1 ታናዳን ጾሳ ካልያዋንቶ፥ ታን ሲቅያዋንቶ፥ ላሞትያዋንቶ፥ ታና ናሸችያዋንቶ፥ ታና ꬎቁ ኦꬅያዋንቶ፥ ታ ዳባቶ፥ ስም ጎዳን ህንተንቱ ምን ኤቃናዉ በሴ።

2 ኤዎደነ ስንጺኬ፥ ህንተንቱ ላኡካ ቆፋን እቱዋ ግዲደ፥ ጎዳን ደአናዳን፥ ታን ህንተና ዞራይ። 3 ቃይ ታናና ኦꬅያ አማነቴዳዎ፥ ኔን ሀ ማጫ አሳቱዋ ማዳናዳን፥ ታን ኔና ዎሳይ፤ አያዉ ጎፐ፥ ኡንቱንቱ ታናናነ ኡንቱንቱ ሱንꬃይ ጾሳ ደኡዋ ማጻፋን *ጾሳ ደኡዋ ማጻፋን፦ ጾሳ አሳ ሱንꬃይ ጻፈትያ ማጻፋ። ጻፈቴዳ ቃለምንጾሳና ቃይ ታናና እትፐ ኦꬅያ ሀራቱዋ ኡባና ዎንጋላ ኡባሳ ጋꬃናዉ ዳቡሬድኖ።

4 ጎዳና ህንተንቱ ደእያ ደኡዋን ኡባ ዎደ ናሸትተ፤ ታን ሀዋ ጉጃደካ ጋይ፤ ናሸትተ።

5 አሳይ ኡባይ ህንተንቱ አሽከተꬃ ኤሮ፤ ጎዳይ ማታን ያና። 6 ጾሳ ህንተንቱ ዎስያ ዎሳ ኡባን አ ሎይꬅ ጋላቲደ፥ ህንተና ኮሽያዋ ኡባዉ ዎስተፐ አትን፥ እትባዉካ ህርጎፕተ። 7 ቃይ አሳ ኤራተꬃ ኡባፐ አꬍያ ጾሳ ሳሮተꬃይ ህንተንቱ ዎዛናነ ህንተንቱ ቆፋ ጎዳ የሱስ ክርስቶሳ ባጋና ናጋና።

8 ዉርሰꬃን፥ ታናዳን ጾሳ ካልያዋንቶ፥ ህንተንቱ ዎዛናን ሎኦባነ ጋላትስያዋ ቆፕተ፤ ቱማ ግድያባ ኡባ፥ ቦንችስያዋ ኡባ፥ ባይዙዋ ግደናባ ኡባ፥ ጌሻባ ኡባ፥ ሲቁዋ ኡባ፥ ሱረ ግድያባ ኡባ ቆፕተ። 9 ህንተንቱ ታፐ ታማሬዳዋ፥ አኬዳዋ፥ ስሴዳዋነ በኤዳዋ ኡባ ኦꬅተ፤ ቃይ ኑዉ ሳሮተꬃ እምያ ጾሳይ ህንተናና እትፐ ግዳናዋ።

10 ሽን ዳሮ ዎድያፐ ጉይያን፥ ሀእ ህንተንቱ ታዋ ላኤንꬁዋ ቆፓናዉ ዶሜዳ ድራዉ፥ ታን ጎዳን ሎይꬃ ናሸታይ፤ ታዉ ቆፓናዉ ህንተንቶ እንጀተናን እጼዳዋፐ አትን፥ ታዉ ቆፋ ቆፒታ። 11 ታን ሀዋ ታና መቴዳ ድራዉ ጊከ፤ አያዉ ጎፐ፥ ታዉ ደእያባይ ታዉ ግዳና †ታዉ ደእያባይ ታዉ ግዳና፦ ታዉ ደእያባን ታን ሸምፓይ፥ ካላይ፥ ዎፑ ጋይ። ግያዋ ታን ታማራድ። 12 ታን መቶቲደ ዎት ደአነንቶ ኤራይ፤ ቃይ ዱረቲደ ደእያዌካ አየንቶ ኤራይ፤ ሀቃን ግድናካ አዉደ ግድናካ፥ ታን ካሉዋነ ኮሻ ቃይ ፓጫነ ፓላሃ ታማራድ። 13 ክርስቶስ ታዉ እሜዳ ዎልቃን፥ ኡባባ ኦꬃናዉ ታን ዳንዳያይ።

14 ግዶፐካ፥ ህንተንቱ ታ መቱዋ ታናና መቶቲደ ዳሮ ሎይꬄድታ፤ 15 ፕልጵስዮሳ አሳዉ፥ ዎንጋላ ምሽራቹ ኮይሮ ህንተ ግዶን ኦደቴዳ፤ ሽን ታን ማቅዶንያፐ ከሴዳ ዎደ፥ ታና አማንያ ህንተንቱፐ አትን፥ ሀራይ ማድቤናዋ ህንተንቱ ህንተንቱ ሁጰዉ ኤሪታ፤ ቃይ እምያባንካ አክያባንካ ህንተፐ አትን፥ ሀራይ ታና ማድቤና። 2 ቆሮ. 11:9 16 አያዉ ጎፐ፥ ታና መቱ ኦይቄዳ ዎደ፥ ሀራይ አቶ ታን ተሰሎንቀን ደእሽንካ ታና ዛር ዛሪደ ማዴድታ። ኪታ 17:1 17 ታን ህንተዋ ቦላ ሀራባይ ጉጀታናዋ ኮይያዋፐ አትን፥ ዎይታ ጻላላ አካናዉ ኮይከ።

18 ሽን ታን ህንተንቱ እሜዳዋ ኡባ አካድ፤ ቃይ ታዉ ፓላሂደ ግድያዌ ደኤ። ህንተ ኪቴዳ ኡባባ ኤፓፍሮድቶሳፐ አካድ፤ ኮሽያ ኡባይ ታዉ ደኤ። ህንተ ታዉ ኪቴዳ እሙ ጾሳዉ ሳዉዋ ቶሽኩ ግያነ እ ዶስያ፥ አ ናሸችያ ያርሹዋ ማላ። ከሳ 29:18 19 ቃይ ታ ጾሳይ ባረ ቦንቾ ዱረተꬃ ዳሩዋን ክርስቶስ የሱሳ ባጋና ህንተና ኮሽያዋ ኡባ ህንተንቶ እማና። 20 ኑ ጾሳዉ፥ ኑ አዎ መꬍናፐ መꬍና ጋካናዉ ቦንቹ ግዶ። አመንእ።

21 ክርስቶስ የሱሳዋ ግድያ ጾሳ አሳቱዋ ኡባቱዋ ሳሮ ጊተ። ታናና ሀዋን ደእያ እሻቱ ህንተና ሳሮ ጊኖ። 22 ሀዋን ደእያ ጾሳ አሳቱዋ ኡባቱ፥ ኡባፐካ አꬂደ ካትያ ቄሳረ ጎልያን ደእያዋንቱ ህንተና ሳሮ ጊኖ።

23 ኑ ጎዳ የሱስ ክርስቶሳ አꬎ ኬካተꬃይ ህንተናና ግዶ።