1 “ታናዳን አማንያዋንቶ፥ ታ አዋቶ፥ ታን ሀእ ህንተንቶ ኦድያ የዉዋ ስስተ!” 2 ጳዉሎስ ኡንቱንቶ እብራይስጸ ቃላን ሃሳይያዋ ስሲደ፥ ካሰፐ ሎይꬅ ጮኡ ጊና እ ሀዋዳን ያጌዳ።

3 “ታን ክልቂያን ደእያ ጸርሴሰን የለታደ፥ ሀ ካታማን ጋማልያል ታና ታማርስና ድጫደ፥ ኑ አዎቱዋ ህግያካ ምንሳ ታማራደ፥ ሀቼ ህንተ ኡባይ ሀንያዋዳንካ፥ ታን ጾሳ የዎ ሴለትያ አይሁዳ አሳ። 4 ታን ማጫ አሳነ አቱማ አሳ ኦይቃ ኦይቃደ ቃሾ ጎለን የጌዳ አሳነ፥ ሀ ኦግያ ካልያ አሳ ዎꬍሳና ጋካናዉ መቶꬄዳ አሳ። 5 ሀዋዳንካ፥ ቃይ፥ ቄሳቱዋ ኡባቱዋ ካፑነ ጭማ ኡባ ሺቁ ታዋ ማርካታናዉ ዳንዳዬ፤ ታን ዳማስቆን ደእያ ኡንቱንቱ እሻቱዋ አይሁዳቶ፥ ኡንቱንቱፐ ዳብዳቢያ አካደ፥ ሄዋን ደእያ አሳቱ ቆሄቲደ ሙረታናዳን፥ የሩሳላመ ኡንቱንታ አሀናዉ ያ ባድ።

6 “ታን ባደ ዳማስቆ ማቴዳ ዎደ፥ ሴታ ጋላሳ ግድሽን፥ ቆፐናን ሳሉዋፐ ዎልቃማ ፖኡ ታ ማታን ዩይ አꬊደ ፖኤዳ። 7 ታን ሳኣን ኩንዳ ኡታደ፥ ‘ሳኦላ፥ ሳኦላ፥ ታና አያዉ የደርሳይ?’ ግያ ቃላ ስሳድ።

8 “ታን ዛራደ፥ ‘ታ ጎዳዉ፥ ኔን ኦኔ?’ ያጋድ።

“ሄዋፐ ጉየ፥ ‘ታን ኔን የደርስያ ናዝሬትያ የሱሳ’ ያጌዳ። 9 ታናና እትፐ ደእያዋንቱ ፖኡዋ በኢደ ያዬድኖ፤ ሽን ታዉ ሃሳይያዋ ቃላ ስስበይክኖ።

10 “ ‘ታ ጎዳዉ፥ ታን አያ ኦꬆ?’ ያጋድ።

“ጎዳይ ታና፥ ‘ደንዳደ ዳማስቆ ባ። ኔን ኦꬃናዉ ጾሳይ ቆፔዳ ኡባባይ ነዉ ያን ኦደታናዋ’ ያጌዳ። 11 ሄ ዎልቃማ ፖኡዋ ድራዉ፥ ታ አይፊ ቆቅና፥ ታናና ደእያ አሳቱ ታ ኩሽያ ኦይቂደ፥ ታና ጎችና፥ ዳማስቆ ጋካድ።

12 “ዳማስቆን ደእያ አይሁዳ ኡባይ ሎይꬅ ቦንችያ እት ሀናንያ ግያ ብታኒ፥ ኑ ህግያዉ አዛዘቲደ፥ ጾሳዉ እመቴዳ አሳ። 13 ሀናኒ ታኮ ዪደ፥ ታ ማታን ኤቂደ ታና፥ ‘ታ እሻዉ ሳኦላ፥ ጼላ’ ያጌዳ። ታን ሄ ዎደ ሄ ማንእያን አኮ ጼላ አጋድ።

14 “እ ታና ሀዋዳን ያጌዳ፤ ‘ኑ አዎቱዋ ጾሳይ ኔን አ ቆፋ ኤራናዉ፥ አ ጽሎ ናኣ በአናዉነ አ ዶናፐካ ሃሳያ ስሳናዉ ኔና ካሰና ዶሬዳ። 15 አያዉ ጎፐ፥ ኔን በኤዳባነ ስሴዳባ አሳ ኡባ ስንꬃን አዉ ማርካታናሳ። 16 ሀእካ አያዉ ጋምአይ? ደንዳደ ጻማቀታ፤ አ ሱንꬃ ጼሳደ፥ ነ ናጋራፐካ ሜጨታ’ ያጌዳ።

17 “ታን ጉየ የሩሳላመ ስማደ ጌሻ ጎልያን ዎስሽን፥ ታ አያናን ግዳድ። 18 ጎዳይ ታና፥ ‘ኤሌላደ፥ የሩሳላመ ከሳ አያዉ ጎፐ፥ ኔን ታዉ ሀዋን ማርካትያዋ አሳይ አከና’ ያግሽን ታን አ በኣድ።

19 “ታን፥ ‘ታ ጎዳዉ፥ አይሁዳ ዎሳ ጎልያ ኡባን ኔና አማንያዋንታ ኦይቃደ ዋꬌዳዋነ ቃሾ ጎልያን የጌዳዋ ኡንቱንቱ ኤሪኖ። 20 ኡንቱንቱ ነ ማርካ እስጽፋኖሳ ዎꬍያ ዎደ፥ ታን ሄ የዉዋ ኤኖ ጋድ። ቃይ ኡንቱንቱ ምይያን ኤቃደ፥ አ ዎꬍያዋንቱ ማዩዋ ናጋይ’ ያጌዳ።

21 “ጎዳይ ታና፥ ‘ታን ኔና አይሁዳ ግደና አሳኮ ሃኮ ሳ ኪትያ ድራዉ ባ’ ጌዳ” ያጌዳ።

22 ጳዉሎስ ሄ ቃላ ሃሳያና ጋካናዉ አሳይ እ ግያዋ ስሴ፤ ሄዋፐ ጉይያን፥ ባረንቱ ኮሻ ꬎቁ ኦꬂደ፥ “ሀዋ ጋድያፐ ꬋይሳ፤ እ ደአናዉ በሰና” ያጌድኖ።

23-24 ኡንቱንቱ ዋስሽን፥ ባረንቱ ማዩዋ ቦላዉ ኦልሺንነ ባና ጫርኩዋን ላልሽን፥ ኦላ ካፑ ዎታዳራቱ ጳዉሎሳ ባረንቱ ደኢያሳ አፋና ማላ አዛዜዳ። ቃይ አሳይ አያዉ ሄዋዳን አ ቦላ ዋሴድኖንቶ ኤራናዉ፥ ጳዉሎሳ ልሱዋን ሾጫና ማላ፥ ኡንቱንታ አዛዜዳ። 25 ሽን ዎታዳራቱ ጳዉሎሳ ዳፉዋን ምንስ ቃቼዳ ዎደ፥ ጳዉሎስ ባረ ማታን ኤቄዳ ጼታቱዋ ካፑዋ፥ “ሮመ ጋድያ አሳ ፕርዳይ ባይናን ሾጭያዌ ህንተንቶ ዎጌ?” ያጌዳ።

26 ሄዋ ጼታቱዋ ካፑ ስሴዳ ዎደ፥ ኦላ ካፑዋኮ ቢደ፥ “ሀ ብታኒ ሮመ አሳ። ኔን አያ ኦꬃና ቆፓይ?” ያጊደ ኦቼዳ።

27 ኦላ ካፑ ጳዉሎሳኮ ሺቂደ፥ “ኔን ሮመ አሴ? ታዉ ኦዳ” ያጌዳ።

ጳዉሎስ፥ “ኤ” ያጌዳ።

28 ኦላ ካፑ ጳዉሎሳዉ ዛሪደ፥ “ታን ሀ ዛረተꬃ ዳሮ ሚሻን ሻማድ” ያጌዳ።

ሽን ጳዉሎስ፥ “ታን ሄ ዘረꬃፐ የለታድ” ያጌዳ።

29 ሄዋ ድራዉ፥ ጳዉሎሳ ብዳናዉ ቆፔዳዋንቱ ኤለካ አፐ ሻከት አጌድኖ። ኦላ ካፑካ ጳዉሎስ ሮመ አሳ ግዴዳዋ ኤሬዳ ዎደ ያዬዳ፤ አያዉ ጎፐ፥ ሳንꬃላታን አ ቃሽስ ዎꬄዳ።

30 ዎንተꬃ ጋላስ ኦላ ካፑ፥ አይሁዳቱ ጳዉሎሳ አያዉ ሞቴድኖንቶነ ጌሺደ ኤራናዉ ኮዪደ፥ ጳዉሎሳ ብሌዳ። ያቲደ ቄሳቱዋ ካፓቱነ አሳይ ኡባይ ሺቃና ማላ አዛዜዳ፤ ቃይ ጳዉሎሳ ዱገ ዎꬂደ፥ ኡንቱንቱ ስንꬃን ኤሴዳ።