1 ሙሴ እስራኤልያ አሳ ኡባ እትፐ ጼሲደ፥ ሀዋዳን ያጌዳ፤ “ህንተኖ እስራኤልያ አሳዉ፥ ታን ሀች ህንተንቶ ኦድያ አዋዩዋነ ህግያ ስስተ፤ ህንተ ኡንቱንታ ታማርተነ ምንሲደ ኦꬅተ። 2 መꬍና ጎዳይ ኑ ጾሳይ ሲና ደርያ ቦላን ኑናና ጫቁዋ ጫቀቴዳ። 3 መꬍና ጎዳይ ሀ ጫቁዋ ጫቀቴዳዌ ኑ አዎቱዋ ጻላላና ግደና፤ ሀች ደኡዋን ደእያ ኑ ኡባናካ ጫቀቴዳ። 4 ሄ ደርያ ቦላን ኤጽያ ታማ ግዶን ግዲደ፥ መꬍና ጎዳይ ህንተ ስንꬃን ኤቂደ ህንተናና ሃሳዬዳ። 5 ታንካ ሄ ዎደ መꬍና ጎዳይ ግያዋ ህንተንቶ ኦዳናዉ፥ ጾሳፐነ ህንተፐ ግዱዋን ኤቃድ፤ አያዉ ጎፐ፥ ህንተ ታማዉ ያዪደ፥ ደርያ ፑደ ከስበይክታ። ጾሳይካ ሀዋዳን ያጌዳ፤

6 “ግብጼ ጋድያፐ አይለተꬃ ጎልያፐ ኔና ዎዜዳዌ ታን መꬍና ጎዳ ነ ጾሳ።

7 “ታፐ አትና፥ ሀራ ጾሳቱ ነዉ ደኦፕኖ።

8 “ቦላ ሳሉዋን ደእያዋ ግድና፥ ዎይ ጋርሳ ሳኣን ደእያዋ ግድና፥ ዎይ ሳኣፐ ጋርሳና ደእያ ሃꬃ ግዶን ደእያዋ ግድናካ፥ አያ ምስልያነ ነዉ ኤቃ ኦꬆፓ።ዎጋ 26:1፤ ዛረ. 4:15-18፤ 27:15 9 ኔን ኡንቱንቶ ሆኮፓ፤ ዎይ ኡንቱንቶ ጎይኖፓ፤ አያዉ ጎፐ፥ ታን ታና እጽያዋንታ አዎቱዋ ናጋራ ድራዉ፥ ናናቱዋ ሄዘንꬃነ ኦይደንꬃ የለታ ጋካናዉ ሙርያዋ፤ ታን፥ መꬍና ጎዳይ ነ ጾሳይ ቃናትያ ጾሳ። ከሳ 34:6-7፤ ፓይ. 14:18፤ ዛረ. 7:9-10 10 ሽን ታን ታና ሲቅያዋንታነ ታ አዛዙዋ ናግያዋንታ ሻአ የለታ ጋካናዉ ታ አገና ሲቁዋ በሳይ።

11 “መꬍና ጎዳ ነ ጾሳ ሱንꬃ ጮ ጼሶፓ፤ አያዉ ጎፐ፥ መꬍና ጎዳይ ባረ ሱንꬃ ጮ ጼስያዋ ሙረናን አገና። ሳፃ 19:12

12 “መꬍና ጎዳይ ነ ጾሳይ ኔና አዛዜዳዋዳን፥ ጌሻ ኦꬃደ ሳምባታ ጋላሳ ናጋ። ከሳ 16:23-30፤ 31:12-14 13 ኔን ኦꬅያ ኦሶ ኡባ ኡሱፑን ጋላሳን ኦꬃ።ከሳ 23:12፤ 31:15፤ 34:21፤ 35:2፤ ዎጋ 23:3 14 ሽን ላፑንꬃ ጋላሳይ መꬍና ጎዳዉ፥ ነ ጾሳዉ ሳምባታ። ሄ ጋላስ አይ ኦሶነ ኦꬆፓ፤ ኔን ዎይ ነ አቱማ ናአይ፥ ዎይ ነ ማጫ ናታ፥ ዎይ ነ ቆማይ፥ ዎይ ነ ቦራይ፥ ዎይ ነ ሀሪ፥ ዎይ ነ ሀራ መሄቱ፥ ዎይ ነ ካታማን ደእያ በቲ፥ ሄ ጋላስ አያ ኦሶነ ኦꬆፕተ። ኔን ሸምፕያዋዳን ነ አቱማነ ማጫ ቆማቱካ ሸምፕኖ። 15 ኔን ግብጼ ጋድያን አይልያ ግዳደ ደኤዳዋ ዶጎፓ፤ ቃይ መꬍና ጎዳይ ነ ጾሳይ ባረ ዎልቃማ ኩሽያንነ ባረ ምጨቴዳ ቀስያን ያፐ ኔና ከሴዳዋ ዶጎፓ። መꬍና ጎዳይ ነ ጾሳይ ሳምባታ ጋላሳ ኔን ናጋናዳን፥ ኔና አዛዜዳዌካ ሄዋ ግሻሳ።

16 “መꬍና ጎዳይ ነ ጾሳይ ነዉ እምያ ጋድያን ነ ኔረካ አዱቃና ማላነ ነዉ ሎአና ማላ፥ መꬍና ጎዳይ ነ ጾሳይ ኔና አዛዜዳዋዳን፥ ነ አዉዋነ ነ ዳዮ ቦንቻ። ዛረ. 27:16፤ ማቶሳ 15:4፤ 19:19፤ ማር. 7:10፤ 10:19፤ ሉቃሳ 18:20፤ ኤፈ. 6:2-3

17 “አሳ ዎꬎፓ።ዶመꬃ 9:6፤ ዎጋ 24:17፤ ማቶሳ 5:21፤ 19:18፤ ማር. 10:19፤ ሉቃሳ 18:20፤ ሮመ 13:9፤ ያቆባ 2:11

18 “ሻርሙጾፓ።ዎጋ 20:10፤ ማቶሳ 5:27፤ 19:18፤ ማር. 10:19፤ ሉቃሳ 18:20፤ ሮመ 13:9፤ ያቆባ 2:11

19 “ዉኦፓ።ዎጋ 19:11፤ ማቶሳ 19:18፤ ማር. 10:19፤ ሉቃሳ 18:20፤ ሮመ 13:9

20 “ነ ሾሩዋ ቦላን ዎርዱዋ ማርካቶፓ። ከሳ 23:1፤ ማቶሳ 19:18፤ ማር. 10:19፤ ሉቃሳ 18:20

21 “ነ ሾሩዋ ማቻቶ አሞቶፓ፤ አ ጎልያ፥ አ ሾይቃ፥ አ አቱማ ቆማ፥ ዎይ አ ማጫ ቆማቶ፥ ዎይ አ ቦራ፥ ዎይ አ ሀርያ፥ ዎይ አዉ ደእያዋ አያነ አሞቶፓ ያጌዳ። ሮመ 7:7፤ 13:9

22 “ደርያ ቦላን ታማ ግዶፐ፥ ሻርያ ግዶፐነ ጎርዴዳ ꬉማ ግዶፐ መꬍና ጎዳይ ꬎቁ ጌዳ ኮሻን ሺቁዋ ኡባዉ ኦዴዳ ቃላቱ ሀዋንታ፤ እ ኡንቱንቱ ቦላን አያነ ጉጅቤና። ቃይ ኡንቱንታ እ ላኡ ማሰቴዳ ሹቻቱ ቦላ ጻፊደ፥ ታዉ እሜዳ። እብራ. 12:18-19

23 “ደሪ ታማን ጹገትሽን፥ ꬉማ ግዶፐ ኮሻ ህንተ ስሴዳ ዎደ፥ ህንተ ዛርያ ካፓቱነ ህንተ ጭማቱ ታኮ ዪደ፥ 24 ሀዋዳን ያጌድታ፤ ‘በአ፥ ኑን መꬍና ጎዳ ኑ ጾሳ ኮሻ ታማ ግዶፐ ስሴዳ ዎደ፥ መꬍና ጎዳይ ኑ ጾሳይ ባረ ቦንቹዋነ ባረ አንጋ ኑና በሴዳ። ቃይ ኑን ጾሳይ አናና ሃሳዪደ አሳይ ደኡዋን ደአናዉ ዳንዳይያዋ ሀቼ በኤዶ። 25 ሽን ሀ ዎልቃማ ታማይ ኑና ꬋይሳናዉ ዳንዳዬ፤ ያትና፥ ኑን አያዉ ሀይቄቶ? መꬍና ጎዳ ኑ ጾሳ ቃላ ኑን ላኤንꬆ ስሶፐ፥ ኑን ሀይቄቶ። 26 አያዉ ጎፐ፥ አሹዋ ማዬዳዋን፥ ኑን ስሴዳዋዳን ታማ ግዶን ግዲደ ሃሳይሽን፥ ደኦ ጾሳ ቃላ ስሲደ፥ ፓጻ ደኤዳ አሳይ ኦኔ? 27 ሄዋ ድራዉ፥ ሙሴ! ኔን ሺቃደ፥ መꬍና ጎዳይ ኑ ጾሳይ ግያዋ ኡባ ስሳ፤ መꬍና ጎዳይ ኑ ጾሳይ ነዉ ኦድያዋ ኡባ ኔን ኑዉ ኦዳ፤ ኑንካ ስሲደ ኦꬃና’ ያጌድታ።

28 “ህንተ ታዉ ሃሳይሽን፥ መꬍና ጎዳይ ህንተ ግያዋ ስሲደ፥ መꬍና ጎዳይ ታና ሀዋዳን ያጌዳ፤ ‘ሀ አሳይ ነዉ ኦዴዳዋ ኡባ ስሳድ፤ ኡንቱንቱ ጌዳዋ ኡባ ልከ ጌድኖ። 29 ኡንቱንቱዉነ ኡንቱንቱ ናናዉ መꬍናዉ ኡባባይ ሎአ ግዳናዳን፥ ታዉ ያያናዉነ ታ አዛዞቱዋ ናጋናዉ ኡንቱንቶ ኡባቶካ ሀዋ ማላ ዎዛናይ ደእ ኤረኔሻ! 30 ሀእ ኔን ባደ፥ ኡንቱንቱ ባረንቱ ዱንካንያዉ ስማናዳን ኦዳ። 31 ሽን ኔን ሀዋን ታ ማታን ኤቃሻ፤ ኡንቱንቱ ላታናዳን ታን ኡንቱንቶ እምያ ጋድያን ኡንቱንቱ ኦꬃና ማላ፥ ኔን ኡንቱንታ ታማርሳና ታ አዛዙዋ፥ ታ አዋዩዋነ ታ ህግያ ኡባ ታን ነዉ ኦዳና’ ያጌዳ።

32 “ህንተኖ እስራኤልያ አሳዉ፥ ሄዋ ግዶፐ መꬍና ጎዳይ ህንተ ጾሳይ ህንተና አዛዜዳዋ ኡባ ኦꬃናዉ ናገትተ፤ አፐ ኡሸቻ ዎይ ሀድርሳ ጎፕተ። 33 ህንተ ደኡዋን ደአና ማላ፥ ኡባባይ ህንተንቶ እንጀታና ማላ፥ ቃይ ህንተ ላትያ ቢታንካ ህንተ አዱቂደ ደአና ማላ፥ መꬍና ጎዳይ ህንተ ጾሳይ ህንተና አዛዜዳ ኦገ ኡባን ሄመትተ።