1 ፕስጾስ አዉራጃ ገሌዳ ሄዘንꬅያ ጋላሳፐ ጉይያን፥ ቂሳርያፐ የሩሳላመ ቤዳ። 2 ያን ቄሳቱዋ ካፓቱነ አይሁዳቱዋ ካለꬅያዋንቱ ጳዉሎሳ ሞቴድኖ። 3 ኡንቱንቱ ጳዉሎሳ ዎꬋናዉ ኦግያን ቆሰት ኡታናዉ፥ ባረንቶ ሎኦባ ኦꬂደ አ የሩሳላመ አሀና ማላ፥ ፕስጾሳ ዎሴድኖ። 4 ፕስጾስ ኡንቱንቶ፥ “ጳዉሎስ ቂሳርያን ቃሸት ኡቴዳ፤ ታን ታ ሁጰዉካ ኤለካ ያ ጉየ ስማናዉ ቆፓ ኡታድ። 5 ሄዋ ድራዉ፥ እ አየንቶ ባይዜዳዌ ደኦፐ፥ ህንተንቱ ግዶን አዎትያዋንቱ ታናና ቂሳርያ ቢደ፥ አ ሞትኖ” ያጊደ ዛሬዳ።

6 ፕስጾስ የሩሳላመን ሆስፑን ዎይ ታሙ ጋላሳፐ አናን ኡቲደ፥ ቂሳርያ ቤዳ፤ ዎንትሳ ጋላስ ፕርድያሳን ኡቲደ፥ ጳዉሎሳ አሀና ማላ አዛዜዳ። 7 እ ጋኬዳ ዎደ፥ የሩሳላመፐ ዬዳ አይሁዳቱ አ ማታን ዩይ አꬍ ኤቂደ፥ ባረንቶ ሻትማናዉ ዳንዳየተና ዳሮ ዴጾ ሞቱዋ አ ቦላ ዎꬄድኖ። 8 ጳዉሎስ ሞተቲደ፥ “ታን አይሁዳቱዋ ህግያካ ጌሻ ጎልያካ ሮመ ካትያ ቄሳራካ አይነ ናቃበይከ” ያጌዳ።

9 ፕስጾስ አይሁዳቱዋ ናሸቻናዉ ኮዪደ ጳዉሎሳ፥ “ፑደ የሩሳላመ ከሳደ፥ ሀ የዉዋባ ያን ታ ስንꬃን ኦሸታናዉ ኮያይ?” ያጊደ ኦቼዳ።

10 ሽን ጳዉሎስ፥ “ታን ኦሸታናዉ በስያ ቄሳራ ፕርዳ ጎለን ኤቃድ። ኔንካ ሎይꬃ ኤርያዋዳን፥ ታን አይሁዳቱዋ አይነ ናቃበይከ። 11 ስም ታን ናቄዳዋ ዎይ ሀይቃናዉ በስያዋ ኦꬄዳዋ ግዶፐ፥ ሀይቁዋፐ አታና ጊከ፤ ሽን ኡንቱንቱ ታና ሞትያ ሞቱ መላ ግዴዳዋፐ ህን ባጋን፥ ኦንነ ታና ኡንቱንቶ አꬂደ እማናዉ ዳንዳየና፤ ቄሳረ ታባ ፕርዶ ጋደ ኦቻይ” ያጌዳ።

12 ሄዋፐ ጉይያን፥ ፕስጾስ ባረናና ዞረትያዋንቱና ዞረት ስሚደ አ፥ “ኔን ቄሳረ ታባ ፕርዶ ጋደ ኦቻዳ፤ ቄሳራኮ ባናሳ” ያጊደ ዛሬዳ።

13 አማሬዳ ጋላሳፐ ጉይያን፥ ካትያ አግሪጳይነ ባርኒቀ ፕስጾሳ ሳሮታናዉ ቂሳርያ ቤድኖ። 14 ያን ኡንቱንቱ ጮራ ጋላሳ ኡት ደእሽን፥ ፕስጾስ ካትያዉ ጳዉሎሳባ ሀዋዳን ያጊደ ኦዴዳ፤ “ሀዋን ፍልክሰ ቃቺደ ባሽ ቤዳ እት ብታኒ ደኤ። 15 ታን የሩሳላመን ደእሽን፥ ቄሳቱዋ ካፓቱነ አይሁዳ ጭማቱ አ ቦላ ፕርዳና ማላ፥ ታና ዎሲደ፥ አባ ታዉ ኦዴድኖ። 16 ታን፥ ‘ሞተቴዳ ኡራይ ባረና ሞትያዋንቱና እትፐ ኤቀናንነ ባረና ሞቴዳ የዎ ዛሩዋ እመናን፥ ኦና ግዶፐነ አꬂደ እምያዌ ሮመ አሳዉ ዎጋ ግደና’ ያጋደ ኡንቱንቶ ዛራድ።

17 “ሄዋ ድራዉ፥ ኡንቱንቱ ሀዋን ሺቄዳ ዎደ፥ ታን ጋምኤናን ዎንትሳ ጋላስ፥ ፕርዳ ጎለ ገላደ ጳዉሎሳ አሀና ማላ አዛዛድ። 18 አ ሞትያዋንቱ ኤቂደ፥ ኢታባን አ ሞተናን አግክኖ ጋደ ታን ቆፔዳዋዳን፥ አይነ አ ሞትበይክኖ። 19 ሽን ኡንቱንቱ ባረንቱ አማኔዳባንቱባነ ጳዉሎስ፥ ‘ፓጻ ደኤ’ ግያ ሀይቄዳ እት የሱሳ ጌተትያ ብታንያባ አናና ፓሉመቴድኖ። 20 ታን ሀ የዉዋ ዎታደ ብዳ ደማንታንቶ፥ ቆፋ ቃቼናን ደኣደ፥ ጳዉሎስ የሩሳላመ ቢደ፥ ሀ የዉዋ ያን ኦሸታናዉ ኮይንቶነ ጋደ አ ኦቻድ፤ 21 ሽን ጳዉሎስ ባረ የዉዋ አዉግስጾሰ ቄሳረ ኦግያ ኦይꬃና ጋካናዉ ናገታናዳን ኦችና፥ ታን አ ቄሳራኮ የዳና ጋካናዉ፥ እ ቃሸታና ማላ አዛዛድ” ያጌዳ።

22 ሄዋፐ ጉየ አግሪጳይ ፕስጾሳ፥ “ታን ታ ሁጰዉካ ቃይ ሄ ብታኒ ግያዋ ስሳና ኮያይ” ያጌዳ።

ፕስጾስ አ፥ “ኔን ዎንት እ ግያዋ ስሳናሳ” ያጌዳ።

23 ዎንትሳ ጋላስ፥ አግሪጳይነ ባርኒቀ ዳሮ ቦንቹዋን ኦላ ካፓቱዋናነ ካታማን ደእያ ዎልቃማ አሳና ዪደ፥ ፕርዳ ጎለ ገሌድኖ፤ ፕስጾስ ጳዉሎሳ አሀና ማላ አዛዝና አሄድኖ። 24 ፕስጾስ ሀዋዳን ያጌዳ፤ “ካትያ አግሪጳ፥ ሀዋን ኑናና ደእያ አሳ ኡባዉ፥ አይሁዳ አሳይ ኡባይ የሩሳላመንካ ሀዋንካ ዋሲደ፥ ‘እ ሀዋፐ ስንꬃዉ ፓጻ ደአናዉ በሰና’ ያጊደ፥ ታና ዎሴዳ ብታንያ ሀዋ በኢታ። 25 ሽን እ አይነ ሀይቃናዉ በስያዋ ኦꬄዳዋ ታን ደማበይከ፤ እ ባረ ሁጰዉ፥ ‘አዉግስጾሰ ቄሳረ ታባ ፕርዶ ያጋደ ኦቻድ’ ጌዳ ድራዉ፥ ቄሳራኮ አ የዳናዉ ታን ቆፓድ። 26 ታን አባ ታ ጎዳ አዉግስጾሰ ቄሳረዉ ጻፋናዉ ቱሙ የዉ ታዉ አይነ ባዋ፤ ሄዋ ድራዉ፥ እ ሎይꬅ ኦሸቶዋፐ ጉይያን፥ ታን ጻፍያባ ደማና ማላ፥ ህንተንቱ ስንꬃ፥ ካትያ አግሪጳ፥ ኡባ ነ ስንꬃ አ አሃድ። 27 አያዉ ጎፐ፥ ቃሸቴዳ ኡራ ኪትያ ዎደ፥ አ አያዉ ሞቴደንቶ፥ ኤርሰናን ጮኡ ግ ባሽያዌ ታዉ ኤያተꬃ ማላቴ” ያጌዳ።