1 እቼሹ ጋላሳፐ ጉይያን፥ ቄሳቱዋ ኡባቱዋ ካፑ፥ ሀናንያ፥ ጭማቱዋናኔ ጻርጻሉሳ ግያ እት ጻባቃና ዱገ ቂሳርያ ዎꬌዳ፤ ኡንቱንቱ ጋድያ ሞድያዋ ቦላ ጳዉሎሳ ሞቴድኖ። 2-3 ጳዉሎስ ጼሰቴዳ ዎደ፥ ጻርጻሉሰ አ ሀዋዳን ያጊደ፥ ሞቱዋ ዶሜዳ።

“ቦንቼቴዳ ፍልክሳ፥ ኑን ነ ባጋና ዳሮ ሳሮተꬃ ደሜዶሽን፥ ነ ቆፋን ሀ ጋድያዉ ኡባባን ኡባሳንካ ሎኦ ላሚ ቤትያዎ ኔና ሎይꬅ ጋላቲደ፥ ሀዋ አኬቶ። 4 ሽን ታን ኔና ጋምኤናን፥ ዶያ ግዴዳ ነ ኬካተꬃን ኑባ ኔን ቃንꬃን ስሳና ማላ፥ ኔና ዎሳይ። 5 አያዉ ጎፐ፥ ሀ ብታኒ ꬉቦ ግዲደ፥ ሳኣ ኡባን ደእያ አይሁዳቱዋ ግዶን ዋላሳ ደንꬄዳ፥ ናዝራዋቱ ባጋ አሳ ካለꬅያዋ ግዴዳዋ ኤሬዶ። 6 ሀራይ አቶ ጌሻ ጎልያካ ቱንሳናዉ ኮይሽን አ ኦይቂደ፥ ኑ ህግያዳን፥ አ ቦላ ፕርዳናዉ ቆፔዶ፤ 7 ሽን ኦላ ካፑዋ ሉስዮስ ዪደ፥ ዎልቃን ኑ ኩሽያፐ አ ዎꬅ አኬዳ። 8 አ ሞትያዋንቱካ ኔኮ ያና ማላ አዛዜዳ፤ ኔን ነ ሁጰዉ ሀ ብታንያ ብዳደ፥ ኑን አ ሞትያ የዉዋ ኡባ ኤራናዉ ዳንዳያ” ያጌዳ።

9 አይሁዳቱካ ቃይ፥ “ሀ የዉ ቱማ” ጊደ፥ አ ቆፋ አኬድኖ።

10 ጋድያ ሞድያዌ ጳዉሎሳ ያናዳን ዉትና፥ እ ሀዋዳን ያጊደ ዛሬዳ፤ “ኔን ዳሮ ዎድያፐ ዶማደ፥ ሀ አሳዉ ፕርዳደ ደእያዋ ታን ኤራደ፥ ታ የዉዋ ናሸቻን ዛራይ። 11 ታን የሩሳላመ ጎይናናዉ ከሶደፐ ታማነ ላኡ ጋላሳፐ ዳረናዋ ኔን ነ ሁጰዉ ኤራና ዳንዳያ። 12 አይሁዳቱ ታና ጌሻ ጎልያን ግድና፥ አይሁዳ ዎሳ ጎለን ግድና፥ ካታማን ግድና፥ ኦናናነ ፓሉመትሽን ዎይ አሳ ሺሻደ ማቂሽን፥ እት ኡራናነ በእበይክኖ። 13 ኡንቱንቱ ሀእካ ታና ሞትያዋ ሻትማናዉ ዳንዳይክኖ።

14 “ሽን ታን ሀዋ ነዉ ኦዳይ፤ ታን ሙሴ ህግያን ደእያዋነ ናባቱ ጻፌዳ ኡባባ አማናናዳን፥ ኑ አዎቱዋ ጾሳዉ ኡንቱንቱ ዎርዶ ግያ ኦግያን ጎሸታይ። 15 ሀዋንቱ ባረንቱ ሁጰዉ፥ ‘አሳይ ኡባይ፥ ዎርዱካ ጽሉካ ሀይቁዋፐ ደንዳናዋንታ’ ግያዋዳን፥ ታንካ ኡንቱንቱ ደንድያዋ ጾሳን ህዶታ ዎꬃደ አሙዋን ናጋይ። 16 ሄዋ ድራዉ፥ ታን ቃይ፥ ጾሳ ስንꬃንነ አሳ ስንꬃን ኡባ ዎደ፥ ፖኩ ባይና ትላ ዎዛናይ ታዉ ደአና ማላ ምናይ።

17 “ታን የሩሳላመፐ ከሶደፐ ጮራ ላይꬃፐ ጉይያን፥ ታ ጋደ ህዬሳዉ ሚሻ እማናዉነ ያርሹዋ ያርሻናዉ የሩሳላመ ባድ። 18 ሄዋ ኦꬅሽን፥ አሳይ ሺቀናን፥ ዋላሳይ ደንደናን፥ ታን ጌሻ ጎልያን ጌይሽን፥ ኡንቱንቱ ታና ደሜድኖ። 19 ሽን ኢስያፐ ዬዳ እት እት አይሁዳቱ ሄዋን ደኢኖ፤ ኡንቱንቱ ታ ቦላ የዉዋ ኮዮፐ፥ ዪደ ታና ነ ቦላን ሞታናዉ በሴ። 20-21 ዎይ ታን ኡንቱንቱ ግዶን ኤቃደ፥ ‘ሀይቄዳዋንቱ ደንዳናዋ አማንያ ድራዉ፥ ሀቼ ህንተ ስንꬃን ታ ቦላ ፕርዲኖ’ ጋደ ሃ ꬎቂሳደ ሃሳዬዳ እት ቃላፐ አትን፥ ሺቁዋ ስንꬃን ኤቂሽን፥ ታ ቦላ እት ባይዙዋ ደሜዳዋ ግዶፐ፥ ሀዋንቱ ባረንቱ ሁጰዉ ሀዋን ኦዳናዋንታ” ያጌዳ።

22 ሽን ፍልክሰ ጾሳ ኦግያባ ጌሽ ኤሬዳ ድራዉ፥ “ታን ህንተ የዉዋ ኦላ ካፑዋ ሉስዮስ ይያ ዎደ ኦግያ ኦይꬃና” ያጊደ፥ ፕርድያ ዎድያ ስንꬃዉ ኬሬዳ። 23 ፍልክሰ ቃይ ጳዉሎሳ ቃቼናን ናጋና ማላነ አ ዳባቱዋፐ ኦንነ አዉ ኦꬅሽን፥ ዎይ አኮ ዪሽን ድገና ማላ፥ ጼታቱዋ ካፑዋ አዛዜዳ።

24 አማሬዳ ጋላሳፐ ጉይያን፥ ፍልክሰ አይሁዳ አሳ ዛረ ግዴዳ ባረ ማቻት ድሩስልና ዪደ፥ ጳዉሎሳ ኪት አህሲደ፥ የሱስ ክርስቶሳን አማንያ ኦግያ እ ሃሳይሽን ስሴዳ። 25 ጳዉሎስ ጽሎተꬃባ፥ ባረ ሁጲያ ናጉዋባነ ያና ፕርዳባ ሃሳይሽን፥ ፍልክሰ ያዪደ፥ “ኔን ሀእዉ ባ፤ ታዉ ሚኬዳ ዎደ፥ ኔና ኪታደ ጼግሳና” ያጌዳ። 26 ሄ ዎደ ቃይ ጳዉሎስ ብለታናዉ፥ ባረዉ ማጋንጻ እማንዴሻ ጊደ ቆፔዳ፤ ሄዋ ድራዉ፥ ዳሮ ዎደ አ አህስ አህሲደ፥ አናና ሃሳዬ።

27 ላኡ ላይꬃ ኩሜዳዋፐ ጉይያን፥ ፍልክሳ ኮታ ጶርቂዮሳ ፕስጾስ አኬዳ። ፍልክሰ አይሁዳቱዋ ናሸቻናዉ ኮዪደ፥ ቃሾ ጎለን ጳዉሎሳ ባሽ አጌዳ።