1 አግሪጳይ ጳዉሎሳ፥ “ኔን ነባ ሃሳያናዉ ዳንዳያ” ያጌዳ። ሄ ዎደ ጳዉሎስ ባረ ኩሽያ ምጪደ ሀዋዳን ያግ ዛሬዳ።

2-3 “ካትያ አግሪጳ፥ አይሁዳቱዋ ዎጋነ ፓሉማ ኡባ ኔን ሎይꬃደ ኤርያ ድራዉ፥ ታና አይሁዳቱ ሞትያ የዉዋ ኡባ ሀቼ ታን ነ ስንꬃን ዛርያዎ ታ ካጫይ ዳርስ ሎአ ያጋደ ቆፓይ፤ ሄዋ ድራዉ፥ ኔን ታ ሃሳያ ሳለተናን ስሳና ማላ፥ ኔና ዎሳይ።

4 “ታን ናአተꬃፐ ዶማደ ታ አሳ ግዶንነ የሩሳላመን ደኤዳ ታ ደኡዋ አይሁዳ ኡባቱ ካሰፐ ዶሚደ ኤሪኖ። 5 ታን ኮይሮፐ ዶማደ፥ ኑ አማኑዋ ህግያ ኦፐነ ምንሲደ ናግያ ፓርሳዋቱዋ ባጋ ፓርሳዌ ግዳደ ደእያዋ፥ ኡንቱንቱ ማርካታናዉ ኮዮፐ ኤሪኖ። 6 ታን ሀእካ ጾሳይ ኑ አዋቶ እማና ጌዳዋ ናሸቻን ናግያ ድራዉ፥ ፕርደታናዉ ሀዋን ኤቃይ። 7 ቃይ ታማነ ላኡ ኑ አዎቱዋ ዛራቱ ጾሳዉ ቃማነ ጋላስ ኡባደ ምንስ ጎይኒደ፥ ጾሳይ እማና ጌዳዋ አካናዉ ናሸቻን ናጊኖ፤ ካትያ አግሪጳ፥ አይሁዳቱ ታና ሞትያዌ ታን ሄዋ ናሸቻን ናግያ ድራሳ። 8 አይሁዳቶ፥ ጾሳይ ሀይቄዳዋንታ ደንꬅያዋ አያዉ አማንክቴ?

9 “ታን ታ ሁጰዉካ ናዝሬትያ የሱሳ ኤቀታናዉ በሴ ጋደ ካሰ ቆፓድ። 10 ታን የሩሳላመን ኦꬄዳዌ ሀዋ፤ ቄሳቱዋ ካፓቱዋፐ ማታ አካደ፥ ጾሳ አሳቱዋፐ ጮራቱዋ ቃሽሳድ፤ ኡንቱንታ ዎꬍያ ዎደካ ኡንቱንቱ ሀይቂያዋ ዶሳድ። 11 አይሁዳ ዎሳ ጎለ ኡባን ዳሮ ዎደ ኡንቱንታ ሙራደ፥ ባረንቱ አማኑዋ ኡንቱንቱ አጋና ማላ ጎደታድ፤ ታን ዎጋይ ባይናዋ ኡንቱንቶ ሀንቀታደ፥ ሀራይ አቶ፥ ሀራ ጋድያ ካታማ ጋካናዉካ ኡንቱንታ መቶꬃይ።

12 “ታን ሀ የዎ ቄሳቱዋ ካፓቱዋፐ ማታነ አዛዙዋ አካደ ዳማስቆ ባድ። 13 ካተዉ፥ ታን ሴታ ጋላስ ኦግያን ደእሽን፥ አዋ ፖኡዋፐ ሎይꬅ አꬍያ ፖኡ ታናነ ታናና ቤዳዋንታ ዩይ አꬊደ፥ ሳሉዋፐ ፖእሽን በኣድ። 14 ኑን ኡባይ ሳኣን ኩንዴዳ ዎደ፥ እብራይስጸ ቃላን፥ ‘ሳኦላ፥ ሳኦላ፥ ታና አያዉ የደሳን መቶꬃይ? ኔን ታና እጹሳን ኔና ቆሃሳ’ ያጊደ ታዉ ኦድሽን ስሳድ።

15 “ያታደ፥ ‘ታ ጎዳዉ፥ ኔን ኦኔ?’ ያጋድ።

“ጎዳይ፥ ‘ታን ኔን የደሳን መቶꬅያ የሱሳ። 16 ሽን ደንዳ ኤቃ፤ አያዉ ጎፐ፥ ሀቼ ኔን ታና ቤኤዳዋነ ታን ኔና ስንꬃፐ በሳናዋ ሀራንቶ ማርካታና ማላ፥ ታዉ ኦꬅያዋ ኡዳደ ኔና ሱንꬃናዉ ነዉ ቆንጫድ። 17-18 ኡንቱንቱ ታና አማንና፥ ኡንቱንቱ ናጋራይ አቶ ጌተታናዳን፥ ጾሳይ ዶሬዳ አሳ ግዶን ኡንቱንቱ ባረንቱ ደኢያሳ ደማናዳን፥ ቃይ ꬉማፐ ፖኡዋ ስማናዳንነ ጻላህያ ጎዳተꬃፐካ ጾሳኮ ስማናዳን፥ ኡንቱንቱ አይፍያ ኔን ዶያና ማላ፥ እስራኤልያ አሳፐነ ታን ኔና ኡንቱንቱኮ ኪትያ አይሁዳ ግደናዋንቱፐ ኔና አሻና’ ያጌዳ።

19 “ካትያ አግሪጳ፥ ሄዋ ድራዉ፥ ታዉ ሳሉዋፐ ቤቴዳ ሳጻዉ ታን አዛዘታናዋ እጻበይከ። 20 ሽን ታን ካሰታደ፥ ዳማስቆንነ የሩሳላመን ሄዋፐ ጉይያን፥ ይሁዳ ጋድያ ኡባን ደእያዋንቱስነ አይሁዳ ግደናዋንቶ ባረንቱ ናጋራፐ ስማና ማላ፥ ቃይ ናጋራፐ ስማናዉ በስያዋ ኦꬂደ፥ ጾሳኮ ስማና ማላ ቃላ ኦዳድ። 21 ሄዋ ድራዉ፥ አይሁዳቱ ታና ጌሻ ጎልያን ኦይቂደ ዎꬋናዉ ኮዬድኖ። 22-23 ሄዋ ድራዉ፥ ታን ጾሳ ማዱዋ አካደ፥ ዳሮነ ጉꬃዉ ሀቼ ጋካናዉካ ኤቃደ ማርካታይ። ናባቱነ ሙሴ፥ ‘ክርስቶስ መቶታናዉ በሴ፤ ቃይ ሀይቁዋፐ ኮይሮ ደንዲደ፥ አይሁዳቶነ አይሁዳ ግደናዋንቶ አቶተꬃ ፖኡዋ ኦዳናዉ በሴ’ ጌዳዋዳን፥ ታንካ ኡንቱንቱ ሃሳዬዳዋፐ ሀራ እትባነ ሃሳዬዳባይ ባዋ” ያጌዳ። ኢሳ. 42:6፤ 49:6፤ 1 ቆሮ. 15:20

24 ጳዉሎስ ባረንቱባ ሀዋዳን ያጊደ ዛርሽን፥ ፕስጾስ ኮሻ ꬎቁ ኦꬂደ አ ሃሳያ ꬉባናዉ፥ “ጳዉሎሳ፥ ኔን ጎያ፤ ኔን ዳሪ ታማሬዳዌ ኔና ጎሻና ሀኔ” ያጌዳ።

25 ሽን ጳዉሎስ ሀዋዳን ያጌዳ፤ “ቦንቼቴዳ ፕስጾሳ፥ ታን ቱማተꬃን ሎኦ የዉዋነ ዎዛና ቆፋ ሃሳይያዋፐ አትን ጎይከ። 26 ታን ካትያ አግሪጳዉ ሀ የዉዋ ቆንጭያን ኦድያዋ እ ኤሬ፤ አያዉ ጎፐ፥ ሀ የዉ ጌማን ኦሰትቤና ድራዉ፥ ሀዋፐ እቱነ አፐ ጌመናዋ ታን ጌሻደ ኤራይ።

27 “ካትያ አግሪጳ፥ ኔን ናባቱ ጌዳዋ አማናይ? ኔን ኡንቱንቱ ጌዳዋ አማንያዋ ታን ኤራይ” ያጌዳ።

28 ካትያ አግሪጳይ ጳዉሎሳ፥ “ሀእ ሀ ቃንꬃ ዎዳትንካ ታና አማንꬃናዉ ኮያይ?” ያጌዳ።

29 ሄዋፐ ጉየ ጳዉሎስ፥ “ዳሮ ዎደ ግድና፥ ጉꬃ ዎደ ግድና፥ ነ ጻላላ ግዳካ፤ ሽን ሀቼ ታን ኦድያዋ ስስያ ኡባይ ቃይ ታዋዳን ቃሸቶፕኖ አትን፥ ታ ማላ ግዳናዳን ጾሳ ዎሳይ” ያጌዳ።

30 ሄዋፐ ጉይያን ካቲ፥ ሞድያ ፕስጾሰ፥ ባርኒቀነ፥ ኡንቱንቱና ደእያ ኡባይ ደንድ፥ 31 እት ባጋ ስሚደ፥ እቱ እቱዋና፥ “ሀ ብታኒ ሀይቁሳይ አቶ ሽን፥ ቃሹዋስካ በስያባ ኦꬅቤና” ያግ ሃሳዬድኖ። 32 አግሪጳይ ፕስጾሳ፥ “ሀ ብታኒ፥ ‘ቄሳሪ ታባ ፕርዶ’ ግቤነንቶ፥ ብለታናዉ ዳንዳዬ ሽን” ያጌዳ።