1 ህንተኖ፥ ሳማርያ ማጫዋንቶ፥ ባሳነ ጋድያ ማጫ ሚዛቱዋዳን ሞꬌዳዋንቶ፥ ሀዋ ስስተ! ህንተ ህዬሳቱዋ ኡቁኒታ፤ ማንቆቱዋካ ቱጋዪታ። ህንተ አስናቱዋካ፥ “ኑዉ ኡሻ ሀምተ” ያጊታ። 2 ኡባ ሞድያ መꬍና ጎዳይ ሀዋዳን ያጊደ፥ ባረ ጌሻተꬃን ጫቃ፤ “ህንተ ማጋን ኦይቂደ ጎሸታና ጋላሳይነ ህንተፐ አቴዳ አማሬዳዋንቱካ ማጋን ኦይቂደ ብያ ሞለቱዋዳን ሀናና ጋላሳይ ያና። 3 ህንተ ኡባይካ ድርሳ ጾእያና ጎችና ከሲደ፥ ሄርሞነን ኦለታና” ያጊደ ጫቄዳ መꬍና ጎዳይ።

4-5 ኡባ ሞድያ መꬍና ጎዳይ ሀዋዳን ያጌ፤ “ህንተኖ፥ እስራኤልያ አሳቶ፥ ቢተ፤ ቤቴለ ቢደ፥ ናጋራ ኦꬅተ፤ ጋልጋላካ ቢደ፥ ናጋራ ጉጂደ ኦꬅተ። ዎንታ ዎንታ ህንተ ያርሹዋ ያርሽተ፤ ሄዘንꬆ ጋላስ ጋላስ ህንተ አስራታ አህተ። እርሹዋ የጊደ ኡኬዳ ኡክꬃ ጹጊደ፥ ጋላታ ያርሹዋ ያርሽተ። ህንተ ህንተ ዶሱዋን እምያዋ ድራዉ፥ ኦቶረቲደ አዋይተ። አያዉ ጎፐ፥ ህንተ ኦꬃናዉ ዶስያዌ ሄዋ” ያጌ።

6 ቃይካ መꬍና ጎዳይ ሀዋዳን ያጌ፤ “ህንተ ካታማ ኡባን ታን ኮሻ የዳደ፥ ሀራይ አቶ ህንተ ማታን ዳጽያባካ ꬋይሳድ፤ ሽን ህንተ ሄዋንካ ታኮ ስምበይክታ። 7 ካꬃ ጫክያ ዎዲ ጋካናዉ ብሮ ሄዙ አግናይ ደእሽን፥ ታን ህንተንቶ እራ ተኣድ። ታን እት ካታማን እራ ቡክሳደ ሀራ ካታማን ቡከናዳን ድጋድ፤ እት ሾይቃን ቡኬዳ፤ ሀራ ቡክቤና ሾይቃይ ቃይ መሌዳ። 8 ሄዋ ድራዉ፥ ላኡ ዎይ ሄዙ ካታማቱዋ አሳይ ሃꬃ ኡሻናዉ እት ካታማ ቤድኖ፤ ሽን አልበይክኖ። ሄዋንካ ቃይ ህንተ ታኮ ስምበይክታ” ያጌ መꬍና ጎዳይ።

9 መꬍና ጎዳይ፥ “ታን ህንተ ካꬃ ቦላን ሀርግያ የዳድ፤ ህንተ አታክልትያነ ህንተ ዎይንያ ቱራ፥ ህንተ ባላስያ ምꬃነ ህንተ ዎጋራ ኡባ ቦሊ ሜዳ፤ ሽን ህንተ ሄዋንካ ታኮ ስምበይክታ” ያጌ።

10 መꬍና ጎዳይ፥ “ታን ግብጼ አሳቱዋ ቦላ ኢታ ሀርግያ የዴዳዋዳን፥ ህንተ ቦላንካ ቦሻ የዳድ፤ ህንተ ዎዳላ ናናቱዋ ማሻን ዎꬋድ፤ ህንተ ፓራቱካ ኦሞደታናዳን ኡዳድ። ህንተ ሞꬃን ሀይቄዳ አሳ አሃ ጽንቁዋን ህንተና ኡላድ፤ ሽን ህንተ ሄዋንካ ታኮ ስምበይክታ” ያጌ።

11 መꬍና ጎዳይ፥ “ሶዶማነ ጋሞራ ካታማቱዋ ꬋይሴዳዋዳን፥ ህንተፐካ ዳሮቱዋ ꬋይሳድ፤ ሀ አቴዳ ህንተካ ታማፐ ኤጺደ አቴዳ ጺፋ ማላ፤ ሽን ህንተ ሄዋንካ ታኮ ስምበይክታ” ያጌ። ዶመꬃ 19:24

12 ጾሳይ፥ “ሄዋ ድራዉ፥ እስራኤልያ አሳቶ፥ ታን ህንተና ሄዋዳን ኦꬃደ ሙራና ሀናይ። ታን ህንተና ሀዋዳን ኦꬃደ ሙራና ሀንያ ድራዉ፥ እስራኤልያ አሳዉ፥ ህንተ ጾሳና ጋከታናዉ ጊግተ” ያጌ።

13 ደረቱዋ ጊግሴዳዌ፥ ጫርኩዋካ መꬌዳዌ፥ ባረ ዎዛና ቆፋ አሳዉ ቆንጭስያዌ፥ ዎንታ ፖኡዋ ꬉማዉ ላምያዌ፥ ጋድያን ደእያ ꬎቃ ደረቱዋ የꬍያዌ፥ አዉ ሱንꬃይ መꬍና ጎዳ፥ ኡባፐ ዎልቃማ ጾሳ።