1 “እስራኤልያ አሳ ቦራይ ዎይ ዶርሳይ ባዪደ ዎራ ቢሺና በኦፐ፥ ሸነኮ ጋደ አጋ አጎፓ፤ አ ጎዳዉ ላጋ አሃደ እማ። ከሳ 23:4-5 2 ሄ መህያ ጎዳይ ነ ሄራ ግዳና ꬋዮፐ፥ ዎይ አ ጎዳይ ኦነንቶ ኔን ኤራና ꬋዮፐ፥ አ ጎዳይ ኮዪደ ያና ጋካናዉ፥ ነ ጎለ አካደ አፋ፤ እ ዪደ፥ ደምያ ዎደ፥ አዉ እማ። 3 ሄዋዳን ሀርያ ግድና፥ ማዩዋ ዎይ አያነ ባዬዳዋ ደሞፐ፥ አ ጎዳዉ ዛራፐ አትና፥ ሸነኮ ጎፓ።

4 “እስራኤልያ አሳ ሀሪ ዎይ ቦራይ ኦግያን ኩንዴዳዋ በኦፐ፥ ማዳደ ደንꬃፐ አትና፥ ሸነኮ ጋደ አጋ አጎፓ።

5 “ማጫ አሳይ አቱማ አሳ ማዩዋ ማዮፕኖ፤ አቱማ አሳይካ ማጫ አሳ ማዩዋ ማዮፕኖ። አያዉ ጎፐ፥ ሄዋ ማላባ ኦꬅያ ኦናነ መꬍና ጎዳይ ህንተ ጾሳይ ሻቴ።

6 “ኦግያን ነ ቢሺና፥ ምꬃን ግድና፥ ሳኣን ባረ ማራ ዎይ ቁቁልያ ሀጳ ኡቴዳ ካፋቶ ደሞፐ፥ እዞ እ ማራና ጋꬃ ኦይቃደ ነ ጎለ አፎፓ። 7 ማራቱዋ አካ አፋናዉ ዳንዳያሳ፤ ሽን ዳዮ ባናዳን የዳ አጋ። ሄዋዳን ኦꬆፐ፥ ኔን ዱረታደ አዱሳ ላይꬃ ደአና።

8 “ኦራꬃ ጎልያ ኬጽያ ዎደ፥ ꬎቃ ካራፐ አሳይ ኩንድ ሀይቂና ነ ኦሸተናዳን፥ ዘምፒደ አትያዋ ጊግሳ።

9 “ነ ዎይንያ ሾይቃን ላኡ ቆሞ ካꬃ ዘሮፓ፤ ሄዋዳን ኦꬆፐ፥ ነ ዘሬዳ ካꬃይነ ዎይኒ ላኡካ ባያና። ዎጋ 19:19

10 “ቦራነ ሀርያ እትፐ ዋጻደ ጎሾፓ።

11 “ሱፍያፐነ ሊኑዋፐ ዋላካን ዳደቴዳ ማዩዋ ማዮፓ።

12 “ነ ማዬዳ ማዮ ኦይዱ ባጋናካ ማጫራይ ደኦ። ፓይ. 15:37-41

13 “እት አሳይ ማቻቶ አኪደ፥ እዝና አቅ ስሚደ፥ እዞ ዶሳና ꬋዮፐ፥ 14 ‘ሀኖ ታ አካደ እዝና አቅያ ዎደ፥ ህጊ እዝዉ ባዋ’ ያጊደ እዞ ባይዚደ ሃሳዮፐ፥ 15 ሄ ናት አዉነ ዳያ እ ህግያ ማላታ አክ አፊደ፥ ካታማ ፐንግያን ደእያ ጭማቱዋ በስኖ። 16 ናት አዉ ጭማቶ ሀዋዳን ያጊደ ኦዶ፥ ‘ታን ታ ናቶ ሀዎ ማቼ ኦꬃደ እማድ፤ ሽን እ እዞ እጼዳ። 17 እ፥ “ነ ናትን ህጊ ባዋ” ያጊደ እዞ ባይዚደ ሃሳየ፤ ሽን ታ ናት ህግያ ማላታ ሀዋ በእተ’ ያጊደ፥ እዝ ህግያ ኤርስያ ጫርቂያ በሶ። 18 ያትና ሄ ካታማ ጭማቱ አ ሙርኖ። 19 እ እስራኤልያ ዎዶራት ሱንꬃ ባይዜዳ ድራዉ፥ ጭማቱ አ ጼቱ ጻጋራ ብራ ሙሪደ፥ ሄዋ ናት አዎ እምኖ። ናታካ አዉ ማቼ ግዳደ ደኡ፤ ባረ ደኦ ላይꬃ ኡባን እ እዞ የዳናዉ በሰና።

20 “አ ሞቱ ቱማ ግዲደ፥ ናትን ዎዶሮተꬃይ ꬋዮፐ፥ 21 ናቶ እዝ አዉዋ ካረ አሂደ፥ ሄ ካታማ አቱማ አሳይ እዞ ሹቻን ጫዲደ ዎꬎ። አያዉ ጎፐ፥ አ ባረ አዉዋ ሶን ደኣደ ሻርሙጻ ግዳደ፥ እስራኤልያ ግዶን ሀ ፖኮባ ኦꬃዱ፤ ሄዋዳን ኦꬂደ ህንተ ግዶፐ ኢታ ድግተ።

22 “አይ አሳይነ ሀራ አሳ ማጫ አሳና ሻርሙጺደ ኦይቀቶፐ፥ እካ አናና ሻርሙጼዳ ማጫ ምሽራታካ ሀይቂኖ። ሄዋዳን ኦꬂደ፥ ህንተ ግዶፐ ኢታ ድግተ።

23 “አይ አሳይነ ሀራዉ ጊጌዳ ዎዶራቶ ካታማ ግዶን ደሚደ እዝና ሻርሙጾፐ፥ 24 ኡንቱንታ ላኡዋካ ካታማፐ ጋጻ ከሲደ፥ ሹቻን ጫዲደ ዎꬍተ። አያዉ ጎፐ፥ ናታ ካታማን ደኣደ፥ አሳይ አሻናዳን ዋሳበይኩ። እ ሀይቂያዌ ቃይ ሀራ አሳዉ ጊጋ ኡቴዳ ዎዶራቶ ባይዜዳ ግሻሳ። ሄዋዳን ኦꬅያዋን ህንተ ግዶፐ ኢታ ድግተ።

25 “እት አሳይ አሳዉ ጊጌዳ ዎዶራቶ አሳይ ባይና ሳኣን ዎልቃን ኦይቂደ፥ እዝና ግሶፐ፥ አ ጻላላይ ሀይቆ። 26 ናቶ አይነ ኦꬆፕተ፤ እዞ ዎꬋናዉ በስያ ናጋራ ኦꬃበይኩ። ሀዌ እት አሳይ ጮ ባረ ሾሩዋ ቦላ ደንዲደ፥ ዎꬍያ አሳ ፕርዳ ማላ ፕርዳ። 27 አያዉ ጎፐ፥ እ እዞ አሳይ ባይና ሳኣን ደሚደ ኦይቂና፥ ሄ ዎዶሮ ናታ ዋሳዱ፤ ሽን እዞ አሽያ አሳይ ደእቤና።

28 “አይ አሳይነ አሳዉ ጊጋቤና ዎዶራቶ ኦይቂደ፥ እ ህግያ አክ ድጊደ ኦይቀቶፐ፥ ከሳ 22:16-17 29 ናት አዎ እሻታሙ ጻጋራ ብራ ጭጎ። ያቲደ ናቶ ባረዉ ማቼ ኦꬆ። ባረ ደኦ ላይꬃ ኡባን እዞ የዶፖ።

30 “አይ አሳይነ ባረ አዉዋ ማቻቶ አኪደ፥ ባረ አዉዋ ካዉሾፖ። ዎጋ 18:8፤ 20:11፤ ዛረ. 27:20