1 “ላኡ አሳቱ ዋላቀቲደ ፕርዳ ጎልያ ዮፐ፥ ዳናቱ ጌሻ ነ ልከ ጊደ፥ ናቄዳዋ ነ ባይዛንቻ ጊደ ፕርድኖ። 2 ባይዛንቻይ ዋꬉ በስያዋ ግዶፐ፥ ትራን ግስሲደ ዞክያ ሾጫናዉ ዳናይ አዛዞ፤ ያቶፐ ባይዛንቻይ ዳና ስንꬃን ባረ ባይዙዋ ኬና ሾጨቶ። 3 እ ኦይታሙዋ ጋካናዉ ሾጨቶፐ አትና፥ ሄዋፐ ዳሩዋ ሾጨቶፖ። ሄዋፐ ዳሩዋ አ ሾጮፐ፥ ነ እሻይ ነ ስንꬃን ካዉሻና። 2 ቆሮ. 11:24

4 “ኡዱማን ካꬃ የꬍያ ቦራ ዶና ቃቾፓ። 1 ቆሮ. 9:9፤ 1 ጽሞ. 5:18

5 “እትፐ ደእያ እሻቱዋፐ እቱ ናኣ የለናን ሀይቆፐ፥ አ ማቻታ ሀራ ባደ ገሉፑ፤ እዝ አስና እሻይ እዞ አኮ፤ እዝዉ ኮሽያዋ ፖሎ። ማቶሳ 22:24፤ ማር. 12:19፤ ሉቃሳ 20:28 6 ያቶፐ ሀ ሀይቄዳዋ ሱንꬃይ እስራኤልያፐ ፕተት ꬋየናዳን፥ አ ኮይሮ የልያ አቱማ ናአይ ሀ ሀይቄዳዋ ሱንꬃን ጼገቶ።

7 “ግዶ ሽን፥ እ ባረ እሻ ማቻቶ አካናዉ ኮያና ꬋዮፐ፥ እዛ ካታማ ፐንግያን ኡቴዳ ጭማቱዋኮ ባደ፥ ‘ታ አስና እሻይ ባረ እሻ ሱንꬃይ እስራኤልያን ደአናዉ ኮይቤና፤ ታና አኪደ፥ ታዉ ኮሽያዋ ኩንናን እጼዳ’ ያጋደ ማጋኑ። ኡሩቶ 4:7-8 8 ካታማ ጭማቱ አ ጼጊደ ኦችኖ፤ ሀእካ፥ ‘ታን እዞ አክከ’ ጊደ እጾፐ፥ 9 ሄ ሀይቄዳዋ ማቻቶ ጭማቱዋ ስንꬃን አኮ ሺቃደ፥ አ ገድያ ጫማፐ እቱዋ ከሳደ፥ አ ሶምኡዋን ጩቻ ጩቻደ ሀዋዳን ያጉ፤ ‘ባረ እሻዉ ዘረꬃይ ደአናዉ ኮየና አሳ ቦላ፥ ሀዋ ማላ ካዉሻይ ጋካናዉ በሴ’ ያጉ። 10 አ ዛሪ እስራኤልያን፥ ‘ጫማ ከሴዳዋንቱ ሶያ’ ጌተት ጼገቲደ ደአና።

11 “ላኡ አሳቱ ዋትሽን፥ እቱዋ ማቻታ ያደ፥ ባረ አስና ሾጭያዋ ኩሽያፐ አሻናዉ፥ ባረ ኩሽያ የዳደ ህንኩዋ አቱማተꬃ ኦይቆፐ፥ 12 እዝዉ አይነ ቃረተናን እ ኩሽያ ቃንጽተ።

13 “ነ ኬሻ ግዶን ዴጾነ ካዉሻ ግዴዳ ላኡ ሚዛናቱ ደኦፕኖ። ዎጋ 19:35-36 14 ነ ሶን ዳርሲደነ ጉꬂደ ልክያ ላኡ ማክያባይ ደኦፖ። 15 መꬍና ጎዳይ ነ ጾሳይ ነዉ እምያ ጋድያን አዱሳ ላይꬃ ነ ደአናዳን ኩመንꬃነ ልከ ሚዛናይነ ማክያባይ ነዉ ደኦ። 16 አያዉ ጎፐ፥ መꬍና ጎዳይ ነ ጾሳይ ሄዋ ማላባ ኦꬂደ፥ ባለꬅያ አሳ ኡባ ሻቴ።

17 “ህንተ ግብጼፐ ከሲደ ቢደ ደእሽን፥ አማሌቃቱ ህንተ ቦላ ኦꬄዳዋ ሀሳይተ። ከሳ 17:8-14፤ 1 ሳሜላ 15:2-9 18 ኡንቱንቱ ጾሳዉ ያየና አሳ፤ ህንተ ኦግያን ህንተናና ኤቀቴድኖ። ህንተ ሄመትሽን፥ ዳቡሪደ ጉየ አቴዳ አሳ ኡባ ዎꬌድኖ። 19 ሄዋ ድራዉ፥ መꬍና ጎዳይ ህንተ ጾሳይ ህንተና ሄ ቢታ ላትሲደ፥ ህንተ ዩሹዋን ደእያ ሞርከቱዋ ኡባፐ ህንተና ሸምፕስያ ዎደ፥ ሀ ጋድያን ኡንቱንታ ሀሳይያ አሳይ ꬋያና ጋካናዉ፥ አማሌቃቱዋ ኡባ ሳሉዋ ጉፋንꬃፐ ꬋይስተ፤ ሄዋ ኦꬃናዋ ሙለካ ዶጎፕተ።