3
1 ህንተኖ እስራኤልያ አሳቶ፥ መꬍና ጎዳይ ህንተ ቦላ፥ ግብጼ ጋድያፐ እ ከሴዳ አሳ ኡባ ቦላ ሃሳዬዳዋ ስስተ። 2 “ሳኣን ደእያ አሳ ኡባፐ ታን ህንተ ጻላላ ዶራድ። ሄዋ ድራዉ፥ ህንተ ኦꬄዳ ናጋራ ኡባዉ ታን ህንተና ሙራና” ያጌ።
እስራኤልያነ ሳማርያ ባሻ
(3:3—6:14)
3 ላኡ አሳቱ ቆፋይ እታ ግደናን ደኢደ እትፐ ሀመቲኖ?
4 ጋሙ ኦይቂያዋ ደመናን ዎራን ጮ ጉዲየ? ዎይ ዎዳላ ጋሙ አየንቶ የደርሲደ ኦይቀናን ባረ ጌሱዋን ዳሪየ?
5 ኦይቃናዉ የጌዳ ግትያ ግዶን ካꬃይ ꬋዮፐ፥ ካፉ ጮ ኦይቀቲ? ዎይ ጲሪ አየንቶ ኦይቂያባይ ባይናን ጮ ፕሪ?
6 ካታማ ግዶን ኦላ ማላካታይ ፑነትያ ዎደ፥ አሳይ ያሻን ኮኮረኔየ? ዎይ መꬍና ጎዳይ ኪተናን ደእሽን፥ ባሻይ እት ካታማ ቦላን ዪየ?
7 ቱሙዋፐ ኡባ ሞድያ መꬍና ጎዳይ ባረ ጹራ ትምቢትያ ኦድያ ባረ ቆማቶ ካሰቲደ ቆንጭሰናን ደኢደ፥ አያነ ኦና።
8 ጋሙ ጉድና፥ ያየናዌ ኦኔ? ኡባ ሞድያ መꬍና ጎዳይ ኦድና፥ ትምቢትያ ኦደናዌ ኦኔ?
ሳማርያ ኩንደꬃ
9 አሽዶዳ ካታማንነ ግብጼ ካትያ ጎለቱዋን ደእያ ኡባቶ ሀዋዳን ያጊደ አዋይተ፤ “ሳማርያ ደረቱዋ ቦላ ሺቅተ፤ ሺቂደ ያን ሀንያ ዎልቃማ ዋጨꬃነ ሱገꬃ ኦሱዋ በእተ” ያግተ።
10 መꬍና ጎዳይ ሀዋዳን ያጌ፤ “ሀ አሳቱ ሱረባ ኦꬅያዋ ኤርክኖ፤ ሱገꬃንነ ቦንቂደ አሄዳ ሻሉዋን ባረንቱ ጎልያ ኩንꬅ ዎꬄድኖ” ያጌ። 11 ሄዋ ድራዉ፥ ኡባ ሞድያ ጾሳይ ሀዋዳን ያጌ፤ “ሞርኪ ህንተ ቢታ ዶዳና፤ ህንተ ጌሱዋ ላላና፤ ህንተ ዱረቱዋ ጎልያካ ቦንቃና” ያጌ።
12 መꬍና ጎዳይ ሀዋዳን ያጌ፤ “ሄንꬃንቻይ ጋሙዋ ዶናፐ ዶርሳ ዎꬅ አክያ ዎደ፥ ዶርሳዉ ላኡ ገደቱዋ ዎይ ዱጻ ሀይꬃ ዎꬅ አክያዋዳን፥ ሄዋዳንካ ሳማርያ ጋድያን እሻሉዋን ኡቴዳ እስራኤልያ አሳፐ አማሬዳዋንቱ ጻላላይ አታና” ያጌ።
13 መꬍና ጎዳይ፥ ኡባፐ ዎልቃማ ጾሳይ መꬍና ጎዳይ ሀዋዳን ያጌ፤ “ሀዋ ስስተ፤ ያቆባ ዛራቱዋ ቦላ ማርካትተ። 14 ታን እስራኤልያ አሳ ኡንቱንቱ ናጋራ ድራዉ ሙሪያ ጋላስ፥ ቤቴለ ካታማን ደእያ ያርሽያ ሳኣ ኮላና፤ ያርሽያ ሳኣን ደእያ ካጨቱካ መኢደ፥ ሳኣን ዎꬋና።2 ካታ. 23:15 15 ባልጉዋን ኡንቱንቱ ደእያ ጎልያነ ቦንያን ኡንቱንቱ ደእያ ጎልያ ኡባ ታን ꬋይሳና። ዳንጋርሳ ዛልያን አሌቂሲደ፥ ኡንቱንቱ ኬጼዳ ጎሊካ ኮለታና፤ ቃይ ዎልቃማ ዎልቃማ ጎለቱ ኡባይካ ꬋያና” ያጌ መꬍና ጎዳይ።