1 ሄዋፐ ጉይያን፥ ሙሴ አሳ ሀዋዳን ያጌዳ፤ “ሀእካ እስራኤልያ አሳዉ፥ ህንተ ደኡዋን ደአናዳንነ መꬍና ጎዳይ፥ ህንተ ማይዛ አዎቱዋ ጾሳይ፥ ህንተንቶ እምያ ቢታ ህንተ ላታናዳን፥ ታን ህንተና ታማርስያ አዋዩዋነ ህግያ ስስተነ ኦꬅተ። 2 ታን ህንተና አዛዝያ መꬍና ጎዳ ህንተ ጾሳ አዛዙዋ ናግተፐ አትና፥ አ ቦላ አይነ ጉጆፕተ፤ ቃይ አፐ አይነ ፓጭሶፕተ። ሳፃ 22:18-19 3 ባኣል-ፓኦራ ደርያ ቦላን መꬍና ጎዳይ ኦꬄዳዋ ህንተ ህንተ አይፍያን በኤድታ፤ መꬍና ጎዳይ ህንተ ጾሳይ ባኣል-ፓኦራን ደእያ ባኣላዉ ጎይኔዳዋንታ ኡባ ህንተ ግዶፐ ꬋይሴዳ።ፓይ. 25:1-9 4 ሽን ህንተ መꬍና ጎዳዉ፥ ህንተ ጾሳዉ፥ አማነቴዳ ድራዉ፥ ሀች ጋካናዉ ኡባይካ ደኡዋን ደኢታ።

5 “በእተ፥ ህንተ ላታናዉ ገልያ ጋድያን ኦꬃና ማላ፥ መꬍና ጎዳይ፥ ታ ጾሳይ ታና አዛዜዳዋዳን፥ አዋዩዋነ ህግያ ታን ህንተና ታማርሳድ። 6 ህንተ ኡንቱንታ ናግተነ ኦꬅተ፤ ሄዋ ህንተ ኦꬆፐ፥ ህንተ አይ ኬሻ አꬌዳ ኤራንቼንቶነ ሀራ አሳይ ህንተና በአና። ኡንቱንቱ ሀ አዋዩዋባ ስስያ ዎደ፥ ‘ቱሙካ ሀ ዎልቃማ ካተተꬃይ አꬌዳ ኤራንቻነ አኬካንቻ ካዉተꬃ’ ያጋና።

7 “ኑን አ ጼስያ ዎደ አዉደነ፥ መꬍና ጎዳይ ኑ ጾሳይ ኑዉ ማታ ግድያዋዳን፥ ማታ ጾስ አዉ ደእያ አይ ዎልቃማ ካዉተꬃይ ደኢ? 8 ታን ሀች ህንተ ስንꬃን ዎꬅያ ሀ ህገ ኡባዳን ጽሎ ግዴዳ አዋዩነ ህጊ ደእያ ሀራ አይ ዎልቃማ ካዉተꬃይ ደኢ?

9 “ስም ህንተ ደእያ ላይꬃ ኡባን ሀ ህንተ በኤዳዋ ኡባ ዶገናዳንነ ህንተ ሁጲያፐ ꬋይሰናዳን ናገትተ፤ ህንተ ናናቱዋነ ህንተ ናናቱ ናናቱዋ ታማርስተ። 10 ሲና ደርያ ቦላን መꬍና ጎዳ ህንተ ጾሳ ስንꬃን ህንተ ኤቄዳ ዎደ፥ ጾሳይ ታና፥ ‘ሀ ሳኣን ደኤዳ ዎደ ኡባን፥ ኡንቱንቱ ታዉ ያይያዋ ታማራናዳንነ ባረንቱ ናናቱዋካ ሄዋ ታማርሳናዳን፥ ታን ታ ቃላ ኡንቱንታ ስሳና ማላ፥ አሳ ታኮ ሺሻ’ ጌዳዋ ሀሳይተ።

11 “ሄ ዎደ ህንተ ሺቂደ ደርያ ጻጱዋን ኤቄድታ፤ ሳሎ ግዱዋ ጋካናዉ፥ ሄ ደርያ ቦላን ታማይ ኤጼ፤ ሄ ደርያ ጻጱ ሳካና ꬉማንነ ሻራን ጎዘት ኡቴዳ። ከሳ 19:16-18፤ እብራ. 12:18-19 12 መꬍና ጎዳይካ ታማ ግዶፐ ህንተንቶ ሃሳዬዳ፤ ህንተ አ ኮሻ ስሴድታፐ አትና፥ አ በእበይክታ። 13 ህንተ ኦꬃናዳን እ ህንተና አዛዜዳ ባረ ጫቁዋ ህንተንቶ ኦዴዳ፤ ሄዋንቱካ ታሙ አዛዞቱዋ። እ ኡንቱንቱ ላኡ ማሰቴዳ ሹቻቱ ቦላ ጻፌዳ። ከሳ 31:18፤ 34:28፤ ዛረ. 9:10 14 ህንተ ላታናዉ ብያ ጋድያን ኦꬃናዳን፥ አዋዩዋነ ህግያ ህንተና ታማርሳና ማላ፥ መꬍና ጎዳይ ታና ሄ ዎደ አዛዜዳ። ከሳ 21:1

15 “መꬍና ጎዳይ ሲና ደርያ ቦላን ታማ ግዶፐ ህንተንቶ ሃሳዬዳ ጋላስ፥ ህንተ አ በእቤና ድራዉ፥ ሎይꬅ ናገትተ። 16 አቱማ ዎይ ማጫ ማላን ኦሰቴዳዋ ግድና ከሳ 20:4፤ ዎጋ 26:1፤ ዛረ. 5:8 17 ሳኣን ደእያ ዶኣ ኡባ ሌምሱዋ ግድና፥ ሳሉዋ ጉፋንꬁዋን ፓልያ ካፉዋ ኡባ ሌምሱዋ ግድና፥ ሮመ 1:23 18 ሳኣ ቦላን ቃጽያባቱ ሌምሱዋ ግድና፥ ቢታፐካ ጋርሳና ሃꬃ ግዶን ደእያ ሞልያ ሌምሱዋ ግድናካ፥ ህንተ ቱነናዳን ማሰቴዳዋ ህንተንቶ ጾሳ ኦꬂደ ጎይኖፕተ። 19 ቃይ ሳሉዋ ፑደ ጼሊደ፥ መꬍና ጎዳይ ህንተ ጾሳይ ሳሉዋፐ ጋርሳና ደእያ ካዉተꬃቶ ኡባዉ እሜዳ አዋ፥ አግና፥ ጾልንተቱዋነ ሳሉዋ መታቱዋ ኡባ በኢደ፥ ህንተ ኡንቱንቶ ጎይኒደ፥ ባለናዳን ናገትተ። 20 ሽን መꬍና ጎዳይ ህንተና ሀች ህንተ ግድያዋዳን፥ ባረዉ ዱማቴዳ አሳ ኦꬃናዉ ብራታ ጮጭያ ማላ ግድያ ግብጼፐ ከሲደ አሄዳ። ከሳ 19:5፤ ዛረ. 7:6፤ 14:2፤ 26:18፤ ቲቶ 2:14፤ 1 ጰጽ. 2:9

21 “ቃይ ህንተ ጋሱዋን መꬍና ጎዳይ ታና ሀንቀቲደ፤ ታን ዮርዳኖሳ ፕነናዳንነ፥ መꬍና ጎዳይ፥ ህንተ ጾሳይ፥ ላታ ኦꬂደ ህንተንቶ እምያ ሎኦ ቢታ ታን ገለናዳን ጫቄዳ። ፓይ. 20:12 22 ሄዋ ድራዉ፥ ታን ዮርዳኖሳ ሻፋ ፕነናን ሀ ጋድያን ሀይቃና፤ ሽን ህንተ ፕኒደ፥ ሄ ሎኦ ቢታ ላቲታ። 23 ሄዋ ድራዉ፥ መꬍና ጎዳይ ህንተ ጾሳይ ህንተናና ጫቀቴዳ ጫቁዋ ዶጎፕተ። ቃይ መꬍና ጎዳይ ህንተ ጾሳይ ህንተና ኦꬆፕተ ጌዳ አይ ማላን ማሰቴዳ ምስልያ ግዶፐነ ህንተንቶ ኤቃ ኦናዳን ናገትተ። 24 አያዉ ጎፐ፥ መꬍና ጎዳይ ህንተ ጾሳይ ምያ ታማነ ቃናትያ ጾሳ። እብራ. 12:29

25 “ህንተ ናናቱዋነ፥ ናናቱ ናናቱዋ የሊደ ሄ ጋድያን አዱሳ ዎድያ ደእያ ዎደ፥ አይ ማላን ግዶፐነ ማሰቴዳ ምስልያዉ ጎይኒደ ቱኖፐ፥ ቃይ መꬍና ጎዳ ህንተ ጾሳ ሀንቀꬃናዉ አ ስንꬃን ኢታባ ኦꬆፐ፥ 26 ህንተ ዮርዳኖሳ ሻፋ ፕኒደ ላታናዉ ብያ ጋድያፐ እቱነ አተናን፥ ኤለ ꬋያናዉ፥ ታን ህንተ ቦላን ሀች ሳሉዋነ ሳኣ ማርካያይ። ህንተ ኡባናካ ꬋያናፐ አትና፥ ሄ ጋድያን አዱሳ ዎድያ ደእክታ። 27 መꬍና ጎዳይ ህንተና ሀራ አሳ ግዶን ላላና፤ ሄ ህንተና መꬍና ጎዳይ ላልያ ካዉተꬃቱዋ ግዶን ህንተ ፓይዱ ጉꬃ ግዳናዋ። ዛረ. 28:36 28 ሄዋን ህንተ ምꬃፐነ ሹቻፐ አሳ ኩሽያን ጊጌዳ በኤና፥ ስሰና፥ ሜናነ ስንገና ጾሳቶ ጎይናና። 29 ሽን ሄዋን ደኢደ፥ ህንተ መꬍና ጎዳ፥ ህንተ ጾሳ ኮያና፤ ህንተ አ ህንተ ኩመንꬃ ዎዛናፐነ ህንተ ኩመንꬃ ሸምፑዋፐ ኮዮፐ ደማና። ኤር. 29:13 30 ሀ ኡባ መቱዋ ግዶን ህንተ ኡንኤቲደ ደኢደ፥ ዎድያ ዉርሰꬃን መꬍና ጎዳኮ፥ ህንተ ጾሳኮ፥ ህንተ ስማናነ አ ቃላዉካ አዛዘታና። 31 መꬍና ጎዳይ ህንተ ጾሳይ ማሮተꬃን ኩሜዳ ጾሳ ግድያ ድራዉ፥ እ ህንተና አገና፤ ዎይ ꬋይሰና፤ ህንተ አዋቶ እ ጫቄዳ ጫቁዋካ ዶገና።

32 “ጾሳይ ጋድያን አሳ መꬌዳ ጋላሳፐ ዶሚደ፥ ህንተፐ ካሰ አꬌዳ ዎድያ አነ ፓይድተ፤ ሀዋ ማላ ግታባይ ሙለካ ሀን ኤርንቶ ዎይ ስሰት ኤርንቶ፥ ሳሎ ሀ ጋጻፐ ያ ጋጻ ጋካናዉ አነ ኦችተ። 33 ታማ ላጩዋ ግዶና ጾሳይ ስሲደ፥ ህንተ ꬋየናን ደኡዋን ደኤዳዋዳን፥ ጾሳይ ስሲደ፥ ደኡዋን ደኤዳ ሀራ አሳይ ደኢ? 34 ዎይ መꬍና ጎዳይ ህንተ ጾሳይ ህንተ ጼልሽን፥ ግብጼ ጋድያን ህንተንቶ ኦꬄዳዋዳን፥ ፓጭያን፥ ማላታን፥ ማላልስያዋን፥ ኦላን ዎልቃማ ኩሽያንነ ምጨቴዳ ቀስያን፥ ቃይ ዎልቃማ ያሻን ሀራ ካዉተꬃ ግዶ ገሊደ፥ እት ካዉተꬃ ባረዉ አካናዉ ባጸቴዳ ሀራ ጾስ ደኢ? 35 መꬍና ጎዳይ ጾሳ ግድያዋ ህንተ ኤራና ማላ፥ ሄዋ እ ህንተና በሴዳ፤ አፐ አትና ሀራይ ባዋ። ማር. 12:32 36 እ ህንተና ታማርሳናዉ ኮዬዳ ድራዉ፥ ባረ ኮሻ ሳሉዋፐ ህንተና ስሴዳ። ቃይ ሀ ሳኣን ባረ ዎልቃማ ታማ ህንተና በሴዳ፤ ሄ ታማ ግዶፐ ህንተ አ ቃላ ስሴድታ። 37 እ ሄዋ ኦꬄዳዌ ህንተ አዎቱዋ ሲቄዳዋፐ ደንዴዳዋን፥ ኡንቱንቱፐ ጉይያን የለትያ ኡንቱንቱ ዛራቱዋ ዶሬዳ ግሻሳ። ቃይ ህንተናካ ግብጼፐ ባረ ዎልቃማ ዎልቃን ከሴዳ ግሻሳ። 38 ሀቼ ህንተ በእያዋዳን፥ ህንተና ገልሳናዉነ ኡንቱንቱ ቢታ ህንተንቶ ላታ ኦꬂደ እማናዉ፥ ህንተፐ ዳርያነ ዎልቃምያ ካዉተꬃቱዋ ህንተ ስንꬃፐ የደርሴዳ።

39 “ስም ሄዋ ግዶፐ፥ ቦላ ሳሉዋን ግድና፥ ጋርሳ ሳኣን ግድና፥ መꬍና ጎዳይ ጾሳ ግድያዋ ኤርተ፤ ህንተ ዎዛናንካ ዎꬅተ፤ ሀራ ጾሳይ ባዋ። 40 ሄዋ ድራዉ፥ ህንተንቱነ ህንተፐ ጉይያን ህንተ ናናዉ ኡባባይ ሎኦ ግዳናዳን፥ ቃይ መꬍና ጎዳይ ህንተ ጾሳይ ህንተንቶ መꬍናዉ እምያ ጋድያን ህንተ ህንተረ አዱቃናዳን፥ ታን ሀች ህንተና አዛዝያ አዋዩዋነ ህግያ ናግተ” ያጌዳ።

41 ሄዋፐ ጉይያን፥ ሙሴ ዮርዳኖሳ ሄፍንꬃን አዋይ ዶልያ ባጋና ሄዙ ካታማቱዋ ዱማዬዳ። ኢያሳ 20:8-9 42 ሄዋ እ ዱማዬዳዌ ካሰ ሞርከተꬃይ ባይናን ደእሽን፥ ኤረናን፥ ባረ ሾሩዋ ዎꬌዳ አሳይ ያ ባቃታናሳ። ሄ ካታማቱዋፐ እቶ ባቃቲደ፥ ሄ ብታኒ ባረ ሸምፑዋ አሻናዉ ዳንዳዬ። 43 ሄዋ ድራዉ፥ ሮቤላ ዛርያዉ መላ ቢታን ꬎቃሳን ደእያ ቤጸራ ካታማ፥ ጋዳ ዛርያዉ ጋላኣደን ደእያ ራሞታነ ምናሰ ዛርያዉ ባሳነን ደእያ ጎላና ካታማቱዋ ዱማዬዳ።

44 ሙሴ እስራኤልያ አሳዉ እሜዳ ጾሳ ህጊ ሀዋ። 45-46 ሀ ዎጋ፥ አዋዩዋነ ህግያ ኡንቱንቱ ግብጼፐ ከሲደ፥ ቤት-ፓኦራ ካታማ ስንꬃን ደእያ፥ ዮርዳኖሳፐ አዋይ ዶልያ ባጋና ደእያ ዛንጋራን ደእሽን፥ ኡንቱንቶ እሜዳ። ሄ ሳአይ ሀሰቦናን ኡቲደ አሞረ ሞድያ ካትያ ስሆና ቢታ ግዶና። ሙሴነ እስራኤልያ አሳይ ግብጼፐ ከሴዳ ዎደ፥ ስሆና ኦሊደ ጾኔድኖ። 47 ሄ ዎደ ኡንቱንቱ አ ቢታነ ባሳነ ካትያ ኦጋ ቢታ፥ ሄዌካ ቃይ ዮርዳኖሳፐ አዋይ ዶልያ ባጋና ደእያ ላኡ አሞረ ካተቱ ቢታ ላቴድኖ። 48 ሄ ቢታይ አርኖና ሻፋ ዶናን ደእያ አሮኤራ ካታማፐ ቢደ፥ ስርዮነ ደርያ ጋኬ፤ ሄ ስርዮነ ጌተት ጼሰትያ ደሪ ሄርሞነ ግያ ደርያ። 49 ቃይካ ሄ ቢታይ ዮርዳኖሳፐ አዋይ ዶልያ ባጋና ደእያ አራባ ቢታ ኡባ አኪደ ቢደ፥ ፕስጋ ደርያ ጻጱዋን ደእያ ሀይቁዋ አባ ጋኬ።