታሙ ሻአ ብራ ሳንትምያ ግዴዳ። 20 ሄዋ ማላ ዎልቃማ ኦግያን ጾሳ ቃላይ ድጬነ አኬ።

21 ሄዌ ፖለቴዳዋፐ ጉይያን ጳዉሎስ፥ “ታን የሩሳላመ ባደ ሮመካ ቃይ በአናዉ በሴ”†ጳዉሎስ ሀዋ አያና ጌሻን ካለሰቲደ ሃሳዬዳዋ። ያጊደ፥ ማቅዶንያናነ አካይያና አꬊደ፥ የሩሳላመ ባናዉ ቆፋ ቃቼዳ። 22 ቃይ ባረና ማድያዋንቱፐ ላአቱዋ ጽሞቶሳነ ኤራስጾሳ ማቅዶንያ ኪቲደ፥ ባረዉ ኢስያን አማሬዳ ዎድያ ጋምኤዳ።

23 ጎዳ ኦግያ ድራዉ፥ ሄ ዎደ ዳሮ ዋላሳይ ከሴዳ። 24 አያዉ ጎፐ፥ ጻጋራ ብራ ሙሽሲደ ትግ መꬍያ ድመጽሮሳ ግያ እት ብታኒ አርጸሚስ ጌሻ ጎልያ ምስልያ ብራፐ ትግ ትጊደ፥ ኦሳንቻቶ ዳሮ ዎꬍያ ደሜ። 25 ሄዋንታነ ኡንቱንቱዋ ማላ ኦሱዋ ኦꬅያዋንታ እትፐ ሺሺደ፥ ሀዋዳን ያጌዳ፤ “አሳዉ፥ ኑ ዱረተꬃይ ሀ ኦሱዋና ግድያዋ ህንተ ኤሪታ። 26 ሄዌ ጳዉሎስ፥ ‘አሳ ኩሺ መꬌዳዋንቱ ጾሳቱዋ ግድክኖ’ ያጊደ፥ ኤፈሶነ ጻላላን ግደናን አማሬዳ ጋዳቱዋፐ አትን፥ ኢስያን ኡባን ጮራ አሳዉ ኦድ አማንꬄዳዋ ህንተንቱ በኤድታነ ስሴድታ። 27 ሎኤናባይ፥ ኑ ኦሱ ካታናዋ ጻላላ ግደና፤ ሽን ኢስያን ደእያ ኡባቱነ ሳኣ ኡባን ደእያዋንቱ ጎይንያ ዎልቃማ ጾሳቶ ጌተትያ አርጸሚስ ጌሻ ጎሊ ቦንቼተናን አታናዋነ፥ እዝ ዳሮተꬃይ ኩንዳናዋ” ያጌዳ።

28 አሳይ ሄዋ ስሴዳ ዎደ ሎይꬅ ሀንቀቲደ “ኤፈሶነ አርጸሚሳ ዎልቃማ” ያጊደ ጫቦቴድኖ። 29 ካታማ ኡባን ዋላሳይ ደንዴዳ፤ ጳዉሎሳና ሀመትያ ማቅዶንያ አሳቱዋ ጋዮሳነ አርስጽሮኮሳ ባረንቱና ኦይቂ አኪደ፥ እትፐ ካሳ ሳኣ ዎጼድኖ። 30 ጳዉሎስካ አሳይ ሺቄዳሳ ገላናዉ ኮዬዳ። ሽን ካልያዋንቱ አ ድጌድኖ። 31 ኢስያ ጋድያ ካፓቱዋፐ ጳዉሎሳ ላገꬃቱዋፐ እቱ እቱ ጳዉሎሳዉ ኪቲደ፥ ካሳ ሳኣን ቆንጭያ ከሲደ እ ቤተና ማላ፥ አ ዎሴድኖ።

32 ሺቁዋን ዋላሳይ ደንድና፥ ዳርያ ባጋ አሳይ ሀራይ አቶ አያዉ ሺቄደንቶ ኤረና ድራዉ፥ እቱ እትባዉ ዋላቀትያ ዎደ፥ የኩ ቃይ ሀራባዉ ዋላቀቴ። 33 አይሁዳቱ እስክንድራ አꬅ በስና፥ እት እት አሳይ እ ሃሳያና ማላ፥ አሳ ግዶፐ ስንꬃዉ አ አꬄዳ፤ አሳይ ጮኡ ጋና ማላ፥ እ ባረ ኩሽያን ጾርስ በሲደ፥ አሳዉ ሞተታናዉ ኮዬዳ። 34 ሽን እስክንድረ አይሁዳ አሳ ግዴዳዋ አሳይ ኤሬዳ ዎደ፥ ላኡ ሳተ ግድያዋ ኬና ኡባይ እት ቃላን፥ “ኤፈሶነ አርጸሚሳ ዎልቃማ” ያጊደ ጫቦቴድኖ።

35 ካታማዉ ጻፈ ግዴዳዌ አሳ ጮኡ ኦꬂደ፥ ሀዋዳን ያጌዳ፤ “ኤፈሶነ አሳዉ፥ ኤፈሶነ ካታማይ ዎልቃማ አርጸሚስስነ ሳሉዋፐ ዎꬌዳ ኤቃ ሹቻዉ ኤቃ ጎልያ ናግያዋ ግዴዳዋ ኤረና አሳይ ኦኔ? 36 ሀዋ ካድያ አሳይ ባይና ድራዉ፥ ህንተንቱ ዎፑ ጋናዉነ ድርበናን አጋናዉ በሴ። 37 አያዉ ጎፐ፥ ሀዋንቱ ጌሻ ጎልያ ሚሻ ዉእቤናዋንታ ኑ ጾሳቱዋካ ቦርቤናዋንታ አሄድታ። 38 ሄዋ ድራዉ፥ ድመጽሮስነ አናና ደእያ ኦሳንቻቱ አሳ ሞታናዉ ኮዮፐ፥ ፕርዳ ጎሊ ዶያ ደኤ፤ ቃይ ጋድያ ሞድያዋንቱካ ደኢኖ፤ ኡንቱንቱ ባረንቱ ግዶን ሞተቲኖ። 39 ሽን ህንተ ሀራ የዉዋ ኮዮፐ፥ ህግያ ሺቁዋን የዉዋ ቃቻና። 40 አያዉ ጎፐ፥ ሀቼ ሀኔዳዋ ሻቢረꬃ ጊደ፥ ሮመ ጋድያ አሳቱ ኑና ሞታና፤ ሀ ሺቆካ ጋሱ ባይና ድራዉ፥ ኑን ጋሱዋ ኦዳናዉ ዳንዳዮኮ” 41 ያጊደ ሺቁዋ ላሌዳ።