1 “ህንተ ላታናዳን መꬍና ጎዳይ ህንተ ጾሳይ ህንተንቶ እምያ ጋድያን፥ ኦን ዎꬌደንቶ ኤረና አሃይ ኩንዲደ ቤቶፐ፥ 2 ህንተ ዳናቱነ ህንተ ጭማቱ ቢደ፥ ሄዋ ዩሹዋን ደእያ ካታማቱዋፐነ ሄ አሃፐ ግዱዋን ደእያ ሃኮተꬃ ልክኖ። 3 ሄዋፐ ጉይያን፥ አሃይ ኩንዴዳሳ ማታትያ ካታማ ጭማቱ፥ ኦሶ ጋካቤና፥ እ ሞርግያን ቃምባራይ ዎꬍቤና ኡሳቶ አክኖ። 4 ጎግያ ሃꬃይ ደእያ ጎሸትቤና ሳነ ዘረትቤና ዛንጋራ አፊደ፥ ሄ ኡሳት ሞርጊያ ምርቂደ መንꬅኖ። 5 ያቶፐ ሌዊያ ናናይ፥ ቄሳቱ ሄ ሳኣ እትፐ ቢኖ፤ አያዉ ጎፐ፥ ሀዋ ማላ ኢታ ሀይቁዋነ ሞቱዋ ሻኪደ ፕርዳናዉ፥ መꬍና ጎዳይ ህንተ ጾሳይ ባረ ስንꬃን ኦꬃናዉ፥ መꬍና ጎዳ ሱንꬃንካ አንጃናዉ ኡንቱንታ ዶሬዳ። 6 ሄዋፐ ጉይያን፥ ሄ አሃይ ኩንዴዳሳ ማታትያ ካታማ ጭማቱ ኡባይ፥ ዛንጋራን ሞርጊያ ምርቂደ ዎꬌዳ ኡሳት ቦላ ባረንቱ ኩሽያ ሜጨቲደ፥ ሀዋዳን ያግኖ፦ 7 ‘ኑ ኩሺ ሀ ሱꬃ ጉስቤና፤ ኑ አይፊካ ሀዋ ኦꬄዳዋ በእቤና። 8 አቤት መꬍና ጎዳዉ፥ ኔን ዎዜዳ ነ አሳ፥ እስራኤልያ ማራ፤ ሀ ጌሻ ሱꬃ ነ አሳ ቦላ ናቁዋ ኦꬃደ ፓይዶፓ ያግኖ’። ሄ ሱꬃ ድራዉ፥ ኡንቱንቶ አቶ ጌተታና። 9 ህንተ መꬍና ጎዳ አይፍያ ስንꬃን ሄዋዳን ኦꬂደ፥ ጌሻ ሱꬃይ ጉኬዳ ናጋራ ህንተ ግዶፐ ድግተ።

10 “ህንተ ሞርክያና ህንተ ኦለታናዉ ከስና፥ መꬍና ጎዳይ፥ ህንተ ጾሳይ፥ ኡንቱንታ ህንተ ኩሽያን አꬅ እምና፥ ኡንቱንታ ኦሞድያ ዎደ፥ 11 ኦሞደቴዳ አሳ ግዶን እት ማላንቻ ምሽራቶ በኣደ፥ እዞ አሞታደ፥ ማቼ ኡዳናዉ ኮዮፐ፥ 12 ነ ጎለ አያ፤ እ ሁጲያ ሜዳ፤ እ ጹጉንꬃካ ጭጋ። 13 ኦሞደትያ ዎደ ደእያ ማዩዋ ቃራ ድጋደ፥ ነ ሶን ኡታደ፥ ባረ አዎነ ባረ ዳይዉ እት አግና ኩመንꬃ ካዮቱ። ሄዋፐ ጉይያን፥ እዞ አካ። 14 ያታ ስምና፥ እዝና ደእያዌ ኔና ናሸቼናን ꬋዮፐ፥ አ ባረ ኮዮሳ ባናዳን የዳ አጋ። ኔን እዞ ማቼ ኦꬃደ እትፐ አቄዳ ድራዉ፥ እዞ ሻሉዋን ዛልአናዉ ዎይ ካዉሻናዉ በሰና።

15 “እት አሳዉ እ ዶስያነ እጽያ ላኡ ማጫ አሳቱ ደኦፐ፥ ቃይ ሀ ላአቱካ አዉ አቱማ ናናቱዋ የሌዳዋንታ ግድሽን፥ ባይራ የለቴዳዌ ሀ እጽያ ማጫ ምሽራትፐ የለቴዳዋ ግዶፐ፥ 16 ባረ ናናዉ ባረ አቁዋ እ ላትስያ ዎደ፥ እ እጽያንፐ የለቴዳ ባይራይ ደእሽን፥ እ ዶስያንፐ የለቴዳ ቴፋ ባይራያናዉ በሰና። 17 ሀራ ናናዉ እምያዋፐ ላኡ ኩሽያ አꬂ እምያዋን ሀ እጽያን ናአይ ባይራ ግድያዋ ኤርሳናዉ በሰ። አያዉ ጎፐ፥ ሄ ናአይ አዉ ኩሽያ ገድያ ጳልቄዳ ባይራ ግድያ ድራዉ፥ ባይራቱዋ እ አካናዉ በሰ።

18 “አዎነ አትዉ አዛዘተናን እጼዳ፥ ኡንቱንቱ ሴርናካ ስመና ሞርግያ ዞዳነ ማካላንቻ ግዲደ ስመና ናእ ደኦፐ፥ 19 አዉነ አታ ሄ ካታማ ፐንግያን ደእያ ጭማቱዋኮ አ ኦይቂ አክ አህኖ። 20 ጭማቶ ሀዋዳን ያግኖ፤ ‘ሀዌ ኑ ናአይ ሞርግያ ዞዳነ ማካላንቻ፤ እ ኑዉ ሙለካ አዛዘተና፤ ሚሻ ላል ካእያዋነ ኡሻንቻ’ ያጊደ ኦድኖ። 21 ሄዋፐ ጉይያን፥ ሄ ካታማን ደእያ አቱማ አሳይ ኡባይ እ ሀይቃና ጋካናዉ፥ ሹቻን ጫዲደ አ ዎꬍኖ። ሄዋዳን ኦꬅያዋን ህንተ ግዶፐ ኢታ ꬋይስተ። ያቶፐ እስራኤልያ ኡባይ ሄዋ ስሲደ ያያና።

22 “እት አሳይ ሀይቁዋ ፕርድስያ ዳባ ኦꬅና፥ ህንተ አ ምꬃን ካቂ ዎꬎፐ፥ 23 ሄ ካቀቴዳ ምꬃን አ አሃይ አቆፖ፤ አ ሄ ጋላስ ሞግተ። አያዉ ጎፐ፥ ምꬃ ቦላን ካቀት ሀይቂያ ኦንነ ጾሳን ሸቀቴዳዋ። መꬍና ጎዳይ ህንተ ጾሳይ ህንተንቶ ላታ ኦꬂደ እምያ ህንተ ቢታ ህንተ ቱንሶፕተ። ጋላ. 3:13