1 “ህንተ ላታናዳን፥ መꬍና ጎዳይ ህንተ አዎቱዋ ጾሳይ ህንተንቶ እሜዳ ጋድያን ህንተ ደኤዳ ኬሻን ኡባን ህንተ ባለናን ኦꬃና አዋዮቱነ ህገቱ፥ ሀዋንታ። 2 ህንተ ላትያ ካዉተꬃቱ ደርያ ቦላን፥ ዞዚያ ቦላንነ ምꬃቱዋ ጻጱዋን ባረንቱ ጾሳቶ ጎይንያ ሳኣ ኡባ ኡባና ꬋይስተ። 3 ኡንቱንቱ ያርሽያ ሳኣ ኮልተ፤ ኡንቱንቱ ጎይንያ ሹቻቱዋካ መንሬꬅተ፤ አሼሮ ግያ ኡንቱንቱ ጾሳት ምስልያ ታማን ጹግተ፤ ማሰቴዳ ኡንቱንቱ ጾሳቱዋ ምስለቱዋ ꬋይስተ፤ ኡንቱንቱ ሱንꬃቱዋካ ሄ ሳአቱዋፐ ቁጭ ድግተ። ዛረ. 7:5

4 “መꬍና ጎዳ ህንተ ጾሳዉ ኡንቱንቱ ባረንቱ ጾሳዉ ጎይንያዋዳን ጎይኖፕተ። 5 መꬍና ጎዳይ ህንተ ጾሳይ ዛረ ኡባይ ደኢያሳፐ ባረ ሱንꬃይ ሄዋን ጼሰታናዳን ዶሬዳ ሳኣ ኮይተ። ሄ ሳኣ ህንተ ባናዉ ኮሼ። 6 ህንተ ህንተ ጹግያ ያርሹዋ፥ ሀራ ያርሹዋ፥ ህንተ አስራታ፥ ህንተ እሙዋ፥ ህንተ ሺቁዋ፥ ህንተ ዶሲደ እምያ እሙዋ፥ ህንተ መህያነ ዶርሳፐ ባይራ ሄ ሳኣ አህተ። 7 ሄዋን መꬍና ጎዳይ ህንተ ጾሳይ ደእያ ሳን ህንተነ ህንተ ሶ አሳይ ማና፤ ቃይ ህንተ ኩሺ ኦꬄዳባን ኡባንነ መꬍና ጎዳይ ህንተ ጾሳይ ህንተና አንጄዳባን ህንተ ናሸታና።

8 “ሀእ ሀዋን ህንተ ኦꬅያዋዳን፥ ሄ ዎደ ህንተ አይፍያን ሎአ ማላትያባ ኦꬅክታ። 9 አያዉ ጎፐ፥ መꬍና ጎዳይ ህንተ ጾሳይ ህንተንቶ እምያ ሸምፖ ቢታ ብሮን ጋክበይክታ። 10 ሽን ህንተ ዮርዳኖሳ ፕኒደ፥ መꬍና ጎዳይ ህንተ ጾሳይ እምያ ሄ ቢታ ላቲደ፥ ህንተ ያን ኡታና። ህንተና ዶዴዳ ሞርከቱዋፐ ህንተና እ ሸምፕስያ ድራዉ፥ ህንተ ዎፑ ጊደ ሄዋን ደአና። 11 ሄ ዎደ መꬍና ጎዳይ ህንተ ጾሳይ ባረ ሱንꬃይ ሄዋን ጼገታናዉ ዶሬዳ ሄ ሳኣ፥ ታን ህንተና አዛዝያዋ ኡባ፥ ጹግያ ያርሹዋ፥ ሀራ ያርሹዋ፥ ህንተ አስራታ፥ ህንተ እሙዋነ ህንተ መꬍና ጎዳዉ ሺቄዳዋ ኡባ ሄዎ አሂታ። 12 ህንተ፥ ህንተ አቱማነ ማጫ ናናይ፥ አቱማነ ማጫ ቆማቱነ ህንተናና ላታ አክቤና ህንተ ካታማን ደእያ ሌዋቱዋናካ እትፐ ሄዋን መꬍና ጎዳ ህንተ ጾሳ ስንꬃን ናሸትተ። 13 ህንተ ጹግያ ያርሹዋ ህንተ ኮዬዳ ሀቃንነ ጮ ያርሸናዳን ናገትተ። 14 ህንተ ህንተ ዛራቱ ደኢያሳ ኡባፐ እቱዋን፥ መꬍና ጎዳይ ዶሬዳ ሳኣን ህንተ ጹግያ ያርሾ ያርሽተ፤ ታን ህንተና አዛዝያዋ ኡባካ ሄዋን ኦꬅተ።

15 “ሽን ህንተ ደእያ ሳን ሀቃንነ ህንተ መህያፐ መꬍና ጎዳይ ህንተና አንጄዳዋዳን ሹኪደ ሚተ፤ ዎጋን ጌሻ አሳ ግድና ዎይ ጌየና አሳ ግድናካ ኡባይካ ጋራ አሹዋነ ገንእያ አሹዋ ምያዋዳን ህንተ መህያፐ ሹኪደ ሚተ። 16 ሽን ሱꬃ ሃꬃዳን ሳኣን ጉስተፐ አትና ሞፕተ። ዶመꬃ 9:4፤ ዎጋ 7:26-27፤ 17:10-14፤ 19:26፤ ዛረ. 15:23

17 “ህንተ ህንተ ካꬃፐ፥ ዎይንያፐነ ዛይትያፐ እምያ አስራታ፥ ህንተ መህያፐነ ዶርሳ ዉድያፐ ባይራ፥ ጾሳዉ እማናዉ ሺቄዳዋ ኡባነ ህንተ ህንተ ዶሱዋን ጮ እምያ እሙዋ ኡባ ህንተ ደእያ ሄራን ሙለካ ሞፕተ። 18 ሽን ህንተ፥ ህንተ አቱማነ ማጫ ናናይ፥ ህንተ አቱማነ ማጫ ቆማቱነ ህንተ ካታማቱዋን ደእያ ሌዋቱዋናካ እትፐ፥ መꬍና ጎዳይ ህንተ ጾሳይ ዶሬዳ ሳኣን መꬍና ጎዳ ህንተ ጾሳ ስንꬃን ሀ ያርሹዋ ኡባቱዋ ሚተ፤ ሄዋን ህንተ ዳቡራን ሺሼዳዋን መꬍና ጎዳ ህንተ ጾሳ ስንꬃን ናሸትተ። 19 ህንተ ህንተ ጋድያን ደእያ ላይꬃ ኡባን ሌዋቱዋ ሸነኮ ጌናዳን ናገትተ።

20 “እ ህንተንቶ ገሌዳ ቃላዳን መꬍና ጎዳይ ህንተ ጾሳይ ህንተ ዛዋ አስያ ዎደ፥ ህንተና አሹዋ ማናዉ ኮሽያ ዎደ፥ ህንተ ኮዬዳ ኬና ሚተ። 21 ሽን መꬍና ጎዳይ ህንተ ጾሳይ ባረ ሱንꬃይ ሄዋን ጼሰታናዳን ዶሬዳ ሄ እት ሳአይ ህንተንቶ ሃኮፐ፥ መꬍና ጎዳይ ህንተንቶ እሜዳ ህንተ መህያ ዎይ ዶርሳ ዉድያፐ ሀቃዋ ግድናካ፥ ታ ህንተና አዛዜዳዋዳን፥ ህንተ ኮዬዳ ኬና ህንተ ካታማን ሹኪደ ሚተ። 22 ዎጋን ጌሻ አሳ ግድና፥ ዎይ ጌየናዋ ግድናካ፥ አይ አስካ ጋራ ግድና፥ ገንእያ አሹዋ ካሰ ምያዋዳን ሞ። 23 ሽን ሱꬃይ ደእያ አሹዋ ሜናዳን ናገትተ፤ አያዉ ጎፐ፥ ሸምፑ ሱꬃን ደኤ፤ ሄዋ ድራዉ፥ ደኡዋ አሹዋና ሞፕተ። ዎጋ 17:10-14 24 ሱꬃ ሃꬃዳን ጋድያን ጉስተፐ አትና ኡሾፕተ። 25 ህንተ መꬍና ጎዳ ስንꬃን ህንተ ሎኦባ ኦꬅያዌ ህንተዉ፥ ህንተፐ ጉይያን፥ ህንተ ናናቶካ ሎኦ ግዳና ማላ፥ ሱꬃ ኡሾፕተ።

26 “ሽን ህንተ ዱማዬዳዋነ ሺቄዳዋ አኪደ፥ መꬍና ጎዳይ ዶሬዳ ሳአዉ ቢተ። 27 ቢደ ህንተ ጹግያ ያርሹዋ፥ አሹዋነ ሱꬃ፥ መꬍና ጎዳዉ፥ ህንተ ጾሳዉ፥ ያርሽያሳን ሺሽተ፤ ህንተ ያርሹዋ ሱꬃ መꬍና ጎዳዉ፥ ህንተ ጾሳዉ፥ ያርሽያ ሳኣ ማታን ጉስተ፤ አሹዋ ህንተ ሚተ። 28 ታን ህንተና አዛዝያ ዎጋ ምንሲደ ናግተ፤ ሄዋ ኦꬆፐ፥ ህንተንቶነ ህንተ ናናዉ ሎአ ግዳናዋ፤ አያዉ ጎፐ፥ ህንተ ልከባነ መꬍና ጎዳ ህንተ ጾሳ ናሸችያ ሎኦባ ኦꬂታ።

29 “ህንተ ላታናዉ ብያ ካዉተꬃ መꬍና ጎዳይ ህንተ ጾሳይ ህንተ ስንꬃፐ ꬋይስያ ዎደነ ህንተካ ኡንቱንቱ ቢታ ላቲደ ደእያ ዎደ፥ 30 ኡንቱንቱ ህንተ ስንꬃፐ ꬋይክችና ህንተ ኡንቱንታ ካላናዉ፥ ኡንቱንታ ጲርያን ኦይቀተናዳን ናገትተ፤ ‘ኑንካ ኡንቱንቱዳን ጎይናናዉ፥ ሀ ካዉተꬃቱ ባረንቱ ጾሳቶ ዎት ጎይኒኖ’ ያጊደ፥ ካል ኦቼናዳን ናገትተ። 31 ኡንቱንቱ ባረንቱ ጾሳቶ ጎይንያ ዎደ፥ መꬍና ጎዳይ እጽያ ቱናባ ኡባ ኦꬅያ ድራዉ፥ ህንተ መꬍና ጎዳዉ፥ ህንተ ጾሳዉ፥ ሄዋዳን ጎይናናዉ በሰና። አያዉ ጎፐ፥ ኡንቱንቱ ሀራይ አቶ ባረንቱ የሌዳ አቱማነ ማጫ ናናቱዋ ባረንቱ ጾሳቶ ያርሺደ፥ ታማን ጹጊኖ።

32 “ስም ህንተ ታ ህንተና አዛዜዳዋ ኡባ ኦꬅተ፤ አ ቦላ አያነ ጉጆፕተ፤ አፐ አያነ ፓጭሶፕተ። ዛረ. 4:2፤ ሳፃ 22:18-19