1 ጳዉሎስ ሄዋን ሺቄዳ አሳ ጫድ ጼሊደ፥ “ታናዳን አማንያዋንቶ፥ ታን ሀቼ ጋካናዉካ ጾሳ ስንꬃን ታ ደኡዋ ኡባን ትላ ዎዛናን ደኣድ” ያጌዳ። 2 ቄሳቱዋ ኡባቱዋ ካፑ ሀናኒ፥ ጳዉሎሳ ዶና ባቃና ማላ፥ አ ማታን ኤቄዳዋንታ አዛዜዳ። 3 ጳዉሎስ ሄ ዎደ አ፥ “ላ ሀ ቦሽንቻን ኦኬዳ *ቦሽንቻን ኦኬዳ፦ እት ኡራይ ሎአ ማላታና ማላ ኦሱሳ፥ ሽን ግደና። ጎዳዉ፥ ጾሳይ ኔና ባቃና። ኔን ታ ቦላ ህግያን ፕርዳናዉ ኡታደ፥ ዎጋይ ባይናን ታና ባቃና ማላ አዛዛይ?” ያጌዳ።

4 ጳዉሎሳ ማታን ኤቄዳዋንቱ አ፥ “ኔን ጾሳ ቄሳቱዋ ኡባቱዋ ካፑዋ ቦራይ?” ያጌድኖ።

5 ሄዋፐ ጉየ ጳዉሎስ፥ “ታናዳን አማንያዋንቶ፥ እ ቄሳቱዋ ኡባቱዋ ካፑዋ ግዴዳዋ ታን ኤራበይከ፤ አያዉ ጎፐ፥ ‘ነ ጋድያ ሞድያዋ ቦላ ኢታ ቃላ ሃሳዮፓ’ ጌተቲደ ጾሳ ማጻፋን ጻፈቴዳ” ያጌዳ። ከሳ 22:28

6 ሽን ጳዉሎስ ባጋቱ ሳዱቃዋናቱዋ፤ ባጋቱ ፓርሳዋቱዋ ግዴዳዋ በኢደ፥ “ታናዳን አማንያዋንቶ፥ ታን ፓርሳዊያነ ፓርሳዊያ ናኣ፤ ‘ሀይቄዳዋንቱ ሀይቁዋፐ ደንዳናዋንታ’ ጋደ ታን ናሸቻን ናግያ ድራዉ፥ ኡንቱንቱ ታ ቦላ ፕርዲኖ” ያጊደ፥ ꬎቁ ኦꬂደ ሃሳዬዳ።

7 ጳዉሎስ ሄዋ ያግና፥ ፓርሳዋቱዋ ግዶንነ ሳዱቃዋናቱዋ ግዶን ዋላሳይ ከስና፥ ሺቄዳ አሳይ ላለቴዳ። 8 አያዉ ጎፐ፥ ሳዱቃዋናቱ፥ “ሀይቄዳ አሳይ ደንደና፤ ኪታንቻይካ አያናይካ ባዋ” ያጌድኖ፤ ፓርሳዋቱ ቃይ ላኡካ ደእያዋ አማኒኖ። 9 ዎልቃማ ዋላሳይ ደንዴዳ፤ ፓርሳዋቱዋ ባጋፐ ሙሴ ህግያ ታማርስያዋንቱ ደንድ ኤቂደ፥ “ሀ ብታንያ ቦላ አይነ ባላ ደምበይኮ፤ አዉ አያናይ ዎይ ኪታንቻይ ሃሳየናን አገና” ያጊደ ፓሉመቴድኖ።

10 ዋላሳይ ዳርና፥ ኦላ ካፑ ጳዉሎሳ ኡንቱንቱ መንሬꬃነንቶነ ግ ያዪደ፥ ባረ ዎታዳራቱ ዎꬊደ፥ ኡንቱንቱ ግዶፐ አ ኤለካ ከሲደ፥ ባረንቱ ደኢያሳ አፋና ማላ አዛዜዳ።

11 ሄ ቃማ ጎዳይ ጳዉሎሳ ማታን ኤቂደ፥ “ጳዉሎሳ፥ ኔን ታዉ የሩሳላመን ማርካቴዳዋዳን፥ ሮመንካ ማርካታናዉ በሴ፤ ምና፤ አይነ ባዋ” ያጌዳ።

12 ዎንትሳ ጋላስ፥ አይሁዳቱ ጳዉሎሳ ዎꬋና ጋካናዉ፥ ሜናዳንነ ኡሸናዳን፥ ጫቀቲደ ጊገቴድኖ። 13 ጳዉሎሳ ቦላ ሄዋ ማቀቴዳ አሳቱ ኦይታሙዋፐ ዳሪኖ። 14 ኡንቱንቱ ቄሳቱዋ ካፓቱዋኮነ ጭማቱዋኮ ዪደ፥ “ኑን ጳዉሎሳ ዎꬋና ጋካናዉ፥ አይነ ባረናዳን፥ ጊገት ኡቴዶ። 15 ሄዋ ድራዉ፥ ህንተንቱነ ሺቄዳ አሳይ ጳዉሎሳባ ጌሺደ ብድያዋ ማላቲደ፥ ኦላ ካፑ አ ህንተንቱኮ ዱገ ዎꬃና ማላ ኦችተ፤ ኑን እ ሃ ሺቃናፐ ካሰና አ ዎꬋናዉ ጊግ ኡቴዶ” ያጌድኖ።

16 ሽን ጳዉሎሳ ምቻት ናአይ ሄ ማቁዋ ስሴዳ ዎደ፥ ቢደ ዎታዳራቱ ደኢያሳ ገሊደ፥ ጳዉሎሳዉ ኦዴዳ። 17 ጳዉሎስ ጼታቱዋ ካፓቱዋፐ እቱዋ ጼሲደ፥ “ሀ ናኣ ኦላ ካፑዋኮ አፋ፤ አያዉ ጎፐ፥ ኦላ ካፖ እ ኦድያዌ ደኤ” ያጌዳ።

18 ሄዋ ድራዉ፥ ጼታቱዋ ካፑ ናኣ ኦላ ካፑዋኮ አፊደ፥ “ቃሾ ጎለን ደእያ ጳዉሎስ፥ ሀ ናአይ ነዉ አየንቶ ኦድያባይ ደእያ ድራዉ፥ ታና ባረኮ ጼሲደ፥ አ ኔኮ አሀናዳን፥ ታና ዎሴዳ” ያጌዳ።

19 ኦላ ካፑ ናኣ ኩሽያ ኦይቂደ፥ ዱማ ጋጻ ከሲደ፥ “ኔን ታዉ ኦዳናባይ አዬ?” ያጊደ ኦቼዳ።

20 ናአይ ኦላ ካፖ፥ “አይሁዳቱ ጳዉሎሳባ ካሰፐ ምንስ ኦችያዋ ማላቲደ፥ ኔን ሺቁዋ አ ኡትሳናዳን፥ ኔና ዎንት ዎሳናዉ ዞረታ ቃቼድኖ። 21 ሽን ኔን ኡንቱንቱ ግያዋ ስሶፓ፤ አያዉ ጎፐ፥ ኦይታሙዋፐ ዳርያ አሳቱ ጳዉሎሳ ዎꬋና ጋካናዉ፥ ቁማ ሜናዳንነ ሃꬃ ኡሸናዳን፥ ጫቀቲደ ጌመት ኡቲደ አ ናጊኖ፤ ኔን ግያዋ ስሳናዉ ሀእካ ጊገት ኡቲደ ናጊኖ” ያጌዳ።

22 ሄዋ ድራዉ፥ ኦላ ካፑ ናኣ፥ “ሀ የዉዋ ኔን ታና ኤርሴዳዋ ኦስነ ኦዶፓ” ያጊደ አዛዜዳዋፐ ጉይያን፥ አ የዴዳ።

23 ኦላ ካፑ ጼታቱዋ ካፓቱዋፐ ላኡዋ ጼሲደ፥ “ቂሳርያ ባናዉ፥ ላኡ ጼቱ ዎታዳራቱዋ፥ ላፑን ታሙ ፓራ ኦይቄዳ አሳቱዋነ ላኡ ጼቱ ቶራንቻቱዋ ቃማፐ ሄዙ ሳትያን ጊግስተ፤ 24 ጋድያ ሞድያ ፍልክሳኮ ጳዉሎሳ ሳሮተꬃን ጋꬃናዉ ቶግስያ መህያነ ጊግስተ” ያጊደ፥ ኡንቱንታ አዛዜዳ። 25 ኦላ ካፑ ሀዋዳን ግያ ዳብዳቢያ ጻፌዳ።

26 “ቃላዉደዮሳ ሉስዮሳፐ፤ ጋድያ ሞድያ ቦንቼቴዳ ፍልክሳ! ሳሮተꬃይ ነዉ ግዶ። 27 አይሁዳቱ ሀ ብታንያ ኦይቂደ ዎꬋና ሀንሽን፥ ሮመ ካታማ አሳ እ ግዴዳዋ ኤራደ፥ ዎታዳራቱዋና ጋካደ አ አሻድ። 28 ኡንቱንቱ አ አያዉ ሞቴድኖንቶ ኤራናዉ ኮያደ፥ ዱገ ኡንቱንቱ ሺቆ አ አፋድ። 29 ኡንቱንቱ ባረንቱ ህግያባ እ ኦቼዳዎ አ ሞቴዳዋፐ አትን፥ አ ዎꬍስያ ዎይ ቃሽስያ ሞቶ ግደና። 30 ኡንቱንቱ ሀ ብታንያ ቦላ ማቀት ኡቴዳ ዝግርሳይ ታና ጋክና፥ ታን ሄ ማንእያን አ ኔኮ የዳ አጋድ፤ አ ሞትያዋንቱካ ቢደ፥ ነ ስንꬃን ሞታና ማላ ኦዳድ፤ ሳሮ ደአ” ያጌዳ።

31 ሄዋ ድራዉ፥ ዎታዳራቱ አዛዘቴዳዋዳንካ ጳዉሎሳ አኪደ፥ ቃማ አንትጳጽሪሳ ጋꬄድኖ። 32 ዎንትሳ ጋላስ አናና ባና ማላ ፓራ ቶጎ አሳቱዋ ዎꬂደ፥ ገድያን ብያዋንቱ ጉየ ዎታዳራቱ ደኢያሳ ስሜድኖ። 33 ፓራዋንቱ ቂሳርያ ገሊደ፥ ዳብዳቢያ ጋድያ ሞድያዎ እሚደ፥ ጳዉሎሳ አ ስንꬃ አꬄድኖ። 34 ጋድያ ሞድያዌ ዳብዳቢያ ናባቤዳዋፐ ጉይያን፥ ጳዉሎስ ሀቃ አዉራጃ አሰንቶ አ ኦቼዳ፤ ክልቂያ አሳ እ ግዴዳዋ ኤሬዳ ዎደ፥ 35 “ታን ነባ ኔና ሞትያዋንቱ ይያ ዎደ ስሳና” ያጊደ፥ ዎታዳራቱ ሄሮድሳ ካዉተꬃ ጎለን አ ናጋና ማላ አዛዜዳ።