1 “ቄሰተꬃን ኦꬅያ ኩመንꬃ ሌዊያ ዛረቶ እስራኤልያ ግዶን ቢታ ላታይ ባዋ። ኡንቱንቱ አሳይ መꬍና ጎዳዉ ሺሽያ ታማን ጹግያ ያርሹዋፐ ሚደ ደእያዌ ኡንቱንቶ ላታ። 2 ኡንቱንቶ ኡንቱንቱ እሻንቱ ግዶን ላታይ ደኤና፤ መꬍና ጎዳይ ኡንቱንቶ ገፔዳዋዳንካ እ ኡንቱንቱ ላታ። ፓይ. 18:20

3 “ኮሩማ ዎይ ዶርሳ አሳይ ያርሾ ሺሼዳዋፐ ቄሳቶ በስያዌ ሀዋ: ምሳ፥ ላኡ ባጋ ጎጎንጩዋነ ኡሉዋ ግዶ አሹዋ ኡንቱንቶ እምኖ። 4 ህንተ ካꬃፐ፥ ዎይንያፐነ ዛይትያፐ ኮይሮ ጋኬዳ አይፍያነ ህንተ ዶርሳ እክስያፐ ባይራቱዋ ቄሳቶ እሚታ። 5 አያዉ ጎፐ፥ ኡንቱንቱነ ኡንቱንቱ ናናይ መꬍና ጎዳ ሱንꬃን ኤቂደ፥ መꬍናዉ ቄሴ ግዲደ ኦꬃና ማላ፥ ህንተ ዛርያ ኡባ ግዶፐ መꬍና ጎዳይ ህንተ ጾሳይ ኡንቱንታ ዶሬዳ።

6 “ሌዊያ ዛረ ግድያ እት አሳይ እስራኤልያ ጋድያን አይ ካታማፐነ ደንዲደ፥ መꬍና ጎዳይ ዶርያ ሳአዉ ዮፐ፥ 7 እ ብያሳን ደእያ ሌዋቱ መꬍና ጎዳ ስንꬃን ኤቂደ ኦꬅያዋዳን፥ እካ መꬍና ጎዳ ባረ ጾሳ ስንꬃን ኤቂደ ኦꬆ። 8 ቃይ ባረ አዉዋ አቁዋ ባይዝና፥ ባረና ጋክያዋ አኬዳዋ ግዶፐካ፥ ሌዋቱ ጎኤትያዋ ኡባ ኡንቱንቱና ልከ ሻኪደ አኮ።

9 “መꬍና ጎዳይ ህንተ ጾሳይ ህንተንቶ እሜዳ ቢታ ገልያ ዎደ፥ ሄ ጋድያን ደእያ አሳይ ኦꬅያ ቱና ኦሱዋ ኦꬆፕተ። 10 ባረ አቱማ ናኣ ዎይ ማጫ ናቶ ያርሾ ጊደ፥ ታማን ጹግያ አይ አሳይነ ህንተ ግዶን ቤቶፖ። ብትያዌ፥ ማራጭያ ጼልያዌ፥ ሙሩንያዌነ ካጫ ኦድያዌ ቃይ ህንተ ግዶን ደኦፖ። ዎጋ 19:26፤ ከሳ 22:18 11 አያንቲያዌ፥ አያናቱዋ ጼግያዌ፥ ሻሬችያዌነ ሀይቄዳ አሳ አያና ጼግያዌ ህንተ ግዶን ደኦፖ። ዎጋ 19:31 12 ሄዋ ማላባ ኦꬅያ አይ አሳይነ መꬍና ጎዳ ማታን እጸቴዳ አሳ። ኡንቱንቱ ሄዋ ማላ ቱና ኦꬅያ ድራዉ፥ መꬍና ጎዳይ ህንተ ጾሳይ ሄ ካዉተꬃ ህንተ ስንꬃፐ የደርሳና። 13 ሽን ህንተ መꬍና ጎዳ ህንተ ጾሳ ስንꬃን ኩመንꬃ ፖኮባይ ባይናዋንታ ግድተ። ማቶሳ 5:48

14 “ሀ ህንተ ላታናዉ ብያ ጋድያን ደእያ ካዉተꬃቱ ሙሩንያዋንቱነ ማራጭያ ጼልያዋንቱ ኦድያዋ ስስያዋንታ። ሽን ህንተ ሄዋ ኦናዳን መꬍና ጎዳይ ህንተ ጾሳይ ህንተና ተኤዳ። 15 መꬍና ጎዳይ ህንተ ጾሳይ፥ ህንተ ዛርያ ግዶፐ፥ ታ ማላ ትምቢትያ ኦድያዋ ህንተንቶ ደንꬃና። ህንተ እ ግያዋ ስስተ። ኪታ 3:22፤ 7:37 16 ህንተ ሲና ደርያ ቦላን ሺቄዳ ዎደ፥ መꬍና ጎዳ ህንተ ጾሳ ሀዋዳን ያጊደ ኦቼድታ፤ ‘ኑን ሀይቀናዳን፥ መꬍና ጎዳ ኑ ጾሳ ኮሻ ዛር ስሶኮ፤ ቃይ ሀ ዎልቃማ ታማካ ላኤንꬆ በኦኮ’ ያጌድታ።

17 “መꬍና ጎዳይ ታዉ ሀዋዳን ያጌዳ፤ ‘ኡንቱንቱ ጌዳዋ ኡባ ልከ ጌድኖ። 18 ታን ኡንቱንቱ ዛራቱ ግዶፐ፥ ነ ማላ ትምቢትያ ኦድያዋ ኡንቱንቶ ደንꬃና፤ ታ ቃላ አ ዶናን ዎꬃና፤ እካ ታን አ አዛዝያ ኡባ ኡንቱንቶ ኦዳና። 19 እ ታ ሱንꬃን ኦድያ ታ ቃላ ስሰና ኦስነ ሀሉዋ ታን ከሳና። ኪታ 3:23 20 ሽን ታ አዛዛቤናዋ ጻሊደ ታ ሱንꬃን ኦድያዌ ዎይ ሀራ ጾሳቱዋ ሱንꬃን ኦድያ ሄ ትምቢትያ ኦድያዌ ሀይቆ’ ያጌዳ።

21 “ህንተ፥ ‘ትምቢትያ ኦድያዌ ኦድያ ቃላይ መꬍና ጎዳፐ ግደናዋ አያን ሻክ ኤራኔ?’ ያጎፐ፥ 22 ሄ ትምቢትያ ኦድያዌ መꬍና ጎዳ ሱንꬃን፥ እ ኦዴዳ ቃላይ ፖለተናን እጾፐ፥ ሄዌ መꬍና ጎዳይ ኦድቤና ቃላ ግድያዋ ኤሪታ። ሄ ትምቢትያ ኦድያዌ ዎርዱዋን ኦዴዳ ድራዉ፥ አዉ ያዮፕተ።