15
አጩ ማረትያ ላይꬃ
(ዎጋ 25:1-7)
1 “ላፑንꬃ ላይꬃ ላይꬃ ዉርሰꬃን ህንተፐ ታልኤዳዋንቶ ኡንቱንቱ አጩዋ ማርተ። 2 ህንተ አጩዋ ማራና ዎጋይ ሀዋ: ባረ ላገ እስራኤልያዉ ታልኤዳ አይ አሳይነ ሄ አጩዋ ማሮ። መꬍና ጎዳ ማሮተꬃይ አዋየቴዳ ድራዉ፥ ታልኤዳዌ ባረ ላገ እስራኤላዉ ዎይ ባረ እሻዉ ታልኤዳባ ኦቾፖ። 3 ሀራ ቢታ አሳዉ ህንተ ታልኤዳ አጩዋ አካናዉ ዳንዳዪታ፤ ሽን ህንተ ህንተ ዛረቶ ታልኤዳባ ኡባ ማርተ።
4-5 “ህንተ መꬍና ጎዳ ህንተ ጾሳ ቃላዉ አዛዘቶፐ፥ ታን ሀች ህንተና አዛዝያ አዛዞ ኡባ ባለናን ኦꬆፐ፥ ህንተ ግዶን እት አሳይነ ህዬሰና። አያዉ ጎፐ፥ ህንተ ላታናዳን መꬍና ጎዳይ ህንተ ጾሳይ ህንተዉ አቆ ኦꬂደ እምያ ጋድያን መꬍና ጎዳይ ህንተና አንጃና። 6 መꬍና ጎዳይ ህንተ ጾሳይ ህንተንቶ ጌዳዋዳን፥ እ ህንተና አንጃና፤ ዳሮ ካዉተꬃይ ህንተፐ ታልአና፤ ሽን ህንተ እቱዋፐነ ታልእክታ። ቃይ ህንተ ካዉተꬃቱዋ ሞዳና፥ ሽን እቱነ ህንተና ሞደና።
7 “መꬍና ጎዳይ ህንተ ጾሳይ ህንተንቶ እምያ ጋድያን ደእያ ቄር ካታማቱዋፐ ሀቃዋንነ ደእያ ህንተ ላገ እስራኤላቱዋ ግዶን እት አሳይ ህዬሶፐ፥ አዉ መቀꬃ ኢቶፕተ፤ ቃይ ህንተ ኩሽያካ ሺሽ አኮፕተ። ዎጋ 25:35 8 ህንተ ኩሽያ አዉ ብርሽተ፤ አ ኮሽያዋ አያነ አዉ ታልእተ። 9 ‘አጩዋ ማርያ ላፑንꬃ ላይꬃይ ማቴዳ’ ጋደ፥ ህዬሳ እስራኤልያዉ ኢታ አይፍያን ጼላደ፥ አዉ አያነ ታልእያዋ ድጋናዉ ኢታ ቆፋይ ነ ዎዛናን ገለናዳን ናገታ። ሄዌ ꬋዮፐ፥ እ ኔፐ መꬍና ጎዳዉ ዋሳና፤ ሄዌ ነዉ ናጋራ ግዳናዋ። 10 ኔን አዉ ጮ እማ፤ ኔን አዉ እምያ ዎደ፥ ነ ዎዛናን አያዉ እማይታ ጎፓ፤ ያቶፐ፥ ህንተ ኦሶ ኡባን፥ ህንተ ኦይቄዳዋን የꬌዳባን ኡባን መꬍና ጎዳይ ህንተ ጾሳይ ህንተና አንጃና። 11 ሄ ጋድያን ኡባ ዎደካ ህዬስ ꬋየና ድራዉ፥ ታን ኔና እስራኤላቶ፥ ነ ጋድያን ደእያ ህዬሳቶነ መቶታንቻቶ ኬካ ግዳናዳን አዛዛይ። ማቶሳ 26:11፤ ማር. 14:7፤ ዮሃ. 12:8
አይለቱዋ ላአ ከስያ ማራ
(ከሳ 21:1-11)
12 “ኔን አቱማ ግድና ማጫ ግድና፥ ነ ዳቦ እስራኤልያ አሳ አይልያ ኦꬃደ ሻሞፐ፥ እ ነዉ ኡሱፑን ላይꬃ ኦꬆ፤ ላፑንꬃ ላይꬃን አይለተꬃፐ ከሳ የዳ። ዎጋ 25:39-46 13 ኔን አይለተꬃፐ አ ከሳ የድያ ዎደ፥ መላ ኩሸ የዶፓ። 14 ኔን ነ ዉድያፐ፥ ነ ኡዱማፐነ ነ ዎይንያ ጉምኢያሳፐ አዉ ኬካተꬃን እማ፤ መꬍና ጎዳይ ነ ጾሳይ ኔና አንጄዳዋ ኬና አዉ እማ። 15 ህንተካ ግብጼ ጋድያን ካሰ አይልያ ግዴዳዋነ መꬍና ጎዳይ ህንተ ጾሳይ ህንተና ያፐ ዎዜዳዋ ዶጎፕተ። ታን ህንተና ሀች አዛዝያዌ ሄዋሳ።
16 “ሽን ሄ አይልያ ኔናነ ነ ጎልያ አሳ ዶሴዳ ድራዉነ ኔናና አዉ ደኡ ሎኦ ግድያ ድራዉ፥ ‘ታን ነ ጎለፐ ከሳደ ቢከ’ ያጎፐ፥ 17 ፐንገ አ አፋደ፥ ጎꬃ አካደ፥ አ ሀይꬃ ሉካ። ያቶፐ እ ነዉ መꬍናዉካ አይልያ ግዳናዋ። ቃይ አይልያ ግድያ ማጫንዉካ ሄዋዳን ኦꬃ። 18 አ ኔን አይለተꬃፐ ከሳ የድያ ዎደ፥ ኔን ቆሄቴዳዋዳን ቆፖፓ፤ አያዉ ጎፐ፥ እ ሀ ኡሱፑን ላይꬃ ግዶን ከራዉ ኦꬅያባይ ኦꬅያዎ ዳኩዋ ዳሩዋ ነዉ ኦꬄዳ። ሄዋ ድራዉ፥ ኔን ኦꬅያባን ኡባን መꬍና ጎዳይ ነ ጾሳይ ኔና አንጃና።
ሚዛይነ ዶርሳይ የልያ ባይራ ማራቱዋ
19 “ኔን ነ መህያፐነ ነ ዶርሳ ዉድያፐ ባይራ የለቴዳ አቱማዋ ኡባ መꬍና ጎዳዉ፥ ነ ጾሳዉ፥ ዱማያ። ነ ዱማዬዳ መህያፐ ባይራ የለቴዳዋ አያነ ጎኤቶፓ፤ ነ ዶርሳ ዉድያፐ ባይራ የለቴዳዋ እክስያካ ሜዶፓ። ከሳ 13:12 20 ኔንነ ነ ሶ አሳይ ጾሳይ ዶርያ ሳኣን መꬍና ጎዳ ህንተ ጾሳ ስንꬃን ሄዋንታ ላይꬃን ላይꬃን ሚተ። 21 ሽን ነ ያርሽያ መህያ ቦላይ ትላና ꬋዮፐ፥ እ ስሌዳዋ ዎይ ቆቀ ግዶፐ፥ ዎይ ቃይ ሀራ ኢታ ፖኮባይ አ ቦላን ደኦፐ፥ ሄዋ መꬍና ጎዳዉ፥ ነ ጾሳዉ፥ ያርሾፓ። 22 ሄዋ ህንተ ደእያ ህንተ ካታማን ሚተ፤ ዎጋን ጌሻ አሳ ግድና፥ ዎይ ቱና አሳ ግድናካ ገንእያነ ጋራ አሹዋዳን ሞ። 23 ሽን ህንተ አ ሱꬃ ሃꬃዳን ሳኣን ጉስተፐ አትና፥ ሞፕተ። ዶመꬃ 9:4፤ ዎጋ 7:26-27፤ 17:10-14፤ 19:26፤ ዛረ. 12:16፣ 23