16
ፓስጋ ባላ
(ከሳ 12:1-20)
1 “አቢባ አግናን መꬍና ጎዳ ህንተ ጾሳ ፓስጋ ባላ ቦንችተ፤ አያዉ ጎፐ፥ መꬍና ጎዳይ ህንተ ጾሳይ ህንተና አቢባ አግናን ቃማ ግብጼፐ ከሴዳ። ዎጋ 23:5-8፤ ፓይ. 28:16-25 2 ህንተ ዶርሳ ዉድያፐነ መህያ ዉድያፐ መꬍና ጎዳይ ባረ ሱንꬃይ ጼሰታናዳን ዶርያ ሳኣን፥ መꬍና ጎዳዉ፥ ህንተ ጾሳዉ፥ ፓስጋዉ ያርሽተ። 3 ሄ ያርሹዋ ህንተ ምያ ዎደ፥ እርሹዋ የግ ኡኬዳ ኡክꬃና ሞፕተ፤ ሽን ላፑን ጋላሳ ኩመንꬃ እርሹዋ የግቤና ኡክꬃና ሚተ። ህንተ ግብጼፐ ኤለካ ከሴዳ ድራዉነ ህንተ ደእያ ላይꬃ ኡባን ህንተ ግብጼፐ ከሴዳ ጋላሳ ሀሳያናዳን፥ ሄ መቱዋ ኡክꬃ ሚተ። 4 ህንተ ጋድያን ኡባን ላፑን ጋላሳዉ አያ እርሹነ ቤቶፖ። ቃይ ህንተ ኮይሮ ጋላሳ ኦማርስ ያርሼዳ አሹዋፐ ዎንታዉ አያይነ አቶፖ።
5 “ህንተ ፓስጋ ያርሹዋ መꬍና ጎዳይ ህንተ ጾሳ ህንተንቶ እምያ አይ ካታማንነ ጮ ሹኮፕተ። 6 መꬍና ጎዳይ ህንተ ጾሳይ ባረ ሱንꬃይ ጼሰታናዳን ዶርያ ሳኣን ህንተ ፓስጋ ያርሹዋ ሹክተ፤ ቃይ አዋይ ዉልያ ዎደ ህንተ ግብጼፐ ከሴዳ ድራዉ፥ ሄ ሳትያን ሹክተ። 7 መꬍና ጎዳይ ህንተ ጾሳይ ዶርያ ሳኣን፥ ሄዋን ካꬂደ ሚተ፤ ያቲደ ሳአይ ዎንትያ ዎደ፥ ህንተ ዱንካንያ ዱንካንያ ቢተ። 8 ኡሱፑን ጋላሳ ኩመንꬃ እርሹዋ የግቤና ኡክꬃ ሚተ፤ ላፑንꬃ ጋላሳን መꬍና ጎዳዉ፥ ህንተ ጾሳዉ፥ ጎይናናዉ ጌሻ ሺቁዋ ሺቅተ፤ ሄ ጋላስ አያ ኦሶነ ኦꬆፕተ።
ቆይቻ ባላ
(ከሳ 34:22፤ ዎጋ 23:15-21)
9 “ህንተ ካꬃ ጫካናዉ ኮይሮ ዶሜዳ ዎድያፐ ዶሚደ፥ ላፑን ሳምንታ ኩመንꬃ ፓይድተ። ፓይ. 28:26-31 10 ያቲደ መꬍና ጎዳይ ህንተ ጾሳይ ህንተና አንጄዳዋ ኬና ህንተ ህንተ ዶሱዋን ጮ እምያ እሙዋ አሂደ፥ መꬍና ጎዳዉ፥ ህንተ ጾሳዉ፥ ቆይቻ ባላ ቦንችተ። 11 ሄዋን ህንተ፥ ህንተ አቱማ ናናይ፥ ህንተ ማጫ ናናይ፥ ህንተ አቱማ ቆማቱነ ህንተ ማጫ ቆማቱ፥ ህንተ ካታማቱዋን ደእያ ሌዋቱ፥ በተቱ፥ አዉ ባይና ናናቱነ ህንተ ግዶን ደእያ አምኤቱ ኡባይ መꬍና ጎዳይ ህንተ ጾሳይ ባረ ሱንꬃይ ጼሰታናዳን ዶርያ ሳኣን፥ ናሸትተ። 12 ህንተ ግብጼ ጋድያን አይልያ ግዴዳዋ ሀሳዪደ፥ ሀ ዎጋ ባለናን ናግተ።
ዳስያ ባላ
(ዎጋ 23:33-43)
13 “ህንተ ኡዱማፐ ህንተ ካꬃ፥ ቃይ ዎይንያ የꬍያሳፐካ ህንተ ዎይንያ ሺሼዳዋፐ ጉይያን፥ ላፑን ጋላሳ ዳስያ ባላ ቦንችተ። ፓይ. 29:12-38 14 ህንተ፥ ህንተ አቱማ ናናቱነ ማጫ ናናይ፥ ህንተ አቱማ ቆማቱነ ማጫ ቆማቱ፥ ህንተ ካታማቱዋን ደእያ ሌዋቱ፥ በተቱ፥ አዉ ባይና ናናቱነ አምኤቱ ኡባይ ሀ ባላን ሎይꬅ ናሸትተ። 15 መꬍና ጎዳይ ዶርያ ሳኣን ላፑን ጋላሳ መꬍና ጎዳዉ፥ ህንተ ጾሳዉ፥ ባላ ቦንችተ፤ አያዉ ጎፐ፥ ህንተ ኡባይካ እትፐ ናሸታና ማላ፥ ህንተ አይፍሴዳባን ኡባንነ ህንተ ኩሺ ኦꬅያባን ኡባን መꬍና ጎዳይ ህንተ ጾሳይ ህንተና አንጃና።
16 “ህንተ ጋድያን አቱማ አሳ ግዴዳ ኡባይ ላይꬃን ሄዙ ገደ፥ ማጋገ ኡክꬃ ባላ ዎደ፥ ሳምንታቱዋ ባላ ዎደነ ዳስያ ባላ ዎደ፥ መꬍና ጎዳ ህንተ ጾሳ ስንꬃን እ ዶርያ ሳኣን ቤቶ። ኡንቱንቱ መꬍና ጎዳ ስንꬃ ዪደ፥ መላ ኩሸ ዮፕኖ። 17 መꬍና ጎዳይ ህንተ ጾሳይ አንጄዳዋ ኬና ኡባይካ ባረ ዳንዳይያዋ ኬና እሞ።
ጽሎ ፕርዳ ፕርድያዋ
18 “ህንተ ዛራቱ ኡባዉ መꬍና ጎዳይ ህንተ ጾሳይ እምያ ካታማቱዋን ኡባን ህንተ ዳናቱዋነ ካፓቱዋ ሱንꬅተ፤ ኡንቱንቱካ አሳዉ ጽሎ ፕርዳ ፕርድኖ። 19 ጽሎ ፕርዳ ጌላዮፕተ፤ ሶምኡዋ ጼሊደ ማዶፕተ። ማጋንጻ አኮፕተ፤ አያዉ ጎፐ፥ ማጋንጻይ አꬌዳ ኤራንቻቱዋ አይፍያካ ቆቅሲደ፥ ጽሎቱዋ ቃላካ ጌላዬ። 23:6፤ ዎጋ 19:15 20 ህንተ ደኡዋን ደአና ማላነ መꬍና ጎዳይ ህንተ ጾሳይ ህንተንቶ እምያ ቢታ ህንተ ላታና ማላ፥ ጽሎ ፕርዳ ፕርድተ።
21 “ህንተ መꬍና ጎዳዉ፥ ህንተ ጾሳዉ፥ ኬጽያ ያርሽያ ሳኣ ማታን አሼሮ ግያ ጾሳትዉ ምꬃፐ መቴዳ ምስልያ ማላ አያነ ኤሶፕተ። ከሳ 34:13 22 ህንተ መꬍና ጎዳይ ህንተ ጾሳይ እጽያ ጎይንያ ሹቻ ህንተንቶ ኤሶፕተ። ዎጋ 26:1