ጌሻ ማጻፋ አሞጻ 1

አሞጻ ትምቢትያ

ገሉዋ

ሀ ትምቢትያን ኦደቴዳ ኪታይ ጌሻ ማጻፋ ግዶን ሀራቱዋፐ አዱሳ ዎድያፐ ካሰና ጻፈቴዳ ማጻፋይ አሞጻ ትምቢትያ ማጻፋ። አሞጽ ይሁዳን ደእያ እት ካታማፐ ዬዳ አሳ ግዶፐነ፥ ክርስቶሳ የለታፐ ካሰ፥ ሆስፑንꬃ ጼቱ ላይꬃዉ ባጋ ሄራን ሀ ኪታ ሁጲሳ ባጋና ደእያ እስራኤልያ ካዉተꬃዉ አꬄዳ። ሄ ዎዲ ዳሮ ዱረተꬃይ፥ አያና ደኡዋንካ አሳይ ድጬዳነ አማንꬅያ ሀኖተꬃይ ቤቴዳ ዎደ። ግዶፐነ አሞጽ ዱረተꬃይ ዱረ አሳ ጻላላዉ እመቴዳዋ በኤዳ፤ ቃይ ሀራ ባጋና ሱረ ፕርዳይ ꬋይያዌነ ህዬሳቱዋ ኡቁንያዌ ጋድያን ዳሬዳዋ በኤዳ። አማኑዋ ኦይቀꬃ ግዶፐካ ቱሙዋፐ ሃኬዳዋ፥ ሎኦ ማላትያ ኢታይ ኩሜዳዋነ አኑ ባይና ሳሮተꬃይ ደእያዋካ በኤዳ። ሄዋ ጋሱዋን ጾሳይ ባረ አሳ ቦላ ሙሩዋ አሀናዋ ሀንቁዋንነ ጻላን ኩሚደ ኦዴዳ። ሄዋናካ፥ “ሱረ ፕርዳይ ሻፋ ሃꬃዳን ጎጎ” ያጊደ ቆፍሴዳ። ሄዋዳን ሀኖፐ፥ “ኡባ ሞድያ ጎዳይ አቴዳ እስራኤልያ አሳዉ ቃረቲደ ማራነንቶነ ኦን ኤሪ!” ያጌዳ (5:15)።

ሸምፓቱዋ ኡባቶ እመቴዳ ቃንꬃ ቆፋቱዋ

1. አሳ ዘረꬃ ኡባይ ባረ ዎንጃላን ኦሸትያዋ 1:1—3:2

2. እስራኤልያነ ሳማርያ ባሻ 3:3—6:14

3. እስራኤልያ ሙሩዋባ አሞጽ በኤዳ እቼሹ ሳጻቱዋ 7:1—9:10

4. እስራኤልያ ፖኦ ህዶታ 9:11-15

አሳ ዘረꬃ ኡባይ ባረ ዎንጃላን ኦሸትያዋ

(1:1—3:2)

1 ኦዝያነ ይሁዳ ጋድያን ካትያ፥ ቃይ ዮኣሻ ናአይ እዮርባም እስራኤልያ ጋድያን ካትያ ግዲደ ደኤዳ ላይꬃን ታቆአ ጋድያን ዶርሳ ሄምያዋንቱፐ እቱ አሞጽ፥ ቢታይ ቃጻናፐ ላኡ ላይꬃፐ ካሰ እስራኤልያባ በኤዳ ሳጻይ ሀዋ።

2 እ ሀዋዳን ያጌዳ፤ “መꬍና ጎዳይ ጽዮነ ደርያን ጉዴ፤ የሩሳላመ ካታማንካ ባረ ኮሻ ስሴ። ሄንꬃንቻቱ መህያ ሄምያ ሄንꬃ ጋደቱ መሊኖ፤ ቃርመሎሳ ደርያ ሁጲያን ደእያ እርጻይካ ሹሌ” ያጌዳ።

እስራኤልያ ዩሹዋን ደእያ ጋደቱዋ ቦላን ጾሳይ ፕርድያ ፕርዳ

ሶርያ

3 መꬍና ጎዳይ ሀዋዳን ያጌ፤ “ዳማስቆ አሳይ ዛር ዛሪደ ኦꬄዳ ናጋራ ድራዉ፥ ታን ኡንቱንታ ሙረናን አግከ። አያዉ ጎፐ፥ ኡንቱንቱ ጋላኣደ ቢታ አሳ ብራታ አቻና ደእያ ጋርያን የꬍሲደ ቆጼድኖ። 4 ሄዋ ድራዉ፥ ታን ካትያ ሀዛኤላ ጎልያን ታማ የዳና፤ የድና ሄ ታማይ ካትያ በንሀዳዳ ጌሱዋካ ማና። 5 ታን ዳማስቆ ካታማ ፐንግያ ኩልቡዋ መንꬃና፤ አዌና ዛንጋራን ደእያ አሳ የደርሳናነ ካተቱዋ ጻምኣ ኦይቄዳዋካ ቤት-ኤዴናፐ ꬋይሳና፤ ቃይ ሶርያ ጋድያ አሳይካ ኦሞደቲደ፥ ቂራ ግያሳ ባና” ያጌ መꬍና ጎዳይ።

ፕልስጼማ

6 መꬍና ጎዳይ ሀዋዳን ያጌ፤ “ጋዛ ካታማ አሳይ ዛር ዛሪደ ኦꬄዳ ናጋራ ድራዉ፥ ታን ኡንቱንታ ሙረናን አግከ። አያዉ ጎፐ፥ ኡንቱንቱ ጋድያን ደእያ አሳ ኡባ ኦሞዲደ፥ ኤዶማ ጋድያ አሳዉ ባይዜድኖ። 7 ሄዋ ድራዉ፥ ታን ጋዛ ካታማ ድርሳን ታማ የዳና፤ ሄ ታማይ ካታማ ጌሱዋካ ማና። 8 አሽዶዳን ደእያ አሳ ታን የደርሳናነ ካተቱዋ ጻምኣ ኦይቄዳዋካ አስቀሎናፐ ꬋይሳና። ኤቅሮና ካታማን ደእያ አሳካ ሙራና፤ ቃይ ፕልስጼማ ጋድያ አሳፐ አቴዳዋንቱካ ሀይቃና። ታን ኡባ ሞድያ መꬍና ጎዳይ ሀዋ ኦዳይ” ያጌ።

ጺሮሳ

9 መꬍና ጎዳይ ሀዋዳን ያጌ፤ “ጺሮሳ ካታማ አሳይ ዛር ዛሪደ ኦꬄዳ ናጋራ ድራዉ፥ ታን ኡንቱንታ ሙረናን አግከ። አያዉ ጎፐ፥ ኡንቱንቱ ጫቀቴዳ እሻተꬃ ጫቁዋ አꬊደ፥ ኦሞደቴዳ አሳ ኡባ ኤዶማ አሳዉ ባይዜድኖ። 10 ሄዋ ድራዉ፥ ታን ጺሮሳ ካታማ ድርሳን ታማ የዳና፤ ሄ ታማይ ካታማ ጌሱዋካ ማና” ያጌ።

ኤዶማ

11 መꬍና ጎዳይ ሀዋዳን ያጌ፤ “ኤዶማ ጋድያ አሳይ ዛር ዛሪደ ኦꬄዳ ናጋራ ድራዉ፥ ታን ኡንቱንታ ሙረናን አግከ። አያዉ ጎፐ፥ ኡንቱንቱ ባረንቱ እሻቱዋ እስራኤላቱዋ ማሻን የደርሴድኖ፤ ኡንቱንቱ ኡንቱንቶ ቃረትበይክኖ። ኡንቱንቱ ኡባ ገደ ሀንቀቲኖ፤ ኡንቱንቱ ይሉ መꬍናዉካ ስመና። 12 ሄዋ ድራዉ፥ ታን ቴማና ካታማ ቦላ ታማ የዳና፤ ሄ ታማይ ቦጽራ ካታማ ጌሶቱዋ ማና” ያጌ።

አሞና

13 መꬍና ጎዳይ ሀዋዳን ያጌ፤ “አሞና ጋድያ አሳይ ዛር ዛሪደ ኦꬄዳ ናጋራ ድራዉ፥ ታን ኡንቱንታ ሙረናን አግከ። አያዉ ጎፐ፥ ኡንቱንቱ ባረንቱ ዛዋ አሳናዉ ጋላኣደ ጋድያን ደእያ ሻሃራ ማጫ አሳቱ ኡሉዋ ዳኬድኖ። 14 ሄዋ ድራዉ፥ ታን ራባ ካታማ ድርሳን ታማ የዳና፤ ሄ ታማይ ካታማ ጌሶቱዋ ማና። ሄዋፐ ጉይያን፥ ኦላ ጋላስ ዋሱ ዳራና፤ ቃይ ኦላንቻቱ ጎትያዳን ዎልቃማና። 15 ኡንቱንቱ ካቲነ አናና ኦꬅያ ካፓቱ ኡባይ ኦሞደቲደ እትፐ ባና” ያጌ መꬍና ጎዳይ።

1:1 2 ካታ. 15:1-7፤ 2 ኦዱዋ 26:1-23፤ 2 ካታ. 14:23-29

1:2 ኢዩ. 3:16

1:3 ኢሳ. 17:1-3፤ ኤር. 49:23-27፤ ዛካ. 9:1

1:6 ኢሳ. 14:29-31፤ ኤር. 47:1-7፤ ህዝ. 25:15-17፤ ኢዩ. 3:4-8፤ ሶፎ. 2:4-7፤ ዛካ. 9:5-7

1:9 ኢሳ. 23:1-18፤ ህዝ. 26:1—28:19፤ ኢዩ. 3:4-8፤ ዛካ. 9:1-4፤ ማቶሳ 11:21-22፤ ሉቃሳ 10:13-14

1:11 ኢሳ. 34:5-17፤ 63:1-6፤ ኤር. 49:7-23፤ ህዝ. 25:12-14፤ 35:1-15፤ አብድ. 1-14፤ ሚልክ. 1:2-5

1:13 ኤር. 49:1-6፤ ህዝ. 21:28-32፤ 25:1-7፤ ሶፎ. 2:8-11