1 ኡባ ሞድያ መꬍና ጎዳይ ታና ሳፃ በሴዳ። ሄ ሳጻን ታን ካትያ ጋክያ ካꬃይ ጫከቴዳዋፐ ጉይያን፥ ላኤንꬁዋ ጫሬዳ ጫርሻ ቦላ እ ቦልያ ዉድያ መꬍሽን በኣድ። 2 ኡንቱንቱ እርጻባ ኡባ ሚደ ዉርሴዳ ዎደ ታን፥ “አቤት ኡባ ሞድያ መꬍና ጎዳዉ፥ ሀያና አቶ ጋርኪ! ያቆባ ዛራቱ ዋኒደ አታናዉ ዳንዳዪኖ? ኡንቱንቱ ቄር ጉꬃቱዋቴ!” ያጋድ።

3 ሄዋ ድራዉ፥ መꬍና ጎዳይ ቃረቴዳ፥ ባረ ቆፋ ላሜዳ፤ ላሚደ ሀዋዳን ያጌዳ፤ “ሀ ኔን በኤዳባይ ፖለተናዋ” ያጌዳ መꬍና ጎዳይ።

4 ኡባ ሞድያ መꬍና ጎዳይ ታና ሀራ ሳፃ በሴዳ። ኡባ ሞድያ መꬍና ጎዳይ ባረ አሳ ፕርዳናዉ ታማ ጼሴዳ፤ ሄ ታማይ ዎልቃማ ጪማ አባ ም ድጊደ፥ ቢታካ ጹጋናዉ ዶሜዳ። 5 ያትና ታን ሀዋዳን ያጋድ፤ “አቤት ኡባ ሞድያ መꬍና ጎዳዉ፥ ሀያና ሀ ታማ ቶይሳርኪ! ያቆባ ዛራቱ ዋኒደ አታናዉ ዳንዳዪኖ? ኡንቱንቱ ቄር ጉꬃቱዋቴ!” ያጋድ።

6 ሄዋ ድራዉ፥ መꬍና ጎዳይ ቃረቴዳ፥ ባረ ቆፋ ላሜዳ፤ ላሚደ ኡባ ሞድያ መꬍና ጎዳይ ሀዋዳን ያጌዳ፤ “ሀዌካ ቃይ ፖለተናዋ” ያጌዳ።

7 ቃይካ እ ታና ሀራ ሳፃ በሴዳ። ታን ሄ ሳጻን በእያ ዎደ፥ ጎዳይ ግምቢያ ስታተꬃ ልክያ ቱምቢያ ኦይቂደ፥ ቱምቢያን ልከቲደ ግምበቴዳ ግምቢያ ማታን ኤቄዳ። 8 መꬍና ጎዳይ ታና፥ “አሞጻ፥ ሀ ኔን ጼልያዌ አዬ?” ያጊደ ኦቼዳ።

ታን፥ “ቱምቢያ” ያጋድ።

መꬍና ጎዳይ ታና፥ “በአ፥ ታን ታ አሳ እስራኤልያ ግዶን ቱምቢያ የጋይ፤ ታን ኡንቱንታ ሙረናን አꬍከ። 9 ይሳቃ ዛራቱ ጎይንያ ꬎቃ ሳአቱ ኮለታና፤ እስራኤልያ ጌሻ ሳአቱካ ꬋያና፤ ቃይ እዮርባማ ካዉተꬃ ቦላካ ታን ማሻና ደንዳና” ያጌዳ።

10 ቤቴለ ካታማን ቄስያ ግዲደ ደእያ አሜስያሴ እስራኤልያ ካትያ እዮርባመኮ ሀዋዳን ያጊደ ኪቴዳ፤ “አሞጽ እስራኤልያ አሳ ግዶን ደኢደ፥ ነ ቦላ ማቀቴዳ፤ እ ባረ ኦዱዋን ጋድያ ባይዜ። 11 አያዉ ጎፐ፥ እ ሀዋዳን ያጌ፤ ‘እዮርባም ማሻን ሀይቃና፤ እስራኤልያ አሳይካ ባረንቱ ጋድያፐ ኦሞደቲደ ባና’ ያጌ” ያጌዳ።

12 ያትና አሜስያሴ አሞጻ ሀዋዳን ያጌዳ፤ “ኔኖ ትምቢትያ ኦድያዎ፥ ባ፤ ህን ይሁዳ ቢታ ባቃታ ባደ፥ ያን ቁማ ማ፤ ትምቢትያ ያን ኦዳ። 13 ሽን ሀዌ ቤቴለ ካቲ ጎይንያ ሳኣነ ካዉተꬃ ጌሻ ሳ ግድያ ድራዉ፥ ላኤንꬆ ሀ ሳኣን ትምቢትያ ኦዶፓ” ያጌዳ።

14 አሞጽ ዛሪደ፥ አማስያስ ሀዋዳን ያጌዳ፤ “ታን መህያ ሄምያዋነ ኡንቱንቱ አይፍያ ማጽያዋፐ አትና፥ ትምቢትያ ኦድያዋ ዎይ ትምቢትያ ኦድያዋ ናኣ ግድከ። 15 ሽን መꬍና ጎዳይ ታና ዶርሳ ዉድያ ሄምያ ሳፐ አኪደ፥ ‘ባደ ታ አሳዉ እስራኤልያዉ ትምቢትያ ኦዳ’ ያጌዳ። 16 ሀእ ስም መꬍና ጎዳይ ግያዋ ስሳ! ኔን፥ ‘እስራኤልያ ቦላ ትምቢትያ ኦዶፓ፤ ይሳቃ ዛራቱዋ ቦላካ ማርካቶፓ’ ያጋዳ። 17 ሄዋ ድራዉ፥ መꬍና ጎዳይ ሀዋዳን ያጌ፤ ‘ነ ማቻታ ካታማ ግዶን ሻርሙጻ ግዳናዋ፤ ነ አቱማ ናናቱነ ነ ማጫ ናናይ ማሻን ሀይቃና፤ ነ ቢታይካ ዎዶሩዋን ሻከታና፤ ቃይ ኔን ነ ሁጲያዉካ አላጋ ጋድያን ሀይቃና። እስራኤልያ አሳይካ ባረንቱ ጋድያፐ ኦሞደቲደ ቱማ ባና’ ያጌ” ያጌዳ።