1 ዉርሰꬃን፥ ታናዳን ጾሳ ካልያዋንቶ፥ ጎዳይ ህንተንቶ ናሸቻ እሞ። ታን ካሰ ጻፌዳዋ ዛረꬃደ ጻፍያዌ ታና ዋይሰና፤ ቃይ ሄ ጻፍያዌ ህንተና ናጋና።

2 ኢታባ ኦꬅያዋንቱፐ፥ ሄ ካናቱዋ ኤሻይ ደእያዋንቱፐ፥ ቃጻራይ ኮሼ ግያ አሳቱዋፐ ናገትተ። 3 አያዉ ጎፐ፥ ኑን ጾሳ ጌሻ አያናን ጾሳዉ ጎይንያ ድራዉነ ኑ ደኡዋን ጎዳ ክርስቶሳ የሱሳን ናሸትያ ድራዉ፥ ቱሙ ቃጻራ ቃጻረቴዳዋንታ፤ አሳተꬃ ቦላ ኦሰትያዋን አማኖኮ።

4 ቃይ ታዉ ታ ሁጲያንካ ታ አሳተꬃን አማነትያዌ ደኤ። አይ አሳይነ ባረ አሳተꬃን አማነትያዌ ባረዉ ደኤ ጊደ ቆፖፐ፥ ታን አፐ ሎይꬃ አꬋይ። 5 ታን የለቶደፐ ሆስፑንꬃ ጋላሳን *ታን የለቶደፐ ሆስፑንꬃ ጋላሳን፦ ሀዌ አይሁድያ አቱማ ናናይ የለቶደፐ ሆስፑንꬃ ጋላሳን ቃጻረትያዋ በሴ። ቃጻረታድ። ታን የለታን እስራኤልያ፤ ቢንያማ ዛረ፤ ዋላካይ ባይና አይሁዳ አሳ። አይሁዳ ህግያ ናግያዋን ግዶፐ፥ ታን ፓርሳዌ፤ 6 አይሁዳ አማኖ ሴላ ግዶፐ፥ ታን አማንያዋንታ ዋይሳድ፤ እት ኡራይ ሙሴ ህገዉ አዛዘቲደ ጽልያዋ ባጋ ግዶፐ፥ ታናን ፖኮባይ ቤትቤና።

7 ሽን ታና ጎእያ ሄ ኡባባ ክርስቶሳ ድራዉ ባዬዳዋዳን ፓይዳይ። 8-9 ቱማካ፥ ሄዋንቱ ጻላላ ግደና፤ ታን ታ ጎዳ ክርስቶስ የሱሳ ኤርያዌ ኡባባፐ ሎይꬅ አꬍያ ድራዉ፥ ኡባባ ታና ሙለካ ጎኤናዋዳን ፓይዳይ፤ ታን አ ድራዉ ኡባባ የጋ ባሻድ። ክርስቶሳ ደማናዉነ አናና ደአናዉ ኡባባ ዎራ ኦሌዳዋዳን ፓይዳይ፤ ታን ሙሴ ህገዉ አዛዘታደ ደምያ ታ ሁጰ ጽሎተꬃይ ታዉ ባዋ። ክርስቶሳ አማንና፥ ጾሳይ እምያ ጽሎተꬃይ፥ አማኑዋን ጾሳ ማታፐ ይያ ጽሎተꬃይ ታዉ ሀእ ደኤ። 10-11 ታን ክርስቶሳነ አ ደንዱዋ ዎልቃ ኤራናዉ ኮያይ፤ ያታደ ታን ታ ሁጰዉ ሀይቁዋፐ ደንዳና ያግያዋን፥ አ ዋይያ አናና ዋየታናዉነ አ ሀይቁዋን አ ማላታናዉ አሞታይ።

12 ታን ሀእ ደማ ድጋድ ዎይ ታናን ባል ባዋ ጊከ። ሽን ክርስቶስ የሱስ ታና ባረዉ ኦꬄዳ ዎይታ ደማና ጋደ ኤሌላይ። 13 ታናዳን ጾሳ ካልያዋንቶ፥ ታን ሄዋ ደማ ድጋድ ጋደ ቆፕከ፤ ሽን ታን እትባ ኦꬃይ፤ ታፐ ጉየና ደእያዋ ዶጋደ ስንꬃን ደእያዋ ኦይቃናዉ ዋታይ። 14 ጾሳይ ክርስቶስ የሱሳ ባጋና ቦላ ደኦ ጼስያ ዎይታ አካናዉ፥ ታ ጋካናዉ ዎጻይ።

15 ስም ኑን አያናን ምኔዳዋንቱ ኡባቱ ሀዋ ቆፓናዉ በሴ፤ ቃይ ህንተፐ አማሬዳዋንቶ አያንነ ዱማ ቆፋይ ደኦፐ፥ ሄዋካ ጾሳይ ህንተንቶ ቆንጭሳና። 16 ግዶፐካ፥ ኑን ሀኖ ጋካናዉ ደኤዳ ማራዳን፥ አነ ስንꬃዉ ሄ ማራ ካሎይተ።

17 ታናዳን ጾሳ ካልያዋንቶ፥ ታን ሀንያዋዳን ሀንተ። ኑን ህንተንቶ ሌምሱዋ ግዴዶ፤ ሄዋዳን ህንተካ ኑን ህንተንቶ ሌምሱዋ ግዴዳ ማራ ካልያዋንታ አኬክተ። 18 አያዉ ጎፐ፥ ታን ሄዋ ህንተንቶ ካሰ ጮራቶ ኦዳድ፤ ቃይ ሀእ ላኤንꬁዋካ አፎጻደ ህንተንቶ ኦዳይ፤ ክርስቶስ ማስቃልያ ቦላ ምስማርያን ꬍሸቲደ ሀይቄዳዎ ባረንቱ ሸምፑ ባረና ሞርከ ኦꬄዳ ዳሮ አሳቱ ደኢኖ። 19 ኡንቱንቱ ዉርሰꬃይ ባሻ፤ ኡንቱንቱ ኡሉ ኡንቱንቶ ጾሳ፤ ዬላታናዉ በስያዋን ኡንቱንቱ ኦቶረቲኖ፤ ቃይ ሀ ሳኣባ ጻላላ ቆፒኖ። 20 አያዉ ጎፐ፥ ኑ ቢታይ ሳሉዋና፤ ኑን ቃይ ሳሉዋፐ ያና ኑና አሽያ ጎዳ የሱስ ክርስቶሳ ናጌቶ። 21 ክርስቶስ ኡባባ ባረፐ ጋርሳን ዎꬃናዉ ዳንዳይያ ባረ ዎልቃን፥ ኑ ዳቡራንቻ አሳተꬃ ላሚደ፥ ባረ ቦንቾ አሳተꬃ ማላትሲደ ኦꬃና።