1 “መꬍና ጎዳይ ህንተ ጾሳይ ህንተና ላትስያ ቢታ ገሊደ ኡትያ ዎደ፥ 2 መꬍና ጎዳይ ህንተ ጾሳይ ህንተንቶ እምያ ጋድያን ሞኬዳ ካꬃ ኡባፐ ባይራትያዋ ቁንኣና መꬍና ጎዳይ ህንተ ጾሳይ ባረ ሱንꬃይ ሄዋን ጼሰታናዳን ዶሬዳ ሳአዉ አኪደ ቢተ። ከሳ 23:19 3 ያቲደ ሄ ዎድያን አዎትያ ቄስያኮ ቢደ፥ ሀዋዳን ያግተ፤ ‘መꬍና ጎዳይ ኑ እማና ጊደ ካሰ ኑ ማይዛ አዋቶ ጫቄዳ ሳኣ ታና ገልሴዳ መꬍና ጎዳዉ፥ ኑ ጾሳዉ፥ ሀች ታን ማርካታይ’ ያጎ።

4 “ያቶፐ ቄሲ ካꬃይ ኩሜዳ ቁንኣ ነ ኩሽያፐ አኪደ፥ መꬍና ጎዳዉ፥ ነ ጾሳዉ ያርሽያ ሳኣ ስንꬃን ዎꬆ። 5 ሄዋፐ ጉይያን፥ መꬍና ጎዳ ነ ጾሳ ስንꬃን ሀዋዳን ያጋደ ሃሳያ፤ ‘ታ ማይዛ አዉ ደኢያሳ ꬋዪደ መቶቴዳ ሶርያ ቢታ አሳ፤ እ መቶቲደ፥ ፓይዱዋን ጉꬃ አሳቱዋና ግብጼ ዎꬊደ ያን ደኤዳ። ሄዋን ደኢደ እ ዎልቃማ ዎልቃማነ ፓይዱዋን ጮራ ጋደ ከሴዳ። 6 ሄዋ በኢደ፥ ግብጼቱ ኑዉ መቀꬃ ኢቴድኖ፤ ኑና ኡንኤꬄድኖ። ኑ ኦꬃናዳን ዴጾ ኦሱዋ ኑ ቦላ ጫኔድኖ። 7 ያትና፥ ኑን መꬍና ጎዳዉ፥ ኑ አዎቱዋ ጾሳዉ፥ ዋሴዶ። መꬍና ጎዳይ ኑ ዋሱዋ ስሴዳ፤ ኑ ኡንኡዋ፥ ኑ ዳቡራነ ኑ ኡቁና በኤዳ። 8 መꬍና ጎዳይ ባረ ዎልቃማ ኩሽያንነ ባረ ምጨቴዳ ቀስያን፥ ዎልቃማ ዳጋማን፥ ማላታንነ ማላልስያ ኦራꬃባ ኦꬅያዋን፥ ኑና ግብጼፐ ከሴዳ። 9 ሀ ሳኣ ኑና አሂደ፥ ማꬃነ ኤሳ ጎግያ ሀ ቢታ ኑዉ እሜዳ። 10 ሄኮ ታን መꬍና ጎዳይ እሜዳ ቢታ አይፍያፐ ኮይሩዋ አሃድ’ ያጋደ፥ ቁንኣ መꬍና ጎዳ ነ ጾሳ ስንꬃን ዎꬃደ፥ አ ስንꬃን ጎይና። 11 ነዉነ ነ ሶ አሳዉ መꬍና ጎዳይ ነ ጾሳይ እሜዳዋን ናሸቲደ፥ ጋላትተ፤ ሌዋቱነ ህንተ ግዶን ደእያ በተቱ ኡባይካ ህንተናና ናሸትኖ።

12 “አስራታ ከስያ ሄዛንꬃ ላይꬃን ላይꬃን ሞኬዳዋ ኡባፐ አስራታ ከሳደ ፖልያ ዎደ፥ ነ ካታማን ደእያ ሌዋቶ፥ በተቶ፥ አታ አዉ ባይናዋንቶነ አምኤቶ እማ፤ ያቶፐ ኡንቱንቱ ህንተ ካታማን ባረዉ ኮሽያ ካꬃ ማናነ ካላና። ዛረ. 14:28-29 13 ሄዋፐ ጉይያን መꬍና ጎዳዉ፥ ነ ጾሳዉ፥ ሀዋዳን ያጋ፤ ‘ታን ታ ጎለፐ ጾሳዉ ዱማቴዳ ካꬃ ከሳደ፥ ኔን ታና አዛዜዳ ነ አዛዙዋዳን ሌዋቶ፥ በተቶ፥ አታ አዉ ባይና ናናቶነ አምኤቶ እማድ። ታን ነ አዛዙዋፐ እቱዋነ መንꬃበይከ፤ ቃይ እቱዋነ ዶጋ አጋበይከ። 14 ታ ካዩዋ ዎደካ፥ ሄ አስራታፐ አይነ ማበይከ፤ ታን ዎጋን ጌሻ ግደና ዎደካ፥ አፐ ካረ ከሴዳዌካ ባዋ፤ ሀይቄዳ አሳዉካ አጫ ሄዋፐ ዎꬃበይከ። ታን መꬍና ጎዳዉ፥ ታ ጾሳዉ፥ አዛዘታድ፤ ቃይ ኔን ታና አዛዜዳዋ ኡባ ፖላድ። 15 ኔን ደእያ ጌሻ ሳኣፐ፥ ሳሉዋፐ ሃ ዱገ ጼላ፤ ነ ደርያ እስራኤላነ ካሰ ኑ ማይዛ አዋቶ ነ እማና ጋደ ጫቄዳዋዳን ኑዉ እሜዳ ሀ ማꬃይነ ኤሳይ ጎግያ ቢታ አንጃ’ ያጋ።

16 “ኔን ሀ አዋዮቱዋነ ዎጋቱዋ ናጋናዳን፥ መꬍና ጎዳይ ነ ጾሳይ ኔና ሀች አዛዜዳ፤ ሄዋ ድራዉ፥ ኔን ኡንቱንታ ነ ኩመንꬃ ዎዛናፐነ ኩመንꬃ ሸምፑዋፐ ናጋ። 17 መꬍና ጎዳይ ነዉ ጾሳ ግዴዳዋ፥ ነ አ ኦግያን ሀመትያዋ፥ አ ዎጋ፥ አ አዛዙዋነ አ ህግያ ኔን ፖልያዋ ሀች ኤርሳዳ። 18 ቃይ መꬍና ጎዳይካ ባረ ገሌዳ ቃላዳን ኔን አ አሳ ግድያዋ፥ አዉ ቡዞ ሚሻ ግድያዋነ ኔን አ አዛዞ ኡባ ናጋናዋ ኤርሴዳ። ከሳ 19:5፤ ዛረ. 4:20፤ 7:6፤ 14:2፤ ቲቶ 2:14፤ 1 ጰጽ. 2:9 19 ሄዋ ኔን ኦꬆፐ፥ እ መꬌዳ አሳ ኡባፐ ኔና ጋላታን፥ ሱንꬃንነ ቦንቹዋን ዎልቃማ ጋደ ኦꬃና መꬍና ጎዳይ ገሌዳ ቃላዳን ኔንካ አዉ ጌሻ ጋደ ግዳናዋ ሀች ኤርሴዳ” ያጌዳ።