ኢዩኤላ ትምቢትያ
ገሉዋ
ትምቢትያ ኦድያ ኢዩኤል አዉደ ደኤደንቶ አ ደኡዋ ታርክያን ዳሮ ኤረትያዌ ባዋ። ግዶ ሽን፥ አ ሱንꬃ ብለꬃይ፥ “መꬍና ጎዳይ ታ ጾሳ” ግያዋ ግዶደ ጾሳይ አናና ደእያዋ በሴ። ሀ ማጻፋ ትምቢትያዉ ሀራ ጌሻ ማጻፋቱዋና ቃራ ማታይ ደኤ። ማጻፋይ ቤቴዳዌ ክርስቶሳ የለታፐ ካሰ፥ ኦይደንꬆ ዎይ እቼሸንꬆ ጼቱ ላይꬃ ሄራና ጌተቲደ ቆፈቴ። ሄ ዎዲ ፓርሰ ካተተꬃይ ደእያ ዎደ። ኢዩኤል ኦዲደ፥ እስራኤልያ ጋድያን ዳሮ ቦሊ ያናዋነ ጋድያ ባይዝያ አዋይ አዋጽና ጋዲ ኮሻታናዋ ኦዴ። ሀ ሀኖታቱ ቃይ ጎዳ ጋላሳይ ማታቴዳዋ ኦዲኖ። ጎዳ ጋላሳይ ጋክያ ዎደ፥ አ ጌሻ ሸኒ ፖለተናዳን ዋትያዋንታ ኡባ እ ሙራናዋካ ጉጂደ ኦዲኖ። ትምቢትያ ኦድያዌ አሳይ ናጋራፐ ስምያዋ ግዶፐ፥ ጾሳይ ኡንቱንታ ካሰ ኡንቱንቱ ደእያ ሀኖታኮ ዛሪደ፥ አንጃናዋ ሀሳይሴዳ። ሀናና ጊደ እ ኦዴዳዋፐ ግታቲደ ቤትያ ህዶታይ ጾሳይ አቱማ አሳቱዋነ ማጫ አሳቱዋ ቦላ፥ ያላጋቱዋነ ጭማቱዋ ቦላ፥ ባረ አሳ ኡባ ቦላ ባረ አያና ጉሳናዋ ኦድያ ሳኣ።
ሸምፓቱዋ ኡባቶ እመቴዳ ቃንꬃ ቆፋቱዋ
1. ቦልያነ ሞርክያ ዎታዳራ 1:1—2:17
2. ጎዳ ጋላሳ 2:18-32
3. ጎዳይ አማነናዋንታ ሙርያዋ 3:1-21
1
ቦልያነ ሞርክያ ዎታዳራ
(ሆሰ 1:1—2:17)
1 ፑቱኤላ ናኣ ኢዩኤላኮ መꬍና ጎዳይ ኪቴዳ ቃላይ ሀዋ።
2 ህንተኖ ጭማቶ፥ ሀዋ ስስተ! ይሁዳ ጋድያን ደእያ አሳዉ ኡባዉ፥ ስስተ! ሀዋ ማላባይ ህንተ ዎደ ዎይ ህንተ አዎቱዋ ዎደ ሀን ኤሪ? 3 ሄዋ ህንተ ናናቶ ኦድተ፤ ህንተ ናናይ ባረንቱ ናናቶ ኦድኖ፤ ቃይ ኡንቱንቱ ናናይካ ካልያ የለታዉ ኦድኖ።
4 ጎንዱዋፐ አቴዳ ካꬃ ዉደ ቦሊ ሜዳ፤ ዉደ ቦልያፐ አቴዳ ካꬃ ቡምቡረꬃይ ሜዳ፤ ቃይ ቡምቡረꬃፐካ አቴዳ ካꬃ ኩኩባይ ሜዳ።
5 ህንተኖ ማꬆትያዋንቶ፥ ቤጎቲደ ዬክተ! ህንተኖ፥ ዎይንያ ኤሳ ኡሽያዋንቶ ኡባ ገደ፥ ዝላልተ! አያዉ ጎፐ፥ ማልእያ ዎይንያ ኤሳይ ህንተ ዶናፐ አቴዳ። 6 ፓይዱ ባይና ኦላንቻይ ታ ጋድያ ማዬዳ። ኡንቱንቱ አቻይ ጋሙዋ አቻ ማላ፤ ቃይ ኡንቱንቱ ካስሊካ ጋማት ካስልያ ማላ። ሳፃ 9:8 7 ኡንቱንቱ ታ ዎይንያ ቱራ ባይዜድኖ፤ ታ ባላስያ ምꬃካ ጮሜድኖ። ኡንቱንቱ ፖቁዋ ኡባ ም ድጌዳ ድራዉ፥ ዎይንያነ ባላስያ ታሸቱ ኡባይ ቦጼድኖ።
8 አቱማዎ፥ ባረ ያላጋተꬃን አ ጊጌዳ አስናይ ሀይቂና፥ ዋሩዋ ማያደ ዬክያ ጌላያቲዳን፥ ኡባይካ ዬክተ! 9 ካꬃ ያርሹነ ኡሻ ያርሹ መꬍና ጎዳ ጌሻ ጎልያ ብያዋ አጌዳ፤ ሄዋ ድራዉ፥ መꬍና ጎዳዉ ኦꬅያ ቄሳቱ ዬኪኖ። 10 ሾይቃይ መላ አቴዳ፤ ቢታይካ ዬኬ። አያዉ ጎፐ፥ ካꬃይ ꬋዬዳ፤ ዎይንያ ቱራይ መሌዳ፤ ዛይቲካ ላፌዳ።
11 ህንተኖ ጎሻንቻቶ፥ ካዮትተ! ህንተኖ፥ ዎይንያ ቱራ ቶክያዋንቶ፥ ዝላልተ! አያዉ ጎፐ፥ ጫኩ ጋኬዳ ዛርጋይነ ባንጋይ ጋደን ꬋይክቼዳ። 12 ዎይንያ ቱራይ መሌዳ፤ ባላስያ ምꬃይካ ሹሌዳ፤ ሮማንያ ግያ ምꬃይ፥ ተምርያ ግያ ምꬃይ፥ አፕልያ ግያ ምꬃይነ ቃይ ሾይቃን ደእያ ሀራ ምꬃ ኡባይካ መሌዳ። ሄዋ ድራዉ፥ አሳፐ ናሸቻይ ሃኬዳ።
ስማናዳንነ ዎሳናዳን ሺቆ ጼሳ
(ሆሰ 1:11—2:17)
13 ህንተኖ ቄሳቶ፥ ዋሩዋ ማዪደ ዬክተ! ህንተኖ፥ ያርሽያሳን ኦꬅያ ቄሳቶ፥ አዬ! አዬ! ጊተ፤ ህንተኖ፥ ታ ጾሳ ስንꬃን ኦꬅያዋንቶ፥ ጌሻ ጎልያ ገልተ፤ ዋሩዋ ማዪደ አቅተ። አያዉ ጎፐ፥ ካꬃ ያርሹዋነ ኡሻ ያርሹዋ ጾሳ ጌሻ ጎልያን ያርሽያዌ ባዋ።
14 ጾማ አዋይተ፤ ጌሻ ያአዉ አሳ ጼሲደ ሺሽተ፤ ጭማቱዋነ ጋድያን ደእያ አሳ ኡባ መꬍና ጎዳ ህንተ ጾሳ ጌሻ ጎልያ ሺሽተ፤ ያቲደ ያን መꬍና ጎዳኮ ዋስተ!
15 መꬍና ጎዳ ጋላሳይ ማቴዳ፤ ኢሳ. 13:6 ሄ ጋላሳዉ አየ አና! ሄ ጋላሳይ ኡባ ዳንዳይያ ጾሳፐ ባሻ ጋላሳ ግዲደ ዬ። 16 ኑ አይፍያ ስንꬃፐ ካꬃይ፥ ኑ ጾሳ ጌሻ ጎልያፐ ናሸቻይነ እልልሳይ ꬋዬዳ ግደኔ? 17 ዘረቴዳ ዘረꬃይ ቢታ ግዶን ቡቄዳ፤ ካꬃይ መል ክቼዳ ድራዉ፥ ዬሲካ ኡባይ መላ ግዴዳ፤ ድየቱካ ኮለቴድኖ። 18 መሄቱ ሎይꬅ ዋሲኖ፤ ሚዛ ዉድያዉካ ማታይ ባይና ድራዉ፥ ያነ ሃነ ብቻሪኖ። ሀራይ አቶ፥ ዶርሳ ዉደቱካ ቱጋቲኖ።
19 አቤት መꬍና ጎዳዉ፥ ታማይ ባዙዋን ደእያ ሄንꬃ ጋደቱዋ ም ድጌዳ ድራዉነ ደምባን ደእያ ምꬃ ኡባ ላጩ ጹግ ድጌዳ ድራዉ፥ ታን ኔኮ ዋሳይ። 20 ጎግያ ሃꬃይ መሌዳ ድራዉነ ታማይ ባዙዋን ደእያ ማታ ም ድጌዳ ድራዉ፥ ሀራይ አቶ፥ ባዙዋ ዶአቱካ ኔኮ ዋሲኖ።