2
1 ጽዮነን ማላካታ ፑንተ፤ ታ ጌሻ ደርያንካ ማላካታ ስስተ! ይሁዳ ጋድያን ደእያ አሳይ ኡባይ ያሻዉ ኮኮሮ፤ አያዉ ጎፐ፥ መꬍና ጎዳ ጋላሳይ ዬ፤ ማታቴዳ። 2 ሄ ጋላሳይ ꬉማነ ሻኖቻ ጋላሳ፤ ሻርያነ ባራ ꬉማ ጋላሳ! ጮራነ ምኖ ኦላንቻቱ ደረቱዋ ቦላን ጻልቂ ከስያዋዳን ከስ ዎꬌድኖ። ኡንቱንቱ ማላይ በንፐ ዶምና ደእቤና፤ ሀዋፐ ስንꬃናዉ ዳሮ የለታ ጋካናዉካ ኡንቱንቱ ማላይ ደኤና።
3 ኡንቱንቱ ባረፐ ስንꬃና ደእያ ጫርሻ ኡባ ታማዳን ሚኖ፤ ቃይ ኡንቱንቱፐ ጉየና ደእያባ ላጩዋዳን ጹጊኖ፤ ኡንቱንቱፐ ስንꬃና ደእያ ሳአይ ኤደነ ገነትያ ማላ፤ ሽን ኡንቱንቱፐ ጉዪ መላ ባዙዋ ማላ፤ ኡንቱንቱፐ አያይነ አተና። 4 ኡንቱንቱ ማላይ ፓራ ማላ ማላ፤ ሳፃ 9:7-9 ኡንቱንቱ ኦላ ፓራቱዋዳን፥ ኤለካ ዎጺኖ። 5 ፓራይ ጎችያ ጋረቱዋ ኮሻ ጊሪኖ፤ ኡንቱንቱ ደረቱዋ ጼራና ጉፒኖ፤ ዳላ ምያ ታማ ላጩዋዳን ጻራጊኖ፤ ኦላ ባናዉ ሳልፔዳ ዎልቃማ ኦላንቻቱዋዳን ማራን ሀመቲኖ። 6 ኡንቱንቱፐ ስንꬃና አሳይ ኮኮሬ፤ ኡንቱንቱ ያሻዉ ኡባ ሶምኢ ላመቴዳ። 7 ኡንቱንቱ ኦላንቻቱዋዳን ዎጺኖ፤ ድርሳ ግምቢያካ ግኢኖ። ኡንቱንቱ ኡባይካ ባረ ማራን ሳልፒኖ፤ ባረንቱ ሳልፕያፐ ጋጻ ከስክኖ። 8 ኡንቱንቱ እቱ እቱዋና ሱገትክኖ፤ ኡባይካ ባረ ሳልፕያን ሳልፕያን ስት ጊደ፥ ስንꬃዉ ሀመቲኖ። ኡንቱንቱ ባረናና ኦለትያዋንቱ ግዱዋና ꬉሲደ አꬊኖ፤ ሄ ዎደ ኡንቱንታ ተእያባይ ባዋ። 9 ኡንቱንቱ ካታማ ኤለካ ዎራጂኖ፤ ድርሳ ግምቢያ ቦላንካ ዎጺኖ። ኡንቱንቱ ጎልያ ቦላካ ከሲኖ፤ ቃይ ካይሱዋዳን፥ ማስኮትያና ገሊኖ። 10 ኡንቱንቱፐ ስንꬃና ጋዲ ቃጼ፤ ሳፃ 8:12 ሳሎቱካ ኮኮሪኖ። አዋይነ አግናይ ꬉሚኖ፤ ቃይ ጾልንተቱካ ባረንቱ ፖኡዋ ገንꬂኖ። 11 መꬍና ጎዳይ ባረ ኦላንቻቱዋ ስንꬃን ጉሜ፤ ሳፃ 6:17 አዉ አዛዘትያ ኦላንቻቱ ጮራነ ዎልቃማ። መꬍና ጎዳ ጋላሳይ ግታነ ዳሮፐ ያሽያዋ። ሄ ጋላሳ ዳንዳያናዌ ኦኔ?
ናጋራፐ ስማናዳን ጼሳ
12 መꬍና ጎዳይ ሀዋዳን ያጌ፤ “ሀእካ ጾሚደ፥ ዬኪድነ ካዮቲደ ፖሎ ዎዛናፐ ታኮ ስምተ። 13 ህንተ ዎዛናፐ አትና፥ ህንተ ማዩዋ ፔꬎፕተ” ያጌ።
መꬍና ጎዳኮ፥ ህንተ ጾሳኮ፥ ስምተ፤ አያዉ ጎፐ፥ እ ቃረታይነ ማሮታይ ኩሜዳዋ፤ ሀንቆ ኤሌለናዋነ ሲቁ ዳሬዳዋ፤ እ ህንተና ሙራናዉ ኮየናዋ። 14 ኦን ኤሪ፥ ጾሳይ ህንተ ጾሳይ፥ ባረ ሀንቁዋፐ ስሚደ፥ ህንተንቶ ዳሮ ካꬃ አንጁዋ እማነንቶነ። ሄ ዎደ መꬍና ጎዳዉ፥ ህንተ ጾሳዉ፥ ካꬃ ያርሹዋነ ኡሻ ያርሹዋ ህንተ ያርሻና።
15 ጽዮነን ማላካታ ፑንተ፤ ያአዉ አሳ ሺሽተ! ጾማ አዋይተ፤ 16 ሺቁዋ ጌሽተ፤ ጭማቱዋ እትፐ አህተ፤ ጉꬃ ናናቱዋነ ꬋምያዋንታካ አሾፕተ። አክያዌ ቡላቻ ጎልያፐ ከሶ፤ ቡላቼትያናካ ባረ ሲርጻፐ ከሱ። 17 መꬍና ጎዳዉ ኦꬅያ ቄሳቱ ጌሻ ጎልያ ባራንዳፐነ ያርሽያ ሳኣፐ ግዱዋን ኤቂደ ዬክኖ። ኡንቱንቱ ሀዋዳን ያጊደ ዎስኖ፤ “አቤት መꬍና ጎዳዉ፥ ነ አሳዉ ቃረታ፤ ነ አሳ ካዉተꬃቱዋ ግዶን ቦርያባነ ቅሊጭስያዋ ከሶፓ። አሳይ ባረ ግዶን አያዉ፥ ‘ኡንቱንቱ ጾሳይ ሀቃን ደኢ?’ ያጋኔ?” ያግኖ።
ጎዳ ጋላሳ
(2:18-32)
18 ያትና፥ መꬍና ጎዳይ ባረ ቢታዉ ሴለታና፤ ቃይ ባረ አሳዉካ ቃረታና። 19 መꬍና ጎዳይ ዛሪደ ባረ አሳ ሀዋዳን ያጌ፤ “በእተ፥ ታን ህንተንቶ ካꬃ፥ ዎይንያ ኤሳነ ዛይትያ ህንተና አዳ ካልስያዋ የዳና፤ ታን ህንተና ሙለካ ካዉተꬃቱዋ ግዶን ቦርያ ከስከ።
20 “ሁጲሳ ባጋና ዬዳ ቦልያዳን ግዴዳ ሞርከቱዋ ታን የደርሳደ፥ ህንተፐ ሃሳና፤ ባዙዋነ መላ ቢታ ታን ኡንቱንታ የደርሳና። አዋይ ዶልያ ባጋና ደእያዋንታ ማጽነ አባዉ፥ አዋይ ዉልያ ባጋና ደእያዋንታ ቃይ ሜድተራነ አባዉ ዛራደ የዳና፤ ኡንቱንቱ አሃይ ጽንቁዋ ጾኡ ጋና። ሄዌ ኡባይ ኡንቱንቱ ህንተ ቦላ ዎልቃማ ኢታባ ኦꬄዳ ግሻሳ” ያጌ።
21 ቢታዉ፥ ስም ያዮፓ፤ መꬍና ጎዳይ ግታባ ኦꬄዳ ድራዉ፥ ናሸታነ ሀሹ ጋ! 22 ህንተኖ ሳኣ መሄቶ፥ ያዮፕተ፤ አያዉ ጎፐ፥ ባዙዋን ደእያ ሄንꬃ ጋዲ አጬዳ፤ ምꬃይካ ባረ አይፍያ አይፌ፤ ኤꬃ ምꬃይነ ዎይንያ ቱራይካ አይፍያ ዶርጾጼ።
23 ህንተኖ ጽዮነ አሳቶ፥ ናሸትተ፤ መꬍና ጎዳን፥ ህንተ ጾሳን፥ ሀሹ ጊተ! አያዉ ጎፐ፥ እ ባልጉዋ እራ ህንተንቶ ዳርሲደ እሜዳ፤ ቃይ እ ካሰዋዳን፥ ህንተንቶ ባልጉዋ እራነ አድልያ እራ ግድሲደ እሜዳ። 24 ካꬃ ቡክያ ኡዱማቱዋን ካꬃይ ኩማና፤ ዎይንያ ኤሳይነ ዎጋራ ዛይቲ ጉምእያ ኦላቱዋ ኩሚደ ፓላሀና።
25 መꬍና ጎዳይ ህንተ ጾሳይ ሀዋዳን ያጌ፤ “ካሰ ታን ህንተ ግዶ የዴዳ፥ ታ ዎልቃማ ኦላንቻቱዋ፥ ጎንዶቱ፥ ቦለቱ፥ ቡምቡሮቱነ ኩኩቦቱ ሜዳ ላይꬃቱዋ አጩዋ ታን ህንተንቶ ጭጋና። 26 ማናዉ ህንተንቶ ዳሮ ቁማይ ደአና። ሄዋ ድራዉ፥ ህንተ ካላናነ ማላልስያባ ህንተንቶ ኦꬄዳ ታና መꬍና ጎዳ ህንተ ጾሳ ሱንꬃ ጋላታና። ቃይ ታ አሳይ ላኤንꬆ ሙለካ ዬላተና። 27 ሄ ዎደ ታን እስራኤልያ ግዶን ደእያዋ፥ ታን መꬍና ጎዳይ ህንተ ጾሳ ግድያዋነ ታፐ አትና፥ ሀራ ጾስ ባይናዋ ህንተ ኤራና። ቃይ ታ አሳይ ላኤንꬆ ሙለካ ዬላተና።
28 “ሄዋፐ ጉይያን ሀዋዳን ሀናና፤ ታን አሳ ኡባ ቦላ ታ አያና ጉሳና። ኪታ 2:17-21 ህንተ አቱማ ናናቱነ ህንተ ማጫ ናናይ ትምቢትያ ኦዳና፤ ህንተ ጭማቱካ አኩሙዋ አኩመታና፤ ህንተ ዎዳላ ናናይካ ሳፃ በአና። 29 ሄ ጋላሳቱዋን ታ አቱማ ቆማቱ ቦላነ ታ ማጫ ቆማቱ ቦላ ታን ታ አያና ጉሳና።
30 “ቃይ ታን ቦላ ሳሉዋን ማላልስያባ፥ ጋርሳ ሳንካ ሱꬃ፥ ታማነ ስት ጊደ ፑደ ደንድያ ጩዋ በሳና። 31 ግታነ ዳሮፐ ያሽያ መꬍና ጎዳ ጋላሳይ ጋካናፐ ካሰ አዋይ ꬉማና፤ማቶሳ 24:29፤ ማር. 13:24-25፤ ሉቃሳ 21:25፤ ሳፃ 6:12-13 አግናይካ ሱꬃ ማላታና። 32 ሄ ዎደ ሀዋዳን ሀናና፤ መꬍና ጎዳ ሱንꬃ ጼስያ ኡባይ አታና። ሮመ 10:13 መꬍና ጎዳይ ጌዳዋዳን፥ ጽዮነ ደርያንነ የሩሳላመን አትያዋንቱ ደአና። ሄዋንቱፐካ መꬍና ጎዳይ ጼሴዳዋንቱ ፓጻ ደአና።”