1 ዋላሳይ እርጼዳዋፐ ጉይያን፥ ጳዉሎስ ካልያዋንታ አህሲደ ዞሬዳ፤ ኡንቱንታ፥ “ሳሩዋን ደእተ” ጊደ፥ ማቅዶንያ ባናዉ ከሴዳ። 2 ሄ ጋድያና አꬊደ፥ ቃላ ኦዲደ፥ አሳ ሎይꬅ ምንሴዳዋፐ ጉይያን፥ ግሪከ ጋደ ዬዳ። 3 እ ሄዋን ሄዙ አገና ኡቲደ፥ ማርካብያን ሶርያ ባናዉ ቆፕሽን፥ አይሁዳቱ ባረና ዎꬋናዉ ኮይያዋ በኢደ፥ ማቅዶንያና ጉየ ስማናዉ ባረ ቆፋ ቃቼዳ።

4 ጳዉሎሳ ሞይዜዳዋንቱ፥ ቤርያፐ ጳርሃሳ ናኣ ሶሲጳጽሮሳ፥ ተሰሎንቀፐ አርስጽሮኮሳነ ስኮንድሳ፥ ደርበፐ ጋዮሳነ ኢስያፐ ትክቆሳነ ጽሮፍሞሳ፥ ቃይ ጽሞቶሳ። 5 ሄዋንቱ ስንꬃዉ ቢደ፥ ኑና ጽሮኣዳን ናጊኖ። 6 ኑን ኡክꬃ ባላ ጋላሳ ቦንቾዋፐ ጉይያን፥ ፕልጵስዮሳ ግያ ጋድያፐ ማርካብያን ደንዲደ፥ እቼሹ ጋላሳን ጽሮኣዳን ኡንቱንታ ጋኪደ፥ ያን ላፑ ጋላሳ ኡቴዶ።

7 ኑን ዎጋ ጋላስ *ዎጋ ጋላስ፦ ግሪክያ ማጻፋን፥ ሳምባታቱዋፐ እቱዋን ያጌ። ኡክꬃ መንꬃናዉ ሺቅ ደእሽን፥ ጳዉሎስ ዎንትና ባናዉ ቆፔዳ ድራዉ፥ ኡንቱንቶ ቃላ ኦዲደ፥ ቃማ ብላሂ ጋካናዉ የዉዋ አዱሴዳ። 8 ኑን ሺቅ ኡቴዳ ፖቅያን ጮራ ጾምፒ ደኤ። 9 ኤዉጽኮሳ ግያ እት ዎዳላይ ማስኮትያ ቦላ ኡቲደ፥ ዳርስ ገምእሼዳ። ጳዉሎስ ሃሳያ አዱሴዳ ዎደ፥ ኤዉጽኮስ ገምእሹዋን ሀይሬዳዌ ሄዘንꬅያ ፖቅያፐ ሳኣን ኩንዲደ ሀይቄዳዋ አሳይ ደንꬄዳ። 10 ሽን ጳዉሎስ ዎꬊደ፥ አ ቦላ ጉፋኔዳ። አ እድሚደ፥ “አ ሸምፑ ከስቤና ድራዉ ህርጎፕተ” ያጌዳ። 11 ያቲደ ፑደ ፖቅያ ከሲደ፥ ኡክꬃ መንꬂደ ሜዳ፤ ሳአይ ዎንታና ጋካናዉ፥ ዳሮ ዎድያ ሃሳዬዳዋፐ ጉይያን ቤዳ። 12 ዎዳላይ ፓጽና፥ ሶይ አፊደ፥ ዳርስ ናሸቴድኖ።

13 ሽን ጳዉሎስ ባረና ያፐ ኑን ሞካና ማላ፥ ኑዉ ኦዴዳ ድራዉ፥ ካሰቲደ ማርካብያኮ ቢደ፥ አሶሳ ባናዉ ደንዴዶ፤ አያዉ ጎፐ፥ ገድያን ባናዉ እ ቆፔዳ ድራዉ ኑና ሄዋዳን አዛዜዳ። 14 እ ኑናና አሶሳን ጋከትና፥ ማርካብያን አ አኪደ ምጽሊነ ዬዶ። 15 ዎንተꬃ ጋላስ ያፐ ማርካብያን ደንዲደ፥ ክዮሳ ሄራ ጋኬዶ፤ ቃይ ዎንተꬃ ጋላስ ሳሞሳ ፕኔዶ፤ ትሮግልዮመን አቂደ፥ ዎንትና ምሊጸ ዬዶ። 16 አያዉ ጎፐ፥ ጳዉሎስ ኢስያን ዳሪ ጋምኤናን ኤፈሶነ ላንቂያና አꬋናዉ ባረ ቆፋ ቃቼዳ፤ ባረዉ ዳንዳየቶፐ፥ ጰንጸቆስተ ጌተትያ ጋላስ የሩሳላመ ጋካናዉ ኤሌሌ።

17 ጳዉሎስ ምሊጸፐ ኤፈሶነ ኪቲደ፥ አማንያ አሳ ካለꬅያዋንታ ጼግሴዳ። 18-19 ዎሳ ጎለ ጭማቱ ጳዉሎሳኮ ዪና፥ ኡንቱንታ እ ሀዋዳን ያጌዳ፤ “ታን ኢስያ ገሌዳ ኮይሮ ጋላሳፐ ዶምና፥ ካዉሻተꬃንነ ዳሮ አፎꬃን ጎዳዉ ኦꬃደ፥ አይሁዳቱዋ ሺቁዋፐ ታና ጋኬዳ ፓጨ ግዴዳ ዎድያ ኡባን ህንተንቱና ዋናደ ደኣድታንቶ ህንተንቱ ኤሪታ። 20-21 ናጋራፐ ጾሳኮ ስምያዋነ ኑ ጎዳ የሱስ ክርስቶሳ አማንያዋ አይሁዳቶነ አይሁዳ ግደናዋንቶ ማርካታደ፥ ሺቁዋንካ ህንተንቱ ጎለን ጎለንካ ህንተንቶ ኦዳደ ታማርሴዳዋፐ አትን፥ ህንተንታ ጎእያባፐ እትባነ ፓጭሳ በይከ።

22 “በእተ፤ ሀእካ ታን ጌሻ አያናዉ አዛዘታደ፥ የሩሳላመባይ፤ ያን ታዉ አዬ ከሳነንቶነ ኤርከ። 23 ጌሻ አያናይ ቃሹነ ዋዪ ታና ናግያዋ ካታማ ኡባን ታዉ ኦዴ። 24 ሽን ታ ዎꬃ ፖላናዉነ ጎዳ የሱስ ክርስቶሳፐ ታን አኬዳ ኦሱዋ ጾሳ አꬎ ኬካተꬃ ዎንጋላ ምሽራቹዋ ማርካትያዋ ፖላናዉ፥ ታ ሸምፑዋ ማደናዋዳን ፓይዳይ።

25 “በእተ፤ ታን ሀእካ ጾሳ ካዉተꬃባ ኦዳደ፥ ህንተንቱ ኡባ ግዶን ዩያድ፤ ስም ሀዋፐ ስንꬃዉ ህንተንቱፐ ኦንነ ታና በኤናዋ ኤራይ። 26 ሄዋ ድራዉ፥ ህንተንቱፐ እት ኡራይ ባዮፐካ ታን ሄዋን ገለናዋ ሀቼ ህንተንቶ ጌሻደ ኦዳይ። 27 አያዉ ጎፐ፥ ጾሳይ ኦꬃናዉ ቆፔዳዋ ኡባ ህንተንቶ አይነ አሸናን ኦዳድ።

28 “የሱስ ባረ ሱꬃን ዎዜዳ ጾሳ አማንያዋንታ ናግተ፤ ቃይ ጌሻ አያናይ ህንተንታ ካፓቱዋ ኦꬂደ ሱንꬄዳ ዉድያ ኡባነ ህንተንቱ ሁጲያ ናግተ። 29-30 ታን ቤዳዋፐ ጉይያን፥ ዉድያዉ ቃረተና ኢታ ዎራካናቱ ህንተንቱ ግዶ ገላናዋንታነ፥ ካልያዋንታ ባረንቱ ጌዱዋ ካለꬃናዉ ዎርዱዋ ሃሳይያ አሳቱ ህንተንቱ ግዶፐ ደንዳናዋ ኤራይ። 31 ሄዋ ድራዉ፥ ታን ሄዙ ላይꬃ ቃማነ ጋላሳ አፎꬃን ህንተንታ ሁጲያን ሁጲያን ምንስያዋ አጋቤናዋ ቆፒደ ገንጭተ።

32 “ሀእካ ህንተንታ ምንሳናዉነ ጌሻ አሳ ኡባ ግዶን ላትሳናዉ ዳንዳይያ ጾሳዉነ አ አꬎ ኬካተꬃ ቃላዉ ህንተንታ ሀዳራ እማይ።

33 “ታን ኦፐነ ብራ ዎይ ዎርቃ ዎይ ማዩዋ አሞታበይከ፤ 34 ታን ሀ ታ ኩሽያን ታናነ ታናና እትፐ ደእያዋንታ ኮሼዳዋ ኦꬄዳዋ ህንተንቱ ህንተንቱ ሁጰዉ ኤሪታ። 35 ህንተንቱ ሀዋዳን ዳቡር ኦꬂደ፥ ዳቡራንቻቱዋ ማዳናዉነ ጎዳ የሱስ ባረ ሁጰዉ፥ ‘አክያዋፐ እምያዌ አንጀቴዳዋ’ ጌዳዋዳን፥ አ ቃላ ህንተንቱ ዎዛና አꬃናዉ በስያዋ ታን ጮራ ኦግያን ህንተንታ በሳድ” ያጌዳ።

36 ጳዉሎስ ሄዋ ሃሳይ ዉርሲደ፥ ኡንቱንቱ ኡባና እትፐ ጉልባቲደ፥ ጾሳ ዎሴዳ። 37 ኡንቱንቱ ኡባይ ጳዉሎሳ እድሚደ፥ ዬኪደ የሬድኖ። 38 ኡባፐ እ፥ “ታና ላኤንꬁዋ ኡባካ በእክታ” ያጌዳ ቃላይ ኡንቱንታ ዳሮ ቃረꬅና ማርካብያ ጋካናዉ አ ሞይዜድኖ።