1 “ሄዋፐ ጉይያን ኑን፥ መꬍና ጎዳይ ታና አዛዜዳዋዳን፥ ዞኦ አባ አፍያ ኦግያ ኦይቂደ፥ ጉየ ስሚደ፥ መላ ቢታ ቤዶ፤ ሄዋን መቶቲደ፥ ደረትያ ኤዶማ ጋድያን ዳሮ ጋላሳ ዩዬዶ። ፓይ. 21:4

2 “ሄዋፐ ጉይያን፥ መꬍና ጎዳይ ታና ሀዋዳን ያጌዳ፤ 3 ‘ሀ ደረትያ ቢታ ዩሻይ ህንተንቶ ግዳናዋ፤ ጉየ ስሚደ፥ ሁጲሳ ባጋ ቢተ። 4 አሳ ኔን ሀዋዳን ያጋደ አዛዛ፤ “ኤዶማን ደእያ ህንተ እሻቱዋ ግድያ ኤሳ ናናቱ ቢታና ህንተ አꬊታ። ኡንቱንቱ ህንተንቶ ያያና፤ ሽን ህንተ ሎይꬅ ናገትተ። ዶመꬃ 36:8 5 ታን ኡንቱንቱ ጋድያፐ ገዲ የꬍያ ሳ ኬሻነ ህንተንቶ እመና ድራዉ፥ ኡንቱንቱና ዋለቀቶፕተ፤ አያዉ ጎፐ፥ ታን ደረትያ ኤዶማ ቢታ ላታ ኦꬃደ ኤሳዉ እማ ድጋድ። 6 ህንተ ምያ ቁማነ ኡሽያ ሃꬃ፥ ኡንቱንቱፐ ሻሉዋን ሻምተ ያጋደ አዛዛ” ያጌዳ።

7 “ ‘መꬍና ጎዳይ ህንተ ጾሳይ ህንተ ኦꬄዳዋ ኡባ አንጄዳ፤ ህንተ ሀ ዎልቃማ መላ ቢታን ሀመትያ ዎደ፥ ህንተና ናጌዳ። ሀ ኦይታሙ ላይꬃ ኡባን መꬍና ጎዳይ ህንተ ጾሳይ ህንተናና ደኤዳ። አያነ ህንተንቶ ፓጭስቤና።

8 “ ‘ሄዋ ድራዉ፥ ኑን ኑ እሻቱዋ ግድያ ኤሳ ናናይ ደእያ ኤዶማ ቢታና አꬊደ ቤዶ። ቃይ ኤላታነ ኤጽዮን-ጋብራ ግያ ካታማቱዋፐ ደንዲደ፥ አራባኮ ጋꬅያ ኦግያ አጊደ፥ ሞኣባ መላ ቢታ አꬌዶ።

9 “ ‘መꬍና ጎዳይ ታና ሀዋዳን ያጌዳ፤ “ታን ኡንቱንቱ ጋድያፐ አያነ ህንተንቶ እመና ድራዉ፥ ሞኣባ አሳና ዋለቀቶፕተ ዎይ ኡንቱንታ ኦሎፕተ፤ አያዉ ጎፐ፥ ኤራ ካታማ ታን ላታ ኦꬃደ ሎጸ ዛረቶ እማ ድጋድ” ያጌዳ’ ያጌዳ።”ዶመꬃ 19:37

10 (ሄ ጋድያን ካሰ ምኖነ ጮራ ግዴዳ፥ ቃይ አናቀ ዛራቱዋዳን አዱሳ ግዴዳ ኤመታ ጌተትያ አሳቱ ደኤድኖ። 11 ኡንቱንቱ አናቀቱዋዳንካ ራፋየቱዋ ጌተቲኖ። ሽን ሞኣባ አሳይ ኡንቱንታ ኤመታ ጊደ ጼሴ። 12 ሆራ ቢታ አሳይ ቃይ ካሰ ኤዶማን ደኤዳ፤ ሽን እስራኤላቱ ላታናዳን መꬍና ጎዳይ ኡንቱንቶ እሜዳ ጋድያን ኡንቱንቱ ኦꬄዳዋዳን፥ ኤሳ ዛራቱ ሆራታ ኡንቱንቱ ጋድያፐ ሾዴድኖ፤ ቃይ ባረንቱ ስንꬃፐ ኡንቱንታ ꬋይሲደ፥ ኡንቱንቱ ሳኣን ኡቴድኖ።)

13 ሙሴ፥ “መꬍና ጎዳይ ኑና፥ ‘ሀእ ደንድተ፤ ዘሬዳ ሻፋ ፕንተ’ ያግና፥ ኑን ዘሬዳ ሻፋ ፕኔዶ። 14 ኑን ቃዴሳ-ባርነፐ ደንዲደ፥ ዘሬዳ ሻፋ ፕናና ጋካናዉ ደእያ ዎዲ ሀታማነ ሆስፑን ላይꬃ፤ ሄ ዎደ መꬍና ጎዳይ ኡንቱንቶ ጫቄዳዋዳን፥ ኦላዉ ጋኬዳ ሄ የለታ አቱማዋንቱ ኡባይ ዉሬድኖ። ፓይ. 14:28-35 15 ዱንካኔዳ ሳፐ ኡንቱንቱ ኡባና ድምእ ጊደ ꬋያና ጋካናዉ፥ መꬍና ጎዳ ኩሺ ኡንቱንቱ ቦላ ደኤ።

16 “ኦላዉ ጋኬዳ አቱማ አሳይ ኡባይ ኡባና ꬋዬዳዋፐነ አሳ ግዶፐ ሀይቂዴ ዉሬዳዋፐ ጉይያን፥ 17 መꬍና ጎዳይ ታና ሀዋዳን ያጌዳ፤ 18 ‘ኤራ ኦግያና ሀች ህንተ ሞኣባ ቢታ አꬊታ። 19 ህንተ አሞና አሳቱ ቢታ ጋክያ ዎደ፥ ኡንቱንታ ቃሰረꬆፕተ ዎይ ኡንቱንቱና ዋላቀቶፕተ። አያዉ ጎፐ፥ አሞና አሳቱ ጋድያፐ አያነ ታን ህንተንቶ ላታ ኦꬃደ እምከ። ታን ሄ ቢታ ሎጸ ዛርያዉ ላታ ኦꬃደ እማ ድጋድ’ ያጌዳ። ዶመꬃ 19:38

20 “(ሄ ቢታይ ካሰ ያን ደእያ አሳይ ጼሰትያ ሱንꬃን ራፋየቱዋ ቢታ ጌተቲደ ጼሰቴ። ቃይ አሞናቱ ኡንቱንታ ዛምዙሚም ጊደ ጼሲኖ። 21 ኡንቱንቱካ አናቀቱዋዳን አዱሳ፥ ምኖነ ጮራ ጋደ፤ ሽን መꬍና ጎዳይ ኡንቱንታ ꬋይስና፥ አሞናቱ ኡንቱንቱ ቢታ ላቲደ ኡቴድኖ። 22 መꬍና ጎዳይ ኤዶማን ደእያ ኤሳ ዛረቶ ኦꬄዳዋዳን፥ ኡንቱንቶካ ኦꬄዳ፤ ሄዌካ እ ሄ ጋድያን ደእያ ሆራታ ꬋይስና፥ ኤሳ ዛራቱ ኡንቱንቱ ቢታ ላቲደ ሀቼ ጋካናዉ ኡቴድኖ። 23 ጋዛ ጋካናዉ ደእያ ሄራቱዋን ደእያ አዎቱዋ ግዶፐ፥ ካፍቶራ ግያ ጋድያፐ ዬዳ ካፍቶረቱ ኡንቱንታ ꬋይሲደ፥ ኡንቱንቱ ሳኣን ኡቴድኖ።)

24 “ቃይካ ጾሳይ ኑና ሀዋዳን ያጌዳ፤ ‘ደንድተ፤ አርኖና ሻፋ ፕንተ። በእተ፥ አሞረ ቢታ አሳ ግድያ ሀሰቦና ካትያ ስሆናነ አ ቢታ ታን ህንተ ኩሽያን አꬃደ እማድ፤ አ ኦሊደ አ ቢታ ላትያዋዳን ዶምተ። 25 ሀቼፐ ዶሚደ ሳሉዋፐ ጋርሳና ደእያ አሳይ ኡባይ ህንተንቶ ያያናዳን ታን ኦꬃና፤ ኡንቱንቱ ህንተዋ ስስያ ዎደ ኡባን፥ ያሻን ኮኮራና’ ያጌዳ።

26 “ሄዋፐ ጉይያን፥ ቅደሞታ መላ ቢታፐ ሀሰቦና ካትያ ስሆናዉ ሳሮ ቃላ ኪተትያዋንቱ ቦላ ሀዋዳን ያጋደ ኪታድ፤ 27 ‘ኑና ነ ቢታና አꬃርኪ! ኑን ዎጋ ኦገ ጻላ ኦይቂደ ባና፤ አፐ ኡሸቻ ዎይ ሀድርሳ ስሞኮ። 28 ኑን ምያ ቁማዉነ ኡሽያ ሃꬃው ሚሻ ቃንጻና። ኑ ኮይያዌ ነ ቢታና አꬋናዋ ጻላላ። 29 ኤዶማን ደእያ ኤሳ ዛራቱነ፥ ኤራን ደእያ ሞኣባ ዛራቱ ኑና አꬆዋዳን፥ መꬍና ጎዳይ ኑ ጾሳይ፥ ኑዉ እምያ ቢታዉ ዮርዳኖሳ ሻፋ ኑን ፕናና ጋካናዉ፥ ኦገ ጻላላና ኑና አꬃ’ ያጋድ።

30 “ሽን ሀሰቦና ካቲ ስሆን ኑና አናን ድጌዳ። አያዉ ጎፐ፥ መꬍና ጎዳይ ህንተ ጾሳይ ሀች ህንተ በእያዋዳን፥ አ ህንተ ኩሽያን አꬂደ እማናዉ አ ዎዛና ምንሲደ፥ አ ሞርግያ ዞዱ ኦꬄዳ።

31 “ሄዋፐ ጉይያን መꬍና ጎዳይ ታና፥ ‘በአ፥ ስሆናነ አ ቢታ ታን ነዉ እሙሳ ዶማድ፤ ሀእ ጾናደ፥ አ ቢታ ላታ’ ያጌዳ።

32 “ያትና፥ ስሆን ባረ አሳ ኡባ አኪደ፥ ያሃጻ ግያ ሳን ኑናና ኦለታናዉ ደንዴዳ። 33 ሽን መꬍና ጎዳይ ኑ ጾሳይ ኑዉ አ አꬅ እሜዳ፤ አ፥ አ አቱማ ናናቱዋነ አ አሳ ኡባ ኑን ዎꬌዶ። 34 ሄ ዎደ ኑን አ ካታማቱዋ ኡባ ኦሞዲደ፥ ሙለ ካታማቱዋካ፥ አን ደእያ አቱማ አሳና፥ ማጫ አሳናነ ናናቱዋና ꬋይሴዳ፤ አያነ አሽበይክኖ። 35 ኡንቱንቱ መህያነ ኑን ኦይቄዳ ካታማቱዋፐ ኦሞዴዳባቱዋ ጻላላ ኑዉ አኬዶ።

36 “አርኖና ዛንጋራ ጋጻን ደእያ አሮኤራፐነ ሄ ዛንጋራ ግዶን ደእያ ካታማፐ ዶሚደ ቢደ ጋላኣደ ቢታ ጋካናዉ፥ ኑዉ ምኔዳ እት ካታምነ ደእቤና። መꬍና ጎዳይ ኑ ጾሳይ ኡንቱንታ ኡባ ኑ ኩሽያን አꬅ እሜዳ። 37 ሽን ኑን አሞና ዛራቱዋ ጋድያኮ፥ ሄዌካ ያቦቃ ሻፋ ዶና ኡባኮ፥ ደረትያ ቢታ ካታማቱዋኮነ መꬍና ጎዳይ ኑ ጾሳይ ኑን ባናዳን አዛዝቤና ሳ ኡባኮ ሺቅበይኮ።