1 “መꬍና ጎዳይ ህንተ ጾሳይ ህንተ ላታናዉ ብያ ቢታ ህንተና ገልስያ ዎደነ፥ ቃይ ህንተፐ ዎልቃምያነ ምንያ ላፑን ካዉተꬃቱዋ፥ ሄዋንቱካ ሂተቱዋ፥ ገርጌሰቱዋ፥ አሞረቱዋ፥ ካናነቱዋ፥ ፓርዘቱዋ፥ ሂዌቱዋነ ያቡሳቱዋ ህንተ ስንꬃፐ ꬎቆልያ ዎደ፥ ኪታ 13:19 2 ኡንቱንቱካ መꬍና ጎዳይ ህንተ ጾሳይ ህንተ ኩሽያን አꬅ እምና፥ ህንተ ኡንቱንታ ጾንያ ዎደ፥ ኡንቱንታ ኡባና ሱፑ ኦꬂደ ꬋይስተ። ኡንቱንቱና አያ ጫቁዋነ ጫቀቶፕተ። ኡንቱንቶ አይነ ቃረቶፕተ። 3 ህንተ ኡንቱንቱና አከቶፕተነ ገለቶፕተ። ህንተ ማጫ ናናቱዋ ኡንቱንቱ አቱማ ናናዉ እሞፕተ። ዎይ ኡንቱንቱ ማጫ ናናቱዋካ ህንተ አቱማ ናናዉ አኮፕተ። 4 አያዉ ጎፐ፥ ኡንቱንቱ ህንተ ናናቱዋ ታና ካልያዋፐ ሀራ ኤቃቱዋ ጎይናናዳን፥ ዎራ ዛራና። ሄ ዎደ መꬍና ጎዳ ሀንቁ ህንተ ቦላ ኤጽ ከሳና፤ ህንተናካ ኤለካ ꬋይስ ባሻና። 5 ሄዋ ድራዉ፥ ኡንቱንቱ ያርሽያ ሳኣ ኮልተ። ኡንቱንቱ ጎይንያ ሹቻቱዋ መንሬꬅተ። አሼሮ ግያ ማጫ ጾሳት ምስልያ ክንቼሬꬅተ፤ ኡንቱንቱ ማሰቴዳ ምስለቱዋካ ታማን ጹግተ። ዛረ. 12:3 6 አያዉ ጎፐ፥ ህንተ መꬍና ጎዳዉ፥ ህንተ ጾሳዉ፥ ጌሻ አሳ። መꬍና ጎዳይ ህንተ ጾሳይ ህንተና ባረዉ ዱማ አልኦ ሚሻ ግድያ አሳ ኦꬂደ፥ ቢታ ቦላን ደእያ አሳ ኡባፐ ዶሬዳ። ከሳ 19:5፤ ዛረ. 4:20፤ 14:2፤ 26:18፤ ቲቶ 2:14፤ 1 ጰጽ. 2:9

7 “መꬍና ጎዳይ ህንተና ሲቄዳዌነ ዶሬዳዌ ህንተ ሀራ አሳፐ ፓይዱዋን ዳሬዳ ግሻሳ ግደና። ህንተ ሀራ አሳ ኡባፐካ ፓይዱዋን ጉጽያዋንታ። 8 ሽን መꬍና ጎዳይ ህንተና ሲቄዳ ግሻዉነ ህንተ ማይዛ አዋቶ ጫቄዳ ጫቁዋ ናጌዳ ድራዉ፥ እ ህንተና አይለተꬃ ጋድያፐ፥ ግብጼ ካትያ ኩሽያፐ፥ ባረ ዎልቃማ ኩሽያን ከሴዳነ ዎዜዳ። 9 ሄዋ ድራዉ፥ መꬍና ጎዳይ ህንተ ጾሳይ ጾሳ ግድያዋ ኤርተ። እ ባረና ሲቅያዋንቶነ ባረ አዛዙዋ ናግያዋንቶ ሻአ የለታ ጋካናዉ፥ ባረ አገና ሲቁዋ ጫቁዋ ናግያ፥ አማነትያ ጾሳ። ከሳ 20:5-6፤ 34:6-7፤ ፓይ. 14:18፤ ዛረ. 5:9-10 10 ሽን እ ባረና እጽያዋንቶ ኡንቱንቱ ታልእያ ዛሬ፤ እ ኡንቱንቱ ታልእያ ዛራናዉ ጋምኤና። 11 ሄዋ ድራዉ፥ ታን ሀች ህንተንቶ እምያ አዛዞቱዋ፥ አዋዮቱዋነ ህገቱዋ ናግተ።

12 “ህንተ ሀ አዛዞቱዋ ስሲደ፥ ኡንቱንታ ምንስ ናጎፐ፥ መꬍና ጎዳይ ህንተ ጾሳይ ህንተ ማይዛ አዋቶ ጫቄዳዋዳን፥ ባረ አገና ሲቁዋ ጫቁዋ ህንተንቶ ናጋና። ዛረ. 11:13-17 13 እ ህንተና ሲቃና፤ ህንተና አንጃና፤ ህንተ ፓይዱዋ ዳርሳና። ቃይ እ ህንተንቶ እማናዉ ህንተ ማይዛ አዋቶ ጫቄዳ ጋድያን ህንተ ኡሉዋ አይፍያ፥ ህንተ ቢታ አይፍያ፥ ካꬃ፥ ዎይንያ፥ ዛይትያ፥ ህንተ መህያ ማራቱዋነ ህንተ ዶርሳ ማራቱዋ ጮርሲደ አንጃና። 14 ህንተ ሀራ አይ አሳፐነ አꬊደ አንጀቴዳዋንታ ግዳና። እቱነ አቱማ ግድና፥ ማጫ ግድና ማይነና። ህንተ መሂካ ማይነና። 15 መꬍና ጎዳይ ሀርገ ኡባፐ ህንተና ናጋና። ህንተ ኤርያ ግብጼ ቢታ ኢታ ሀርግያ ህንተ ቦላ አሄና፤ ሽን እ ህንተና እጽያ ኡባ ቦላን ሄ ሀርግያ አሀና። 16 መꬍና ጎዳይ ህንተ ጾሳይ ህንተንቶ አꬅ እምያ አሳ ኡባ ꬋይስተ፤ ኡንቱንቶ አይነ ቃረቶፕተ። ኡንቱንቱ ጾሳቱዋዉካ ጎይኖፕተ። አያዉ ጎፐ፥ ሄዌ ህንተንቶ ጲረ ግዳና።

17 “ህንተ ህንተ ዎዛናን፥ ‘ሀ ካዉተꬃቱ ኑፐ ምኒኖ፤ ያትና፥ ኑን ኡንቱንታ ዋቲደ የደርስ ከሳኔ?’ ጋናዉ ዳንዳዪታ። 18 ሽን ኡንቱንቶ ያዮፕተ። መꬍና ጎዳይ፥ ህንተ ጾሳይ፥ ግብጼ ካትያ ቦላነ ግብጼ ቢታ ኡባ ቦላ ኦꬄዳዋ ሀሳይተ። 19 መꬍና ጎዳይ ህንተ ጾሳይ ህንተና ግብጼፐ ከስያ ዎደ ኦꬄዳ ዎልቃማ ቦሻቱዋ፥ ማላታቱዋ፥ ማላልስያባቱዋ፥ አ ዎልቃማ ኩሽያነ አ ምጨቴዳ ቀስያ ህንተ ህንተ አይፍያን በኤድታ። ሀእ ህንተ ያይያ አሳ ኡባ ቦላንካ መꬍና ጎዳይ፥ ህንተ ጾሳይ ሄዋዳን ኦꬃና። 20 ቃይ ኡንቱንቱፐ አꬂደ ባቃቲደ፥ ህንተፐ ቆሰቴዳዋንቱካ ꬋያና ጋካናዉ፥ መꬍና ጎዳይ ህንተ ጾሳይ ኡንቱንቱ ግዶን ሻብረꬃ የዳና።

21 “ሄዋ ድራዉ፥ ህንተ ኡንቱንቶ ያዮፕተ፤ አያዉ ጎፐ፥ ህንተናና ደእያ መꬍና ጎዳይ፥ ህንተ ጾሳይ፥ ግታነ ያሽያ ጾሳ። 22 መꬍና ጎዳይ ህንተ ጾሳይ ሄ ካዉተꬃቱዋ ጉꬃ ጉꬃ ꬎቆሊደ፥ ህንተ ስንꬃፐ ꬋይሳና። ህንተ ኡንቱንታ ኡባ እት ኩꬃን ꬋይስክታ፤ ሄዋ ህንተ ኦꬆፐ፥ ጋድያን ደእያ ዶአቱ ዳሪደ፥ ህንተና ዋይሳና። 23 ሽን መꬍና ጎዳይ ህንተ ጾሳይ ኡንቱንታ ህንተ ኩሽያን አꬅ እማና፤ ኡንቱንቱ ꬋያና ጋካናዉ፥ እ ኡንቱንታ ሻቢራና። 24 ቃይ ኡንቱንቱ ካተቱዋካ እ ህንተ ኩሽያን አꬅ እማና። ህንተካ ኡንቱንቱ ሱንꬃ ሳሉዋፐ ጋርሳ ባጋፐ ፕቲደ ꬋይሳና። ኦንነ ህንተናና ኤቀት ዳንዳየና፤ ህንተ ኡንቱንታ ꬋይሳና።

25 “ማሰቴዳ ኡንቱንቱ ጾሳቱዋ ምስለቱዋ ታማን ጹግተ። ሄ ምስለቱዋ ቦላን ደእያ ብራ ዎይ ዎርቃ አሞቶፕተ። ሄዌ መꬍና ጎዳዉ፥ ህንተ ጾሳዉ፥ ቱና ግድያ ድራዉ፥ ህንተ አ ጲርያን ኦይቀተናዳን፥ አ ህንተንቶ አኮፕተ። 26 ህንተ ሄ ቱና ኤቃቱዋ ህንተ ጎለ ገልሲደ፥ ኡንቱንቱዳን ሸቀቴዳዋንታ ግዶፕተ። ህንተ ኡንቱንታ ኡባናካ እጽተነ ሻተትተ፤ አያዉ ጎፐ፥ ኡንቱንቱ ባረንቱ ሁጲያዉ ሸቀቴዳዋንታ።