1 ህንተኖ፥ እስራኤልያ አሳይ ማዱዋ ኦችያ ቦንቼቴዳ እስራኤልያ ጋድያ ካፓቶ፥ ህንተኖ፥ ጽዮነን እሻሉዋን ደእያዋንቶ፥ ሳማርያ ካታማንካ ህርግ ባይናን ኡቴዳዋንቶ፥ ህንተንቶ አየ አና! 2 አነ ካልነ ግያ ካታማ ቢደ በእተ። ሄዋፐ ቃይ ሀማታ ግያ ዎልቃማ ካታማ ቢደ፥ ያና ቃይ ዱገ ፕልስጼማቱዋ ካታማ ጋተ ዎꬍተ። ኡንቱንቱ ህንተ ላኡ ካዉተꬃቱዋፐ ኬኪኖ? ኡንቱንቱ ጋዲ ህንተ ጋድያፐ አኪ? 3 ህንተኖ፥ ኢታ ጋላሳይ ኤለካ ዬና ጊደ፥ ሱገꬃ ኦሱዋ ኦꬅያዋንቶ፥ 4 ዳንጋርሳ ዛልያፐ ኦꬄዳ አርሳን ግስያዋንቶ፥ ምንጻፍያንካ እንጀቲደ ኡትያዋንቶ፥ ቃይ ዶርሳ ዉድያፐ ቦልት ቦልታቱዋነ ሚዛ ዛዳሉዋፐ ሞꬎ ማራ አሹዋ ምያዋንቶ፥ 5 ዳዊተዳን የꬃ ሚሻ ህንተንቶ ጊግሲደ፥ ማስንቁዋን ዱማ ዱማ የꬃ የጽያዋንቶ፥ 6 ዎይንያ ኤሳ ከርያና ጋንያዋንቶ፥ ሎይꬅ አልኦ ሽቱዋካ ኦከትያዋንቶ፥ ዮሴፎ ዛራቱዋ ባይዛድ አይነ ካዮተናዋንቶ፥ ህንተንቶ አየ አና! 7 ሄዋ ድራዉ፥ ኦሞደቲደ ባናዋንቱፐ ኮይሮቱ ህንተና ግዳና፤ ሄ ዎደ ህንተ እንጀ ደኡሳይነ ህንተ እሻልያዌ አታና።

8 መꬍና ጎዳይ፥ ኡባፐ ዎልቃማ መꬍና ጎዳይ ጾሳይ ሀዋዳን ያጊደ፥ ባረካ ባረናን ጫቄዳ፤ “ታን ያቆባ ኦቶሩዋ እጻይ፤ ኡንቱንቱ ጌሱዋካ ሸነታድ፤ ታን ካታማነ ካታማን ደእያ ኡባ ኡንቱንቱ ሞርከቶ አꬃደ እማና” ያጌዳ።

9 እት ጎልያን ታሙ አሳይ አቶፐ፥ ኡንቱንቱካ ሀይቃና። 10 ኡንቱንቱ ዳቦቱዋፐ እቱ አሃ ሞጋናዉ ጎለፐ ከሲደ አፋና፤ ሄ ጎልያ ቆልኦን ደእያ ብታንያ፥ “ኔናና አቴዳ ሀራ አሳይ ደኢ?” ያጊደ ኦቻና። እ ዛሪደ፥ “ባዋ” ያጋና። ኦችያዌ፥ “ሀይዛ፥ ሀይዛ! መꬍና ጎዳ ሱንꬃ ኑን ጼሳናዉ ኮሸና” ያጋና።

11 መꬍና ጎዳይ አዛዝና፥ ዎጋ ጎለቱ ኮለታና፤ ቄር ጎለቱካ መኤረታና። 12 ፓራቱ ዛላ ቦላን ጋልፋናዉ ዳንዳዪኖ? ዎይ ቃይ ጎሻንቻይ ቦራ ዋጺደ፥ አባ ጎሻናዉ ዳንዳዪ? ሽን ህንተ ቱሙ ፕርዳ ማርዝያዉ፥ ጽሎተꬃ አይፍያካ ጫሞ ላሜድታ። 13 ህንተ ሎዳባራ ካታማ ጾኔዳ ድራዉ ናሸቲታ፤ ቃይ፥ “ኑን ቃርናይማ ካታማካ ኑ ምኖተꬃን ኦይቄዶ” ያጊታ።

14 መꬍና ጎዳይ፥ ኡባፐ ዎልቃማ ጾሳይ ሀዋዳን ያጌ፤ “ህንተኖ፥ እስራኤልያ አሳቶ፥ ታን ህንተ ቦላ እት ካዉተꬃ ደንꬃና፤ ኡንቱንቱ ህንተና ሀማታ ፕኑዋፐ ዶሚደ፥ አራባ ዎምባ ጋካናዉ ቱጋያና” ያጌ።