1 “ህንተ ላታናዉ ብያ ጋድያን ህንተ ኦꬃናዳን ታን ህንተና ታማርሳና ማላ፥ መꬍና ጎዳይ ህንተ ጾሳይ ታና አዛዜዳ አዛዞቱ አዋዮቱነ ህገቱ ሀዋንታ። 2 ህንተ ላይꬃይ አዱሳ ግዳና ማላ፥ ህንተ፥ ህንተ ናናቱነ ህንተ ናናቱ ናናይካ ታን ሀች ህንተና አዛዝያ ጾሳ አዋዩዋነ ህግያ ናግያዋን ህንተ ላይꬃን ኡባን መꬍና ጎዳዉ፥ ህንተ ጾሳዉ ያይተ። 3 ህንተኖ እስራኤልያ አሳዉ፥ ኡባባይ ህንተንቶ ሎአ ግዳናዳንነ መꬍና ጎዳይ፥ ህንተ አዎቱዋ ጾሳይ፥ ህንተንቶ ጌዳዋዳን፥ ማꬃነ ኤሳ ጎግያ ጋድያን ህንተ ሎይꬅ ጮራታናዳን፥ ሀ ህገቱዋ ስስተነ ምንሲደ ኦꬅተ።

4 “ኔኖ እስራኤልያዉ፥ ስሳ፤ መꬍና ጎዳይ ኑ ጾሳይ እት መꬍና ጎዳ። ማር. 12:29 5 ኔን መꬍና ጎዳ ነ ጾሳ ነ ኩመንꬃ ዎዛናፐ፥ ነ ኩመንꬃ ሸምፑዋፐነ ነ ኩመንꬃ ዎልቃፐ ሲቃ። ማቶሳ 22:37፤ ማር. 12:30፤ ሉቃሳ 10:27 6 ሀቼ ታን ኔና አዛዝያ ሀ አዛዞቱዋ ነ ዎዛናን ዎꬃ።ዛረ. 11:18-20 7 ሀ አዛዛቱዋ ኔን ነ ናናቱዋ ታማርሳ፤ ኔን ነ ሶን ኡትያ ዎደ፥ ኦግያን ሀመትያ ዎደ፥ ግስያ ዎደነ ደንድያ ዎደካ ኡንቱንታ ሃሳያ። 8 ማላታ ኦꬃደ ነ ኩሽያን ኡንቱንታ ቃቻ፤ ቃይ ነ ሶምእያንካ ማላታዳን ዎꬃ። 9 ነ ፐንግያ ማቃንያ ቦላንነ ነ ድርሳ ፐንግያ ቦላን ኔን ኡንቱንታ ጻፋ።

10-11 “መꬍና ጎዳይ ህንተ ጾሳይ ህንተንቶ እማና ጊደ ህንተ አዋቶ፥ አብራሃማዉ፥ ይሳቃዉነ ያቆባዉ ጫቄዳ፥ ህንተ ኬጽቤና ግታነ ሎኦ ካታማቱ ኩሜዳ ቢታ እማና። ህንተ ኩንꬅቤና ዱረታይ ኩሜዳ ጎለቱዋ፥ ህንተ ቦክቤና ኦላቱዋ፥ ህንተ ቶክቤና ዎይነቱዋነ ዛይትያ ዎጋራቱዋ ህንተንቶ እምያ ዎደ፥ ህንተካ ሚደ ካሌዳ ዎደ፥ ዶመꬃ 12:7፤ 26:3፤ 28:13 12 ህንተና ግብጼፐ፥ አይለተꬃ ጋድያፐ ከሴዳ መꬍና ጎዳ ዶገናዳን ናገትተ። 13 መꬍና ጎዳዉ፥ ህንተ ጾሳዉ፥ ያይተ፤ አ ጻላላዉ ጎይንተ፤ አ ሱንꬃንካ ጫቂተ። ማቶሳ 4:10፤ ሉቃሳ 4:8 14 ህንተ ዩሹዋን ደእያ አሳይ ጎይንያ ሀራ ጾሳቶ ጎይኖፕተ። 15 አያዉ ጎፐ፥ ህንተ ግዶን ደእያ መꬍና ጎዳይ ህንተ ጾሳይ ቃናትያ ጾሳ፤ አ ሀንቁ ህንተ ቦላን ኤጽ ከሳና፤ እ ህንተና ቢታ ቦላፐካ ፕቲደ ꬋይሳና።

16 “ማሳሀን ህንተ አ ፓጬዳዋዳን፥ መꬍና ጎዳ ህንተ ጾሳ ፓጮፕተ። ከሳ 17:1-7፤ ማቶሳ 4:7፤ ሉቃሳ 4:12 17 መꬍና ጎዳይ ህንተ ጾሳይ ህንተና አዛዜዳ አ አዛዞቱዋ፥ አ ዎጋቱዋነ አ አዋዮቱዋ ምንሲደ ናግተ። 18 ህንተዉ ኡባባይ ሎአ ግዳና ማላ፥ መꬍና ጎዳ ስንꬃን ህንተ ልከባነ ሎኦባ ኦꬅተ። ያቶፐ፥ ህንተንቶ እማናዉ መꬍና ጎዳይ ህንተ አዋቶ ጫቄዳ፥ ሄ ሎኦ ቢታ ህንተ ላታና። 19 መꬍና ጎዳይ ባረ ጌዳዋዳን ህንተ ሞርከቱዋ ኡባ ህንተ ስንꬃፐ የደርሳና።

20 “ስንꬃፐ ህንተ ናናይ፥ መꬍና ጎዳይ ኑ ጾሳይ ህንተና አዛዜዳ ሀ ዎጋ፥ አዋዩዋነ ህግያ ብለꬃይ አዬ? ያጊደ ህንተና ኦችያ ዎደ፥ 21 ህንተ ኡንቱንቶ ሀዋዳን ያጊደ ዛርተ፤ ‘ኑን ግብጼ ጋድያን ግብጼ ካትያ አይለቱዋ፤ ሽን መꬍና ጎዳይ ባረ ምኖ ኩሽያን ኑና ግብጼፐ ከሴዳ። 22 ቃይ መꬍና ጎዳይ ኑ ጼልሽን፥ ግብጼ ቢታ ቦላን፥ ግብጼ ካትያ ቦላንነ አ ሱንꬃቱዋ ኡባ ቦላን ግታነ ያሽያ ማላታቱዋነ ማላልስያባቱዋ ኦꬄዳ። 23 ሽን እ ኑ ማይዛ አዋቶ እማና ጊደ ጫቄዳ ቢታ ኑና ገልሲደ፥ ኑዉ እማናዉ ኑና ግብጼፐ ከሴዳ። 24 ያቲደ ሀች በእያዋዳን፥ ኑዉ ኡባ ዎደካ ሎአ ግዳና ማላነ ኑን ደኡዋን ደአና ማላ፥ መꬍና ጎዳይ ኑና ሀ አዋዮቱዋ ኡባ ናጋናዳንነ መꬍና ጎዳዉ፥ ኑ ጾሳዉ፥ ያያናዳን አዛዜዳ። 25 እ ኑና አዛዜዳዋዳን፥ መꬍና ጎዳ፥ ኑ ጾሳ፥ ስንꬃን ሀ አዛዞቱዋ ኡባ ምንሲደ ናጎፐ፥ ሄዌ ኑዉ ጽሎተꬃ ግዳና’ ያግተ።