1 “ሄዋፐ ጉይያን ኑን ስሚደ፥ ባሳነ አፍያ ኦግያና ከሲደ፤ ያትና፥ ባሳነ ቢታ ካቲ ኦግ ባረ ኦላንቻቱዋ ኡባና ኤድራአ ግያ ካታማን ኑናና ኦለታናዉ ከሴዶ። 2 ሽን መꬍና ጎዳይ ታና፤ ‘አዉ ያዮፓ! አያዉ ጎፐ፥ ታን አ፥ አ ኦላንቻቱዋ ኡባናነ አ ቢታና ነ ኩሽያን አꬃደ እማድ። ሀሰቦናን ኡቲደ ካተቴዳ አሞረቱ ካትያ ስሆና ቦላ ኦꬄዳዋዳን፥ ኔን አ ቦላካ ኦꬃና’ ያጌዳ።

3 “ሄዋ ድራዉ፥ መꬍና ጎዳይ ኑ ጾሳይ ባሳነ ቢታ ካትያ ኦጋነ አ አሳ ኡባ ኑ ኩሽያን አꬂደ እሜዳ፤ ኑን ኡንቱንቱፐ እቱዋነ አሸናን ዉርስ ዎꬌዶ። 4 ሄ ዎደ ኑን አ ካታማቱዋ ኡባ ኦይቄዶ፤ ኑን ኦይቂቤና እት ካታማይካ ባዋ፤ ሄዋንቱካ ባሳነ ካትያ ኦግ አርጎባ ጋድያን አይስያ ኡሱፑን ታሙ ካታማቱዋ። 5 ሀ ካታማቱ ኡባይካ አዱሳ ግምቢያን ድረቴዳዋንታነ ፐንግያናነ ጎርድያ ምꬃና ደእያዋንታ። ቃይ ግምቢያ ድርሳይ ባይና ሎይꬅ ዳሮ ሞꬃቱካ ደኢኖ። 6 ሀሰቦና ቢታ ካትያ ስሆና ቦላ ኦꬄዳዋዳን፥ ኑን ኡንቱንታ ኡባና ꬋይሴዶ። ኡንቱንቱ ካታማቱዋ ኡባ፥ ኡንቱንቱን ደእያ አቱማዋና ማጫዋነ ናናቱዋናካ ሙለ ꬋይሴዶ። 7 ሽን መህያ ኡባነ ካታማቱዋፐ ቦንቄዳ ኦሞዱዋ ኦꬂደ፥ ኑዉ አኬዶ።

8 “ሄ ዎደ ኑን አርኖና ሻፋፐ ቢደ ሄርሞነ ደርያ ጋካናዉ ደእያ ቢታ ዮርዳኖሳ ሻፋፐ አዋይ ዶልያ ባጋና ደእያዋ ሄ ላኡ አሞረ ቢታ ካተቱዋፐ አኬዳ። 9 (ሲዶና ቢታ አሳይ ሄርሞነ ደርያ ስርዮነ ደርያ ጊደ ጼጊኖ፤ አሞረ ቢታ አሳይ ቃይ ሳኒራ ጊደ ጼጊኖ።) 10 ኑን ደምባ ጋድያን ደእያ ካታማቱዋ ኡባ፥ ጋላኣደ ቢታ ኡባ፥ ባሳነ ቢታ ኡባነ ባሳነ ጋድያን ኦግ ሞድያ ሳላካነ ኤድራአ ካታማቱዋ ጋካናዉ ደእያ ሳኣ ኦይቄዶ። 11 (ራፋየቱዋፐ አቴዳዌ ባሳነ ቢታ ካትያ ኦጋ ጻላላ። አ አርሳይ ብራታ አርሳ፤ ሄ አርሳይ ሀቼ ጋካናዉካ ራባ ጌተትያ አሞናቱዋ ካታማን ደኤ፤ አዉ ጌሳይ ኡዱፑን ዋꬋ፤ ጎምፓይካ ኦይዱ ዋꬋ።)

12 “ሄ ቢታ ኑን ላቴዳዋፐ ጉይያን፥ አርኖና ሻፋ ዶናን ደእያ አሮኤራ ካታማፐ ዶሚደ ደእያ ሳኣነ፥ ደረትያ ጋላኣደ ጋድያፐ ባጋ አ ካታማቱዋናካ ሮቤላ ዛረቶነ ጋዳ ዛረቶ ታን እማድ። 13 ጋላኣደፐ አቴዳዋነ ኦግ ሞድያ ባሳነ ቢታ ኡባ፥ ሄዌካ አርጎባ ካዉተꬃ ቃይ ምናሰ ዛርያፐ ባጋቶ እማድ። (ሄ ባሳነ ቢታይ ኡባይ ራፋየቱዋ ቢታ ጌተት ጼሰቴዳ። 14 ምናሰ ዛርያፐ ያኢር፥ ኩመንꬃ አርጎባ ቢታ ላቴዶ፤ ሄዌካ ጋሹራቱነ ማእካቱ ቢታ ጋጻ ጋካናዉ ደእያ ባሳነ ቢታ። እ ቄር ካታማቱዋ ባረ ሱንꬃን ጼሰታናዳን ኦꬄዳ፤ ሄዋ ድራዉ፥ ኡንቱንቱ ሀቼ ጋካናዉ፥ ሀቦት-ያኢራ ካታማቱዋ ጌተት ጼሰቲኖ።)

15 “ቃይ ጋላኣደ ቢታካ ምናሰ ዛረ ግድያ ማኪራሳዉ እማድ። 16 ሮቤላነ ጋዳ ዛርያዉ ጋላኣደፐ ቢደ አርኖና ሻፋ ማታ ጋካናዉ ደእያ ቢታ እማድ። ገድሳ ባጋና ኡንቱንቶ አርኖና ሻፋዉ ባጋይ ዛዋ፤ ቃይ ሁጲሳ ባጋና አሞናቱዋ ቢታ ጋጻ ግድያ ያቦቃ ሻፋይ ዛዋ። 17 አዋይ ዉልያ ባጋና፥ ኡንቱንቱ ዛዋይ አራባን ደእያ ዮርዳኖሳ ሻፋ ጋኬ፤ ሄዌካ ጋሊላ አባፐ ዶሚደ ፕስጋ ደርያ ጻጱዋን ደእያ ሀይቁዋ አባ፥ ሄዌነ ማጽንያ አባ ጋካናሳ።

18 “ሄ ዎደ ታን ህንተና ሀዋዳን ያጋደ አዛዛድ፤ ‘መꬍና ጎዳ ህንተ ጾሳይ ሀ ቢታ ህንተ ላታናዳን ህንተንቶ እሜዳ። ስም ህንተንቶ ደእያ ቶራንቻ አሳ ኡባ ኦላ ሚሻ ግጽሲደ፥ ህንተ እሻቱዋ ግድያ እስራኤልያ አሳፐ ስንꬃና ኦለታናዉ አꬍተ።ኢያሳ 1:12-15 19 ህንተዉ ዳሮ መሂ ደእያዋ ታን ኤራይ፤ ሄዋ ድራዉ፥ ህንተ ማቼቱ፥ ህንተ ጉꬃ ናናይነ ህንተ መሂ ታን ህንተንቶ እሜዳ ካታማቱዋን ደእሽኖ። 20 ሄዌነ፥ መꬍና ጎዳይ ህንተና ሸምፕሴዳዋዳን፥ ህንተ እሻቱዋካ ሸምፕሳና ጋካናዉነ፥ ቃይ ዮርዳኖሳ ሻፋ ሄፍንꬃን፥ መꬍና ጎዳይ ህንተ ጾሳይ ኡንቱንቶ እምያ ቢታ ኡንቱንቱ አካና ጋካናሳ። ሄዋፐ ጉይያን፥ ህንተ ሁጲያን ሁጲያን፥ ታን ህንተንቶ እሜዳ ቢታ ስሚታ’ ያጋድ።

21 “ታን ሄ ዎደ ያሳ ሀዋዳን ያጋደ አዛዛድ፤ ‘መꬍና ጎዳይ፥ ህንተ ጾሳይ፥ ሀ ላኡ ካተቱ ቦላ ኦꬄዳዋ ኡባ ኔን ነ አይፍያን በኣዳ፤ ህንተ ኦይቃናዉ ብያ ካዉተꬃቱዋ ኡባ ቦላካ መꬍና ጎዳይ ሄዋዳን ኦꬃና። 22 ህንተ ድራዉ ኦለትያዌ፥ መꬍና ጎዳ ህንተ ጾሳ ግድያ ድራዉ፥ ኡንቱንቶ ያዮፕተ’ ያጋድ።

23 “ሄ ዎደ ታን ሀዋዳን ያጋደ መꬍና ጎዳ ሎይꬃደ ዎሳድ፤ ፓይ. 27:12-14፤ ዛረ. 32:48-52 24 ‘ኡባ ሞድያ መꬍና ጎዳዉ፥ ነ ግታተꬃነ ነ ምኖ ኩሽያ ታና፥ ነ ቆማ በሳናዉ ዶማዳ፤ አያዉ ጎፐ፥ ነዋዳን ሀዋ ማላ ኦሶቱዋነ ዎልቃማባ ኦꬃናዉ ዳንዳይያዌ ሳሉዋን ግድና ሳኣን አይ ጾሳይ ደኢ? 25 ጾሳዉ! ታን ባደ ዮርዳኖሳ ሻፋፐ፥ ሄፍንꬃን ደእያ ሄ ሎኦ ደረትያ ቢታነ ሊባኖሳ በአናዳን ታና የዳርኪ!’ ያጋድ።

26 “ሽን መꬍና ጎዳይ ህንተ ጋሱዋን ታና ሀንቀቲደ፥ ታዉ ስሰናን እጼዳ፤ መꬍና ጎዳይ ታና ሀዋዳን ያጌዳ፤ ‘ስም ነዉ ግዳናዋ፤ ሀ የዉዋ ደንꬃደ ላኤንꬆ ታዉ ሃሳዮፓ። 27 ሄዋ አጋደ ደንዳ፥ ፕስጋ ደርያ ሁጲያ ከሳ፤ ሄዋን ኤቃደ ቢታዉ አዋይ ዶልያ ባጋ፥ ሁጲሳ፥ ገድሳነ አዋይ ዉልያ ባጋ ነ አይፍያ ደንꬃደ ጼላ። አያዉ ጎፐ፥ ኔን ሀ ዮርዳኖሳ ሻፋ ሙለካ ፕናካ። 28 ማታ ኔን ኢያሱዉ አዛዙዋ እማ፤ አ ጻልሳነ ምንꬃ፤ አያዉ ጎፐ፥ እ ሀ አሳ ካለꬂደ ፕንꬃናነ ሀ ኔን በእያ ቢታ እ ኡንቱንታ ላትሳናዋ’ ያጌዳ።

29 “ሄዋ ድራዉ፥ ኑን ቤት-ፓኦራ ካታማ ስንꬃን ደእያ ዛንጋራን ጋምኤዶ” ያጌዳ።