1 መꬍና ጎዳይ ሀዋዳን ያጌ፥ “ሄ ጋላሳቱዋንነ ሄ ዎድያን ታን ይሁዳነ የሩሳላመ አሳ ኦሞዱዋ ዛራናነ እሻልሳደ ዎꬃና። 2 ታን ካዉተꬃቱዋ ኡባን ደእያ አሳ ሺሻደ፥ ዱገ እዮሳፈጻ ዎምባ ዎꬃና፤ ኡንቱንቱ ታ አሳ እስራኤልያ ቦላ ኦꬄዳ ባይዙዋ ኡባ ድራዉ፥ ታን ኡንቱንታ ያን ፕርዳና። አያዉ ጎፐ፥ ኡንቱንቱ ታ አሳ ካዉተꬃቱዋ ግዶን ላሌድኖ፤ ቃይ ታ ቢታካ ባረዉ ግሽ አኬድኖ፤ 3 ኦሞደቴዳ ታ አሳ ቦላን ሳማ የጌድኖ፤ ሻርሙጻ ማጫ አሳ ደማናዉ፥ አቱማ ናኣ እሜድኖ፤ ቃይ ዎይንያ ኤሳ ኡሻናዉ፥ ማጫ ናቶ ባይዜድኖ።

4 “ሄዋዳንካ፥ ህንተኖ፥ ጺሮሳ፥ ሲዶናነ ፕልስጼማ ጋድያ አሳቶ፥ ህንተ ታ ቦላ አይ ኦꬃናዉ ቆፔድቴ? ታን ኦꬄዳዋ ሀሉዋ ከሳናዉ ኮዪቴ? ሄዋ ህንተ ኮዮፐ፥ ታን ኤሌላደ ህንተ ኦꬄዳ ኦሱዋ ህንተ ቦላ ዛራና። ኢሳ. 14:29-31፤ 23:1-18፤ ኤር. 47:1-7፤ ህዝ. 25:15—28:26፤ አሞጻ 1:6-10፤ ሶፎ. 2:4-7፤ ዛካ. 9:1-7፤ ማቶሳ 11:21-22፤ ሉቃሳ 10:13-14 5 አያዉ ጎፐ፥ ህንተ ታ ብራነ ታ ዎርቃ አኬድታ፤ ታ አልኦ ሚሻካ ህንተ ኤቃ ጎለቱዋ ገልሴድታ። 6 ይሁዳ ጋድያ አሳነ የሩሳላመ ካታማ አሳ ኡንቱንቱ ጋድያፐ ሃስ አፊደ፥ ግሪከ ጋድያ አሳዉ ዛልኤድታ። 7 በእተ፥ ህንተ ዛልኤዳ ሳኣፐ ታን ኡንቱንታ ሀእ ደንꬃና፤ ህንተ ኦꬄዳዋ ኡባ ህንተ ሁጲያን ዛራና። 8 ታን ህንተ አቱማ ናናቱዋነ ህንተ ማጫ ናናቱዋ ይሁዳ ጋድያ አሳዉ ዛልኤታናዳን ኦꬃና፤ ቃይ ኡንቱንቱካ ሃኮ ጋድያን ደእያ ሳባ ጋድያ አሳዉ ኡንቱንታ ዛልአና። ታን መꬍና ጎዳይ ሀዋ ኦዳድ።

9 “ሀዋዳን ያጊደ አይሁዳ ግደና አሳቱዋ ግዶን አዋይተ፤ ‘ኦላዉ ጊግተ፤ ምኖ አሳቱዋ ደንꬅተ! ኦላንቻቱ ኡባይ ሺቅኖነ ከስኖ። 10 ህንተ ማራሻ ማሻ፥ ኢሳ. 2:4፤ ሚክ. 4:3 ህንተ ባጫካ ቶራ ከሳናዉ ቆጽተ! ዳቡራንቻይ፥ ታን ምና! ያጎ። 11 ህንተኖ፥ ዩሹዋን ደእያ ካዉተꬃ ኡባቶ፥ ኤለካ ሃ ዪተ፤ ሄዋን ሺቅተ’ ያግተ” ያጌ።

አቤት መꬍና ጎዳዉ፥ ነ ኦላንቻቱዋ ያ ዱገ ዎꬃ!

12 ቃይካ ጾሳይ ሀዋዳን ያጌ፤ “ካዉተꬃቱ ደንዲደ፥ እዮሳፈጻ ዎምባ ቢኖ፤ አያዉ ጎፐ፥ ዩሹዋን ደእያ ካዉተꬃቱዋ ኡባ ቦላን ፕርዳናዉ ታን ያን ኡታና። 13 ኡንቱንቱ ኢታተꬃይ ሎይꬅ ዳሬዳ። ሳፃ 14:14-16፣ 19-20፤ 19:15 ሄዋ ድራዉ፥ ጫካ ዎዲ ጋክና ባጫን ጫክያዋዳን፥ ኡንቱንታ ጫክተ፤ ዎይንያ አይፊ ጉምእያ ኦላን ኩምና የꬍያዋዳንካ፥ ኡንቱንታ የꬍተ።”

14 ፕርዳ ዛንጋራን መꬍና ጎዳ ጋላሳይ ጋኬዳ፤ ሄዋ ድራዉ፥ ዳሮ ዳሮ አሳይ ፕርዳ ዛንጋራን ደኤ። 15 ሄ ጋላስ አዋይነ አግናይ ꬉማና፤ ጾልንተቱካ ባረንቱ ፖኡዋ ገንꬃና። 16 መꬍና ጎዳይ ጽዮነን ግዲደ ጉማና፤ አሞጻ 1:2 የሩሳላመንካ ባረ ኮሻ ስሳና፤ ሳሉነ ሳአይ ኮኮራና። ሽን መꬍና ጎዳይ ባረ አሳዉ እስራኤላዉ ባቃት አትያ ሳኣነ ደኡዋ ግዳናዋ።

17 መꬍና ጎዳይ፥ “ታን ታ ጌሻ ደርያን ጽዮነን ደእያ መꬍና ጎዳ ህንተ ጾሳ ግድያዋ ህንተ ሄ ዎደ ኤራና። የሩሳላመ ካታማይ ጌሻ ግዳናዋ፤ ቃይ አላጋቱዋ ኦላንቻቱ ላኤንꬆ የሩሳላመ ዎራጅክኖ።

18 “ሄ ጋላስ ደረቱ አይፍያ ዎይንያ ቱራን ካመታና፤ ደረቱዋ ቦላንካ ዳሮ ማꬃ እምያ ሚዛይ ሄመታና። ይሁዳ ጋድያን ደእያ ሻፋ ኡባና ሃꬃይ ፑልታና። መꬍና ጎዳ ጌሻ ጎልያፐ ፑልቱ ጎጋና፤ ሺጽማ ዛንጋራ ኡሻና።

19 “ግብጼ ጋዲ መላ ግዳናዋ፤ ኤዶማ ቢታይካ አይነ ዶለና ቢታ ግዳናዋ። አያዉ ጎፐ፥ ኡንቱንቱ ይሁዳ አሳ ቦላ ኢታባ ኦꬄድኖ፤ ቃይ ይሁዳ ጋድያን ጽሎ አሳ ሱꬃካ ጉሴድኖ። 20 ሽን ይሁዳ ጋዲ መꬍናዉ፥ የሩሳላመካ የለታ ኡባ ጋካናዉ፥ አሳይ ደኢያሳ ግዳናዋ። 21 ታን ጭገተናን አጌዳ ኡንቱንቱ ሱꬃ ሀሉዋ ብሮ ከሳና፤ አያዉ ጎፐ፥ ጾሳይ ጽዮነን ደኤ” ያጌ።