1 “እት አሳይ ማቼ አክ ስሚደ፥ እት ኢታባ እ ቦላ ደሚደ እዞ እጾፐ፥ እዝዉ ፓራማ ጻፍ እሚደ፥ ባረ ጎለፐ ከሲደ የዶፐ፥ ማቶሳ 5:31፤ 19:7፤ ማር. 10:4 2 እዛ አ ጎለፐ ከሳደ፥ ሀራ አስና ገሎፐ፥ 3 ሄ ላኤንꬆ አስናይካ እዞ ዶሰናን እጺደ፥ ፓራማ እዝዉ ጻፍ እሚደ፥ ባረ ጎለፐ እዞ ከሲደ የዶፐ፥ ዎይ እዞ አኬዳ ሄ ላኤንꬆ አስናይ ሀይቆፐ፥ 4 አ ቱኔዳ ድራዉ፥ ኮይሮ ፓራሜዳ አስናይ ላኤንꬆ እዞ ዛሪደ አኮፖ። ሄዌ መꬍና ጎዳ ማታን እጸቴዳዋ፤ ቃይ ህንተካ መꬍና ጎዳይ ህንተ ጾሳይ ህንተንቶ እምያ ጋድያን ሀዋ ማላ ናጋራ ኦꬆፕተ።

5 “ኦራꬃ ማቼ አኬዳ አሳይ ኦላዉ ቦፖ፤ ሀራ ዴጾ ኦሱዋካ አዉ እሞፕተ። እት ላይꬃይ አꬋና ጋካናዉ፥ ሀቃነ ቤናን ባረ አኬዳ ማቻቶ ናሸቾ።

6 “አይ አሳይነ አጮ ዎጻ ዎይ ማይድያ ኦይቆፓ፤ አያዉ ጎፐ፥ ሄዌ ጎልያ አሳይ ጋጭያባ ꬋዪደ፥ ሀይቂኖ ግያዋ።

7 “ባረ እሻ ግድያ እስራኤልያ አሳ ዉእ አፊደ፥ አይልያ ከስያ አሳይ ዎይ ሀራዉ ዛልእያ አይ አሳይነ ሀይቆ። ሄዋዳን ኦꬅያዋን ህንተ ግዶፐ ኢታ ድጊታ። ከሳ 21:16

8 “ዎልቃማ ጋልባ ሀርግያን ሳከትያ አሳዉ ሌዊያ ዛረ ግድያ ቄሳቱ ህንተና ታማርሴዳዋዳን ኡባባ ፖልተ፤ ታ ኡንቱንታ አዛዜዳዋ ሄዋዳን ኦꬃናዉ ናገትተ። ዎጋ 13:1—14:54 9 ህንተ ግብጼፐ ከሲደ ኦግያን ደእሽን፥ መꬍና ጎዳይ ህንተ ጾሳይ ሚርያም ቦላ ኦꬄዳዋ ሀሳይተ። ፓይ. 12:10

10 “ኔን ነ ሾሮ እትባ ታልኣደ፥ እ ኦይꬅያዋ ኦቻናዉ አ ጎለ ገሎፓ። ከሳ 22:26-27 11 ኔን ካረን ኤቃ ደእሽን፥ ነ ታልኤዳ ብታኒ ኦይꬅያዋ ባረ ጎለፐ ከሲደ ነዉ እሞ። 12 እ ህዬሳ ግዶፐ፥ ነ አጮ ኦይቄዳ አ ማዩዋ ነ ሶን አይሶፓ። 13 እ ማዪደ አቃናዳን፥ ኦማርስ ዎደ አዉ ጉየ ዛራ፤ እ ሄዋን ኔና ጋላታና። ሄዌ መꬍና ጎዳ ነ ጾሳ ማታንካ ነዉ ጌሻተꬃ ግዳናዋ።

14 “ነ እሻ ግድያ እስራኤልያ አሳ ግድና፥ ዎይ ነ ቢታ ካታማፐ እቱዋን ደእያ ካረ ቢታ አሳ ህዬሳ ቃጻራደ ናቆፓ። ዎጋ 19:13 15 እ ሀች ኦꬄዳዋ ሀች አካናዉ ምንሲደ ኮይያ ድራዉ፥ አዋይ ዉለናን ሀች ጭጋ። ሄዌ ꬋዮፐ፥ መቶታንቻይ ኔፐ መꬍና ጎዳዉ ዋስና፥ ነዉ ናጋራ ግዳናዋ።

16 “ናናይ ኦꬄዳ ናጋራ ድራዉ፥ አዎቱዋ ዎꬋናዉ በሰና፤ ቃይ አዎቱ ኦꬄዳ ናጋራ ድራዉካ፥ ናናቱዋ ዎꬋናዉ በሰና። አሳይ ኡባይ ባረ ኦꬄዳ ናጋራን ናጋራን ሀይቃናዉ በሰ። 2 ካታ. 14:6፤ 2 ኦዱዋ 25:4፤ ህዝ. 18:20

17 “ካረ ቢታ አሳቱ ፕርዳነ አዉ አታ ባይናዋንቱ ፕርዳ ደሽሶፓ፤ አምአት ማዩዋ አ ታልኤዳዎ ጋደ ኦይቆፓ። ከሳ 23:9፤ ዎጋ 19:33-34፤ ዛረ. 27:19 18 ህንተካ ግብጼ ጋድያን አይልያ ግዴዳዋነ መꬍና ጎዳይ ህንተ ጾሳይ ህንተና ያፐ ዎዚደ ከሴዳዋ ሀሳይተ። ታን ሀዋ ህንተና አዛዝያዌ ሄዋ ድራሳ።

19 “ነ ሾይቃፐ ካꬃ ጫክያ ዎደ፥ ነ ዶጌዳ ምርቂያ ቆራናዉ ጉየ ቦፓ። መꬍና ጎዳይ ነ ጾሳይ ነ ኩሽያ ኦሶ ኡባን ኔና አንጃና ማላ፥ ሄዋ በትያዉ፥ አታ አዉ ባይና ናናቶነ አምኤቶ አጋ። ዎጋ 19:9-10፤ 23:22 20 ነ ዎጋራ አይፍያ ማጽያ ዎደ፥ እቱነ አተናን ዉርሳደ ማጻናዉ ላኤንꬁዋ ጉየ ስሞፓ፤ አቴዳዋ በትያዉ፥ አታ አዉ ባይና ናናቶነ አምኤቶ አጋ። 21 ነ ዎይንያ አይፍያ ማጽያ ዎደ፥ አቴዳዋ ቃርማናዉ ላኤንꬁዋ ጉየ ቦፓ፤ ሄዋ በትያዉ፥ አታ አዉ ባይና ናናቶነ አምኤቶ አጋ። 22 ህንተካ ግብጼ ጋድያን አይልያ ግዲደ ደኤዳዋ ዶጎፕተ። ታን ሀዋ ህንተና አዛዝያዌ ሄዋ ድራሳ።