1 “ህንተ ደኡዋን ደአና ማላ፥ ህንተ ፓይዱካ ዳራና ማላነ መꬍና ጎዳይ ካሰ ህንተ ማይዛ አዋቶ እማና ጊደ ጫቄዳ ቢታ ገሊደ፥ ህንተ ላታና ማላ፥ ሀች ታን ህንተና አዛዝያ አዛዙዋ ኡባ ምንሲደ ናግተ። 2 መꬍና ጎዳይ ነ ጾሳይ ነዉ እሜዳ አዛዙዋ ነ ናግንቶ ናገነንቶ፥ ነ ዎዛና ቆፋ ኤራናዉ፥ ኔና ፓጫናዉነ ኔና ዝቂ ኦꬃናዉ፥ ኦይታሙ ላይꬃ ኩመንꬃ እ ኔና ባዙዋን ካለꬄዳ ኦገ ኡባ ሀሳያ። 3 እ ኔና ዝቂ ኦꬄዳነ ኮሻይሴዳ፤ ሄዋፐ ስሚደ ኔና ግድና፥ ዎይ ነ ማይዛ አዎቱዋ ግድናካ፥ ኤረና ማና ኔና ምዜዳ። ሄዋ እ ኦꬄዳዌ አሳይ መꬍና ጎዳይ ሃሳይያ ቃላ ኡባናፐ አትና፥ ኡክꬃ ጻላላን ደኤናዋ ኔና ታማርሳናሳ። ማቶሳ 4:4፤ ሉቃሳ 4:4 4 ሀ ኦይታሙ ላይꬃቱዋ ግዶን ኔን ማዬዳ ማዩ ዉርቤና፤ ነ ገዲካ ጋፍቤና። 5 ያቶፐ፥ አሳይ ባረ ናኣ ሴርያዋዳን፥ መꬍና ጎዳይ ነ ጾሳይካ ኔና ሴርያዋ ነ ዎዛናን አኬካ።

6 “አ ኦግያን ሀመትያዋንነ አ ቦንችያዋን መꬍና ጎዳ ነ ጾሳ አዛዞቱዋ ናጋ። 7 አያዉ ጎፐ፥ መꬍና ጎዳይ ነ ጾሳይ ኔና ዛንጋራፐነ ደርያፐ ፑልትያ ቄር ሻፋቱነ ጎግያ ፑልቶቱ ደእያ ሎኦ ቢታ ገልሳናዉ አሄ። 8 ሄ ቢታይ ዛርጋይነ ባንጋይ፥ ዎይኒ፥ ባላሲነ ሮማኒ፥ ዎጋራ ዛይቲነ ኤሳይ ኩሜዳ ቢታ። 9 ቃይካ ሄ ቢታይ ኡክꬃይ ፓጨናን ኔን ምያ ቢታ፤ አያይነ ነዉ ፓጨና ቢታ። ሄ ቢታይ ሹቻይ ብራታ ግዴዳ ቢታ። ደርያፐካ ማዳብያ ግያ ብራታ ቦኪደ አክያ ቢታ። 10 ኔን ሄዋን ማደ ካላና፤ ያታደ፥ እ ነዉ እሜዳ ሎኦ ቢታ ድራዉ፥ መꬍና ጎዳ ነ ጾሳ ጋላታና።

11 “ታን ሀች ኔና አዛዝያ አ አዛዞቱዋ፥ አ ህገቱዋነ አ አዋዮቱዋ ናገናን አጋደ፥ መꬍና ጎዳ ነ ጾሳ ዶገናዳን፥ ናገታ። ሆሰ 13:5-6 12 ኔን ማደ ካልያ ዎደ፥ ሎኦ ጎልያ ኬጻደ አን ኡትያ ዎደ፥ 13 ነ መህያነ ዶርሳ ዉዲ ዳርያ ዎደ፥ ነዉ ብራይነ ዎርቃይ ዳጋትያ ዎደ፥ ቃይ ነዉ ደኤዳባይ ኡባይ ዳርያ ዎደ፥ 14 ሄ ዎደ ነ ዎዛናይ ኦቶረተናዳን፥ ኔንካ ግብጼ ጋድያፐ፥ አይለተꬃ ጎልያፐ ኔና ዎዜዳ መꬍና ጎዳ ነ ጾሳ ዶገናዳን ናገታ። 15 እ ኔና ማርዝያና ደእያ ሾሻይነ ማስማሱ ኩሜዳ፥ ሃꬃይ ባይና፥ ሄ ግታነ ያሽያ መላ ቢታና ካለꬄዳ፤ እ ነዉ መላ ባዙዋን ዛላፐ ሃꬃ ꬉሴዳ። 16 ነ ማይዛ አዎቱ ኤረና ማና መላ ቢታን ኔና ምዜዳዌ፥ ኔና ዝቂ ኡዳናሳነ ኔና ፓጫናሳ፤ እ ሄዋ ኦꬄዳዌ ዉርሰꬃን ነዉ ኡባባይ ሎኦ ግዳናዳና። 17 ኔን፥ ‘ታ ዎልቃይነ ታ ኩሽያ ምኖተꬃይ ሀ ዱረተꬃ ታዉ አሄዳ’ ጌናዳን ናገታ። 18 ሽን ኔን መꬍና ጎዳ ነ ጾሳ ሀሳያ፤ አያዉ ጎፐ፥ ሀች ኔን በእያዋዳን፥ ነ ማይዛ አዎቱዋና ጫቀቴዳ ጫቁዋ ምንꬃናዉ፥ ኔን ዱረታ ደማናዳን ነዉ ዎልቃ እሜዳዌ አቴ።

19 “ኔን መꬍና ጎዳ ነ ጾሳ ዶጎፐ፥ ሀራ ጾሳቱዋ ካሎፐ፥ ቃይ ኡንቱንቶ ኦꬆፐነ ጎይኖፐ፥ ኔን ቱሙ ꬋያናዋ ታን ሀች ማርካታይ። 20 መꬍና ጎዳዉ፥ ነ ጾሳዉ፥ ኔን አዛዘተናን እጼዳ ድራዉ፥ መꬍና ጎዳይ ነ ስንꬃፐ ꬋይሴዳ ካዉተꬃቱዋዳን ኔንካ ꬋያና።