ጳዉሎስ
ቆላስያሳ አሳዉ
ጻፌዳ ኪታ
ገሉዋ
ጳዉሎስ ቆላስያሳ አሳዉ ጻፌዳ ኪታይ ጻፈቴዳዌ፥ ኤፈሶነ አሳዉ ጻፈቴዳ ኪታና እት ዎድያና ማላቴ። ሄዌካ ቄር ኢስያን፥ ኤፈሶነፐ አዋይ ዶልያ ባጋና ቤትያ ቆላስያሳን ደእያ አማንያ አሳቱዋሳ ግዲደ ላኡዋ ግዶን ደእያ ዱማተꬃይ፥ ቆላስያሳ አሳዉ ጻፈቴዳ ኪታይ ክርስቶስ መታ ኡባዉ ሁጰ ግድያዋ በስያ ዎደ ኤፈሶና አሳዉ ጻፈቴዳ ኪታይ ቃይ ክርስቶስ ዎሳ ጎለዉ ሁጰ ግድያዋ በሴ። ሀ አሳቶ ቃላ ማርካቴዳዌ ጳዉሎሳ ግዳና ꬋዮፐካ፥ ሮመ ጋድያን፥ ኢስያ ዋና ካታማ ግድያ ኤፈሶነፐ ኡንቱንቶ ኦꬅያ አሳቱዋ ኪትያዌ አ ግድያ ድራዉ፥ ቆላስያሳዉካ አዎትያ ሀኖታይ አዉ ደኤ። ቆላስያሳ አማንያዋንቱ ግዶን፥ “ጾሳ ኤራናዉነ ኩመንꬃ አቶተꬃ ደማናዉ፥ አሳይ ኡባይ አያና ዎልቃቶነ ማታይ ደእያዋንቶ ጎይናናዉ ኮሼ” ያግያ ዎርዶ አስታማራቱ ደእያዋ ጳዉሎስ ስሴዳ። ሀ አስታማራቱ ሀራባ ቃይ፥ “አሳይ ኡባይካ ቃጻራ ማላትያ ዎጋቶ ሞደታናዉነ ቁማ ዎጋነ ሀራ ዎጋቱዋ ኡባ ናጋናዉ ኮሼ” ያጊኖ።
ጳዉሎስ ሀ ኪታ ጻፌዳዌ ቱማንቻ ግድያ ክርስትና ኪታ ኦድያዋን፥ ኡንቱንቱ ዎርዶ ትምርትያ ጳልቃናሳ። እ ዛሬዳ ዛሩዋፐ ዋናትያዌ “የሱስ ክርስቶስ ኩመንꬃ አቶተꬃ እማናዉ ዳንዳዬ፤ ሀ ሀራ አማናቱነ ኦሳቱ አፐ ሃሳናዉ ዳንዳዪኖ” ያግያዋ። ጾሳይ ክርስቶሳ ባጋና ሀ አላምያ መꬌዳ። ቃይ አ ባጋና ዛሪደ አ ባረኮ አሀና። ሀ አላምያዉ ክርስቶሳ ዎዛናፐ አማንያዋ ጻላላን አቶተꬃ ህዶታይ ደኤ። ሀዋ ማራን ጳዉሎስ ሀ ዎልቃማ ትምርቲ አማንያ አሳ ደኡዋን ዋኒደ ኦሱዋን ፔሻናዉ ዳንዳይንቶ ኦዴ።
ሀ ኪታ ጳዉሎሳፐ አኪደ፥ ቆላስያሳ ጋꬃናዉ ኪተቴዳ ቲኪቆሳና እትፐ ቤዳዌ አናስሞሳ ግድያዋ በእያዌ ጎእያዋ። ዋኒደ ጎፐ፥ ጳዉሎስ ሀ አናስሞሳ ጌተትያ ባረ ኦሳንቻባ ደንꬂደ፥ ፕልሞናዉ ሀራ ኪታ ጻፌዳ።
ሸምፓቱዋ ኡባቶ እመቴዳ ቃንꬃ ቆፋቱዋ
ገሉዋ 1:1-8
ክርስቶሳ ኤሻነ ኦሱዋ 1:9—2:19
የሱሳን ቤትያ ኦራꬃ ደኡዋ 2:20—4:6
ዉርሰꬃ ቁትያ 4:7-18
1
1 ታን ጳዉሎስ፥ ጾሳ ሸንያን ክርስቶስ የሱስ ኪቴዳዋ ግዴዳዌነ ኑ እሻይ ጽሞቶስ፥ 2 ቆላስያሳ ግያ ካታማን ደእያ ጾሳ ናናቶ፥ ክርስቶሳን አማነቴዳ እሻቶ ሀ ዳብዳቢያ ጻፌቶ።
ጾሳ ኑ አዉዋፐነ ጎዳ የሱስ ክርስቶሳፐ፥ አꬎ ኬካተꬃይነ ሳሮተꬃይ ህንተንቶ ግዶ።
ጳዉሎስ ዎሴዳ ጋላታ ዎሳ
3 ኑን ህንተንቶ ዎሲደ፥ ኑ ጎዳ የሱስ ክርስቶሳ አዉዋ፥ ጾሳ ኡባ ዎደ ጋላቴቶ። 4 አያዉ ጎፐ፥ ኑን ክርስቶስ የሱሳ ህንተንቱ አማንያዋነ ጾሳ አሳቱዋ ኡባ ሲቅያዋ ስሴዶ። 5 ቱሙ ኪታይ ዎንጋላይ ኮይሮ ህንተኮ ዬዳ ዎደ፥ ጾሳይ ስንꬃፐ እማና ጌዳዋ ስሴድታ። ስም ህንተንቱ አማኑነ ሲቁ ሳሉዋን ጊጊደ ናግያ፥ ጾሳይ ስንꬃፐ እማና ጌዳዋን ዶመቴዳ። 6 ሄ ዎንገሊ ህንተኮ ጋኬዳ፤ ህንተንቱ አ ስሶደፐነ ጾሳ አꬎ ኬካተꬃ ቱማተꬃን ኤሮደፐ ዶሚደ፥ ህንተንቱ ግዶን ደእያዋዳንካ፥ ቢታ ኡባን አንጁዋ አሄነ ኡባሳ አኬ።
7 ህንተንቱ ሄዋ ኑናና እትፐ ቆማ ግዴዳ ሲቆ ኤፓፍራፐ ታማሬድታ፤ እ ኑ ድራዉ ክርስቶሳዉ አማነቲደ ኦꬅያዌ፥ 8 ጾሳ አያናን ሀራቱዋ ህንተንቱ ሲቅያዋ ኑዉ ኦዴዳ።
9 ሄዋ ድራዉ፥ ኑን ቃይ ሄዋ ስሴዳ ጋላሳፐ ዶሚደ፥ ጾሳይ ህንተንቶ ባረ ሸንያ ኤርያ ኤራተꬃ፥ ጾሳ አያናይ እምያ አꬌዳ ኤራተꬃናነ አኬካና እትፐ ኩንꬂደ እማናዳን፥ ኡባ ዎደ ባለናን ጾሳ ዎሴቶ። 10 ሄዋፐ ጉይያን፥ ጎዳይ ኮይያዋዳን ህንተንቱ ደአናዉነ፥ ኡባ ዎደ አ ናሸችያባ ኦꬃናዉ ዳንዳያና፤ ህንተንቱ ኦꬅያ ሎኦ ኦሱዋ ኡባን ህንተንቱ ደኡ ጎአና ደእያዋ ግዳናዋ፤ ቃይ ጾሳ ኤርያዋን ድጭ ድጭ ባንታ።
11 ህንተንቱ ኡባባን ናሸቻን ገንጫናዳንነ ዳንዳያናዳን፥ ጾሳይ ባረ ቦንቹዋ ግታተꬃዳን እምያ ዎልቃ ኡባን ምንተ። 12 ቃይ ጾሳ ናናቶ ጊጌዳ ፖኦ ካዉተꬃ ላታናዉ፥ ኑና ዳንዳይሴዳ ጾሳ አዉዋ ጋላትተ። 13 እ ኑና ꬉማ ዎልቃፐ አሺደ፥ ባረ ሲቅያ ናኣ ካዉተꬃኮ ፕንꬄዳ። 14 ቃይ እ ባረ ናኣን ኑና ዎዚደ፥ ኑ ናጋራ አቶ ጌዳ።
ክርስቶሳ ጾሳተꬃነ አ ኦሱዋ
15 ክርስቶስ ቤተና ጾሳ ቆንጭስያዋ፤ እ መቴዳዋ ኡባፐ አꬍያ ባይራ ናኣ። 16 አያዉ ጎፐ፥ ኡባባይካ አን መቴዳ፤ ቤትያዋንቱ፥ ቤተናዋንቱ፥ አያናቱዋፐ ቤትያ ዎልቃይነ ጎዳተꬃይ፥ ꬎቃተꬃይነ ማታይ፥ ሳሉዋንነ ሳኣን ደእያ ኡባባይካ አንነ አዉ መቴዳ። 17 እ ኡባባፐ ካሰ ደኤዳ፤ ኡባባይካ አን ባረ ሳኣ ሳኣ ኦይቂደ ደኤ። 18 እ ባረ ሁጰዉ፥ ዎሳ ጎለዉ ሁጰነ ደኦ፤ እ ኡባፐ ቦላ ግዳና ማላ፥ ካሰቲደ ሀይቁዋፐ ደንዴዳ ባይራ ናኣ ግዴዳ።
19 አያዉ ጎፐ፥ ጾሳይ ኮዬዳዋዳን፥ አን ጾሳተꬃ ኩመንꬃይ ደኤ። 20 ያትና ጾሳይ ክርስቶሳ ባጋና ኡባባ ባረናና ስገꬃናዉ የዉዋ ቃቼዳ፤ ባረ ናአይ ማስቃልያ ቦላን ጉሴዳ ሱꬃን ሳሉዋንነ ሳኣን ደእያ ኡባባ ባረናና ስገꬄዳ።
21 ሀዋፐ ካሰ፥ ህንተንቱ ኢታባ ቆፔዳ ድራዉነ ኦꬄዳ ድራዉ፥ ጾሳፐ ሻከቲደ፥ አናና ሞርከቴድታ። 22 ሽን ጾሳይ ሀእ ህንተንታ ፖኮባይ ባይናዋንታነ ቃይ ጌሻቱዋ ኦꬂደ፥ ባረ ስንꬃ ሺሻናዉ፥ ባረ ናኣ ሀይቄዳዋ አሳተꬃን ባረናና ህንተንታ ስገꬄዳ። 23 ሄዌ ህንተንቱ ቱሙ አማኑዋን ምን ኤቂደ፥ ምሽራቹዋ ቃላ ስሲደ፥ ስንꬃፐ አካና ጌዳዋፐ ቃጸናን ምኒደ ደኦፐ ሀናና፤ ሄ ዎንጋላ ምሽራቹ ሳኣን ደእያ መታ ኡባ ማታን ኦደቴዳ። ታን ጳዉሎስካ ምሽራቹዋ ቃላ ኦድያዋ ግዳድ።
ጳዉሎስ የሱስ ኪቴዳዋ ግዲደ ኦꬄዳ ኦሱዋ
24 ታን ህንተንቶ ዋየቴዳ ድራዉ፥ ሀእ ናሸታይ፤ ክርስቶስ ባረ ሁጰዉ፥ ሄዋ ግያዌ ዎሳ ጎለዉ፥ ዋየትሽን ፓጬዳዋ ታን ታ ቦላ ሳኩዋን ኩንꬃይ። 25 ጾሳይ ታና ህንተንታ ማድያዋነ አ ቃላ ፖላደ ኦድያ ቆማተꬃ ኪታ ታዉ እሜዳ። 26 ሀ ቃላይ ሀዋፐ ካሰ ባጋ ኡባን፥ አሳ ኡባዉ ኤረተናን ጌሚደ ደኤ፤ ሽን ባረና አማንያዋንቶ ጾሳይ ሀእ ቆንጭሴዳ። 27 ጾሳይ አይሁዳ ግደና አሳዉ ዎꬄዳ ሀ አሳዉ ቆንጭቤና ቦንቹዋነ ዱረ የዉ አየንቶ ጌሻቱዋ ኤርሳናዉ ኮዬዳ፤ ሀ አሳዉ ሀእ ቆንጬዳዌ አዬ ጎፐ፥ ክርስቶስ ህንተንቱን ደእያዋ፤ ሄዋ ግያዌ ጾሳ ቦንቹዋ አናና ህንተንቱ አካናዋ።
28 ሄዋ ድራዉ፥ ኑን አሳ ኡባዉ ክርስቶሳዋ ኦዴቶ፤ አሳ ኡባ ክርስቶሳን ኩመንꬃ አሳ ኦꬂደ፥ ጾሳኮ ሺሻና ማላ፥ ኑዉ አꬌዳ ኤራተꬃ ኡባን ህንተንታ ሴረቶነ ታማርሴቶ። 29 ታን ሀዋ ፖላናዉ፥ ታናን ኦꬅያ ክርስቶስ ታዉ እምያ ዎልቃን ባጸታይነ ዳቡራይ።