1 “ህንተ ግዶን ትምቢትያ ኦድያዌ ዎይ አኩሙዋ ብልያ አሳይ ደንዲደ፥ ማላታነ ማላልስያባ ኦꬆፐ፥ 2 እ ኦዴዳ ማላታይ ዎይ ማላልስያባይ ቱሙ ግዲደ ፖለትና፥ እ ህንተና፥ ‘አነ ካሰ ህንተ ኤረና ሀራ ጾሳቶ ጎይኖይተ’ ያጎፐ፥ 3 ህንተ አ ሙለካ ስሶፕተ። ህንተ አ ኩመንꬃ ዎዛናፐነ ኩመንꬃ ሸምፑዋፐ መꬍና ጎዳ ህንተ ጾሳ ዶስንቶነ ጊደ፥ ህንተና እ ፓጫናዉ ሄዋ ኦꬄ። 4 መꬍና ጎዳ ህንተ ጾሳ ካልተ፤ አዉ ያይተ፤ አ አዛዙዋ ናግተ፤ አ ቃላካ ስስተ፤ አዉ ጎይንተ፤ አፐ ዱጾፕተ። 5 ህንተና ግብጼፐ ከሲደ፥ አይለተꬃፐ ህንተና ዎዜዳ መꬍና ጎዳ ህንተ ጾሳ ቦላ ህንተ ማካላናዳን ታማርስያ ትምቢትያ ኦድያዋ፥ ዎይ አኩሙዋ ብልያዋ ዎꬍተ፤ ሄዋ ማላ አሳይ ህንተና መꬍና ጎዳ ህንተ ጾሳ አዛዙዋፐ ዎራ ባናዳን ኦꬅያ ድራዉ፥ ሄዋ ማላ ዎꬊደ፥ ኢታ ህንተ ግዶፐ ድግተ።

6 “ሀራይ አቶ ነ ዳይ ናአይ ነ እሻይ፥ ነ አቱማነ ማጫ ናእ፥ ነ ሲቅያ ነ ማቻታ፥ ዎይ ነ ሲቆ ላጊ ኔና፥ ‘ደንዳ፥ ካሰ ኔንነ ነ ማይዛ አዎቱ ጎይን ኤረና ጾሳዉ ጎይናና’ ጎፐ፥ 7 ቢታዉ ሀ ጋጻፐ ያ ጋጻ ጋካናዉ ደእያ፥ ነ ዩሹዋ ኡባን ማታንነ ሃኩዋን ደእያ አሳይ ኡባይ ጎይንያ ጾሳቶ፥ ‘ደንዳ ቢደ ኡንቱንቶ ጎይናና’ ጊደ ባለꬆፐ፥ 8 አዉ ኤኖ ጎፓ፤ እ ግያዋካ ስሶፓ። አዉ ቃረታደ አ ጉየ አሾፓ፤ 9 አ ዎꬋናዉ ኮሼ። አ ዎꬋናዉ ኮይሮ ነ ዶማ፤ ሄዋፐ ጉይያን፥ አሳይ ኡባይ ባረ ኩሽያ አ ቦላ ዎꬂደ ዎꬎ። 10 እ ሀይቃና ጋካናዉ፥ ሹቻን ጫድተ፤ አያዉ ጎፐ፥ እ ህንተና ግብጼ ጋድያፐ፥ አይለተꬃ ጎልያፐ ከሴዳ መꬍና ጎዳፐ፥ ህንተ ጾሳፐ፥ ህንተና ሻካናዉ ኮዬዳ። 11 እስራኤልያ አሳይ ኡባይ ሄዋ ስሲደ ያያና፤ ቃይ ሄዋ ማላ ኢታባካ ላኤንꬆ ህንተ ግዶን ኦንነ ኦና።

12 “መꬍና ጎዳይ ህንተ ጾሳይ ህንተ ደአናዳን እምያ ካታማፐ እቱዋን ህንተ ደእያ ዎደ፥ 13 ህንተ አሳ ግዶን ኢታቱ ደንዲደ፥ አሳ፥ ‘ደንድተ! ቢደ ህንተ ኤረና ጾሳቶ ጎይኔቶ’ ያጊደ ባለꬅያዋ ስሶፐ፥ 14 ሄ የዉዋባ ኦችተ፤ ምንሲደ ፓይድተ። ቆርና ሄ ህንተ ግዶን ቱናባይ ኦሰቴዳዌ ቱማ ግዶፐ፥ 15 ሄ ካታማን ደእያ አሳ ኡባ ማሻ ቃራን ዉርስተ፤ ሄ ካታማነ አን ደእያ መህያናካ አሸናን ꬋይስተ። 16 ሄ ካታማፐ ህንተ አኬዳ ኦሞዱዋ ኡባ ካታማ ዳባባ ሺሽተ። ሄ ካታማነ አ ኦሞዱዋ ኡባ መꬍና ጎዳዉ፥ ህንተ ጾሳዉ፥ ጹግያ ያርሹዋ ኦꬂደ ዉርስ ጹግተ። እ መꬍናዉካ ላኤንꬆ ኬጸተና፤ ላለቴዳ ሳ ግዲደ፥ ሄ ሳአይ አታና። 17 ቱና ጌተቴዳ ሚሻፐ አያይነ ህንተ ኩሽያን ቤቶፖ። ያቶፐ፥ መꬍና ጎዳይ ባረ ዎልቃማ ሀንቁዋፐ ስሚደ፥ ህንተና ማራና፤ እ ህንተንቶ ቃረታና። ካሰ ህንተ ማይዛ አዋቶ ጫቄዳ ጫቁዋዳን፥ ህንተ ፓይዱዋ ዳርሳና። 18 አያዉ ጎፐ፥ ታን ሀች ህንተና አዛዝያ አዛዞ ኡባ ህንተ ናግያዋን መꬍና ጎዳዉ፥ ህንተ ጾሳዉ አዛዘቶፐ፥ ቃይ መꬍና ጎዳ ህንተ ጾሳ ስንꬃንካ ልከ ግድያባ ኦꬆፐ፥ ሄ ጌዳዌ ህንተንቶ ቱሙ ፖለታና።