1 “ሄ ዎደ መꬍና ጎዳይ ታና ሀዋዳን ያጌዳ፤ ‘ኮይሮዋንቱ ማላ ላኡ ማሰቴዳ ሹቻቱዋ ጊግሳ። ያታደ ታኮ ደርያ ሃ ፑደ ከሳ፤ ቃይ ምꬃ ታቦታካ መꬋ። 2 ካሰ ኔን መንꬄዳ ማሰቴዳ ሹቻቱ ቦላ ደእያ ቃላቱዋ ሀ ማሰቴዳ ሹቻቱ ቦላ ታን ጻፋና፤ ኔንካ ኡንቱንታ ታቦታ ግዶን ዎꬃሳ’ ያጌዳ።

3 “ታን ኦዶሩዋፐ ታቦታ መꬋድ። ካሰዋንቱ ማላ ላኡ ማሰቴዳ ሹቻቱዋካ ጊግሳድ፤ ያታደ ሄ ላኡ ማሰቴዳ ሹቻቱዋ ታ ኩሽያን ኦይቃደ፥ ደርያ ፑደ ከሳድ። 4 ህንተ ሺቁዋ ኦꬄዳ ጋላስ፥ ደርያ ቦላን ታማ ግዶፐ መꬍና ጎዳይ ህንተንቶ ኦዴዳ ቃላቱዋ፥ ሄዋንቱካ ታሙ አዛዞቱዋ፥ ካሰ ጻፌዳዋዳንካ ሀ ማሰቴዳ ሹቻቱ ቦላ መꬍና ጎዳይ ጻፌዳ፤ ያቲደ እ ኡንቱንታ ታዉ እሜዳ። 5 ሄዋፐ ጉይያን፥ ታን ደርያፐ ዱገ ዎꬋደ፥ መꬍና ጎዳይ ታና አዛዜዳዋዳን፥ ሄ ማሰቴዳ ሹቻቱዋ ታን መꬌዳ ታቦታ ግዶን ዎꬃድ፤ ሀእካ ኡንቱንቱ ያን ደኢኖ።

6 “እስራኤልያ አሳይ ያእቃና አሳቱ ሃꬃ ኦላይ ደኢያሳፐ ደንዲደ፥ ሞሰር ቤድኖ። አሮን ያን ሀይቂደ ሞገቴዳ፤ አ ናአይ ኤልኣዛር አ ላቲደ፥ አ ሳኣን ቄስያ ከሴዳ። ፓይ. 20:28፤ 33:38 7 ኡንቱንቱ ሄዋፐ ጉድጎዳ ግያሳ ቤድኖ፤ ያፐ ቃይ ጎግያ ሃꬃቱ ደእያ ቢታ ዮጽባታ ግያሳ ቤድኖ። 8 ሄ ዎደ፥ መꬍና ጎዳ ጫቁዋ ታቦታ ቶካና ማላ፥ መꬍና ጎዳዉ ኦꬃና ማላ፥ አ ስንꬃን ኤቃና ማላነ፥ ሀች ጋካናዉካ ኡንቱንቱ ኦꬅያዋዳን መꬍና ጎዳ ሱንꬃን አንጃና ማላ፥ ሌዊያ ዛራቱዋ መꬍና ጎዳይ ባረዉ ዱማዬዳ። ፓይ. 3:5-8 9 ሄዋ ድራዉ፥ ኡንቱንቱ እሻቱዋና ሻክና፥ ኡንቱንታ ጋክያባይ ዎይ ላታይ ሌዊያ ዛረቶ ባዋ፤ መꬍና ጎዳይ ህንተ ጾሳይ ኡንቱንቶ ኦዴዳዋዳንካ፥ ኡንቱንቱ ላታይ መꬍና ጎዳ።

10 “ታን ካሰዋዳንካ ኦይታሙ ጋላሳነ ኦይታሙ ቃማ ደርያ ቦላን ጋምኣድ፤ መꬍና ጎዳይ ሀእካ ታ ዎሳ ስሲደ፥ ህንተና ꬋይሳናዉ ኮይቤና። ከሳ 34:28 11 መꬍና ጎዳይ ታና፥ ‘ታን እማና ጋደ ኡንቱንቱ አዋቶ ጫቃ ዎꬄዳ ቢታ ኡንቱንቱ ገላናዳንነ ላታናዳን፥ ሀ አሳፐ ስንꬃና ኡንቱንታ ካለꬃ’ ያጌዳ።

12 “እስራኤልያ አሳዉ፥ መꬍና ጎዳ ህንተ ጾሳይ ህንተፐ ኮይያዌ ሀዋ: መꬍና ጎዳዉ፥ ህንተ ጾሳዉ፥ ያይተ፤ አ ኦግያን ኡባን ሀመትተ፤ አ ሲቅተ፤ ህንተ ኩመንꬃ ዎዛናፐነ ኩመንꬃ ሸምፑዋፐ መꬍና ጎዳዉ፥ ህንተ ጾሳዉ ኦꬅተ። 13 ህንተዉ ሎአናዳን፥ ታን ሀች ህንተንቶ እምያ መꬍና ጎዳ አዛዞቱዋነ አዋዮቱዋ ናግተ።

14 “ሳሉነ ሳሉዋፐ ቦላና ደእያ ሳሎቱ፥ ቃይ ሳአይነ ሳኣን ደእያ ኡባባቱ ጾሳ ህንተ መꬍና ጎዳባቱዋ። 15 ግዶፐነ መꬍና ጎዳይ ህንተ ማይዛ አዎቱዋን ናሸቲደ፥ ኡንቱንታ ሲቄዳ፤ ቃይ ሀች ህንተ በእያዋዳን፥ ኡንቱንቱፐ ጉይያን ኡንቱንቱ ዘረꬃቱዋ ግድያ ህንተና ካዉተꬃቱዋ ኡባፐ ዶሬዳ። 16 ሄዋ ድራዉ፥ ህንተ ዎዛና ሾኩዋ ቃጻርተ፤ ቃይ ሀዋፐ ስንꬃናዉ ሞርግያ ዞዛ ግዶፕተ። 17 አያዉ ጎፐ፥ መꬍና ጎዳይ ህንተ ጾሳይ ጾሳቱዋ ጾሳነ ጎዳቱዋ ጎዳ። እ ዎልቃማ ጾሳ፤ እ ዎልቃማነ ያሽያ ጾሳ። እ ዴሙዋ ጼል ፕርደናዋነ ማጋንጻ አከናዋ። 1 ጽሞ. 6:15፤ ሳፃ 17:14፤ 19:16፤ ኪታ 10:34፤ ሮመ 2:11፤ ጋላ. 2:6፤ ኤፈ. 6:9 18 እ አዉ ባይና ናናቶነ አምኤቶ ኡንቱንቱ ፕርዳ ከሴ፤ በትያካ ሲቂደ፥ ቁማነ ማዩዋ አዉ እሜ። 19 ህንተካ በተቱዋ ሲቅተ፤ አያዉ ጎፐ፥ ህንተ ህንተ ሁጲያዉካ በተ ግዲደ ግብጼን ደኤድታ። 20 መꬍና ጎዳዉ፥ ህንተ ጾሳዉ፥ ያይተ፤ አዉ ኦꬅተ፤ አናና ኦይቀትተ፤ አ ሱንꬃንካ ጫቂተ። 21 ህንተ ህንተ አይፍያን በኤዳ ሄ ግታነ ያሽያ ማላልስያባቱዋ፥ ህንተንቶ ኦꬄዳዌ እ ህንተ ጋላታቴ፤ ቃይ ህንተ ጾሳ። 22 ግብጼ ቢታ ዎꬌዳ ህንተ ማይዛ አዎቱ ኡባና ላፑን ታማ፤ ሀእ መꬍና ጎዳይ ህንተ ጾሳይ ህንተና ሳሉዋ ጾልንተቱዋዳን ጮራዬዳ። ዶመꬃ 15:5፤ 22:17፤ 46:27