1 “ህንተኖ እስራኤልያ አሳዉ ስስተ፤ ህንተ ህንተፐ ግታትያነ ዎልቃምያ ካዉተꬃቱዋ፥ ቃይ ዩሹዋ ግምቢ ሳሉዋ ጋኬዳ ዎልቃማ ካታማቱዋካ ላታናዉ ሀች ዮርዳኖሳ ፕኒታ። 2 ሄ ጋድያን ደእያ አሳይ ምኖነ አዱሳ፤ ኡንቱንቱ፥ ‘ኦንነ ኡንቱንቱና ኤቀታናዉ ዳንዳየና አናቀ ዛራቱዋ’ ጊሽና፥ ህንተ ስሴድታ። 3 ሽን ምያ ታማዳን ህንተፐ ስንꬃና ብያዌ መꬍና ጎዳ ህንተ ጾሳ ግድያዋ ሀች ኤርተ። እ ኡንቱንታ ꬋይሳናነ ህንተ ስንꬃን ኡንቱንታ ካዉሻና። መꬍና ጎዳይ ህንተንቶ ጌዳዋዳን ህንተ ኡንቱንታ የደርሲደ ከሳናነ ባሱዋናካ ꬋይሳና።

4 “መꬍና ጎዳይ ህንተ ጾሳይ ኡንቱንታ ህንተ ስንꬃፐ የደርሴዳዋፐ ጉይያን፥ ህንተ ህንተ ዎዛናን፥ ‘ኑን ጽሎ ግድያ ድራዉ፥ ሀ ቢታ ኑን ላታና ማላ፥ መꬍና ጎዳይ ኑና ገልሴዳ’ ያጎፕተ። መꬍና ጎዳይ ኡንቱንታ ህንተ ስንꬃፐ የደርሲደ ከስያዌ፥ ኡንቱንቱ ኢታ ግድያ ግሻሳ። 5 ህንተ ኡንቱንቱ ቢታ ላታናዉ ገልያዌ ህንተ ጽሎነ ሱረ ግድያ ድራሳ ግደና፤ ሽን ጾሳይ ህንተ ጾሳይ ኡንቱንታ ህንተ ስንꬃፐ የደርስያዌ ሀ ካዉተꬃቱ ኢታ ግድያ ድራሳነ በን ህንተ ማይዛ አዋቶ፥ አብራሃማዉ፥ ይሳቃዉነ ያቆባዉ ጫቄዳ ቃላ ናጋናሳ። 6 ስም ሄዋ ግዶፐ ህንተ ሀዋ አኬክተ፤ መꬍና ጎዳይ ህንተ ጾሳይ ሀ ሎኦ ቢታ ህንተና ላትስያዌ ህንተ ጽሎተꬃ ግሻሳ ግደና፤ አያዉ ጎፐ፥ ህንተ ሞርግያ ዞዱ ጌዳ አሳ።

7 “ህንተ መꬍና ጎዳ ህንተ ጾሳ መላ ቢታን ዎት ሀንቀꬄድተንቶ ዶጎፕተ፤ ህንተ ግብጼ ጋድያፐ ከሴዳ ጋላሳፐ ዶሚደ፥ ሀች ሀ ሳኣ ጋኬዳ ጋላሳይ ጋካናዉ፥ መꬍና ጎዳ ቦላ ማካሌድታ። 8 ሲና ደርያ ቦላካ መꬍና ጎዳይ ህንተና ꬋይሳናዉ ደንዳና ጋካናዉ፥ ህንተ መꬍና ጎዳ ሀንቀꬄድታ። 9 መꬍና ጎዳይ ህንተናና ጫቀቴዳ ጫቁ ጻፈቴዳ ማሰቴዳ ሹቻቱዋ አካናዉ ታን ደርያ ሁጲያ ከሴዳ ዎደ፥ ሄዋን ካꬃ ሜናንነ ሃꬃ ኡሸናን፥ ኦይታሙ ጋላሳነ ኦይታሙ ቃማ ጋምኣድ። ከሳ 24:18 10 ሄዋፐ ጉይያን፥ ጾሳ ብራꬍያን ጻፈቴዳ ላኡ ማሰቴዳ ሹቻቱዋ መꬍና ጎዳይ ታዉ እሜዳ። ሄ ማሰቴዳ ሹቻቱ ቦላ ህንተ ሺቁዋ ኦꬄዳ ጋላስ ደርያ ቦላን ታማ ግዶን ግዲደ፥ መꬍና ጎዳይ ህንተንቶ ሃሳዬዳ ቃላቱ ኡባይ ጻፈት ኡቴድኖ። 11 ሄ ኦይታሙ ጋላሳፐነ ኦይታሙ ቃማፐ ጉይያን፥ መꬍና ጎዳይ ባረ ጫቁ ጻፈቴዳ ላኡ ማሰቴዳ ሹቻቱዋ ታዉ እሜዳ።

12 “ሄዋፐ ጉይያን፥ መꬍና ጎዳይ ታና ሀዋዳን ያጌዳ፤ ‘ሀዋፐ ኤለካ ዎꬋ፤ አያዉ ጎፐ፥ ኔን ግብጼፐ ከሴዳ ነ አሳይ ቱን ክቼዳ፤ ታን ኡንቱንታ አዛዜዳ አዛዙዋፐ ኤለካ ዎራ ስሚደ፥ ሲልሲደ መꬌዳ ኤቃ ባረንቶ ጎይናናዉ ጊግሴድኖ’ ያጌዳ።

13 “መꬍና ጎዳይ ቃይካ ታና፥ ‘ታን ሀ አሳ በኣድ፤ ኡንቱንቱ ቱሙካ ሞርግያ ዞዛ አሳ። 14 ያቶፐ፥ ታን ኡንቱንታ ꬋይሳናዋነ ኡንቱንቱ ሱንꬃካ ሳሉዋፐ ጋርሳ ባጋፐ ቁጫናዋ ታና ድጎፓ። ያታደ ኔና ኡንቱንቱፐ ምንያነ ጮራትያ ካዉተꬃ ከሳና’ ያጌዳ።

15 “ታን ጫቁዋ ቃላይ ጻፈቴዳ ላኡ ማሰቴዳ ሹቻቱዋ ላኡ ኩሽያን ቶካደ ደርያፐ ዎꬋአድ፤ ሄ ዎደ ደርያ ቦላ ታማ ላጩ ቤቴ። 16 ታ ጼልያ ዎደ፥ ህንተ መꬍና ጎዳ ህንተ ጾሳ ቦላ ናጋራ ኦꬄዳዋ በኣድ፤ ህንተ ሲልሲደ መꬌዳ ኮሩማ ምስልያ ህንተንቶ ኤቃ ኦꬂደ ጊግሴድታ። ህንተ መꬍና ጎዳይ ህንተና አዛዜዳ ኦግያፐ ኤለካ ዎራ ስሜድታ። 17 ያትና፥ ታን ታ ላኡ ኩሽያን ኦይቄዳ ላኡ ማሰቴዳ ሹቻቱዋ ኦላደ፥ ህንተ ጼልሽን መንꬃድ።

18 “ሄዋፐ ጉይያን፥ ታን ህንተ ኦꬄዳ ናጋራ ኡባ ድራዉ፥ ሄዌነ መꬍና ጎዳ ሀንቀꬃናዉ ህንተ አ ስንꬃን ኢታባ ኦꬄዳ ድራዉ፥ ካሰዋዳንካ ኦይታሙ ጋላሳነ ኦይታሙ ቃማ መꬍና ጎዳ ስንꬃን ጉፋናደ ጋምኣድ፤ ሄ ዎደ ታን ቁማ ማበይከ፤ ሃꬃካ ኡሻበይከ። 19 መꬍና ጎዳይ ህንተ ቦላን ሀንቀቴዳ አ ኤጽያ ሀንቆ ታን ያያድ፤ አያዉ ጎፐ፥ እ ህንተና ꬋይሳናዉ ጊጌዳ፤ ሽን መꬍና ጎዳይ ዛረꬂደካ ታዉ ስሴዳ። እብራ. 12:21 20 ቃይ መꬍና ጎዳይ አሮናካ ꬋይሳናዉ ሎይꬅ ሀንቀቴዳ፤ ያትና፥ ሄ ዎደ ታን አሮናዉካ ዎሳድ። 21 ታን ህንተ መꬌዳ ሄ ናጋራን ኩሜዳ ኮሩማ ምስልያ አካደ፥ ታማን ጹጋድ፤ ያታደ አ ክንቼሬꬃደ እ ባናዳን ሊቃና ጋካናዉ ጋጫድ፤ ሄ ባና ደርያፐ ጎግያ ሃꬃን ኦላድ።

22 “ህንተ ቃይካ ታብኤራን፥ ማሳሃንነ ቅብሮተ-ሀታዋን (አሙዋ ዱፉዋን) መꬍና ጎዳ ሀንቀꬄድታ።ፓይ. 11:3፣ 34፤ ከሳ 17:7 23 መꬍና ጎዳይ ህንተና፥ ‘ቢተ፥ ታን ህንተንቶ እሜዳ ቢታ ላትተ’ ያጊደ፥ ቃዴሳ-ባርነፐ የዴዳ ዎደካ፥ ህንተ መꬍና ጎዳ ህንተ ጾሳ አዛዙዋ እጺደ ማካሌድታ፤ አን አማነትበይክታ ዎይ አ ቃላዉካ አዛዘትበይክታ። ፓይ. 13:25—14:38፤ ዛረ. 1:21፣ 26፤ እብራ. 3:16 24 ታን ህንተና ኤሮደፐካ ዶሚደ፥ ህንተ መꬍና ጎዳ ቦላን ማካላንቻ።

25 “መꬍና ጎዳይ ህንተና ꬋይሳና ጌዳ ድራዉ፥ ታን ሄ ኦይታሙ ጋላሳነ ኦይታሙ ቃማ መꬍና ጎዳ ስንꬃን ጉፋናደ ጋምኣድ። 26 ታን መꬍና ጎዳ ሀዋዳን ያጋደ ዎሳድ፤ ‘አቤት ኡባ ሞድያ መꬍና ጎዳዉ፥ ኔን ነ ዎልቃማ ዎልቃን ዎዜዳነ ነ ምኖ ኩሽያን ግብጼፐ ከሴዳ፥ ነዉ ላታ ግድያ ነ አሳ ꬋይሶፓርኪ! 27 ነ ቆማቱዋ፥ አብራሃማ ይሳቃነ ያቆባ ቆፓ፤ ሀ አሳ ሞርግያ ዞዱ ኦꬅያዋ፥ ኡንቱንቱ ኢታተꬃነ ኡንቱንቱ ናጋራ ፓይዶፓ። 28 ሄዌ ꬋዮፐ፥ ኔን ኑና ያፐ ከሴዳ ግብጼ ቢታ አሳይ፥ “መꬍና ጎዳይ ኡንቱንታ ገልሳና ጌዳ ቢታ ገልሳናዉ ዳንዳይቤና ድራዉነ ኡንቱንታ እጼዳ ድራዉ፥ መላ ቢታን ዎꬋና ጊደ ከሴዳ” ያጋና። 29 ግዶ ሽን፥ ሀ አሳይ ኔን ነ ዎልቃማ ዎልቃንነ ነ ምጨቴዳ ቀስያን ግብጼፐ ከሴዳ ነ ላታ ግድያ ነ አሳቴ’ ያጋድ።