1 “ሳንግሰቴዳ ዎይ ቃራተቴዳ አቱማ አሳይ፥ መꬍና ጎዳ ሺቁዋ ግዶን ቤቶፖ።

2 “ሻርሙጻን የለቴዳ አሳይ መꬍና ጎዳ አሳ ማባራ ገሎፖ፤ ሀራይ አቶ ቢደ ታማንꬃ የለታ ጋካናዉካ፥ አ ዛርያፐ ኦንነ መꬍና ጎዳ አሳ ማባራ ግዶ ገሎፖ።

3 “አሞና አሳ ግድና፥ ዎይ ሞኣባ አሳ ግድናካ፥ መꬍና ጎዳ አሳ ማባራ ገሎፖ፤ ሀራይ አቶ ቢደ ታማንꬃ የለታ ጋካናዉካ፥ ኡንቱንቱ አሳ ግዴዳ ኦንነ መꬍናዉካ መꬍና ጎዳ አሳ ማባራ ገሎፖ። ናህ. 13:1-2 4 አያዉ ጎፐ፥ ህንተ ግብጼፐ ከሲደ ሄመትሽን፥ ኡንቱንቱ ህንተና ካꬃናነ ሃꬃና ሞክበይክኖ። ሄዋዳንካ፥ ማስጰጾምያን ፓቶራ ግያ ካታማን ደእያ ብኦራ ናኣ ባላም ህንተና ሸቃና ማላ ቃጻሬድኖ። ፓይ. 22:1-6 5 መꬍና ጎዳይ፥ ህንተ ጾሳይ፥ ባላም ግያዋ ስሳናዉ ኮይቤና፤ አ ሸቃ ህንተንቶ አንጆ ላሜዳ። አያዉ ጎፐ፥ መꬍና ጎዳይ ህንተ ጾሳይ ህንተና ሲቄ። ፓይ. 23:7—24:9 6 ህንተ ደኦ ላይꬃ ኡባን መꬍናዉካ ኡንቱንቱ ሳሮ ደአናዳንነ ኡንቱንቱ ዱረታናዳን አሞቶፕተ።

7 “ህንተዉ ኡንቱንቱ ዳቦ ግድያ ድራዉ፥ ኤዶማቱዋ ካꬊደ እጾፕተ፤ ቃይ ግብጼቱዋካ እጾፕተ። አያዉ ጎፐ፥ ህንተ ኡንቱንቱ ጋድያን በተ ግዲደ ደኤድታ። 8 ኡንቱንቶ ሄዘንꬆ የለታ ናናይ መꬍና ጎዳ አሳ ማባራ ገላናዉ ዳንዳዪኖ።

9 “ህንተ ህንተ ሞርክያ ኦላናዉ ከሲደ እትሳን ካምቡዋ መꬎ ዎደ፥ ህንተና ቱንስያዋፐ ኡባፐ ሻከትተ። 10 ቃማ አኩሙዋን ማጫ አሳና ጋከቴዳዋ ኤርስያ እርጻባይ አን ደእያ አይ አሳይነ ደኦፐ፥ ዱንካኔዳ ሳኣፐ ጋጻ ከሲደ ያን ጋምኦ። 11 ሳአይ ኦማርስያ ዎደ፥ ባረ ቦላ ሜጨቲደ፥ ለለምእያ ዎደ ዱንካኔዳሳ ስሞ።

12 “ህንተ ሼሻዉ ኡትያሳ ዱንካኔዳ ሳኣፐ ካረና ጊግስተ። 13 ሼሻዉ ኡትያሳ ቦካናዉ ዞሩዋ ህንተ ኦላ ሚሻና ጋꬅ ኦይቂተ፤ ሼሻዉ ኡት ስሚደ፥ ኦላን ቢታ ዛርተ። 14 አያዉ ጎፐ፥ መꬍና ጎዳይ ህንተ ጾሳይ ህንተና ናጋናዉነ ህንተ ሞርከቱዋ ህንተ ኩሽያን አꬅ እማናዉ፥ ህንተ ሄራን ያነ ሃነ ሀመቴ። ሄዋን እ ሸነይያባ አያነ በኢደ፥ ህንተፐ ዎራ ስመናዳን፥ ህንተ ሄራን ጌሻ ግዳናዉ ኮሼ።

15 “ባረ ጎዳፐ ባቃቲደ፥ ኔኮ ዬዳ አይልያ ዛራደ አ ጎዳዉ እሞፓ። 16 እ ህንተ ካታማቱዋፐ ባረ ኮዬዳዋን ደኦ፤ አ ኡቁኖፕተ።

17 “እስራኤልያ አሳፐ ኦንነ አቱማ ግድና፥ ማጫ ግድናካ፥ አላጋ ጾሳዉ ጎይንያዋንቱ ኦꬅያዋዳን፥ ሻርሙጽያዋ ግዶፖ። ዎጋ 19:29 18 ሄዋዳንካ፥ አቱማዋ ግድና፥ ማጫውኖ ግድና፥ ሻርሙጻን ደሜዳ ሚሻ ሺቁዋ ጋꬃናዉ መꬍና ጎዳ ህንተ ጾሳ ጎልያ አሆፕኖ። አያዉ ጎፐ፥ ኡንቱንቱ ላኡዋካ መꬍና ጎዳይ ህንተ ጾሳይ ሻቴ።

19 “ነ ዛረ ግድያ እስራኤልያ አሳዉ ሚሻ፥ ካꬃ ግድና ሀራባ ታልአደ ድቻ አኮፓ። ከሳ 22:25፤ ዎጋ 25:36-37፤ ዛረ. 15:7-11 20 ሀራ ቢታ አሳፐ ድቻ ኦቻናዉ ዳንዳያሳ፤ ሽን ኔን ላታናዉ ገልያ ጋድያን ኔን ኦꬅያባን ኡባን መꬍና ጎዳይ ነ ጾሳይ ኔና አንጃና ማላ፥ ነ ዛረ ግድያ እስራኤልያ አሳዉ ድቻዉ ታልኦፓ።

21 “መꬍና ጎዳዉ፥ ነ ጾሳዉ፥ እማናዉ ገፔዳዋ እማናዉ ጋምኦፓ። መꬍና ጎዳይ ነ ጾሳይ ኔን ገፔዳዋ ኩመንꬃን ኔፐ ኮይያ ድራዉ፥ ፖላና ꬋዮፐ፥ ነዉ ናጋራ ግዳና። ፓይ. 30:1-16፤ ማቶሳ 5:33 22 ሽን ኔን ገፓና ꬋዮፐ፥ ሄዋን ነዉ ናጋራይ ባዋ። 23 መꬍና ጎዳዉ፥ ነ ጾሳዉ፥ እማና ጋደ ኔን ዶናን ሃሳዬዳዋ ነ ዶሱዋን እማና ጌዳ ድራዉ፥ ነ እንጻርሳን ሃሳዬዳዋ ፖላ።

24 “ነ ሾሩዋ ዎይንያ ግዱዋና አꬍያ ዎደ፥ ዎይንያፐ ነ ኮዬዳ ኬና ማፐ አትና፥ አፐ አያነ ነ ኦይቄዳ ሚሻን የጎፓ። 25 ነ ሾሩዋ ሾይቃና ካንꬅያ ዎደ፥ ሄ ሾይቃን ደእያ ትሻፐ ዱꬃደ ማፐ አትና፥ ነ ሾሩዋ ካꬃ ባጫን ጫካደ ጎለ አፎፓ።